Ana Boki Moomon:
Te Tia Kakoaua ma te Baibara
Ni kaineti ma te tua n te Baibara are “e na kamatoaki taeka ni kabane ni wiia taani kaotioti aika uoman ke teniman” (2 I-Korinto 13:1), booki aika uoua ana Boki Moomon ao te Baibara a kakoauaa Iesu Kristo ao n reirei taekan Ana euangkerio. Unimwaane Russell M. Nelson n te Kooram n Abotoro n te Tengaun ma Uoman a reirei bwa “kakoaua ni booki aika tabu a kakoauaia bon irouia. Te tua aei e kabwarabwaraaki n taai aika bwakanako ngke e koroia te burabeti bwa ana Boki Moomon e ‘koreaki ma te kantaninga bwa kam na kakoaua [te Baibara]; anne; ao ngkana kam kakaoaua [te Baibara]; ao kam na kakoaua [ana Boki Moomon] naba’ [Moomon 7:9]. Booki ni kabane a irekereke ma ake tabeua. Booki n tatabeua nako a tei bwa kakoauana bwa e maiu te Atua ao n taetae nakoia Natina n te kaotioti nakoia Ana burabeti.”1
Mai inano bon karinanin reirei aika kakawaki aika reiakinaki n te Baibara bwa koaua ake a karinaki n ana Boki Moomon.
Ana Mition Iesu Kristo
Te Baibara ao ana Boki Moomon a kakoaua ibukin Iesu Kristo, Natin te Atua, ao Ana mwakuri ni Kamaiu. A reirei bwa te Tia Kamaiu e katokai iaona ara bure ao e tokanikai man te mate.
Ana Riki Temanna Natin te Atua
Baibara: “Bwa E tangiriia aomata te Atua, n te aro are E anga Natina ae te riki-temanna iai, bwa e aonga n aki mate ane onimakinna, ma e na reke irouna te maiu are e aki toki” (Ioane 3:16) taraa naba Mataio 16:16; Ioane 6:69).
Ana Boki Moomon: “I ataia bwa Iesu Kristo e na roko, eng, te nati, ana Riki Temanna te Tama, ae onrake n te akoi ao te nanoanga, ao te koaua.” (Aramwa 5:48; taraa naba 1 Nibwaai 11:16–21; Motiaea 3:5–8).
E Tiringaki Ibukin Ara Bure
Baibara: “Bwa raraau aei, ae raraan te berita nabangkai, ae kawawaeaki I bukiia aomata aika bati bwa bwaini kabwaraan aia bure” (Mataio 26:28; taraa naba Ebera 9:28; 1 Betero 3:18).
Ana Boki Moomon: “Taraia, e anga rabwatana bwa te karea ibukin taian bure, bwa kakoroan bukin te tua, ibukiia ake a uruaki nanoia man raraoma tamneia” (2 Nibwaai 2:7; taraa naba 1 Nibwaai 11:33; Aramwa 34:8–10; 3 Nibwaai 11:14).
Kamaunai Nanokawakira
Baibara: “E anai rawawatara, ao e uouoti nanokawakira” (Itaia 53:4; taraa naba Ebera 2:18).
Ana Boki Moomon: “Ao e na waaki, n rinanon te kainnano te maraki ma te kaririaki n aekaia nako; … bwa e na ataia ni kaineti ma te maiu n iriko bwa e na kanga ni buokiia ana aomata ni kaineti ma mamaaraia” (Aramwa 7:11–12; taraa naba Motiaea 14:3–5).
E Tokanikai Iaon te Mate
Baibara: “Ma e a tia ni kautaki Kristo mai buakoia maate, ae te moa ni uaa i buakoia aika matu” (1 I-Kortinto 15:20; taraa naba Ioane 14:19; Mwakuri 26:23).
Ana Boki Moomon: “Kakoauaa Iesu Kristo, bwa bon ngaia Natin te Atua, ao e tiringaki irouia Iutaia ao man mwakan te Tama ao e a tia ni manga kateirakeaki are e a tia iai ni karekea te tokanikai iaon te rua ni mate” (Moomon 7:5; taraa naba Motiaea 16:7–8; Ereman 14:17).
Ana Babaire te Atua Ibukira
Te Baibara ao Ana Boki Moomon a reirei bwa te Atua bon Tamara are i Karawa. Ibukin aei, E a tia ni katauraoa te “babaire ni kamaiu” (Aramwa 24:14) are ti na kona ni kamaiuaki iai rinanon ana Mwakuri ni Kamaiu Iesu Kristo.
Te Tama ae Tangira i Karawa
Baibara: “Bwa Irouna ti maiu, ao ti kakamwakuri, ao bon iai ngaira; n ai aron are a kangai naba ami tia oto-kuna tabemaang, Bwa kanoana naba ngaira” (Mwakuri 17:28; taraa naba Taian Areru 82:6; Ebera 12:9).
Ana Boki Moomon: “I ataia bwa te [Atua] e tangiriia natina” (1 Nibwaai 11:17; taraa naba 1 Nibwaai 17:36).
Te Mate ao te Aba n Tamnei
Baibara: “Ngke e tuai n okira te tano te rabwata n ai arona rimoa, ngke e tuai n okira te Atua te tamnei are E a tia n anga” (Te Minita 12:7; taraa naba 1 Betero 3:19–20; 4:6).
Ana Boki Moomon: “Tamneia aomata ni kabane, e ngae ngke a raoiroi ke a buakaka, a boni uotaki n okira mweengaia nakon te Atua are e anganiia te maiu” (Aramwa 40:11; tarai naba kiibu 12–14).
Te Mangauti
Baibara: “Ao rimwi ngkana e a tia ni kamaunaaki kunu ae rabwatau aei, ma n irikou ae N na noora iai te Atua” (Iobi 19:26; taraa naba Etekiera 37:12; 1 I-Korinto 6:14; 15:54).
Ana Boki Moomon: “I ataia bwa kam ataia ae e na roko te kara nakon rabwatara ao ni mate, e ngae n anne ao ti na kona n noora te Atua n rabwatara aikai” (2 Nibwaai 9:4; taraa naba 2 Nibwaai 9:12; Aramwa 11:43–45; 40:23).
Tuua a Katauraoa te Kawai
E reirei te Baibara bwa e a tia te Atua n anga tuua ao e na kakabwaiaira ngkana ti ongotaeka nako iai. Burabeti n Ana Boki Moomon a taui mwiin ao a irii taian tua.
Kakabwaia man te Ongotaeka
Baibara: “Ao e tuangiira Iehova bwa ti na toui mwiin ana tua aikai ni kabane, ni maaka Iehova ae Atuara, bwa ti aonga ni kabwaia ni boong ni kabane, bwa E aonga n tautaui maurira. … Ao e na atongaki bwa ara raoiroi te aro aei, ngkana tao ti tarataraira n toua mwiin tuua aikai ni kabane” (Te Tua-Kaua 6:24–25; taraa naba Taekan Rabakau 4:4; Ioane 14:21).
Ana Boki Moomon: “E a tia ni berita nakoimi bwa ngkana kam kawakin ana tua ao kam na kabwaia iaon te aba; ao e aki manga rairaki man bwaai ake e a tia n taekin; mangaia ae ngkana kam kaawakin ana tua ao e na kakabwaiai ngkami ao e na karikirakei ngkami” (Motiaea 2:22; taraa naba 2 Nibwaai 1:20).
Tua ake Tebwina
Baibara: E kaoti Tuua ake Tebwina te Uea nakon Mote (taraa Te Otinako 20:1–17).
Ana Boki Moomon: E reirei tuua ake tebwina Abinataai nakoia ana ibonga te Uea Nooa (taraa Motiaea 12:33–36; 13:12–24).
Kabwianibwai
Baibara: “Kam na kabane kabwiani bwaai n urakin nakon te auti ni kaiko bwai, bwa e aonga ni mena te amwarake ni mwaneabau” (Maraki 3:10; taraa naba Nakoaia Ibonga 27:30).
Ana Boki Moomon: “Ao bon aei naba Merekitereka are e kabwaka kabwaianibwai nakoina Aberaam; eng, tamara naba are Aberaam e kabwaka naba kabwian bwaai n ana bwai ni kabane” (Aramwa 13:15; taraa naba 3 Nibwaai 24:8–10).
Bwabetito ao te Tamnei ae Raoiroi
Baibara: “Ngkana e aki bungiaki te aomata n te ran ma te Tamnei, ao e aki kona n rin n uean te Atua” (Ioane 3:5; taraa naba Mareko 16:16; Mwakuri 2:36–38).
Ana Boki Moomon: “Rairii nanomi ngkami tokin aonaaba, ao nako mai nakoiu ma ni bwabetitoaki n arau, bwa kam aonga ni katabuaki ngkana kam butimwaea te Tamnei ae Raoiroi, bwa kam aonga n tei n akea barekami imatau n te kabanea ni bong” (3 Nibwaai 27:20; taraa naba 2 Nibwaai 9:23; 31:5–9).
Ana Ekaretia Iesu Kristo n Taai Ake Rimoa
E katea ana Ekaretia te Uea i Ierutarem ao n aban Amerika. Te Baibara ao Ana Boki Moomon bon bwaai ni kakoaua are E bairei ao ni kairiia Ana aomata rinanoia burabeti ao abotoro.
Burabeti
Baibara: “E na bon aki karaoa te bwai teuana te Uea ae Iehova, ngkana e aki kaota moa nanona ae raba nakoia ana toro aika burabeti” (Amota 3:7; taraa naba Ieremia 1:7; 7:25).
Ana Boki Moomon: “Mairoun te Tamnei ao bwaai ni kabane a bon kaotaki nakoia burabeti” (1 Nibwaai 22:2; taraa naba Iakobwa 4:4–6).
Te Tengaun Ma Uoman
Baibara: “E weteia Ana reirei: ao E rineia tengaun ma uoman mai buakoia, ao E arania bwa taan tuatua” (Ruka 6:13; taraa naba I-Ebeto 2:19–20; 4:11–14).
Ana Boki Moomon: “Kam na kakabwaiaaki ngkana kam ongo n aia taeka naaka tengaun ma uoman ake I a tia n rineia mai ibuakomi bwa a na buoki ngkami (3 Nibwaai 12:1; taraa naba 1 Nibwaai 11:29).
Te Kariaiakaki n te Nakoanibonga
Baibara: “Kam aki rineai, ma I rinei ngkami, ao I motiki bukimi, bwa kam na nako ni kariki uaa, ao bwa a na aki mauna uaami” (Ioane 15:16; taraa naba Mataio 16:19; Ruka 9:1–2; Ebera 5:4).
Ana Boki Moomon: “[Aramwa] e katabuia ibonga ao unimwaane, ni katokaan baina iaoia n aron ana waaki te Atua, bwa a na tararua ao man kawakina te ekaretia” (Aramwa 6:1; taraa naba 2 Nibwaai 6:2; Moronai 3).
Kamatebwai Riki Tabeua
Te tiata aei tiaki te rekooti ae bwanin. Bwa mwakoron am kamatebwaian booki aika tabu bon iroum ao n am utu, ko kona ni karin bwaai riki tabeua nakon te tiata aei ao ni ukoukorii riki reirei ake a reiakinaki n ana Boki Moomon ao n te Baibara ni kabongana te Kairiki nakon Atuun rongorongo ke te Kairi nakon Koroboki Aika Tabu ao bwaai ni kamatebwai n te aonrain n te scriptures.lds.org.
Tamnein Harold B. Lee iroun Doyle Shaw, ana mwamwannano te Church History Museum