I Namakina te Ai Inanou

Claudia Williams, Florida, USA

I ikawai rake n iriira te Reirei n Taabati n te umwantabu are irarikin mweengau n au tai n ataei i Michigan, USA. Iai au tia reirei ae tamaroa ae e kaona nanou n te tangira ibukin Iesu Kristo.

Ni katoa wiiki e anganiira kaati aika korotamneiaki ni kaoti ana mwakuri te Tia Kamaiu iaon te aba, n ikotaki ma koaua ao kakai ake E karaoi. Ni katoa wiiki I kanimwi kaati inanon te boki n tamnei ao ni wawareki karaki n te Baibara. Ngke I a rikirake ni kara, I reitanako au kamatebwai n te Euangkerio n te Nu Tetemanti.

Ririki imwiina, n tain te tiamwa n 1968, mitinare man Ana Ekaretia Iesu Kristo ni Boong Aika Kaitira a kawara mweengan te membwa. E aki butimwaea aia kakao unimwaane n reiakina taekan te Ekaretia ma e kanakoia nakon mweengau.

N ara moan kaitibo ma mitinare a reireinai bwa “te kekerikaki” e a tia n riki man te Ekaretia are e a tia ni kateia Iesu Kristo (taraa 2 I-Tetaronike 2:3). Tera are a reiakinna e booraoi ma au kamatebwai i bon irou, ai ngaia are ngke a tuangai ngkana a kona ni kawarai riki, I kariaia.

N tain kawarau are imwiina, I a tia ni karinani au titiraki. Aomata aika Itiaki ni Boong Aika Kaitira a bwabetito man te kateboaki? A kakoaua n ana kariaia te nakoanibonga? A kakoaua ni kamaiuan te aoraki? Aia kaeka a boutoka are I a tia ni kamatebwaia n te Nu Tetemanti. N tokin aia kakawari, a katuka te boki irou are a taku bwa e kakoaua Iesu Kristo.

I katuka te boki iaon te Terewition ao n nako ni matu. Ma n te nukanibong, I a kautaki man te namakin ae korakora are I a kinaa rimwi bwa te Tamnei are Raoiroi. I namakina te wirikiriki bwa N na moana au wareware, ai ngaia are I a wareware inanon teuana ao te itera n aoa imwaain ae I oki rikaaki ni matu. Te tai ae uarereke imwiina, I a manga kautaki riki ma te namakin ae ti te arona, ai ngaia are I a wareki riki tabeua.

Te baeten aio e reitinako ibukin uoua boong ake imwiina. I tangira bwa tera are I warekia ao ni kinaa bwa Ana Boki Moomon e kakoaua Iesu Kristo.

I baireia ni butiia te Atua ibukin ana kairiiri. Ibukin te moan tai man ngke I uarereke, I katorobubua n taromauri. I butiia Tamara are i Karawa bwa e na buokai n ataa ae N na karaoia ma te ai are I namakinna inanou. Ngke e a bane au tataro, I namakina te wirikiriki bwa N na manga wareka rongorongoia Reimwanaite n rairakiia n 3 Nibwaai 9. I warekia bwa a “bwabetitoaki ma te ai ao te Tamnei are Raoiroi, ao a aki ataia” (kibu 20).

Te mwakoro n taeka ae “a bon aki ataia” e taetae nakoiu. E roko irou te iango: “Ana Ekaretia Iesu Kristo e a bon roko iaon te aba!” I bon ingainga ni kan taetae ma mitinare ibukin bwaai ake I a tia ni wareki ao I atai ngkai. Ma ngke a kaeka nakon au titiraki ma te kakao bwa N na bwabetitoaki, I tuangiia bwa I aki kona. Buu te mwaane e na aki oota iai.

Ngkai I a reitia nako n iango ibukin te kibu anne, ma, I kinaa bwa iai inanona te kairiiri ae mataata ibukiu n anga te karea ae “te uruaki n nano ao te raraoma n tamneia.” I tataro ao ni buubutia Tamau ae Karawa bwa e na buokai, ao E bon buokai. Imwiina n reken ana tai ni marooro buu ma mitinare, e anga ana kariaia ibukiu bwa N na bwabetitoaki.

Ai kakaitaura ngai nakon Tamara are i Karawa n tangira ibukin te taneiai are ae boongana ao ni korakora are iai irou n aiaron te kairake n tina ni warekan Ana Boki Moomon. E kairai nakon ana euangkerio Iesu Kristo ae kaokaki. N tokina, ana mwakuri te Tamnei ae Raoiroi I namakin ni boong akanne inanon 1968 ngkai bon bwaintituaraoi aika teimatoa—te bwai teuana are e a tia ni kairai inanon te maan ae e raka iaon 40 te ririki ngkai ni membwa n ana Ekaretia.