O Le Ekalesia Moni ma le Ola e Tasi
Mai se saunoaga na tuuina atu i le aso 25 o Iuni, 2010, i se semina mo peresitene fou o misiona.
O le a le uiga o le faaupuga, O Le Ekalesia a Iesu Keriso o le Au Paia o Aso e Gata Ai ua na o le pau lea o le Ekalesia moni?
O lo tatou tiutetauve muamua ma le faamoemoega o le molimau atu e uiga ia Iesu Keriso i se lalolagi o loo mafatia i le fiailoa o Lana misiona paia. O la’u tali atu i lena tiutetauave maoae, o le a ou talanoa atu ai e uiga i Le Ekalesia a Iesu Keriso o le Au Paia o Aso e Gata Ai, ua na o le pau lea o le Ekalesia moni ma le ola. I le faia o lena mea ua ou iloa o loo ou talanoa e tetee ai i galu malolosi ua taua o “faasa’oga faapolokiki”.
O manatu teuteu o lenei vaitaimi e faapea, e moni lotu uma. O le mea moni, o le manatu e faapea e tutusa lotu uma o le aoaoga lea a le aneti-Keriso, lea o loo ta’u mai i le Tusi a Mamona i le tala ia Korioa (tagai i le Alema 30). Na tuuina mai lena tala e aoao mai ai ia i tatou se lesona taua i o tatou aso.
O se faaaliga na tuu atu i le Perofeta o Iosefa Samita i le 1831, i se taimi ae le’i leva ona faatulagaina Le Ekalesia o le Au Paia o Aso e Gata Ai, o loo tautala mai e uiga ia i latou o e na tuuina atu i ai le “mana e faataatia ai le faavae o lenei ekalesia.” Ona ta’ua lea e le Alii le Ekalesia o le “ekalesia ola e tasi ma le faamaoni i luga o le fogaeleele atoa ua fiafia i ai a’u o le Alii” (MFF 1:30).
Ona o lenei folafolaga a le Alii, ua tatou ta’ua ai lenei, Lana Ekalesia—la tatou Ekalesia—o le “Ekalesia moni e tasi.” O nisi taimi tatou te faia ai lenei tulaga i se auala e tiga ai tagata o isi ekalesia po o e ua tuuto i nisi talitonuga. Peitai e le’i aoao mai le Atua ina ia tatou faia se mea tatou te lagona ai le maualuga atu i isi tagata. O le mea moni lava e tofu lotu uma ma talitonuga o loo i ai ni vaega o upumoni, o nisi e tele atu nai lo isi. E moni e alofa le Atua i Ana fanau uma. Ma e moni, o Lana fuafuaga o le talalelei e mo Ana fanau uma, ma o ia mea uma e ogatasi ma Lana lava taimi atofaina.
O le a la le uiga o le faaupuga ua na o Le Ekalesia a Iesu Keriso o le Au Paia o Aso e Gata Ai le Ekalesia moni?
E tolu itu taua—(1) atoatoaga o aoaoga faavae, (2) mana o le perisitua, ma le (3) molimau ia Iesu Keriso—o loo faamatala mai ai le mafuaaga na tautino mai ai e le Atua, ma i le avea ai ma ni Ana auauna ua tausisia ua na o le pau lenei o le Ekalesia moni ma le ola i luga o lenei fogaeleele atoa.
1. Atoatoaga o Aoaoga Faavae
Ao i ai Iesu Keriso i luga o le fogaeleele, sa Ia aoaoina atu le atoatoaga o Ana aoaoga faavae, o le fuafuaga lea na faataatia mai e lo tatou Tama Faalelagi mo le alualu i luma e faavavau o Lana fanau. Mulimuli ane, na leiloloa ai le tele o nei upumoni o le talalelei e ala i le suia i mataupu po o filosofia na matele i ai le lalolagi lea na talaiina ai le faa-Kerisiano, ma e ala i faiga sese a taitai o vaega faaupufai. Tatou te ta’ua lenei aveeseina o le atoaga o le upumoni, o le Liliuese.
O le tele lava o tapuaiga faalelotu po o manatu faafilosifia o loo i ai i le lalolagi i le aso e aofia ai, i se fua faatatau i le tele po o le itiiti, o upumoni na faaalia mai e le Atua i aso anamua, faatasi ai ma le faafefiloi o filosofia po o faiga sese a tagata. Tatou te talitonu o le toatele o taitai faalelotu ma e mulimuli i ai o ni tagata e talitonu faamaoni ma alolofa i le Atua ma malamalama ma auauna atu ia te Ia i le mea sili latou te mafaia. O loo tatou nonofo aitalafu i alii ma tamaitai o e na faatumauina pea le malamalama o le faatuatua ma le aoaoina i le tele o seneturi e tau mai i le asō. Tatou te mananao i e uma o loo sailiili i la tatou ekalesia mai isi lotu po o isi faiga ina ia taofimau i mea lelei uma ua ia i latou, ma o mai e vaai po o le a se auala e mafai ona tatou faaopoopo atu ai i lo latou malamalama i le upumoni ma lo latou fiafia a o latou mulimuli i ai.
Ona sa tele mea na leiloloa i le Liliuese, o lea na talafeagai ai i le Alii ona toefuatai mai le atoaga o Ana aoaoga faavae. Na amataina lena tulaga i le mea tatou ta’ua o le Uluai Faaaliga a Iosefa Samita.
O le atoaga o le talalelei a Iesu Keriso e amata i le faamautinoaga sa tatou nonofo faatasi o ni agaga ae tatou te le’i o mai i lenei lalolagi. E faamautinoa mai ai e i ai se faamoemoega o lenei olaga faaletino. E aoao mai ai o la tatou sini tupito o le avea lea faapei o o tatou matua faalelagi. Tatou te faataunuuina lenei mea e ala i le agavaa mo le tulaga faamamaluina faaselesitila ma sootaga e ta’ua o le faaeaga po o le ola e faavavau, lea e faatagaina ai i tatou e faaauauina o tatou sootaga faaleaiga i le faavavau atoa.
O le aoaoga faavae a Iesu Keriso, e malamalama i lona atoaga, o le fuafuaga lea e mafai ona avea ai i tatou ma fanau e tatau ona i ai fanau a le Atua. O le tulaga le pisia ma le atoatoa lenei o le a oo i ai ona o se faaauauina tumau o feagaiga, sauniga, ma faatinoga; o se faateleina o filifiliga sa’o; ma le faaauau pea o le salamo. “O le aso o lenei olaga, o le aso lea e tatau ona fai ai e tagata a latou galuega” (Alema 34:32). Ua mafai lenei mea ona o le Togiola a Iesu Keriso ma le usiusitai i tulafono ma sauniga o Lana talalelei.
O le talalelei toefuataiina a Iesu Keriso e atoatoa, lautele, alofa, ma e moni. I le mavae ai o aafiaga e tatau ai o le olaga faaletino, o le a toetutu uma atalii ma afafine o le Atua ma o atu i se malo o le mamalu e sili atu ona matagofie nai lo se mea e mafai ona iloaina e soo se tagata. Sei vagana ai ni vaega itiiti, e oo lava i tagata e sili ona amioleaga o le a iu lava ina o i se malo o le mamalu—e ui ina maualalo teisi—. O le a tupu nei mea uma ona o le alofa sili o le Atua mo Ana fanau, ma ua mafai nei mea uma ona o le Togiola ma le Toetu a Iesu Keriso, “o lē faamamaluina le Tama, ma faasaoina galuega uma a ona aao” (MFF 76:43).
2. Mana o le Perisitua
O le mea lona lua ma le tulaga e matuai taua lava i le “ekalesia moni ma le ola e tasi i luga o le fogaeleele atoa” o le pule o le perisitua.
Ua faamanino mai i le Tusi Paia le tatau ona i ai o le pule o le perisitua ma o lenei pule e tatau ona faaee atu e ala i le tuuina atu o lima o i latou o e umiaina. O le pule o le perisitua e le’i oo mai ona o se manaoga e auauna atu po o le faitauina o tusitusiga paia. Ina ua leiloa lena pule o le perisitua e ala i le liliuese, na toefuataiina mai e na tamalii toetutu o e na umiaina i le olaga nei ma o e na auina mai e faaeeina mai. Na tupu lena mea o se vaega o le Toefuataiga o le talalelei, ma o le pule o le perisitua, faatasi ai ma ki na manaomia e taitai ai lona faatinoga, o loo i ai i lenei Ekalesia ae le o se isi lava.
O se taunuuga la o lo tatou mauaina o le mana o le perisitua, ua faatagaina ai taitai ma tagata o Le Ekalesia a Iesu Keriso o le Au Paia o Aso e Gata Ai ua i ai le pule e faatino ai sauniga manaomia o le perisitua, e pei o le papatisoga, le meaalofa o le Agaga Paia, ma le taulimaina o le faamanatuga.
O ki o le perisitua, o loo umiaina e lo tatou perofeta pele o, Peresitene Thomas S. Monson, ma isi perofeta ma Peresitene uma o le Ekalesia, ua faatagaina ai o ia e maua faaaliga mo le Ekalesia atoa. O lenei Ekalesia e “ola” ona e i ai ni o tatou perofeta o e o loo faaauau pea ona tuu mai ia i tatou ia afioga a le Alii e manaomia mo o tatou taimi.
3. Molimau ia Iesu Keriso
O le mafuaaga lona tolu ua avea ai la tatou Ekalesia ma ekalesia moni e tasi, ona ua ia i tatou le upumoni faaalia e uiga i le natura o le Atua ma lo tatou sootaga ia te Ia, ma o lea ua tatou maua ai se molimau tulaga ese ia Iesu Keriso. O le mea e taua ai, o lo tatou talitonuga i le natura o le Atua o le mea lea ua ese ai i tatou mai talitonuga o le tele o tapuaiga faa-Kerisiano.
O Mataupu Faavae o le Faatuatua, o le tautinoga aloaia lea e tasi o a tatou talitonuga, e amataina faapenei: “Matou te talitonu i le Atua, le Tama Faavavau, ma Lona Alo o Iesu Keriso, ma le Agaga Paia.” E tutusa lo tatou talitonuga lenei ma isi Kerisiano e uiga i le Aigaatua, ae ia i tatou la e ese lona uiga nai lo le toatele. Tatou te talitonu o nei tagata e toatolu o le Aigaatua o ni tagata mavaevae se toatolu ma o le Atua le Tama e le o se agaga ae o se tagata ua faamamaluina o loo i ai se tino o aano ma ivi, e pei o Lona Alo toetu o Iesu Keriso. E ui e eseese i foliga, ae tasi i lo Laua faamoemoe.
O le Uluai Faaaliga a Iosefa Samita, ua faaalia ai o manatu sa i ai e uiga i le natura o le Atua ma le Aigaatua, ua le moni lea ma e le mafai ona taitai atu ai tagata e lagolagoina i latou i le faasinomaga ua finagalo i ai le Atua mo i latou (tagai i le Talafaasolopito—Iosefa Samita 2:17–19). O le liligi auauai mai o faaaliga faaneionapo ua faamanino mai ai le taua o lenei upumoni faavae ma ua aumaia ai foi ia i tatou le Tusi a Mamona. O lenei tusitusiga paia fou o se molimau lona lua lea ia Keriso. E lagolagoina ia valoaga faaletusi paia ma aoaoga o le natura ma le misiona a Keriso. Na te faalauteleina lo tatou malamalama i Lana talalelei ma Ana aoaoga i le taimi o Lana misiona i le lalolagi. E tuuina mai ai foi le tele o aoaoga lea e mafai ai ona tatou iloa le moni o nei mea.
E le o faavaeina i tatou i le poto o le lalolagi po o filosofia a tagata—e tusa lava po o a tu ma aga po o lo latou faaaloalogia. O la tatou molimau ia Iesu Keriso e faaautu i faaaliga a le Atua i Ana perofeta ma mo i tatou taitoatasi. (tagai i le 1 Korinito 2:1–5; 2 Nifae 28:26.)
O le a la le mea ua tatou faamaonia i la tatou molimau ia Iesu Keriso?
O Iesu Keriso o le Alo e Toatasi na Fanaua e le Atua, le Tama Faavavau. O Ia o le Foafoa o lenei lalolagi. E ala i Lana galuega le mafaatusalia i le olaga nei, o Ia o lo tatou faiaoga. Ona o Lona Toetu, o le a toetutu ai mai le oti i latou uma o e na ola. O Ia o le Faaola, o lana taulaga togiola na totogi ai le agasala a Atamu, ma tatalaina ai le faitotoa mo i tatou ina ia magalo a tatou agasala patino ina ia tatou mama e toe foi atu i le afioaga o le Atua, lo tatou Tama Faavavau. O le savali autu lenei a perofeta o augatupulaga uma.
Ou te tuuina atu ma le faamaoni la’u molimau ia Iesu Keriso ma le moni o Lana talalelei. O loo soifua o Ia, ma e moni Lana talalelei. O Ia o le Malamalama ma le Ola o le Lalolagi (tagai i le MFF 34:2). O Ia o le Auala i le tino ola pea ma le ola e faavavau (tagai i le Ioane 14:6). Ia te au lava ia, o le vavega o le Togiola a Iesu Keriso e faigata ona malamalama i ai. Peitai ua tuuina mai ia te au e le Agaga Paia se molimau i lona moni, ma e mafai ona ou olioli i le faaaluina o lo’u olaga atoa i le folafolaina atu.
Faamatalaga mai le Ua Auina Atu e Iesu o Lenei Toasefulu ma le Toalua, saunia e Walter Rane, faaaloaloga a le Falemataaga o Talafaasolopito a le Ekalesia
Toefuataiga o le Perisitua Mekisateko saunia e Walter Rane © IRI; O Manaoga o Lo’u Loto, saunia e Walter Rane, faaaloaloga a le Falemataaga o Talafaasolopito a le Ekalesia