Tera ae Reiakinna ana Boki Moomon ibukin ana Tangira te Atua

Iroun Unimwaane Russell M. Nelson

Man te Kooram n Abotoro n te Tengaun ma Uoman

Tabeua ana katooto te Uea aika rangin n tamaroa ibukin ana tangira te uea ake a koreaki n ana Boki Moomon.

Angiia Kiritian a tataneiai ma katein Iesu Kristo ake a taekinaki n te Baibara. A miimi n te tangira are E karaoia nakoia raarikin, aika aoraki, ao aika a uruaki nanoia. Naake a iangoia bwa bon Ana reirei a mwakuri korakora naba ni kataia ni katotonga ana katooto ao n ira ana mwakuri ni kaungaunga Ana Abotoro ae tangiraki: “Ti na tangiriira i bon iroura: bukina bwa te tangira bon mairoun te Atua; ao aomata ni kabane ake a tangira a bungiaki iroun te Atua, ao a ataa te Atua. … Bwa te Atua e tangira” (1 Ioane 4:7–8).

Te tua aei e kamatataaki n ana Boki Moomon. E kabwarabwara aron temanna ni bungiaki iroun te Atua ao e kanga temanna ni karekea te mwaaka bwa e na tangira n Arona ae tangira. E kaoti teniua reirei aika kakawaki are e uota mwaakan ana tangira te Atua nako nanon maiura.

Te Moan, ana Boki Moomon e reirei bwa kamwakuran te onimaki rinanon Kristo ao ni karaoa te berita ma Ngaia ni kawakin Ana tua bon te kiing ni kona ni mangabungiaki n te maiu n tamnei. Nakoia aomata n Ana Boki Moomon ake a tia ni karaoi berita aikanne, te Uea Beniamina e taekinna, “Ao ngkai, ibukin te berita ae tabu are kam a tia ni karaoia, kam na aranaki bwa natin Kristo, natina mwaane, ao natina aine; bwa taraia, n te bong aio ao e a tia ni manga bungia tamneimi; bwa kam taekinna bwa a bitaki nanomi rinanon onimakinan arana; mangaia ae kam a bungiaki irouna ao kam a riki bwa natina mwaane ao aine ngkami” (Motiaea 5:7).

Te kauoua, e reirei te Tia Kamaiu bwa te mwaaka n riki n ai Arona e roko rinanon karekean taian otenanti n te euangkerio: “Ngkai aio te tua: Rairi nanomi, ngkami tokin aonaaba, ao nako mai nakoiu ma ni bwabetitoaki n arau, bwa kam aonga ni katabuaki ngkana kam butimwaea te Tamnei ae Raoiroi, bwa kam aonga n tei n akea barekami imatau n te kabanea ni bong” (3 Nibwaai 27:20).

Te Kateniua, E kaumakiira bwa ti na ira Ana katooto: “Ngaia are aekan aomata raa ngkami?” E titiraki ma te aki nanokokoraki. Ana kaeka: “E koaua ae I tuangkami, kam na riki n ai arou” (3 Nibwaai 27:27). E koaua, E tangiriira bwa ti na riki n ai Arona.

Tabeua maibuakon ana katooto aika anainano ibukin Ana tangira a koreaki inanon ana Boki Moomon. A kona katooto aikai ni karaoaki inanon maiura ngkana ti kekeiaki mwaaka n riki n ai aron te Uea.

Bon Ana tangira ibukin Riaai ao ana utu Riaai—ao aia tangira Ibukina—are e uotiia nakon aban America, abaia ni berita, are a rikirake iai.¹

Bon ana tangira te Atua ibukira are E kauringnga inanon tienture n nako n tuangiia aia burabeti Nibwaite bwa a na kawakin aia rekooti ae tabu aia aomata. Reirei man te rekooti anne e kaineti ma aron kamaiuakira ao karietataakira. Reirei aikai a tauraoi ngkai inanon ana Boki Moomon. Te boki ae tabu aei e tei bwa te kakoaua ae iai rabwatana ibukin ana tangira te Atua ibukiia Natina ni kabane ni kabuta te aonaaba.²

Bon ana tangira Kristo ibukin Ana “tiibu ake tabeman” ae E uotia nakon te Aonaaba ae Boou.³ Ti reiakinna man ana Boki Moomon bwa urubwai n te aonaaba aei aika korakora ao boongin te roo aika teniua a riki n te Aonaaba ae Boou imwiin maten te Uea n te Aonaaba Ngkoa. Ngkanne te Uea ae karineaki ao ni manga kaokaki kukurei man tia ni manga uti e ruo mai karawa ao ni mena ibuakoia aomata n te Aonaaba ae Boou.

“Ngai te oota ao maiuin te aonaaba,” E tuangiia, “ao I a tia ni mooi n te mwangko ae mao are e a tia n anganai te Tama, ao e a tia ni mimitong te Tama irou ngke I katoka iaou buren aonaaba” (3 Nibwaai 11:11).

Ngkanne E katauraoa teuana te atatai ae moan te anainano ae a kona aomata ni karekea ma Ngaia. E kaoia bwa a na namakina ikoakin rarikina ao mwiin te neera ni Baina ao i Waena, bwa aonga n ataia bwa boni Ngaia “Atuan Ieraera, ao Atuan aonaaba ae bwanin, ao [e] a tia n tiringaki ibukin buren aonaaba” (3 Nibwaai 11:14).

E anganiia Ana reirei Iesu te kariaiakaki bwa a na bwabetito, n anga ana bwai n tituaraoi te Tamnei ae Raoiroi, ao ni kakabwaia te toa. E anganiia te mwaaka ni katea Ana Ekaretia ibuakoia, are e kairaki irouia ana reirei ake tengaun ma uoman.

E tibwai nakoia tabeua reirei ake E a tia n anganiia Ana reirei n te Aonaaba Ni Kawai. E katoki aorakiia. E katorobubua ao e tataro nakon te Tama n taian taeka aika rangin ni mwaaka ao n tabu ae aki kona n raweaki. E korakora mwakan Ana tataro ngaia naake a ongo Irouna a rootaki n te kimwareirei ae korakora. Taonakinakona n Ana tangira ibukiia ao man Aia Onimaki Irouna, Iesu ibon Irouna e tang. E taetae ni burabeti ibukin ana mwakuri te Atua inanon tienture are e kaineti nakon te berita are e taekinaki ibukin Kauaokina.⁴

Ngkanne E tuangiia bwa a na uoti natiia Nakoina.

“Ao e anai aia ataei ake a uarereke, temanna imwiin temanna, ao e kakabwaiaia, ao e tataro nakon te Tama i bukiia.

“Ao ngke e a tia ni karaoa aio e a manga tang riki;

“Ao e taetae nakoia aomata ake a uanao, ma n taku nakoia: Nooria ami ataei.

“Ao ngke a tararake bwa a na nooria a tabekarake mataia nako karawa, ao a noora karawa bwa e uki, ao a nooria anera bwa a ruo mai karawa ae aiaron ae otabwaniniaki n te ai; ao a ruo ma n otabwaninia ataei ake a uarereke, … ao anera a karaoi aia mwakuri n ibuobuoki nakoia” (3 Nibwaai 17:21–24).

Akanne bon itiakin ao mwaakan ana tangira te Atua, n aron are e kaotaki inanon ana Boki Moomon.

Ni boong aika kaitira ngaira ake ti kakabwaiaki ni karekea ana Boki Moomon, n riki bwa membwa n ana Ekaretia te Uea, ni karekea Ana euangkerio, ao ni kawakin Ana tua ti atai tabeua ana tangira te Atua aika akea tokiia. Ti ataia bwa ti na kanga ni karaoa Ana tangira bwa oin ara bwai. Ngkana ti a riki bwa Ana reirei ni koaua, ti karekea te mwaaka n tangira n aron are E karaoia. Ngkana ti kawakin Ana tua, ti na kona n riki n ai Arona. Ti karababa oin ara mronron n tangira ngkana ti nako ni kawariia aomata ni kabuta te aonaaba, utu, ao neewe.

Ma te kakaitau ae korakora ibukin ana katooto ni Maiuna ae moan te tamaroa, ti kona ni karika te kibu aei bwa te bwai ae riai n iraki: “Tataro nakon te Tama ma korakoran nanomi ni kabane, bwa kam kaonaki ma te tangira aio, are e a tia ni katoka iaoia ni kabane ake taan iriira Natina, are Iesu Kristo ni koaua; bwa kam aonga n riki bwa natin te Atua mwaane [ao aine] bwa ngkana e kaoti ao ti na riki n arona, bwa ti na nooria n arona ngkai” (Moronai 7:48).⁵

Bwaai aika a na taraaki

1. Taraa 1 Nibwaai 17:35–44; Motiaea 7:20; Aramwa 9:9–11; 3 Nibwaai 5:20–22.

2. Taraa Atuun ana moan iteraniba Ana Boki Moomon; 1 Nibwaai 13:35–41; 2 Nibwaaii 33:4; Motiaea 1:2–7; Moomon 8:13–41.

3. Taraa Ioane 10:16; 3 Nibwaai 15:11–24.

4. Taraa 3 Nibwaai 11–14; 18–20.

5. Kabotaua 1 Ioane 3:1–3.

Te Burabeti e Kakoauaa

“Ana Boki Moomon e a tia ni kaokaki man ana bwaintituaraoi ao mwaakan te Atua. E taetae bwa kanga te bwanaa man te tano ni kakoaua ibukin Natin te Atua. E taetae ibukin Bungiakina, Ana mwakuri, ibukin Taurakina ao Mangautina, ao ibukin Kaotina nakoia aika a etieti n te Aba ni Mari iaon America.

“Bon te bwai ae kona n riingaki ae kona n tautauaki, ae kona ni warekaki, ae kona ni kataaki. E uoti inanon n nena te berita are e moan roko ma iai ae mimitong. Mirion ngkai ake a tia ni kakaea koauana ao a kunea bwa boni rekooti aika koaua ao n tabu.”

Beretitenti Gordon B. Hinckley (1910–2008), “The Great Things Which God Has Revealed,” Liahona, Meei 2005, 81–82.

Kan Ataakina Bon Ataakin te Tangira

Ngai bon te membwa ae boou n Ana Ekaretia Iesu Kristo Ibukiia Aika Itiaki Ni Boong Aika Kaitira, ao irou ana Boki Moomon tiaki bon ti te boki. Bon te bwai ni kakoaua ae matoatoa bwa Tamara are i Karawa e tangiriira. Bon kakoauaan ae aomata Aika Itiaki ake rimoa a tangiriira ao a tangiriira bwa ti na okira mweengara. Bon kakoauaan ae ana babaire ni kakukurei te Atua bon iai ao e kororaoi.

Ngkana ko ataia bwa e boni koaua te boki aei ko ataia bwa Tamara are i Karawa ao Natina a maiu. Bon ataakina bwa te maiu e tikiraoi ao akea tokina. Bon ataakina bwa ngkana ko teimatoa ni kakaraoa am kabanea n tamaroa ao n raira nanom ngkana ko bwaka, ao ko na teimatoa ni kabwaraaki am bure. Bon ataakin nanon raoi te utu. Bon ataakina bwa ko na aki kona ni kabua raom ae ko tangiria, bwa teuanne ke neienne e tataninga ibukim. Bon ataakin ana kakabwaia Tamara are i Karawa. Bon ataakin karekean te rau man angibuaka aika ko na kaitara ma ngaai, ko kona ni kaitarai, ngkai bon ibukin kabwaiam. Bon ataakina ae te Tamnei ae Raoiroi bon raoraom n taainako. Ni bon koauana raoi, bon ataakin te taeka ae te tangira n nanona ni kabane.

Emma Adesanya, Ireland

Kinaakin Mwaakan Ana Tangira

Ngke I kaina te Ekaretia n au moan ririki n te reirei ae rietaata, I namakina te raoiroi n aron taian bitaki ake I a tia ni karaoi nakon katein maiu ao n noora ae tamaroa riki ae a tia ni karaoia te euangkerio nakon maiu. E ngae n anne, n te tai ae waekoa ao I namakinna bwa kanoan taai aika nako ngaia ae totokoi rikirakeu aika I kona ni karaoi. E na kanga Tamara are i Karawa ni kabonganaai ni buoka katean Aba n ueana ngkana I a tia ni karaoi rinerine aika aki raraoi?

N te bong teuana ao I kauka ana Boki Moomon nakon te kabanea ni iteraniba. I wareki ana taeka ni karaure Moronai “Eng, nakomai nakon Kristo, ma ni kakororaoaki irouna, … ao ngkana kam kakeai bwaai ni kabane aika tiaki n aron te Atua, man tangira te Atua ma korakorami, ami iango ao marurungimi, ao ngkanne e na tau ana akoi ibukimi, ao man ana akoi ao kam kona ni kororaoi iroun Kristo; ao ngkana man ana akoi te Atua kam a kakororaoaki inanon Kristo, kam bon aki kona ni kakeaa mwaakan te Atua” (Moronai 10:32). I moanna man taeka aikanne. I namakina te Tamnei n tuangai bwa a boni bane ni koaua. I a ataia ae I a tia ni kataua mwaakan te Atua n au iango ngke I taku bwa e aki kona ni kabonganaai n aanga aika E noorai bwa I tau nako iai.

I iangoia bwa ma ngkai ao N nang aki manga “kakewea mwaakan te Atua” bwa N na mwaninga taekan taai aika a nako ao n ti taraa kanoan taai aika ana roko. Ngkana I rangin ni iangoa kanoan taai aika ana roko irarikin kanoan taai aika a tia n nako ao ni kakoaua ana mwakur n nanoanga Iesu Kristo, ao I rangin n namakina ana tangira au Tia Kamaiu ao te kukurei ae raka riki nakoiu.

Christy Pettey, Washington, USA

Kaotin Kristo n Iteran te Aonaaba are Imaeao, Iroun Arnold Friberg © 1995 IRI

Aramwa e Karaoa te Bwabetito inanon Ranin Moomon, iroun Arnold Friberg

Rokon Iesu Kristo i America, iroun John Scott