Toatasi le Paionia Malosi, Toatele Augatupulaga ua Faamanuiaina

Talu mai aso o le popofou o le Ekalesia, na sauaina ma ulagia ona tagata ona o o latou talitonuga. O se tasi o tamaitai talavou na feagai ma se sauaga o Sara Elvira Eriksen. Sa fanau o ia i Drammen, Nouei, i le 1895. Ina ua uma ona maua sana molimau, sa tuuto o ia i le talalelei—o se tautinoga e taua tele ona taunuuga nai lo se isi lava mea na ia mafaufauina i lona olaga atoa. Ona o lona lototoa ma le faatuatua, ua maua ai nei e tagata na tupuga mai ia te ia ia faamanuiaga o le talalelei i o latou olaga.

E pei o Sara, tatou te ono aafia ma ni faigata i o tatou olaga lea e manaomia ai i tatou e tu i se tulaga mo a tatou molimau ia Iesu Keriso ma Lana Ekalesia toefuataiina. O la tatou filifiliga e tu mausali i o tatou talitonuga e mafai ona uunaia ai olaga o isi, e pei foi ona faia e Sara. O lana tala lenei.

Ina ua 15 o’u tausaga, sa alu se ma savaliga ma lo’u tamā i se tasi o afiafi i le Aso Sa. Na faafuasei lava ona tu lo’u tamā ma fautua mai e ma te o i le Lotu Mamona. Sa ou te’i, ae ona o lo’u fiailoa na ma o ai ma ia. Sa usuina e le aufaipese se viiga matagofie. Ou te le’i faalogoina muamua lava se mea ua ese le faagaeetia.

Ina ua uma le pese, sa tu i luga se faifeautalai ma tuuina mai se lauga e uiga i le Aigaatua. Na talanoa mai o ia ia i maua ma lo’u tamā i se taimi mulimuli ane mo ni nai minute.

Ana le mavae se tausaga mulimuli ane, ina ua ou alu e aoao le Igilisi mai faifeautalai, ou te le toe alu i le lotu. A maea vasega Igilisi taitasi, ona matou se’e atu lea i talanoaga faalelotu. Sa aoao au e faifeautalai e uiga i le talalelei ma le auala e tatalo ai i le Atua le Tama i le suafa o Iesu Keriso. Sa la ta’uina mai ia te au le Toefuataiga o le talalelei e ala mai i le Perofeta o Iosefa Samita, o le oo mai o le Tusi a Mamona, ma le tele o isi mataupu faavae o le talalelei.

Sa matuai fou nei mea uma ia te a’u, peitai na i ai se leo masani. Sa ou suesue ma le faaeteete i tusitusiga paia ma tatalo ma le faamaoni mo le malamalama, lea na tuuina mai ia te a’u.

Sa matauina e lo’u tamā se suiga ia te a’u. Peitai ina ua ia iloaina ua amata ona ou faananau atu i le Ekalesia, sa amata ona ita ma faasa a’u ona ou toe alu i le lotu. Sa ou alu lava. Sa tele lava ina ia auina mai lo’u tuagane e avatu a’u i le fale i le ogatotonu o sauniga Lotu.

Ina ua atoa lo’u 17, sa fesili mai lo’u tamā po o le a se mea ou te manao i ai mo lo’u aso fanau. Sa ou tauina atu ia te ia ou te manao i lana faatagaga ou te papatiso ai. Sa ia tu’iina luga o le laulau ma ee mai, “Leai!”

O le taimi lea na auai ai o’u matua i se isi lotu. Na auina mai e lo’u tamā le faifeau o le lotu ma isi e talanoa mai ia te a’u, ae na mausali la’u molimau i le talalelei. Sa ta’u mai e lo’u tamā o a’u o se tagata ua faamaasiasia le aiga, ma sa tuli faamalosi a’u mai le aiga. Sa ou nofo i se aiga o se uso o le Aualofa pe tusa ma se vaiaso. I lena taimi ua faamaluluina le loto o lo’u tamā, ma na ia faatagaina a’u e toe foi mai i le aiga.

I totonu o ni nai masina na iloa ai e lo’u tamā ua leai se mea e mafai ona toe aveeseina ai la’u molimau i le talalelei, o lea na ia tuuina mai ai lana faatagaga ou te papatiso. Sa matuai maoae lo’u olioli ma le fiafia lea na matua loloto ai se aafiaga na faia i lo’u tamā. Na oo lava ina manao ma te o i Oslo e auai i lo’u papatisoga.

O le taimi atoa lava lea, e le’i tele ni upu na fai mai ai lo’u tina, ae na mafai ona ou iloaina sa talitonu o ia e moni le talalelei. Sa ma faaaluina le tele o itula ma te talanoa ai e uiga i le talalelei.

Ae peitai, e le’i gata le tauiviga i le aiga. Sa le’i faalogo lo’u tamā ia te a’u. Sa ou tuuina ni tamaitusi i luga o lana laulau, aua e masani lava ona ia faitau i le leva o le po. Sa ou valaaulia i le tele o taimi ia faifeautalai i lo matou fale, ma sa la talanoa i lo’u tamā, ae leai ma se mea na aoga.

I se tasi aso na fesili mai ai lo’u tamā ia te au, “E te tatalo ea?” Sa ou fai atu ia te ia ou te tatalo i aso uma ina ia tatala ona mata i le moni o le talalelei. Na ia tali mai e sau uma lava na mea mai le tiapolo ona ia fai mai lea, “Ta tatalo faatasi la.”

Sa ou fai atu, “Ia ua lelei, tatalo oe i lou Atua, ae o le a ou tatalo i lo’u Atua, ma o le a ta vaai po o ai e tali muamua mai.” Ma na ma faia faapea.

E le’i leva ae amata ona ou matauina ua ia faitauina ia tamaitusi ma le Tusi a Mamona. Sa ma o i le lotu i le tele o taimi ae le’i mafai lava ona talanoa mai pe faailoa mai ia te au ni suiga i lona talitonuga. Ae ui i lea, e seasea i ai se aso ma te le’i talanoa ai i ni mataupu faavae eseese o le talalelei.

I se tasi o aso, ina ua mavae le tolu tausaga o lenei tulaga, na ia fai mai ia te a’u e alu i Oslo ma e manao ma te o faatasi. Ina ua ma taunuu atu i le fale faatali pasese, sa i ai iina se tasi o faifeautalai a le matou uarota. Sa ou fesili ia te ia po o fea e alu i ai.

Sa fai mai le faifeautalai, “E te le iloa? Ou te alu e papatiso lou tamā.”

Sa ou tagi ma ata! E tasi le masina mulimuli ane ae papatiso foi lo’u tina ma lo’u tuagane laitiiti. Sa auai foi lo’u uso ma lona toalua i le Ekalesia i se taimi e lei mamao, faapea foi ma o’u tuagane e toatolu.

Ata mai le faaaloaloga a Janet Bylund