I a Kata Ana Berita Moronai

Francesco Ferraresi, Lombardy, Italy

Tabeua te ririki n nako I mena n ana auti raoraou ike I a kaitibo iai ma uoman kairake n ataeinimwaane aika a kunnikainia raoi ake a kaotia nakoiu bwa mitinare n te LDS. I iangoia bwa e bon kamiimi bwa a tia ni mwananga man te tabo ae raroa n rairiia aomata aika a kaman kakoauaa te Tia Kamaiu.

Imwiina ao I butiia bwa a na kawarai n au auti. “Ngkana kam tangiria, kam kona n roko ao n noorai ibukin ataakin ara katei,” I taku. “Ma tai iangoia bwa N na bita au aro.”

Ngke ti a kaaitibo n te bong are imwiina, mitinare a taekina Ana Boki Moomon. I taku bwa e kamiimi bwa I a tia n aki ongongo taekana ngkoa. I kaoia riki, ma imwiin aia kauoua ni kakawara buu te aine, Anna Maria, e baireia bwa a burababa ao e na kitana te auti inanon ara marooro. Mitinare a taraa n ae a kamiimi teutana nakoiu naba, ma I bon kan ataia bwa tera are a na taekinna ao n reita kaitiboora ma ngaia.

N te bong teuana ngke e roko Anna Maria n te mweenga, e ongo ara taetae iaon te mare are akea tokina. Aio are e a bon rangi ni kakaongoraa nakoina, ao ti baireia bwa ti na manga moana ara marooro riki ni bootaki. Iai rabakauna ae korakora iaon booki aika tabu ao n taainako iai ana titiraki aika bati. Mitinare a kaekai tabeua ana titiraki n te tai naba arei, ma ake tabeua a uotii nakon mweengaia ao ni karaoa aia kakaae. Ni katoa wiiki n akea kabwakaia a oki ma aia kaeka, ao ni katoa wiiki Anna Maria e a tauraoi ma titiraki aika bati.

N te tai ae e aki maan imwiin banen ara marooro, Anna Maria e a kakubanakoai man butiakiu ibukin au kariaia bwa e na bwabetitoaki. I tuangnga bwa akea irou totokoana ngkana e a bon koaua bwa e rairaki. I iira ana bwabetito n March 5, 1995, ni kukurei n te namakin ae kamiimi n tain te bootaki.

I reitanako au wareware ni karaababa ibukin te Ekaretia, ao mitinare a reitinako ni kaungaai. N tokina ao I baireia bwa N na kata ana berita Moronai (taraa Moronai 10:4–5). I tangiria n ataia bwa e koaua ae Ana Boki Moomon e roko mairoun te Atua ke e koaua ae bon tii te boki ni wareware ae tamaroa.

Te bongina inanon Tuun 1995 ngke ti ngai ni mweengau, I katorobubua irarikin waen au kainiwene ao n butiia Tamau are i Karawa, “E koaua Ana Boki Moomon, ao ngkana e koaua, ni ngai ae N na bwabetitoaki iai?” N te tai ae waekoa I namakinna inanou ao n au iango te bwanaa ae mataata ae tuangai, “Ana Boki Moomon e bon koaua.” Ngai ngkanne te namakin irou ae mataata bwa n ningai ae N na bwabetitoaki iai. Te wiiki imwiina I a manga tataro riki ao ni karekea te kaeka ae tii te arona. Nanou e a rauaki ma te kukurei. Ngkai I ataia bwa te Atua e atia n taetae nakoiu: Ana Boki Moomon e bon kairaki iroun te Atua ao Iotebwa Timiti bon te burabeti ae koaua.

N tokina, n Tebetembwa 17, 1995, I a rin n te ran ni bwabetito, teuana ao te iterana te ririki man te tai are I moana kaitiboou iai ma mitinare. E aki maan ao natira te aine, Aba Chiara, e rikirake ni kan ongora n te Ekaretia ao e bwabetitoaki naba. N Tianuare 1997 ara utu e kabaeaki n te Bern Switzerland Tembora.

Ti ataia bwa aio te Ekaretia ae koaua, e tautaekanaki iroun Iesu Kristo rinanon te burabeti ao te nakoanibonga. Ti kakaitau nakon te Uea ibukin Ana Tangira, ibukin kairakira nakoia mitinare, ao ibukin wanawanara n te euangkerio.