Reirei ibukin Ara Bong
Ti reiakinna mairouia burabeti n taai akekei bwa ana Boki Moomon iai inanona bwaai aika “mataata mani kakaawaki” aika a mwaiti ake a kawakinaki bwa kairakira inanon ara bong (taraa 1 Nibwaai 13:40; 19:3). Koaua aikai a katauraoi kabwarabwara ao a karikirakea te oota ni bwaninin ana euangkerio Iesu Kristo ao ni buokiia ataein te reirei n ana Boki Moomon ni mwanangaia inanon kakaewenako n te maiu ma te onimaki ao te korakora. Inanon taeka aika imwiina, burabeti n taai aikai ao abotoro a kakoauai reirei aika moan te kakaawaki aikai.
Te Uea E Tabeakiniiira
“I kauringaki n ana taeka te Uea are e reke n ana boki Ita n ana Boki Moomon. E taku te Uea, ‘N na katauraoi ngkami ni kaaitarai bwaai aikai; bwa kam aki kona n rinanon te marawa ae korakora aio ma ti ngkana I katauraoi ngkami ni kaaitarai naon taari, ma te ang ake a waaki nako, ao te ieka are e na roko.’ [Ita 2:25]. Tariu ao mwaneu, E a tia ni katauraoira. Ngkana ti kakauongo nakon Ana taeka ao ni maiuakin tuua, ti na maiu n tain mwakuri aika bubuaka ao te bure—te tai are e kona ni kabotauaki ma naao ao te ang ma te ieka are e kona ni kamaunanakoia. E tabeakiniira. E tangiriira ao e na kakabwaiaira ngkai ti karaoa ae eti.”
Beretitenti Thomas S. Monson, “Taeka ni Kainiin,” Riaona, Nobembwa 2009, 109.
Iesu Bon te Kristo
“Ana Boki Moomon bon te kabanea ni mwaaka ni kakoaua ae koreaki are ti karekea bwa Iesu bon te Kristo. Tera te bwai are e taekinna Nibwaai ae aan karekean te Tamnei ae Raoiroi? Onimaki inanon te Uea Iesu Kristo. Tao warekan ana Boki Moomon ngkai ao imwina e na kakoaua te onimaki inanon te Uea Iesu Kristo? Ko bon aki kona n ataia ngkana ko wareka Nibwaai ma te karaurau. E taekina aio ‘te bwaintituaraoi … nakoia ake a teimatoa n ukoukoria.’ Teimatoa e bon kananona raoi n tainako. Ao e kananona raoi iangoana ao tataroakinana. Ao n te tataro e na kaira raoi te ingaingannano ni bubuti ni kan ata te koaua. Bwaai nako iaana e na bon aki teimatoa. Ao bwaai aika kee e na bon aki tau ibukim ao ibukiu.”
Beretitenti Henry B. Eyring, te Moan Kauntira in te Moan Beretitentii, “Going Home,” in Brigham Young University 1986–87 Devotional and Fireside Speeches (1987), 77–78.
Tataekinan te Euangkerio
Boton nako te rongorongo n te euangkerio a reke ni koroboki aika a tabu ma angiina a anganiira ae mataata raoi n ana Boki Moomon ao ni kaotioti nakon te Burabeti Iotebwa Timiti. Ikai Iesu e kamataata raoi n taekinna bwa Ana reirei, ao Ana euangkerio, are a riai ni maiuakinna natin te Atua te maiu ae akea tokina (taraa D&C 14:7).
Beretitenti Dieter F. Uchtdorf, Kauoman ni Kauntira n te Moan Beretitentii, “Have We Not Reason to Rejoice?” Riaona, Nobembwa 2007, 19.
Bwabetitoaia Ataei Aika a Uarereke
“[Tabeman a kakoaua] bwa ataei aika a uarereke a karikaki inanon te bure ao man rinnanon te mamate inanon te babakanikawai. Te reirei anne e kairua!
“‘Bwa I a tia ni karekea te koaua, bwa iai te kakauntaeka ibuakomi ibukin bwabetitoakiia ami ataei aika a uarereke’ (Moronai 8:5).
“E arana aia kauntaeka bwa te ‘kairua ae kamwaraa’ ao e koreia: …
“‘Kakauongo nakon ana taeka Kristo, ami Tia Kabooi Maiumi, ami Uea ao Atuami. Noria, I roko nakon te aonaaba tiaki bwa N na weteia aika a raoiroi ma N na weteia taan bure nakon te rairannano; naake aki aoraki aki kainnanoa te taokita, ma a kainannoia naake a aoraki; ngaia are, ataei aika a uarereke a bon aki aoraki, bwa a bon aki kona ni karaoa te bure; ngaia are e anaaki te rekenikai mairoun Atam irou, ao akea korakorana iaoia; …
“‘Ao aio aron kaotan ana taeka te Atua nakoiu iroun te Tamnei are e Raoiroi; ngaia are, natiu te mwaane ae moan te tangiraki, I ataia bwa bon te bwainingare ae matoatoa imatan te Atua, bwa ko na bwabetitoia ataei aika a uarereke’ (Moronai 8:7–9). …
“Wareki ni kabane ana reta. Bon te reirei ae koaua.”
Beretitenti Boyd K. Packer, Beretitenti n te Kooram n Abotoro ake Tengaun ma Uoman, “Little Children,” Ensign, Nobembwa 1986, 17.
Taian Kauring man Ana Boki Moomon
“Ibuakon reirei ake ti reiakin man ana Boki Moomon bon rikin ao mwiin te buaka ao iaan aana aika a riai. E karakin bwaai aika a bubuaka ao kakamaakun rengarengan aika a raba, ake a ikoikotaki ni karekea te mwaaka ao n tautaekaniia aomata. E taekina koauan Taatan ao e anga kanikina tabeua ni kawai ake e kabonganai. E reireiniia ni kabonganaan raoi te kaubwai. E tuangiira ae mataata mani kakaawaki ni koauan te euangkerio ao koauan Iesu Kristo mai karawa ao Ana angakarea n te mwakuri ni kamaiu ibukiia aomata ni kabane. E kauringiira bobotakakiia ana auti Iteraera n te kabanea ni bong. E tuangiira kakaawakin ao reirei n te mwakuri ni mitinare. E kauringiira te kamoamoa, kairiribai, kabwabwakan tain karaoan bwaai, kakamakun katei aika bure, kewekewe, ao te bure.
“Ngkai e bon nakoira bwa ti na kamatebwaia Ana Boki Moomon ao n reiakin ana koaua ao ni karaoi inanon maiura.”
Unimwaane L. Tom Perry man te Kooram n Abotoro ake Tengaun ma Uoman, “Blessings Resulting from Reading the Book of Mormon,” Riaona, Nobembwa 2005, 8.
Bwaai ni Kabane A na Manga Bane ni Kaokaki
“Koauan ao ataakin te mangauti ni kabuta te aonaaba e bon mataata kabwarabwaraakina n ana Boki Moomon. E reirei te burabeti are Amureka:
“‘Maten Kristo e na kabwara ana kabaebae te mate n rabwata, bwa ni kabane aomata a na kateirakeaki man te mate n rabwata.
“‘Te tamnei ao te rabwata a na manga ikotaki riki n aroia ae kororaoi; baai ma wae ma toman te rabwata ana manga kaokaki nakon teia ni koaua, n aron ae iroura n te tai aei; ao ti na uotaki bwa ti na tei i matan te Atua, n ataa naba ae ti ataia ngkai; …
“‘Ao ngkanne, kaokakin bwaai nako e na reke nakoira ni kabane, nakoia ake a kara ao ake a uarereke, ake a kabaeaki ao ake a inaomata, nakon te mwaane ao te aine, nakoia ake a buakaka ao ake a raoiroi; ao a na akea naba iran atuuia ae e na bua; ao bwaai ni kabane a na manga kaokaki nako aroia ae kororaoi’ (Aramwa 11:42–44).
“Aramwa e reirei naba bwa n te maungauti ‘bwaai ni kabane a na manga bane ni kaokaki nakon aroia ae kororaoi’’ (Aramwa 40:23). …
“Ai kamwengaraoira ataakin bwaai ni kabane aika a tia ni kabuakakaaki n te maiu … a na manga bane ni kaokaki nakon aroia ae kororaoi.’”
Unimwaane Dallin H. Oaks man te Kooram n Abotoro ake Tengaun ma Uoman, “Te Mangauti,” Riaona, Turai 2000, 17.
Kakamaakun Bootaki ni Karaba
“Ana Boki Moomon e reirei bwa bootaki ni karaba aika buakaka a kabaeaki ni mwakuri aika bure ake a kaotinakoi kakaewenako aika kanganga, tiaki ti nakon temanna ao utu ma ni kabanea te botannaomata. Ibuakoia bootaki ni karaba aika buakaka bon taian kaeng, koraki ake a kabonakoi turaki, ao utu ake a barongaaki ni karaoan mwakuri n iowawa. Bootaki ni karaba ni boong aikai a mwakuri ai aroia raoi ana taan ira Kateanton n tain ana Boki Moomon. … Ibuakon aia mwakuri bon te ‘tiriaomata, a karaoi mwakuri n iowawa n anaibwai, a na iraa, mani karaoi aro ni kabekaau ma aekan nako mwakuri aika a bubuaka, aika a kaitarai tuan abaia ma ana tua Atuaia’ [Ereman 6:23].
“Ngkana ti aki taratara raoi, bootaki ni karabwa aika buakaka ni boong aikai a kona ni karekea te korakora ni karekei kariirii aika a tawe ae bwanin raoi n aron are a karaoia n ana tai Ana Boki Moomon.”
Unimwane M. Russell Ballard Man te Kooram n Abotoro ake Tengaun ma Uoman, “Standing for Truth and Right,” Ensign, Nobembwa 1997, 38.
Katokan Kangaanga n te Maiu
“Inanon Ana Boki Moomon ao bon iai rongorongo ake a koreaki ikekei mai karawa ni kaota aron kaetakin katei aika bure ao aron karekean te maiu ae bwanin. E reireiniira bwa ti na kanga ni katoka te kangaanga ao kakaewenako ake ti kaaitarai ni boong aikai. … [Te Uea] e a tia ni katauraoa te kawai ni kaeta te maiu ae korakora kairuana, ma te kawai aei e aki bongana ngkana e tiku n rokanaki inanon te boki ae in.”
Unimwane Richard G. Scott Man te Kooram n Abotoro ake Tengaun ma Uoman, “True Friends That Lift,” Ensign, Nobembwa 1988, 76.
Te Kauring n Ara Berita Aika a Tabu
“Ti kauringaki man ana Boki Moomon bwa ara bwabetito bon te berita ae e tabu n ‘riki bwa taan kakoaua ibukin te Atua [ao n Abanueana] n taainako ao ni bwaai nako, n taabo nako ake kam nako iai, ni karokoa matemi, bwa kam aonga ni kabooaki iroun te Atua, ao rin ibuakoia ake a na ira te moan mangauti, bwa e aonga n reke iroumi te maiu are akea tokina’ (Motiaea 18:9; katuruturuana e ikotaki).”
Unimwaane Robert D. Hales Man te Kooram n Abotoro ake Tengaun ma Uoman, “Berita aika tabu n te Bwabetito: N Rin n te Abanuea ao Man te Abanuea,” Riaona, Tianuare 2001, 7.
Kakabwaia n Te Ongotaeka
“Inanon taabo aika mwaiti n ana Boki Moomon, aomata a anganaki te berita bwa a na rikirake kaubwaia n te aba ngkana a kawakin tua[taraa 1 Nibwaai 2:20; 2 Nibwaai 4:4]. Te berita aei n taainako e kairiiraki ma te kauring are ngkana aki kawakin ana tua te Atua, a na bon kamaunaaki mai Imatana [taraa Aramwa 36:30].”
Unimwaane Quentin L. Cook Man te Kooram n Abotoro ake Tengaun ma Uoman, “Te Kantaninga bwa Ko Ataia, Kangaangan Ara Tai,” Riaona, Nobembwa 2008, 104.