O Le Faataoto i le Laau o le Fa’i

Saunia e Anton T. Kumarasamy

E pei ona faamatalaina atu ia Linda J. Later

O le fa’i o laau taatele ia i le mea o loo ou nofo ai i Sri Lanka. E vaivai o latou ponati, lea e faigofie ai ona tipi i se naifi, ae e leai se tagata e faaleagaina le laau o le fa’i aua e fua mai i ni fua mananaia.

O le tele o tausaga ua mavae ao o’u laitiiti, sa i ai se afa matautia. Ina ua uma, sa ou alu i fafo ma iloa ai se tasi o o matou fa’i ua pau i lalo; sa mafuli ma ua leai ma ni lau. Sa ou mafaufau o se mea malie le tipiina o le ponati laau, o lea sa ou alu ai i le fale ma aumai se naifi. Ae i le taimi lava o le a sasau ai la’u ta, ae taofi loa a’u e lo’u tamamatua.

“E le tatau ona e faaleagaina le fa’i,” o lana tala lea.

“Ae aisea?”o lau fesili lea. “E le toe aoga, ma o le a mālie.”

E le’i i ai se tala a lo’u tamamatua ae na geno mai ia te a’u e mulimuli atu ia te ia. Fai mai ou te tipiina se ogalaau tele. Ona ia toe aumaia lea o a’u i le lotoa lea o loo taatia ai le fa’i. E ui na foliga e le toe aoga, ae na ma galulue e toe faatu i luga. Ina ua sa’o le ponati laau, ona ma te’eina lea o le fa’i i le ogalaau.

“Anetone,” o le fai mai lea o lo’u tamamatua, “Ou te manao e te vaaia le fa’i lea i aso uma ma ia mautinoa o loo tu sa’o pea. E manaomia lou fuiina i vai i aso uma e fafaga ai.”

O lea o taeao uma lava ou te siakia ai le fa’i ina ia mautinoa o loo sa’o le ponati. O aso uma lava ou te faatumuina ai se pakete vai ma sasaa ai ma le faaeteete i autafa o aa. Sa ou filiga i le tuuina atu o le tausiga na manaomia e le laau.

E le’i leva ae fua mai, i se taimi puupuu lava, ni fa’i. Ina ua pula le aufai, sa tufatufa atu e Tamamatua se fa’i i tagata taitasi o le aiga. Sa ou matamata ma le fiafia ao latou fofoeina ma ‘ai ia fa’i. E le’i i ai ma se fa’i na sili atu ona lelei lona tofo nai lo na fa’i, ma sa aumaia ia te a’u le fiafia i le vaai atu i lo’u aiga o fiafia i ai.

Ua tele lena o ni tausaga ua mavae, ae ou te le’i mauaina Le Ekalesia a Iesu Keriso o le Au Paia o Aso e Gata Ai. Peitai o lesona na ou aoaoina ao ou tausia le laau o le fa’i e faatatau lea i lo’u olaga i le taimi nei. I lo’u valaauga i le Ekalesia faapea foi i la’u matata faafomai, e masani lava ona ou maua ni tagata e i ai ni faafitauli faigata. Faapei o le fa’i, ua tuulafoaia nei tagata, aveesea lo latou matagofie, ma ua leai—e oo lava i la latou vaai. Pe a ou mafaufau e tuulafoai i latou, ona ou manatuaina lea o le suamalie o le fua o le fa’i ma maua ai le lototele e fesoasoani e faatutu i latou i luga, taofi i latou, fafaga i latou, ma tausi i latou i aso uma e pei ona faia e le Faaola.

O fa’i na fiafia i ai lo’u aiga na suamalie, ae o loo ta’u mai e le Tusi a Mamona se isi ituaiga fua —o se tasi e “suamalie tele” ma e “sili i mea uma sa ou muai tofotofo ai” (tagai i le 1 Nifae 8:11–12). E mafai ona tatou maua le olioli a o tatou fesoasoani atu i e o loo tauivi ina ia maua lo latou ala i le puao o le pogisa ma taitai i latou ina ia aai i le fua ua sili ona suamalie nai fua uma—o le fua o le ola e faavavau.

O fa’i na faaleagaina e le afa lea na foliga mai ua pepē. Peitai o sina alofa, tausiga, ma le fafagaina i aso uma, na le gata ina toe ola ae ai, ae na fua mai foi.