Lua Paionia mai Seneturi e Lua
O se tamaitiiti Sikotilani. O se teineitiiti Taiuani. E tasi ma le afa seneturi e va ai ae na tuufaatasia e ala i le faatuatua.
Lau Pele Ebenezer, e te le iloaina a’u; ta te le’i feiloai lava.
O le aso 17 o Novema, 1830, sa e fanau ai i Dunblane, Perthshire, Sikotilani, ia Andrew Bryce ma Janet Adams Bryce. Sa la faaigoaina oe ia Ebenezer.
E selau fasefulutolu tausaga mulimuli ane, ae ou fanau i Hualien, Taiuani. Sa faaigoaina a’u ia Ji-Jen Hung.
Na amata ona e faigaluega i lotoa o vaa i le 10 o ou tausaga. Sa avea mulimuli ane oe ma se tagata aoga i lea matata ma sa e matuai atamai lava i lau matata.
I le fa o o’u tausaga na amata ai ona ou taulotoina ia faatele ma le gagana faifaatusa a Saina. Sa le’i faigofie, ae na ou mafaia.
I le tautotogo o le 1848, sa amata ai ona e fiafia i Le Ekalesia a Iesu Keriso o le Au Paia o Aso e Gata Ai, e ui e le’i tutusa lou naunautai ma lou tamā, aiga, ma uo. Sa latou faia mea uma na mafai e faatosina ai oe ina ia e faitioina le Ekalesia. Na oo lava ina loka e lou tamā ou lavalava e taofia ai oe mai le auai atu i sauniga i Aso Sa. Peitai na mausali lou faatuatua. E ui i sauaga ae na e tauivi pea.
O le aso 4 o Tesema, 1986, na tuitui mai ai i le faitotoa o le fale o lo’u tamā ni faifeautalai Amerika se toalua mai Le Ekalesia a Iesu Keriso o le Au Paia o Aso e Gata Ai. E ui lava na faatagaina e Tama ia faifeautalai e asiasi soo mai, ae sa le’i fiafia o ia i le savali. O ni nai masina mulimuli ane na tetea ai i laua ma le Tina ae toe faaipoipo.
Ina ua ta’u atu e Tama i faifeautalai le tala faanoanoa i le malepe o lo matou aiga, sa ia fai atu foi i ai, e aua nei toe o mai.
Sa tuuina e faifeautalai se kopi o le Tusi a Mamona ma tusia i totonu o le faavaa le tuatusi o le lotu e sili ona lata ane ma faapea mai, “E avea pea i maua ma a outou uo. Afai e i ai se mea e mafai ona ma faia mo lou aiga, susū mai i le tuatusi lenei, ma o le a e mauaina i maua iina.”
Sa faigata ona faatofa atu i faifeautalai i lena afiafi, aua sa ou lagonaina se mea taua i le la savali.
Sa sau le toalua fou o lo’u tamā [i lo matou aiga]. Na amata ona vaaia uiga le lelei o i laua ma Tama, ua amata ona faigata le olaga, ma sa avea a’u ma se talavou faafiufiu.
I se tasi o po, ina ua ou le mafaia ona toe tatalia o laua uiga le lelei, sa ou tamoe i fafo o le faitotoa i le fefe ma lafi i le togā araisa, ua tuulafoaia, faanoanoa, ma leai se faamoemoe. Sa ou manao ou te sola ese, ae na leai se mea ou te alu i ai.
Na faafuasei lava ona ou manatuaina le tala a faifeautalai i le la asiasiga mulimuli. “O le mea muamua lava taeao, o le a ou toe foi e saili a’u uo!” Sa ou fai ifo ai ia te au lava, ma sa ou mauaina se lagona o le filemu i totonu mo le taimi muamua lava i le tele o tausaga.
O le taeao po lava na sosoo ai, sa ou oso ai i luga o la’u uila ma agai atu i le aai i le lotu, ae peitai o faifeautalai ia na asia lo’u aiga i nai tausaga ua mavae ua toe foi i o laua aiga. Na toeitiiti lava ou toe foi, ae faafetaui loa a’u e ni tamaitai agalelei se toalua e i ai pine o o laua igoa i o laua ofu mafanafana ma faailoa mai i laua.
Le Pele Ebenezer, e ui i le tetee o lou tamā, ae na e papatiso ia Aperila 1848, na o le pau lea o le tagata o lou aiga na liliu mai.
E masina talu ona ou feiloai i faifeautalai tamaitai, ae ou papatiso loa, ia Novema 1988, o le tagata muamua o lo’u aiga ua liliu mai.
Peitai sa faafaigata e Tama ma lona toalua lo’u auai i le lotu.
I se tasi aso ina ua ou toe foi mai i le fale mai se gaoioiga a Tamaitai Talavou, sa laa mai ia Tama i le potu, palauvale mai ia te a’u, uu atu a’u tusitusiga paia, ma saesae ninii. Na salalau solo ma opeopea i le ea tamai fasi pepa, ma pauu lemu ifo i le fola, i le mea foi lea na toulu i ai o’u loimata.
Sa pei o se miti taufaafefe ua le mafai ona ou alafa’i mai ai.
Ina ua atoa lo’u 21, sa ou faailoa atu se manaoga malosi e auauna atu i se misiona. Na tali mai lo’u Tama e ala i le faatōina o a’u. O le po o le vaeluaga o le Tausaga Fou a Saina, lea e toatele tagata e o i aiga e faatasi ai ma e pele ia i latou, sa tuliese ai a’u mai lo’u aiga.
Le Pele Ebenezer, ina ua le mafai ona tatalia ia sauaga mai lou aiga ma uo, sa e fuafua loa e faimalaga atu mai Sikotilani i Amerika e auai faatasi ma le Au Paia o Aso e Gata Ai ma laasia ia laufanua valevalenoa i Iuta. Sa ita tele lou tamā. Sa ia faatonuina oe e te nofo, peitai o oe o se alii talavou naunautai. O le aso lava na e tuuvaa ese atu ai o le taimi mulimuli lava lea na e vaai ai ia te ia.
Sa le’i faigofie ia te oe, Ebenezer le olaga o se tagata malaga e 17 tausaga, ae na e mafaia. Na e faaaogaina vave ou tomai faakamuta, fau masini, ma le fauvaa. Sa valaauina oe e fausia se falelotu i Pine Valley, Iuta. E ui e te le’i fauina muamua se falelotu, ae sa le’i faatuai lou taliaina o le valaauga. O le asō, o loo faaaogaina pea lena falelotu e aupito sili ona leva o le Au Paia o Aso e Gata Ai.
Mulimuli ane na e mauaina le nofoaga mataina faalenatura lea o loo tauaveina lou igoa o, Bryce Canyon National Park.
O le aso 4 o Iuni, 1994, sa ou lipoti atu ai i le Misiona a Taiuani Taichung o se faifeautalai faamisiona. Sa ou faapipiiina se pine lanu uliuli o le igoa i lo’u ofu mafanafana, e pei lava o alii faifeautalai ia na o mai e asiasi i lo’u aiga i tausaga ua mavae. Sa faalotomaualaloina a’u. Sa faamamaluina a’u. Sa faamanuiaina a’u.
Ina ua maea la’u misiona, sa ou malaga atu i Iuta, lea na ou fetaui ai i lo’u toalua. Sa ma faaipoipo i le malumalu mo le taimi nei ma le faavavau atoa. E ala mai i le gafa o lo’u toalua, ua ou fesootai atu ai ia te oe.
Le Pele Ebenezer, e te le iloaina a’u. Ta te le’i feiloai lava. Peitai ua ou faalogo i tala e uiga ia te oe. Sa le’i malolo le feoai o ou vae. Sa le’i malolo le galulue o ou lima. Sa le’i malolo lou loto mai le talitonu. Sa le’i taofia lava oe mai le auauna atu. Ina ua mavae atu nei tausaga uma, o loo siitiaina pea a’u e au faataitaiga faamaoni. Faafetai lava, le pele Ebenezer. Faafetai lava!
O Ebenezer Bryce na fesoasoani i le fausiaina o le falelotu o Pine Valley (lalo), na faamaeaina i le 1868. Na ia mauaina foi le mauga loloto lea ua faaigoaina i lona igoa, Bryce Canyon National Park (taumatau), i Iuta i saute.
Ata o le Tusitala na pueina e Derek Israelson; Ata pue o Ebenezer Bryce o le faaaloaloga a Utah State Historical Society; Ata pue o le Bryce Canyon © Rubberball Productions