E na Kanga aron Kamatebwaian ana Boki Moomon

Iroun Unimwaane D. Todd Christofferson

Man te Kooram n Abotoro n te Tengaun ma Uoman

Uabwi ma nimaua te ririki n nako, Beretitenti Ezra Taft Benson (1899–1994) e iangoi “teniua bukin bwaai aika a kakawaki bwa bukin tera Aomata aika Itiaki a riai ni karaoa te kamatebwai n ana Boki Moomon bwa te mwakuri n uaa tokin maiuia.”¹ Aikai bukiia:

• Te moan, ana Boki Moomon bon kiingin ara Ekaretia—kiingin kakoauan Iesu Kristo, ibukin ara tua, ao ara koaua.

• Te kauoua, ana Boki Moomon e koreaki ibukin ara bong.

• Te kateniua, ana Boki Moomon e buokiira ni kaniira riki nakon te Atua.

Bukina aikai ibukin kamatebwaian ana Boki Moomon e baairei naba tabeua kawai ae ti na kona n iri nanoia ni kamatebwaian te boki ae tabu ae onoti aei.

Kiingin Ara Ekaretia

Ngkai ana Boki Moomon kiingin kakoauan Kristo ao bwaninin ana Euangkerio, e kakawaki inanon ara kamatebwai n anga nanora ae onoti nakon reirei aika mwaiti ao koaua ibukin te Tia Kamaiu are a koreaki inanona. Temwaangina a tia ni karaoa aei man karekean teuana ae boou, kaobiin ana Boki Moomon ae materaoi boona ao ni mwaaken ni kabane kiibu ake a kaineti nakon ke are e reiakina taekan te Tia Kamaiu, Ana mwakuri, ao Ana Mition. Aio e kaai n uota te kakoaua ae nano ibukin Iesu ngkai Natin te Atua ao te kakaitau ae itiaki man te bwai are E a tia ni karaoia ao n teimatoa ni karaoia ibukira.

E Koreaki ibukin Ara Bong

Taan korokaraki n ana Boki Moomon a koroboki ma roro aika a na roko inanoia, ai moararariki ni boong aika kaitira. Ni kakimototoan aia rekooti Nibwaai, e taku Moomon bwa e aki kona ni koroi “katebubua ni mwakoro” (taraa 3 Nibwaai 5:8; taraa naba Ana Taeka Moomon 1:5). E taetae Moronai “I taetae nakoimi n aron ae aongkoa iai ngkami, ma bon akea ngkami. Ma nooria, Iesu Kristo e a tia ni kaoti ngkami nakoiu, ao I atai ami mwakuri” (Moomon 8:35). Taani korokaraki aika uoman ao temwaangina, a mwakuri iaan te kairi mai ieta, a koroi bwaai ake a na rangin ni boongana nakoira inanon boong aika kaitira.

Mangaia are ti riai ni kamatebwai ma titiraki aikai inanora: “Bukin tera e karinaki aei? E na kanga ni mwakuri n te bong aei ao nakoiu?” E maroroakinna Beretitenti Benson, n aron te katotoo, bwa inanon ana Boki Moomon ti kunea te baeten ibukin te katauraoi ibukin Kauaokin te Tia Kamaiu. Ti reiakinna bwa a kanga ana reirei Kristo ni maiu n tain te buaka, ni kaitara ma te bwainikirinaki ao kitanan te koaua, karaoan te mwakuri ni mitinare, ao te kaeka nakon kabuanibwain bwain te aonaaba.² N aron ae karaoia Nibwaai, ngkana ti kamatebwai, ti na riai “ni kabootau” booki aika tabu nakoira—ngaia anne, kataia ni kunea bwa ti na kanga ni kammwakura te bwai are ti kunea inanon ana Boki Moomon (taraa 1 Nibwaai 19:23).

Kaanira Riki nakon te Atua

Taekinan ana taeka Beretitenti Benson teuana riki te tai: “Tiaki tii ana Boki Moomon ae reireiniira te koaua, irarikina e bon karaoa anne. Tiaki tii ana Boki Moomon ae kakoaua ibukin Kristo, irarikina e bon karaoa anne, naba. Ma e bon mwaiti riki. Iai te mwaaka inanon te boki are e na moanna n raanga nako inanom n te tai are ko moanna n taua iai ma nanom ni kamatebwaia ana Boki Moomon.”³

Ni koauana, kamatebwaian ana Boki Moomon e kaoa te Tamnei, ao te Tamnei bon aan te kaotioti. Aio e baireia bwa ngkana ti kamatebwai inanon te kantaninga, te nano ae itiaki—iangoana raoi, te tataro, ao tao ni koroi taeka ngkana ti wareware. Aio e na kaira ara kantaninga nakon karekean te oota ae raka inanon te kantaninga are ti na karekea iai rakan te oota ao te wanawana, man te bwai are ti kamatebwaia ao ibukin bwaai riki tabeua. N tabetai e bon ibuobuoki warekan Ana Boki Moomon ni kabane n te tai ae kimototo ni karekei karaki ao rongorongo ma iai. Ma e na rangin n tamaroa riki ngkana ko karekea am tai ae tau ni katoa bong ni kamatebwai booki ma tiaki ni wareki tabeua kiibu ke baana ni katoa bong.

Buoka ibukin te Kamatebwai

Ti kakabwaiaki n te bong aei ni karekean bwai ni mwakuri aika a mwaiti ake a na kona ni buoka ara kamatebwai n ana Boki Moomon. Tabeua a kabaeaki ma booki aika tabu—te Topical Guide, Bible Dictionary, ao intekiti ni booki aika a tabu n te Ingiriti ao te Kairi nakon Booki aika tabu n taian taetae ake tabeua. Ao iai irouia Aomata aika Itiaki boreti aika boou ibukin taeka ake a oti nanoia inano ao baika a kaineti ni koauan rongorongo.

Tabeua buoka ibukin te kamatebwai inanon boomwa aika a koreaki iaona e ikotaki ma te Kairi ni Kamatebwai ibukiia Membwa n te Kiraati n te Reirei n Taabati, te Kairi ni Kamatebwai ibukiia Ataein te reirei n te Tieminari, ao te Bokinreirei ibukiia Ataein te reirei n te Intitute. A boou nakon ara tai ao te ririki bon te mwaiti ae rikirake ibukin bwai ni mwakuri aika maiu n te iti, ae kabwarabwaraaki inanon te mwakoro ni bwai ae irariki n te iteraniba 31.

Bwai ni Mwakuri ibukin te Rairaki

Ana Boki Moomon bon te kaubwai ae akea kabotauana ao te bwai ni mwakuri ibukin te rairaki are e a tia ni baireia te Uea ao ni katauraoaki ibukin ara bong. I nooria bwa kanga aiaron aan au koaua ibukin Iesu Kristo, n te wewete ni burabeti ibukin Iotebwa Timiti, ao ibukin ana Ekaretia Iesu Kristo ibukiia aika Itiaki ni boong aika Kaitira n aron “manga katean riki abanuean te Uea iaon te aba.”⁴ I bon kukurei n tomaa au onimaki ma Iesu Kristo bwa ngkai am Uea ao Atuam a maiu e bon koaua (taraa D&C 17:6). E bia teimatoa am kamatebwai n ana Boki Moomon ni karababa rairakim ao ni kairiko n te kawai ae kairaki nakon te maiu are e na roko.

Bwaai aika a na taraaki

1. Ezra Taft Benson, “The Book of Mormon—Keystone of Our Religion,” Ensign, Nobembwa 1986, 5–7. Te taetae ae kakaongora aei e a manga boretiaki riki iaon te rongorongo aei ni iteraniba aika 52–58.

2. Taraa Ezra Taft Benson, Ensign, Nobembwa 1986, 6–7.

3. Ezra Taft Benson, Ensign, Nobembwa 1986, 7.

4. Kabwarabwara nakon ana Boki Moomon.

Te Burabeti E Kakoaua

“I moana warekan ana Boki Moomon imwaain ae I a bon tau n riki bwa te riikan, ao I a kaman warekia n te tai arei, ao I ataia bwa e koaua. …

“… Taraakina irou bwa membwa nako n te Ekaretia aio a na bon aki rauaki nikarokoa teuanne ke neienne e wareka ana Boki Moomon n te tai ae okioki, ao ni karaurau raoi n iangoia n te kantaninga are teuanne ke neienne a na kakoaua raoi bwa bon te rekooti ma te kairiri mairoun teuare Mwaaka iaona, ao rongorongona e bon koaua.”

Beretitenti Joseph Fielding Smith (1876–1972), in Conference Report, Okitobwa 1961, 18.

Booki aika Tabu iaon te Intanete ao Tuan te Mobile

N reitakin ma kabebetean te kakae iaon boton taeka ao baika a kaineti ni koauan rongorongo, booki aika tabu iaon te rain (sriptures.lds.org) ao iaon tuan te mobile (mobile.lds.org) e katauraoi tabeua bwaai ni kakukurei are a kona ni buokiko inanon am kamatebwai ae onoti:

Au Boki ni Kamatebwai (notebook.lds.org)

Te boki ni kamatebwai iaon te rain e anga bwai ni mwakuri aika ti te arona ae ko na bae ni kabonganai n aron katein te kamatebwai—kanikinaeana, korean mwiina, ao baika a kaineti ni koauan rongongo, n aron te katotoo—ma e anga te kariaia nakoim ni kabongana ao ni kawakin baikai iaon te iti. N reitaki ma anne, ko kona ni “mwaakena” ke ni karinanii am taeka ao ake kanoana tabeua are a tauraoi. Ibukina ngkai ko ritiitita nakon Au Boki ni Kamatebwai ma am akaunti n te LDS, manga rinanoan am boki e na teimatoa ni kabouaki e aki kakawaki bwa mwaitira baika ko kabonganai n rokom iai. Bwaai ni mwakuri aikai e kairiko ni karaoan oin am akaiwe ae onoti ibukin atunn reirei ibukin te kamatebwaia n te euangkerio ao te angareirei.

Tein Booki aika Tabu ao Taetae (scriptures.lds.org)

Koroboki aika kanakoaki rinanon te iti ao rawebwanaa ibukin booki aika tabu a tauraoi n te LDS.org ao mobile a kamanenaaki ngkai n taian taetae aika mwaiti ao a teimatoa karaoakiia inanon taetae riki tabeua.

N reitaki nakon te wareware ao te kakauongo, ko kona naba ni kaewea ao ni kabongana te bwai ni kakauongo, ePub, ao te PDF files offline. Booki aika tabu ngkai iaon te rain inanon ana tabo te Ekaretia e kabebetei tibwaakin rongorongo aika bebete ao taeka aika a onoti ma tabeman man kabonganaan te e-meeri ao bwai ni mwakuri n te rawebwanaa.

Booki aika tabu n te LDS.org a kaman tauraoi n te tai aei inanon 21 taian taetae; Kamanenaan tuan te mobile a tauraoi inanon 10 taian taetae, ni kaineti ma aron tuana.

Intekiti ni Katotoon Booki aika Tabu n te LDS (scriptures.byu.edu)

Te bwai n reirei aei, e karaoaki n te Ingiriti irouia uoman tia reirei n te Brigham Young Uniwetiri, e reitii kiibu man booki aika tabu ma maroro mairouia burabeti ao abotoro ni boong aikai. N aron te katotoo, iangoia ai aongkoa are ko kan ataia bwa antai ae e koreia 1 Nibwaai 3:7 inanon maungatabu ni kabuta. Kiriki iaon ana Boki Moomon Link ni iteran te tikuriin ae teangamaing ao minotia rikaaki nakon 1 Nibwaai 3; ikanne ko na konaa ni kunea te kaeka.

Intekiti n Atuunreirei ibukin te Maungatabu ni Kabuta (conference.lds.org)

Teuana te bwai n reirei ae e na buokiko n tomai kamatebwaian booki aika tabu ma aia taeka burabeti aika maiu, conference.lds.org e karaoi rinanin boton atuunreirei ni katoa maungatabu ni kabuta. N aron te katotoo, ngkana ko kamatebwaia te Mwakuri ni Kamaiu inanon booki aika tabu, ko konaa ni karekei nimaua maroro ake a kabwarabwara atuun te reirei n te maungatabu n Eberi 2011.

Kateimatoa te Kamatebwai ao Kateimatoa te Reirei

Te moan tai are I wareware iai n ana Boki Moomon I tuai kaaina te Moomon. Bon tiaki ngai te membwa. Bon 16 au ririki ni maiu, ao I warekia inanon te wiiki. Ngke I a kaan roko n tokin au wareware, I kaitibo ma te kibu are e kamatoa bwa ngkana bon ana Ekaretia Kristo, e na kaotia n arana (taraa 3 Nibwaai 27:8). N te tai anne a waanako raninmatau iaon tabau. I ataia bwa ana Boki Moomon e bon koaua, ao I baireia bwa N na bwabetitoaki.

Imwiin au bwabetito I a manga wareka riki te boki, ma n te tai aei I kabooa au bwai ni mwaake ao ni mwaakenii kiibu ke karaki ake anainano nakoiu. Inanon warewareu ake imwiina I karaoa te bwai ae ti te arona, ma I aki karin taeka nakon kiibu ake I mwaakenii ni mataniwiin te boki. Te tai are imwiina I karin baika a kaineti ni koauan te rongorongo nakon kiibu ake iai rekerekeia, tao man ana Boki Moomon ke ni booki tabeua ake a kariaiakaki.

Imwiina, ni moan te ririki, I kabooa kaobiin booki aika tabu ae boou, kioina ngkai teuana are I kamanena e aon ni mwaakenaki, ai moararariki imwiin kabonganakina irou inanon au tai ni mitinare ao ni katauraoi reirei aika mwaiti iai. N te tai aei au kamatebwai ao baike a mwaakenaki a bon boboto iaon atuunreirei. I kabongana te kara ae te inke ibukin atuunreirei aika onoti—n aron te katotoo, te aoranti ibukin te onimaki, te kiriin ibukin te rairannano, ao ai arona nako naba.

Man kateimatoan kamatebwaian ana Boki Moomon ni kabonganaan kawai aika a kakaokoro aikai, I reiakinaki bwa te wareware n te taina n ana Boki Moomon e bon aki tau. Ti reiakina teutana imwiin teutana ngkai ti teimatoa ni kamatebwai. I reiakinaki naba bwa e aki kakawaki bwa mwaitira ara tai n tia ni warekia, e na iai n taai nako te bwai ae ti na kona n taekinna, “Bukin tera I aki noora arei mai imwaaina? E riai ni kaman mena ikekei.”

Booki aika tabu—ai morarariki ana Boki Moomon—e reireiniira taekan Iesu Kristo ao taekan Tamara are i Karawa. Kamatebwaian booki aika tabu e a tia ni kaaniai riki Nakoiia.

Cristina Vergara Ramírez, Chile

Kamataata n te korotamnei iroun Craig Dimond