Te Rongorongo ibukin Reirei n te Kaakawari
Ngkana Tiaki Nanououa
Kamatebwaia te karaki aio ao, n ae e angaraoi, maroroakinna ma aine ake ko kawariia. Kabonganai titiraki ni buokiko ni kakorakoraia am aine ao ni karaoa te Bootaki n Aine bwa iteran maium ae kakammwakuri.
Onimaki • Utu • Buokaki
N ana Boki Moomon ti wareka rongorongoia kairake n ataeinimwaane aika rangin ninikoria, tamaroa ake a bon rang korakora aki mamakia ibukin ninikoriaia, ao te korakora naba ma te marurung. “Eng, bon mwaane aika a kokoaua man taua ma nanoia, bwa a bon tia n reireinaki bwa a na kaawakin ana tua te Atua man nakonako ma te eti i matana” (Aramwa 53:21). Kairake n ataeinimwaane aika a kakaonimaki aikai a anga aia karinerine nakon tinaia—aia banna ni katotoo ao taan tia reirei.
Tinaia ana taanga ni buaka Ereman a maeka n taai ake tiaki aekakin ara tai. Baike a rinanona a boni kanganga ao ni kamamate, ao kairake a bane ni weteaki bwa a na kamanoa inaomataia n te maiu n rabwata ao n te maiu n tamnei. N te bong aei ti maeka n te aonaaba ike ti “aki kaunrabwata ma te rara ma te iriko, ma ti kaunrabwata ma taian uea, ma ake a korakora ma taan tau taekan aonaaba aika taan taua aron te ro aei, ma taanga n tamnei aika buakaka ake iaani karawa” (I Ebeto 6:12).
Taai ni kakaewenako e kairoro nakoia kaaro aika korakora ao aia katotoo ake a reiakina te koaua bwa ana taanganibuaka Ereman ataia “Bwa ngkana aki nanououa, ao E na kamaiuia te Atua” (Aramwa 56:47). Te reirei ao kaotan katotoo iaon te koaua aei ngkai e kantaninga te taratara raoi. Ma e ngae n anne, ti riai n aki maaku. Ngkana ti ataia bwa antai ngaira ao antai te Atua ao tia tia ni karaoi berita ma Ngaia, ngaira—n aroia tinaia taanibuaka—ti na karekea te anainano ae korakora ibukin te raoiroi.
E kuri n aekakia, ana taanganibuaka Ereman aika 2,060 n tatabemaniia nako a anaaki nanoia mairouia tinaia. Ma tiina aika aki tii mwakuri n ti ngaiia. Ngaiia ma tabeman mwaane ao aine aika raoiroi, tiina aikai a tia ni kabaei aia onimaki ao aia katotoo n reiakina mwaakan berita aika tabu. Kairake n aomata n te bong aei a oota n te berita ae tabu are a tia ni karaoi aia karo bwa a na aki rin inanon te buaka. Ao e ngae ngke e taraa ni kanganga, Tamara are i Karawa ae tatangira e kauka te kawai ibukiia kaaro aikai ni kaawakin aia berita aika tabu—ao ni kamanoa inaomataia (taraa Aramwa 56:5–9). Ngaira n ae ti te arona ti riai ni karinei ara berita aika tabu bwa aonga naati ao kairake—oin natira ao naake n ara uoote, mwaanga, kaain rarikira, ao rabwatan te kaawa—a na oota ao ni boutoka kawakinan berita aika tabu.
Ngkana ti karinei ara berita aika tabu, Tamara are i Karawa e kona ni katauraoa te kawai ibukira. Ti na maiuakin ara berita aika tabu ma te eti. Ti kona, n aron te katotoo, bwaina te tataro, kamatebwai ni booki aika tabu, ni karekean te rekomente nakon te tembora, ni kabonganaan kunnikai aika tamaroa, kawakinan te Taabati. Ngkana ti karaoia, natira a na ataia ao a na kona ni kangai, “Ti aki nanououa bwa ataa aio tinara” (Aramwa 56:48).
Aine ni Boong aika Kaitira ake a nooria bwa korakoraia a roko man ana Mwakuri ni Kamaiu te Uea aki kabwarai nanoia n taai ni kanganga ao n taai ni bwarannano. Ngkai ngaira taani kaawakin berita aika tabu, ti boutoka kamatoaan, nabeakinan, ao kamanoiaia ataei ao kairake bwa n te bong teuana ti bae n taetae iaon te roro ae rikirake aei, “Bwa I bon tuai man noora te ninikoria ae moan te korakora, tiaki, bon akea ibuakoia ni kabane” (Aramwa 56:45).
Julie B. Beck, te Beretitenti ni Kabuta n Aia Bootaki Aine
Man Booki Aika A Tabu
Kamataata n te korotamnei iroun Robert Casey