Ana Boki Moomon E Taetae Nakoiu
Gina Baird, Utah, USA
Ngke ara bina, Amanda, e a koro uoua ana ririki, e tuoaki ao e kuneaki bwa iai aorakina ae te kaentia n raraana. Ana keiti e bon matoatoa, ao ana kaentia e aki kerikaaki imwiin bwainaorakiana n te chemotherapy. Aingaia are e nang koreaki ao ni manga oneaki kanoanriina.
Ngke buu te mwaane ao natira uoman mwaane a tiku ni mweengaia i Utah, ngai I tiku ma Amanda n te titeite teuana man Tebetembwa ni karokoa moan iteran Tianuare. Ti aki bootaki ni bukamaru n te Kiritimati, ma n tokin te tutuo n te tararua, ti oki rikaaki nakon mweengara.
Ni moan rokora n te onaoraki ibukin ara tutuo imwiin okiran mweengara, taokita a manga kunea naba manin te riukemia (leukemia) inanon raraan Amanda. Te korokoro ibukin oneakin te rii e aki nakoraoi. N ongoraau n te rongorongo, I namakina ae aiaron ae I inako rinanon te mataroa. Ara utu a tia n rinanon te raraoma, te mwakuri, te kamaenakoaki ao taai ni kangaanga aika bati. Ngkai e nang bon bua natira te aine.
I okira mweengau n te bwakantaai anne nakoia natiu mwaane ake uoman. Ngke ti tabe n tataninga buu te mwaane n okira te mweenga man ana mwakuri, ti kaotinakoi ara kaobi n Ana Boki Moomon ao ni moana ara wareware. Ti a roko n 2 Nibwaai 9. Ngkai ti wareware, taeka aika imwiina a taetae nakoiu:
“I a taekin bwaai aikai bwa kam aonga ni kimwareirei, ao n euti atuumi n aki toki, ibukin taian kakabwaia aika e na anga te Uea ae te Atua nakoia natimi.
“Bwa I ataia ae kam a tia ni karaoa te ukeuke ae korakora, angiia mwaitimi, ni kan atai kanoan bwaai aika a na roko, mangaia ae I ataia bwa kam ataia ae e na roko te kara nakon rabwatara, ao ni mate; e ngae n anne ao ti na kona n noora te Atua n rabwatara aikai. …
“Bwa ngkai e reke te mate nakon te aomata, ao bwa e aonga ni kakoroaki bukin ana baire n nanoanga te Tia Karikibwai, e riai ni iai te mwaaka ni manga uti. …
“Ai korakorara ana raoiroi Atuara, are e a tia ni katauraoa te kawai ibukira are ti kona iai ni birinako mai nanon bain te man ae kakamaku aio; eng te man ae kakamaku anne, te mate. …
“Ao e a roko nakon te aonaaba bwa e na kamauia aomata ni bane ake a ongo ni bwanaana; bwa taraia, e a tia ni kammarakaki ibukiia aomata ni kabane, eng, ni marakiia bwaai ni kabane aika maiu, n aroia mwaane, aine, ma ataei, aika kaain ana utu Atam.
“Ao e karaoa aio bwa e aonga ni kona n reke te mangauti nakoia aomata ni kabane, bwa aonga n tei aomata ni kabane imatana n te bong ni motikitaeka ae korakora” (2 Nibwaai 9:3–4, 6, 10, 21–22).
Ngkai I wareki taekai aikai, te Tamnei ae Raoiroi e kaona te ruu. I namakina Tamau are i Karawa bwa e ataa te rongorongo are I karekea n te bong anne. I namakinna bwa taeka ake e a tia ni koroi te burabeti Iakobwa ae raka iaon 2,000 te ririki n nako ao imwaain are a koreaki nakoiu n te bong anne ao a roko bon mairoun te Tia Kamaiu. E ata te maraki ao te nanokaawaki are I namakinna imwiin ongou bwa natira te aine e na mate. Ao E mena ikekei ni karaunanoia au utu ma Ana berita are E a tia ni katauraoa te kawai ao n teuana te bong, rinanon mwaakan te Mangauti, “inanon rabwatara ti na noora te Atua.”
Amanda e maiu ni kaania teuana riki te ririki, ma I aki kona ni mwaninga te bong anne ngke taeka man Ana Boki Moomon a taetae nakoiu inanon kainnanou ao te Uea e anganai te kantaninga, te raunnano, ao ataakin Ana babaire.