E Le Uma le Alofa
Talosagaina se naunautaiga e faatumulia i le meaalofa o le alofa, le alofa mama o Keriso.
Sa ma asiasi atu talu ai nei ma lo’u toalua i le aai o Navu, Ilinoi. A o ma i ai iina, sa ma nofonofo i le potu i luga o le Faleoloa Piliki Lanumumu, i le mea sa i ai le ofisa ma le pisinisi a le Perofeta o Iosefa Samita. Sa ma faalogologo toto’a i le tamaitai taiala sa otootoina mai ni nai mea o le talafaasolopito o le Toefuataiga na tutupu ai iina.
Sa liliu atu o’u mafaufauga i le faavaeina o le Aualofa ma nisi o aoaoga na maua mai e uso o le Aualofa mai le Perofeta i lena lava potu. O na aoaoga na avea ma mataupu faavae sa faavae ai le Aualofa. O faamoemoega o le faateleina o le faatuatua, faamalolosia o aiga o Siona, ma le sailia ma fesoasoani ia i latou e manaomia le fesoasoani, sa faavaeina lava mai le amataga. Na ogatusa lava ma aoaoga a o tatou perofeta.
I se tasi o na uluai fonotaga, sa sii mai ai e le Perofeta le tusi a Paulo i Korinito. I lana lauga mamana e uiga i le alofa, na ta’ua ai e Paulo le faatuatua, faamoemoe, ma le alofa, ae faaiu ai i le “ae o le sili o na mea uma o le alofa lea.”1
Na ia faamatalaina uiga auaumama e aofia ai i le alofa. Fai mai a ia:
“E onosai le alofa, e agamalu, e le losilosi le alofa, e le mitamita vale le alofa, e le faafefeteina,
“… E le sailia e ia ana lava mea, e le faaitaitagofie e le tuuina atu i nisi le leaga;
“E le fiafia i le amio leaga, a e fiafia i le faamaoni;
“E ufiufi i mea uma, e talitonu i mea uma, e faamoemoe i mea uma, e onosai i mea uma.
“E le uma le alofa.”2
I sana saunoaga i tamaitai, na saunoa atu ai le Perofeta o Iosefa faapea: “Aua nei faaitiitia la outou vaai e tusa ai ma uiga lelei o outou tuaoi. … E tatau ona outou faateleina o outou agaga o le alofa i isi, pe afai [o le a] outou faia faapei o Iesu. … A o faateleina lo outou lotomama ma le amioatua, a o faateleina lo outou lelei, ia faateleina lo outou alolofa atu i isi—e ao ina outou lava faapalepale ma onosai i faaletonu ma sese o tagata. E taua tele agaga o tagata!”3
O le tautinoga a le mau “E le uma le alofa” ua avea ma mautauave a le Aualofa aua o loo opomau ai nei aoaoga ma le poloaiga na tuuina atu e le Perofeta o Iosefa Samita i uso o le Aualofa ina ia “faamama avega ai i e matitiva” ma ia “faaolaina ai agaga.”4
O nei mataupu ua fai ma faavae ua opomauina e uso o le Aualofa i le lalolagi atoa, aua o le natura lea o le galuega a le Aualofa.
O le a le uiga o le alofa? E faapefea ona tatou maua le alofa?
Na faamatalaina e le Perofeta o Mamona le alofa “o le alofa le pona lea oKeriso,”5 ae na aoao mai Paulo o le “alofa … o le fusi lea e atoatoa ona lelei ai,”6 ma sa faamanatu mai e Nifae “ua tuu mai ai e le Alii le Atua se poloaiga ia i ai i tagata uma le alofa mama, o lea alofa mama o le alofa lea.”7
I le toe iloiloina o le faamatalaga talu ai a Paulo o le alofa, ua tatou aoao ai o le alofa mama e le o se faatinoga e tasi po o se mea tatou te foai atu, ae o se tulaga e tatau ona i ai, o se tulaga o le loto, o lagona agalelei e faaosofia ai faatinoga alofa.
O loo aoao mai foi Mamona e faaee atu le alofa mama i luga o soo moni o le Alii ma o le alofa mama e faamamaina ai i latou o i ai le alofa.8 E le gata i lea, ua tatou aoaoina o le alofa mama o se meaalofa e tatau ona tatou sailia ma tatalo ia maua. E manaomia le i ai o le alofa mama i o tatou loto ina ia tatou maua ai le malo selesitila.9
Faatasi ai ma le malamalama ua poloai mai le Alii ia outou “faaoofu outou lava i le fusi o le alofa mama,”10 e tatau ona tatou fesili po o a uiga auaumama e fesoasoani tatou te atiina ae ai le alofa mama.
E tatau ona muamua i ai lo tatou manao e faateleina le alofa mama ma ia avea atili e faapei o Keriso.
O le isi laasaga o le tatalo. Na apoapoai mai Mamona ia i tatou e “tatalo atu i le Tama ma le malosi atoa o le loto, ina ia faatumulia [i tatou] i lenei alofa.” O lenei alofa faaleatua, ma a o faatumulia i tatou i lenei alofa, o le a “avea i tatou e pei lava o Ia.”11
O le faitauina o tusitusiga paia i aso taitasi, e mafai ona tatou mafaufau ai i le Faaola ma i ai se manao ia avea atili e faapei o Ia.
I lo’u ofisa, sa ou filifili e faatautau ai se atavali na tusia e Minerva Teichert ua faaulutalaina O le Laveaiga o le Tamai Mamoe na Se. O loo faaalia ai le Faaola o loo tu i Lana lafu mamoe ma sapaia ma le faaeteete se tamai mamoe i Ona aao. E fesoasoani lea ia te au e toe mafaufau ai i Lana talosaga: “Fafaga i a’u mamoe,”12 ia te a’u o lona uiga ia auauna atu ia i latou uma o loo siomia ai oe ma gauai faapitoa atu ia i latou e manaomia le fesoasoani.
O le Faaola o le faataitaiga atoatoa lea o le auala e faaali atu ai le alofa mama. I le taimi o Lana auaunaga i le olaga nei, sa Ia faaalia ai le alofa naunau mo e fia aai, mo lē agasala, mo e mafatia, ma e mama’i. Sa auauna atu o Ia i e matitiva ma e mauoa; o tamaitai, o tamaiti, ma alii; o aiga, uo, ma tagata ese. Sa Ia faamagalo atu ia i latou na molituina o Ia, sa puapuagatia foi o Ia ma maliu mo tagata uma.
I lona soifuaga atoa, sa faatino ai foi e le Perofeta o Iosefa Samita le alofa mama a o ia ofoina atu le alofa faauso ma le faaaloalo i isi. Sa lauiloa o ia i lona agalelei, alofa, tigaalofa, ma le popole mo i latou sa siomia o ia.
O le taimi nei, ua faamanuiaina i tatou i se perofeta o loo faatinoina le alofa mama. O Peresitene Thomas S. Monson o se faataitaiga ia i tatou ma le lalolagi. O loo ia laeiina le ofutalaloa o le alofa mama. E agalelei o ia, e tigaalofa, e limafoai; o se faitaulaga moni a le Alii o Iesu Keriso.
Ua aoao mai e Peresitene Monson: “O le alofa o le onosai lea i se tasi ua mafua ai ona tatou lē fiafia. O le teena lea o le lagona ia itaitagofie. O le taliaina lea o vaivaiga ma faaletonu. O le taliaina o tagata i o latou tulaga moni o i ai. O le faasēloa o le vaai i luga atu o le vaaiga faaletino, i uiga faaleatua e le mu itiiti i le gasologa o le olaga. O le teena lea o le lagona e tuufaavasega isi.”13
A ia i tatou le alofa mama, ua tatou naunau e auauna atu ma fesoasoani i isi pe a faigata, ma e aunoa ma se mafaufau i se taui pe faalauiloa. Tatou te le faatalitali se’i tofia e fesoasoani aua ua avea ma o tatou lava natura. A tatou filifili ia agalelei, lotoalofa, limafoai, onosai, talia gofie, lotofaamagalo, fetala’i, ma lē manatu faapito, ona tatou iloa lea ua tumu i tatou i le alofa mama.
E saunia e le Aualofa auala e le mafaitaulia e auauna atu ai i isi. O se tasi o auala aupito taua e faatino ai le alofa mama o faiaoga asiasi. E ala atu i faiaoga asiasi mataalia, tatou te maua ai le tele o avanoa e alolofa ai, auauna atu, ma tautuaina isi. O le faaalia o le alofa mama, po o le alofa, e faamama ma faapaiaina ai o tatou agaga, ma fesoasoani ai ia tatou avea atili ai e faapei o le Faaola.
Ou te maofa lava a o ou molimauina galuega e le mafaitaulia o le alofa mama e faatinoina i aso taitasi e faiaoga asiasi i le lalolagi atoa, o ē auauna atu ma le le manatu faapito i manaoga o uso taitoatasi ma o latou aiga. Ou te fai atu i nei faiaoga asiasi faamaoni, o na faatinoga laiti o le alofa mama, ua outou mulimuli ai ma galulue o ni meafaigaluega i Ona aao a o outou fesoasoani atu, tausia, sii a’e, faamafanafana, faalogo atu, faamalosiau, faafailele, aoao, ma faamalolosia uso i lalo o la outou tausiga. Se’i ou faasoa atu lava ni nai faataitaiga pupuu o lena auaunaga.
Sa mafatia Rosa i le ma’i suka tuga ma isi ma’i. Sa auai o ia i le Ekalesia i ni nai tausaga ua mavae. O ia o se tina mautoatasi ma sana tama tama talavou. E taofia soo i le falemai mo ni nai aso. E le gata ina ave o ia e ona faiaoga asiasi i le falemai, ae la te asiasi atu foi ia te ia ma faamafanafana ia te ia i le falemai ma la te vaaia foi lana tama i le fale ma le aoga. E avea ona faiaoga asiasi ma ana uo ma ona aiga.
Ina ua mavae ni nai asiasiga i se uso patino, sa iloa e Kathy e le iloa e lenei uso ona faitautusi ae sa manao o ia e aoao. Sa ofo atu Kathy e fesoasoani ia te ia e ui lava sa ia iloa e manaomia se taimi umi, onosai, ma le faia pea lava pea.
O Emily o se ava talavou sa sailia le upumoni. O lona toalua o Michael, e le fiafia i le lotu. Ina ua ma’i Emiy ma ua taofia i le falemai, sa aveina atu i ai e Cali, o se uso o le Aualofa la te tuaoi, ni meaai mo le aiga, vaavaai le pepe, faamama le fale, ma faia fuafuaga ina ia maua e Emily se faamanuiaga faaleperisitua. O nei galuega alofa na faamaluluina ai le loto o Michael. Sa tonu ia te ia e alu i sauniga Lotu ma feiloai ai i faifeautalai. Na papatiso talu ai nei Emily ma Michael.
E le uma le alofa. … E agalelei … le alofa, … e le sailia e ia ana lava mea, … e onosai i mea uma, e tumau e oo i le iuga.”14
Na saunoa Peresitene Henry B. Eyring:
Ua faatumulia le talafaasolopito o le Aualofa i tala o na auaunaga ofoofogia ma le le manatu faapito. …
O lenei sosaiete e aofia ai tamaitai o o latou lagona o le alofa e puna a’e mai loto ua suia e ala i le faaagavaaina mo le osia ma le tausiga o feagaiga, ia e na o le Ekalesia moni a le Alii e maua ai. O o latou lagona o le alofa moni e maua mai ia te Ia e ala i Lana Togiola. O a latou aga o le alofa e taialaina i Ana faataitaiga—ma e puna mai i le lotofaafetai mo Lana meaalofa e le i’u o le alofa mutimutivale—ma le Agaga Paia, lea na Ia auina mai e mafutaina Ana auauna ia latou misiona o le alofa. Talu ai lena mea, ua latou faia ma ua mafai ona faia mea e le masani ai, mo isi ma maua ai le olioli tusa lava pe tele foi mea latou te manaomia.”15
O le tuuina atu o le auaunaga ma le alofa mama i isi e fesoasoani tatou te faatoilaloina ai o tatou lava faigata ma faafoliga ai e le ogaoga tele.
O le a ou toe foi atu nei i aoaoga a le Perofeta o Iosefa Samita i uso i le popofou o le Toefuataiga. I le uunaia o faatinoga o le alofa mama ma le agalelei na ia saunoa ai: “Afai tou te ola ai i nei mataupu faavae, se taui ina a tele ma mamalu o lo outou taui i le malo selesitila! Afai tou te ola e tusa ai ma o outou avanoa paia, o le a le mafai ona taofia agelu mai le avea ai ma a outou paaga.”16
E faapei o uluai aso i Navu, sa o ai uso e saili ma fesoasoani atu ia i latou sa manaomia le fesoasoani, e faapena foi i le taimi nei. O uso i le malo o ni poutu sili o le malosi faaleagaga, auaunaga alofa, ma le tuuto. E asiasi atu faiaoga asiasi tuuto ma tausia e le tasi le isi. Latou te mulimuli i faataitaiga a le Faaola ma faia e pei foi ona sa Ia faia.
E mafai ona faatumulia tamaitai uma o le Aualofa i le alofa i le iloaina o a latou galuega iti o le alofa mama e i ai se mana faamalolo mo isi ma mo i latou lava. E oo ina latou iloa ma le mautinoa o le alofa o le alofa mama lea o Keriso ma e le uma lava.
A e faitauina le talafaasolopito o le Aualofa, o le a musuia ai oe ia e iloa o lenei mataupu faavae taua o le talalelei o se autu masani lea o i ai i le tusi atoa.
Ou te faaiu atu i se valaaulia i tamaitai uma o le Ekalesia e talosagaina se naunautaiga e faatumulia i le meaalofa o le alofa, le alofa mama o Keriso. Faaaoga uma a outou punaoa e faia ai mea lelei, e aumaia ai le toomaga ma le faaolataga ia i latou o loo siomia ai outou, e aofia ai ma o outou lava aiga. O le a faapaleina ma le manuia e le Alii a outou taumafaiga.
Talosia ia avea lo tatou iloa i le alofa sili o le Tama ma le Alo mo i tatou, ma lo tatou faatuatua ma le lotofaafetai mo le Togiola, e uunaia ai i tatou e atiina ae ma faatino le alofa mama mo i latou uma o siomia ai i tatou. O la’u tatalo lea i le suafa o Iesu Keriso, amene.