Te Ai ae e Ura Inanou
Te bong are e reireinna iai ni wareware bon te bong naba are Eduardo e karekea ana kakoaua man Ana Boki Moomon ao mwaakana.
“Tibu te unimwaane e aki toki n tataekina, ‘Ngkana ti tangiria n riki bwa te aomata temanna, ti riai n reireiniira ni wareware,’” e taku Eduardo Contreras. “Tibu te unimwaane e bon koaua.”
Ibukin Eduardo, e ngae n anne, te reirei ni wareware e bon tangira te tai ae e abwaabwaki. Ngkai temanna ngai ibuakoia ataei aika niiman ake a kaikawaaki iroun tinaia ae mate buuna inanon te kaawa ae Córdoba, Argentina, e kiitana ana reirei ngke waniua a na ririki ao n nako ni mwakuri ni buoka kamaiuan ana utu.
“Ti bon rangi ni kainnano,” e uringnga. Ao ni kakoroi bukin bwaai, Eduardo e ireirei kaau, karao buriki, e kiniki buteeta, kabooi nako nutibeeba, ao ni karaoi mwakuri aika a aki teimaan ni karokoa, ngke ai te kairake n ataeinimwaane, e a reke ana mwakuri ae bwanin ana tai iai n tautaekan te kaawa.
Ngkai e waaki te ririki, Eduardo e a iein ao e a katea oin ana utu. Man te tai are angiina mairouia natina ake niiman a moanna ni kiitana mweengaia, e teimatoa n aki kona ni wareware ao n tia n rangi ni uarereke ana kona bwa e na kanga ni kona ni wareware. E bitaki anne n teuana te bong ngke e kakioia ataein ana tabo aika bati ake a kaenaenaeia uoman mitinaren te LDS imatan mweengana. E kaoia mitinare ni kariniia, ao imwaiina n te tai ae maan ngaia ao buuna, María, a karaoa te marooro.
“E matoatoa ootau ni bwaai ake a taekin ibukina bwa e uarereke aia taetae n Spain,” e uringnga Eduardo, “ma a kaotia nakoiu te beeba ae uarereke ae iai tamnein te Tia Kamaiu ao te Burabeti Iotebwa Timiti inanon te Buakonikai ae Tabu I iangoia bwa tamnei ake a kaoti nakoira ao bwaai ake a reireiniira a tikiraoi.”
N te tai ae e aki maan mitinare akekei a oneaki mwiia irouia tabeman, n ikotaki ma te tia taetae are kaain Spain. Eduardo ao María, ake e a tia ni mate natiia te aine ae uarereke tabeua te ririki n nako, a rangi n riingaki man ana tamnei te Ekaretia Utu Bon Akea Tokiia. Ngai, n ikotaki ma natiia te mwaane are te bina, Osvaldo, a waekoa ni bwabetitoaki.
Ni bwabetitoan Eduardo n 1987 e roko nanou ni kakorakora ana kakoaua man warekan ana Boki Moomon. “I kanga n reiakinna ni warekia? E titiraki buuna. María e tuangnga bwa e na tarai reeta, ni booti n ana iango, kataia ni katangi taeka, ao imwiina ni kataia ni warekia ni kabaibati. Ma te kataneiai, e kamatoa nakoina, e na bon reiakinna ni warekia.
Eduardo, ngkanne ai 45, e a atai tangin manin te reta aika bati, ma e tuai man ni kataia ni wareware man te tai are e kiitana te reirei e kaan abwi te ririki imwaaina.
I Namakina te Ai
Ma te tataro inanona, Eduardo e tekateka inano n teuana te bong n te tiamwa n te tabo ae e nunikai itinaniku iakuun mweengana. “Ikekei,” e taku, “I a kairoroai bwa N na karaoia.”
E taku Maria bwa e aki kona ni iangoia bwa terana are e riki imwiina. Ngkai e tabe ni mwakuri inanon te uma ni kuuka, e kakauongo ao e a manga aki ngkai e Eduardo e kataia ni katangi tangiin manin te reta ao taeka. “N te tai ae karina I ongo ana taetae ae waetata,” e taku. “I kakauongo ao I a ataia bwa e bon wareware—n tangiraoi. Ni kee iaan te itera n aoa ae e atia n nako, ao e bon wareware!”
Eduardo e bon rangi n rekenako n ana kakatai n te aro are e aki ataia ae e bon wareware. Ma ngkai e wareware, e uringnga, “I namakina te ai ae e ura inanou.” E maaku ao e mimii, Eduardo e wewete nakon buuna, “Mami, tera ae riki nakoiu?”
“Bon Tamnein te Uea,” María e kaeka. “Ko a wareware n akea baebaeen newem!”
Ngkai e uringa te aro anne, e taku Maria, “Bon te bwai teuana ae ti aki kona ni kakewea.”
Eduardo e reitia “Te bong are I rabakau ni wareware iai bon te bong naba are I karekea au kakoaua man Ana Boki Moomon ao mwaakana.”
Man te tai anne, Eduardo e moanna n utiuti n te aoa 4.00 n te ingabong ni wareka Ana Boki Moomon imwaain nakona ni mwakuri. Ngkanne e a manga wareka te Doctrine ao Covenants, n rimwiiaki ma te Baibara. Te boki ae bati e a kuneaki ni mweengan Contreras, ike e karokoi iai booki tabeua imwaain 1987.
Ngkai rabakauia Eduardo ao María a rikirake n te euangkerio, aiaron naba aia kakoaua. Ngke e mate natia te mwaane Osvaldo imwiin te kabuanibwai n te kawai inanon 2001, aia kakoaua—n raonaki ma aia taneiai n te maiu n tamnei ae korakora n tain te tataro ao inanon Buenos Aires Argentina Tembora, are ngaia ao Osvaldo a tia ni kabaeaki—e buokiia n aia tai n rawawata ni buan natiia.
“Tao tabeman kaaro a na kona n tia n riki ni burababa,” e taku Eduardo, “ma ti namakina te rau are e taku, ‘Natimi te mwaane e bon marurung.’ E koaua ti bon tang. Bon te nati te mwaane ae tamaroa, ao ti uringnga. Ma ti a tia ni kabaeaki n te tembora, ao ti ataia bwa e mena iaara.”
Ootan te Konabwai ni koroboki ao ni wareware
Te kakaitau nakon aia reirei membwa n ana uoote, Eduardo e a rabakau naba ni koroboki. “Imwaaina,” e taku, “I aki kona naba n tiainaa arau.”
Ma ootan te konabwai ni koroboki ao ni wareware, Eduardo e a ataa koauan ana taeka tibuna te unimwaane.
“Ti mena ikai iaon te aonaaba bwa ti aonga n rikirake teutana ni katoabong,” e taku. Man reireinakim ni wareware ao ni koroboki, e reitia, e kaotia nakoia natina ao tibuna bwa e aki kona n rangi n iremwe n reirei, ni katamaroa, ao n riki n aron are e tangiria te Atua bwa ti na riki nako iai “Ibukina bwa I a kona ni wareware, I reireinai tabeua bwaai aika boou ni katoabong,” e taku.
Ni boong aikai Tarira Contreras e a kona ni wareki bwaai nako ake e kan warekii, n ikotaki ma taian nutibeeba are e a tia ni kabonakoi ngke te ataei ae babanga ni koroboki ao ni wareware. Booki aika a tabu a teimatoa n riki bwa ana boki aika mamaten nanona, aimoarara riki, Ana Boki Moomon. E a tia ni warekia mai moana ni karokoa ae bane waniua te tai.
“Irou Ana Boki Moomon bon te mataroa,” e taku, e teimatoa ni kakaitau ibukin aron rabakauna ni koroboki ao ni wareware ao te euangkerio n tia ni bita maiuna. “Ana Boki Moomon bon te boki ae kakaawaki nakoiu. E bon kakaawaki nakoiu. I namakina te Tamnei ni katoa te tai are I kaukia ni warekia.”
Ibukin Eduardo Contreras, tamneina ieta ma buuna, María, Ana Boki Moomon bon te kawai nakon te riteratii (konabwai ni wareware ao ni koroboki). “I namakina te Tamnei ni katoa te tai are I kaukia ni warekia, e taku.
Tamnei iroun Michael R. Morris