Ngkana Ko Rangi ni Kan Ataia, Ko na Bon Ataia

Iroun Unimwane Walter F. González

Man te Beretitentii n te Itingaun

I namakina te kakaitau ae akea tokina ibukin ana Boki Moomon. E bita maiu n aki toki, ao I ataia bwa e kona ni bita nanom.

Ai 18 au ririki ngke I riki bwa te membwa n te Ekaretia. Ana Boki Moomon e riki bwa te bwai ni kakawaki inanon rairaku. N te tai anne, I kakaei iango aika boou are e kona ni kabwarabwara te aonaaba ae katobibiai. I uringiia au burobetia n te reirei ae rietata are a rangi ni bwainii kawai n anga reirei ni bwain te aonaaba aei. I a moanna ni iangoa aia iango taan aki kakoaua te Atua ae e maiu.

N te bong teuana ao I noora te boki ae buruu are uoman mitinare a tia ni katikua inanon mweengara tao onoua te ririki nako. Bon ana Boki Moomon. N airi ma te boki anne, a katuka te boki ae uarereke are taekan Iotebwa Timiti ao tabeua kaetieti n arom n tataro nakon te Atua.

I a waaki ni wareka ana Boki Moomon. Ai tibwa tabeua te kibu inanon te boki, n ana boki Nibwai, ngke I a namakina te bwai ae bitaki. I a tabe ni kauntaeka imarenan au namakin ao wanawanau. Ngaia are I a baireia bwa N na titirakina te Atua n te tataro.

Aio bon te moan tai inanon maiu are I a tataro ni katorobubua. Te namakin are imwiina e a riki bwa teuana te bwai ae e rangi n tabu inanon maiu. Te namakin ae kaonaki n te kukurei are e kaona nanou bwa ana Boki Moomon e raka riki nakon ae ti te boki. Bon te boki ae boboto mai karawa. Ai bon ana taeka te Atua. Imwiina I a oota bwa te namakin bon te Tamnei are e kakoaua ni bon koauana.

Ngkai tabeman a bon tia ni karekea te namakin ae aron aei, iai kawai aika a kakaokoro are e kona n ata iai ana Boki Moomon bwa e koaua.

Ko na Kanga n Ataia?

1. Tabeman ana ataia man ongoraia. Ko na bae n riki bwa temanna mai ibuakoia are e na ataia ti man ongom nakon ana reirei te boki. Ana Boki Moomon e tuangiia ngaa ake a ongo iroun natin Motiaea n reirei ana euangkerio Iesu Kristo ao “a rairaki nakon te Uea” (taraa Aramwa 23:5–6). Mitinare ni boong aikai a reirei te euangkerio are e kuneaki n ana Boki Moomon. Tabeman a na ataia bwa Ana Boki Moomon bon ana taeka te Atua ti man ongoraia irouia tabeman n tibwa reirei mai iai.

2. Tabeman a ataia man warekana. Ko bae n riki bwa temanna ibuakoia ake a ataia ti man warekan ana Boki Moomon ma nanoia ae koaua ni kan ata te koaua. Aio ai aron kainnabau. Ai 12 ana ririki ngke e warekia ma nanona ni kabane te kaetieti ni wareka te boki mai moana ni karokoa e bane. Ngke e karaoa aei, e ataia bwa e bon koaua. Te namakin e bon rang korakora n te aro are, ngke e wareware, e baireia n iriira te Tia Kamaiu n aki toki. E tiku ni koaua nakon are e namakinna.

3. Tabeman a ataia man karaoana. Ko bon bae ni mena ibuakoia naake a na ataia ti man karaoan bwaai ake e reirei iaona te boki. Tabeman aomata a karekei aia koaua man karaoana (taraa Ioane 7:17). Nibwaai, te burabeti n Ana Boki Moomon, e oota raoi n te koaua. E koreia “bwa I aonga ni kairiia nanoia bwa a na kakoaua te Uea ae aia Tia Kabooia … I kabootaui kanoan booki aika a tabu nakon maiura, bwa ti aonga n raka man reiakinaki iai” (1 Nibwaai 19:23; katuruturuana e ikotaki). Man kabootauan, ke karaoan, reirei n ana Boki Moomon inanon maium, ko kona naba ni kairaki n oina mai karawa.

4. Tabeman a na ataia man bubutian te Atua. Ko na bon bae n reke ibuakoia naake a ana ataia man warekana man ana Boki Moomon ao imwiina a butiia Tamara are i karawa n te tataro ngkana e koaua te boki. Aio are I rinanona. Aio te berita ae riinga te nano are e reitaki n ana boki teuana te burabeti, Moronai, nakoia ni kabane taan ukoukora te koaua: “Nooria, N na anai nanomai bwa ngkana kam wareki bwaai aikai …kam na butiia te Atua, te Tama ae akea Tokina, n aran Kristo ngkana arona bwa a koaua bwaai aikai, ao ngkana arona bwa kam bubuti ma te nano ae koaua ma nanomi raoi, ao te onimaki iroun Kristo, e na bon kaota te koaua nakoimi, ni mwaakan te Tamnei ae Raoiroi.” (Moronai 10:3–4). I kaota au koaua bwa ngkana kam warekia man tataroakina taekan ana Boki Moomon, n irii kairiiri iroun Moronai, ko na ataia bwa e bon koaua.

Te Atua E a Tia ni Berita Bwa Ko na Ataia

Ngkana ko rangi ni kan ataia, ko na ataia bwa ana Boki Moomon e bon koaua. Te Atua e a tia ni berita bwa e na anga te ataibwai aei nakoia taan ukoukora te koaua, ao Ngaia ae “Atuan te koaua, ao ko aki kona ni kewe” (Ita 3:12).

Ana burabeti temanna n Ana Boki Moomon, Aramwa, e reireia natina bwa te Atua e a tia ni berita bwa E “na kawakina [te boki aei] bwa iai bukina ae kakannato irouna, bwa e na kaota mwaakana nakoia rooro aika a na roko. Ao nooria, teuana bukina ae e a koro bukina, bon kaokaia ngaa ma ngaa … nakon ataakin te koaua; ao e a tia ni kaota mwaakana irouia, ao e na bon teimatoa naba ni kaota mwaakana irouia nakoia rooro aika a na roko, ngaia are e na bon kawakinaki [te boki aei]” (Aramwa 37:18–19).

Te mwaaka naba ni kakoaua anne e kuneaki ni boong aikai n te boki ae tabu aei ae e aki tataneiai te aba iai, ao te Uea e na kaotia nakon temanna are e bane nanona n ukoukoria ni kan ataia. I kona n taekina aei ni kakoaua ngkana I tanrikaaki nakon boong akekei ngke I reiakina taekan te Ekaretia. N te bong aei, ibukin te mwaaka ni kakoaua ni maakan ana Boki Moomon, I kakoaua ana Boki Moomon bwa bon ana taeka te Atua, bwa e reirei bwa Iesu bon te Kristo, te Meetia ae Tabu. Te boki bon te bwai ni kakoaua ae kona n nooraki bwa Kaokan ana Euangkerio e a tia n riki ao bwa Iotebwa Timiti bon ana burabeti te Atua.

Ngkana ngkoe temanna mai ibuakoia ake a ukoukora te koaua, te Uea e a tia ni berita bwa ko na ataia. Ko na kona n ataia man ongoraeakinan ana reirei te boki, man warekan te boki, man karaoan bwaai ake e reirei te boki, man tataroakinna ni kan ata koauana, ke man ikotakin bwaai aikai. Ma ko na bon ataia.

E Kakoaua Te Burabeti

“Ana Boki Moomon bon ana taeka te Atua. Ti kaoko bwa ko na wareka te rongorongo ae kamimii aei. Bon te mwakoro ae moan te kamiimi ni boong aikai. Warekia ma te karaurau ao te tataro mwaaka, ao ngkana ko karaoia te Atua e na anganiko te koaua ni koauana n aron are e taekinaki n te berita iroun Moronai. (taraa Moronai 10:4).”

Beretitenti Howard W. Hunter (1907–95), The Teachings of Howard W. Hunter, ed. Clyde J. Williams (1997), 54.

E Kakoaua te Burabeti

“Ngai temanna are I a tia ni karekea mairoun te Uea te kaotioti ae moan te korakora ni kaineti ma koauan [Kaokanbwaai, n ikotaki ma Ana Boki Moomon]. Te kanikina anne e tiku irou ni mwaaka inanon aoa ma aoa; ao ni bwaai ni kabane ake a riki inanon maiu, e na tiku n au ururing te ataibwai ae kororaoi e na teimataoa n tiku irou.”

Beretitenti Lorenzo Snow (1814–1901), n Ribootin te Maungatabu, Okitobwa 1900, 61.

Ana Berita Moronai

Ni kabanean ana Boki Moomon, te burabeti ae arana Moronai e berita bwa ngkana ti wareka ana Boki Moomon, iangoi raoi rongorongona inanora, ao ni butiia te Atua n te tataro ngkana e koaua, te Atua e na bon kaekaira rinanon mwaakan te Tamnei ae Raoiroi (taraa Moronai 10:3–5).

Karekean te kaotioti ae onoti e bon ti nakoim. E roko n aro aika bati n taai aika a kakaokoro nakoira n tatabemaniira nako ni kaineti ma nanon te Uea. Ataakin koaua aika imwiina aikai e kona ni buokiko n ataia ibon iroum.

1. Iangoia

Imwain kaoara n tataro, Moronai e kaoira bwa ti na iangoia raoi. Iangoia raoi nanona bwa ko na iangoia n ae nano. Titirakiniko. Tera ae I namakinna ngke I wareka ana Boki Moomon? E aera ngkai I namakinna te aro anne? Tera ae I a tia n reiakinna? E raoiroi?

Te Uea e anga ana reirei n te koaua aio nakon Oliver Cowdery: Ngkana akea am iango kawakinna bwa ko na titirakinai. Ma, nooria, I tuangko bwa ko riai ni kamatebwaia inanom, imwiina ko na titirakinai ngkana e koaua (taraa D&C 9:7–8; katuruturuana e ikotaki).

2. Tataroakinna Raoi

Kabotoan ara iango ao ni boboto iaon ana kaeka te Tamnei ae Raoiroi ae maraara e nakon ana kekeiaki te kaburoro. Tao aio mwakorona bwa bukin tera ngkai Enoti n ana Boki Moomon e taekina ana tataro bwa te “kaangaanga … ma te Atua” (Enoti 1:2).

Ngkana ko warekia, iangoia raoi, ke n tataroakinna, kakaea te tai ao te tabo ae e na karako te bwai are e na katabea ami iango. Kakaea te tabo are e na buokiko n iango raoi iai. Tataro ni kaota bwanaam bwa e kona ni buokiko ni kabotoa am iango.

3. Anga te Titiraki ae Eti

Te Uea e tuanga Oliver Cowdery n aki tii bubuti ma n titiraki ngkana te bwai are e iangoia e eti. N tabetai, riki ngkana ti rinanon karekean te kaeka mairoun Tamara are i karawa, e bon beebete n oota n te kaeka nakon te titiraki are ti eng ke tiaki.

“Te kiing nakon katamaroan te tataro bon reiakinan kanakoan te titiraki ae eti.” E reirei Unimwane Richard G. Scott man te Kooram n Abotoro ake Tengaun ma Uoman.¹

4. Tera ae Ko Kananonaa?

Teuana mai ibuakon kiingin ana berita Moronai bwa ti na bubuti ma “nanora ae koaua.” Ngke 14 ana ririki Iotebwa Timiti e nako n te buakonikai n tataro, “e tataro ma nanona raoi n aki tii kakauongo ma n ongotaeka,” e taku Beretitenti Henry B. Eyring, Moan Kauntira n te Moan Beretitentii. “… Ao ibukin ana kakaonimaki, inanon boong ao namwakaina ao ririki ake imwaina e kaekaaki ana tataro n raangan te oota ao te koaua.”²

5. Tai Katibanakoa

Tiaki ni kabane kaotioti a kamiimi. Tabeman aomata iai miia, kaotioti, ke a kawaraki. Ma a mwaiti ma ibuakora aika a na rinanon te bwai teuana ae rau man itiaki, n arona ae karaunano, te namakin ae rau.

Beretitenti Spencer W. Kimball (1895–1985), te ka 12 ni Beretitenti n te Ekaretia, e reirei, “Kantaningaan te kamiimi, temanna e na bon aki tauraoi nakon raangan te reitaki ae kaotaki ae teimatoa.”³

Bwaai aika a na taraaki

1. Richard G. Scott, “Using the Supernal Gift of Prayer,” Riaona, Meei 2007, 8.

2. Henry B. Eyring, “Prayer,” Riaona, Tianuare 2002, 18.

3. Teachings of Presidents of the Church: Spencer W. Kimball (2006), 241.

I Kanga n Ataia

E ngae ngke I bwabetitoaki n au ririki ae ruaiwa, au utu a bon aki rangi ni kakaonimaki n te Ekaretia. Man ngke ai 13 au ririki, mitinare a kaoai bwa N na ira te taromauri, ngaia are I a iri. I ira naba te tieminarii. Kanoan te kooti are ti reiakinna bon te Doctrine ao Covenants, are e taraa ni kaminonano irou. I aki rangi n oota ma rongorongon Iotebwa Timiti ao ana Boki Moomon. I tangiria ni kakaea te Atua, ma I bon aki koaua bwa ni kanga ke n te tabo raa.

N te tai ae maan ao I rangi n iangoa ara marooro ma mitinare. I iangoa te tieminarii. I iangoa ara marooroo ma Kiritian tabeman n aro tabeua. N tabetai I tataro ni kan ata ae koaua, ma ae moa riki te iango nakon te titiraki ae nano. Imwiina n te tairiki teuana ao I a baireia bwa nna tataro ma te “nano ae koaua.”

I tuanga Tamau are i Karawa bwa I kan ataia ao n riki bwa kaain Ana Ekaretia ae koaua. I berita: “Ngkana Ko na kaotia nakoiu bwa Iotebwa Timiti bon te burabeti ae koaua ao ngkana ana Boki Moomon e bon koaua, N na karaoi bwaai ni kabane are Ko anganai bwa N na karaoia. Ngkana Ana Ekaretia Iesu Kristo Ibukiia Aika Itiaki Ni Boong Aika Kaitira te Ekaretia ae koaua, N na iria ao n aki kitanna.”

Akea irou te kanikinaa ae kamiimi, ma I namakina te rau ao n nako ni matu. Tabeua te aoa imwiina I uti ma te iango ae kaokoro: Iotebwa Timiti bon te burabeti ae koaua, ao ana Boki Moomon e bon koaua.” Te iango e raonaki n te rau ae akea aekakin kabwarabwaraana. I a manga matu riki, ao ni manga teirake riki iwmiina ma te iango ao te namakin ae bon titebo naba.

Man te tai anne, I aki kona n nanououa bwa Iotebwa Timiti bon te burabeti ni koaua. I ataia bwa aio ana mwakuri te Tia Kamaiu ao Tamara are i Karawa e na kaekai ara bubuti aika nano.

Rodolfo Armando Pérez Bonilla, El Salvador