O Faifeautalai o Ni Oa o le Ekalesia

Saunia e Elder Kazuhiko Yamashita

O Le Fitugafulu

Ou te faafetai ona o le valaauina o faifeautalai e le Alii, ma latou te tali atu i lena valaau, ma o loo latou auauna atu i le lalolagi atoa.

I se tasi po i ni nai tausaga ua tuanai, sa asiasi mai ai se alii faifeautalai fou e suafa ia Elder Swan ma lana soa sinia Iapani i lo matou aiga. O le mea na lelei ai, sa ou i ai i le fale, o lea sa ou valaaulia ai i laua i totonu. Ina ua ou faafeiloaia i laua i le faitotoa, sa tosina atu la’u vaai i le ofutele sa laeiina e Elder Swan. E aunoa ma le mafaufauina, sa ou faapea atu ai ia te ia, “Matuai manaia lou ofutele o loo fai!” Ae peitai, sa le o se ofutele fou, ma sa fai si matafi. Sa ou faapea o le ofutele, o se ofu sa tuu ai e se tasi o faifeautalai sa i ai muamua i le falemautotogi o faifeautalai.

Sa vave ona tali mai Elder Swan i la’u tala, ma sa matuai faafeagai lava ma le mea sa ou mafaufau i ai. I lana faa-Iapani taupanuupanu sa ia tali mai ai: “Ioe, o se ofutele lelei lenei. Sa ofu e lo’u tamā le ofutele lenei a o avea o se faifeautalai i Iapani i le 20 tausaga ua mavae.”

Sa galue lona tamā i le Misiona a Iapani Okayama. Ma ina ua alu lona atalii e auauna faamisiona i Iapani, sa ia tuuina atu ia te ia lona ofutele. O le ata lenei o le ofutele ua lua tupulaga o Elder Swans na laeiina i Iapani.

Sa faagaeetia au ina ua ou faalogo i upu a Elder Swan. Ma ua ou malamalama nei i le pogai sa laeiina ai e Elder Swan le ofutele o lona tamā a o talai. Sa amata e Elder Swan lana misiona ma ua ia mauaina le alofa o lona tamā mo Iapani ma ona tagata.

Ou te mautinoa o nisi o outou sa oo foi i ai se aafiaga e talitutusa ma lenei. Sa ta’u mai e nisi o faifeautalai o loo galulue i Iapani e faapea, sa faamisiona foi nisi o o latou tama, o latou tina, o latou tama matutua po o tamaloloa o o latou aiga i misiona i Iapani.

Ou te fia faailoa atu lo’u alofa faamaoni, faaaloalo, ma le lagona o le agaga faafetai tele mo faifeautalai uma ua maea misiona o e sa auauna atu i le lalolagi atoa. Ou te mautinoa e le o galo outou ia i latou sa outou fesoasoani e faaliliuina mai. “E matua matagofie i luga o mauga o vae o le ua fai mai le tala lelei … !”¹

O au o se tasi o na tagata liliu mai. Sa ou liliu mai i le 17 o o’u tausaga, a o ou aoga i se aoga maualuga. O le faifeautalai sa faia lo’u papatisoga o Elder Rupp mai Idaho. E le’i mamao atu talu ona faamalolo o ia mai le avea ma se peresitene o le siteki i Idaho. Ou te lei toe vaai ia te ia talu mai le taimi na faatoa papatisoina ai au, ae sa ma fesootai i i-meli ma talanoa atu ia te ia i le telefoni. E lei galo lava o ia ia te au. O lona agalelei, foliga ataata sa tumau i lo’u manatua. Sa matuai fiafia o ia ina ua ia iloa o loo o’u manuia lava.

A o 17 ou tausaga, sa lei i ai so’u malamalamaaga lelei i savali sa aoaoina ai au e faifeautalai. Ma sa ou lagonaina lo latou alofa loloto ma le tumau. Ae peitai, sa ou maua se lagona faapitoa e uiga i faifeautalai. Sa ou fia avea e faapei o i latou. Ma sa ou lagonaina lo latou alofa loloto ma le tumau.

Sei ou faamatala atu i le aso sa ou papatiso ai. O le aso 15 o Iulai, ma sa o se aso vevela tele. Sa papatisoina ai foi ma se tamaitai i le aso lena. O le faatanoa o le vai papatisoga sa fauina e faifeautalai, ma sa le o se vaaiga manaia tele.

Sa faia le faamauga i le taimi lava na uma ai o ma papatisoga. Sa muamua faamauina le tuafafine e Elder Lloyd. Sa matou saofafai faatasi ma isi tagata o le au paia, moeiini ou mata, ma faalogologo ma le filemu. Sa faamauina o ia e Elder Lloyd, ona amata lea ona ia tuuina atu ni faamanuiaga i ona luga. Ae peitai, sa le toe gagana Elder Lloyd, o lea na pupula ai ou mata ma vaai atu ia te ia ma se pulatoa loloto.

E oo mai lava i le aso, o loo ou manatuaina lelei lena vaaiga. Sa maligi loimata o Elder Lloyd. Ma mo le uluai taimi i lo’u olaga, sa ou maua ai se aafiaga o le fusia i le Agaga Paia. Ma na ala mai i le Agaga Paia, sa ou maua ai se iloa mautinoa na alofa Elder Lloyd ia i maua ma sa alofa le Atua ia i maua.

Ona oo lea i le taimi e faamauina ai au. Ma o Elder Lloyd foi sa faia. Sa tuu ona lima i luga o lo’u ulu ma faamauina au o se tagata o le Ekalesia, tuuina mai le meaalofa o le Agaga Paia, ona amata loa lea ona fofogaina se faamanuiaga. Ma sa toe le gagana foi o ia. Ae peitai, sa ou malamalama nei i le mea na tupu. Sa ou iloaina moni e ala i le Agaga Paia, sa alolofa faifeautalai ia te au, ma sa alofa foi le Atua ia te au.

Ou te fia fai atu ni nai upu i faifeautalai o loo auauna atu i le taimi nei i misiona i le lalolagi atoa. O ou uiga faaalia, ma le alofa e te faaali atu i isi, o ni savali sili ona taua. E ui lava ina sa le’i vave ona ou malamalama lelei i aoaoga faavae uma sa aoaoina ai au e faifeautalai, ae sa ou lagonaina lo latou alofa tele ma a latou faatinoga e tele o le agalelei, na aoao mai ai ia te au ni lesona taua. O lau savali o le savali o le alofa, o se savali o le faamoemoe, ma o se savali o le faatuatua. O ou uiga faaalia ma au amioga e valaaulia ai le Agaga, ma o le Agaga e mafai ai ona tatou malamalama i mea e taua. O le mea ou te manao e faapupula atu ia te outou o le, e ala atu i lou alofa, o loo e faasafuaina atu ai le alofa o le Atua. O oe o se oa o lenei Ekalesia. Ou te matuai faafetai lava ia te outou uma mo a outou osigataulaga ma lo outou tuuto.

Ou te fia talanoa atu foi ia te outou o faifeautalai i le lumanai. I totonu o lo’u lava aiga, e toafa le ma fanau sa faamisiona, ma o le a ulufale le ma faifeautalai lona lima i le Nofoaga Autu e Aoao ai Faifeautalai i Provo i le faaiuga o le masina lenei. O le tausaga a sau, ua fuafua ai le ma uii e fai se misiona pe a uma ona faauu mai i le aoga maualuga.

O lea la, ou te talanoa atu i o’u atalii ma outou uma o loo sauniuni e fai ni misiona. E taua lou sau ma aumai ni mea se tolu i lau misiona:

O se manao e talai atu le talalelei. O loo finagalo le Alii e te sailia Ana mamoe, ma sue i latou.² O loo faatalitali mai tagata uma o le lalolagi ia te outou. Faamolemole ia faanatinati atu i mea o i ai i latou. E leai ni tagata e sili ona taumafai malosi atu nai lo faifeautalai e o e laveai isi. O a’u le isi o i latou na laveaiina.
Atiina ae lau molimau. E manaomia e le Alii lou “loto ma se mafaufau malie.”³
Alofa i isi, e pei foi o Elder Swan, o lē na aumaia le ofutele ma le alofa o lona tamā mo Iapani ma ona tagata i lana misiona.

Ma mo outou e le o iloa pe faapefea ona tapena e fai se misiona, faamolemole alu e vaai lou epikopo. Ou te mautinoa o le a fesoasoani atu o ia ia te oe.

Ou te faafetai ona o le valaauina o faifeautalai e le Alii, ma latou te tali atu i lena valaau, ma o loo latou auauna atu i le lalolagi atoa. Sei ou fai atu ia te outou uma o faifeautalai faapelepele ua maea misiona. Ou te matuai faafetai mo a outou taumafaiga uma. O outou o ni oa o lenei Ekalesia. Ma ia faaauau pea ona outou avea ma ni faifeautalai ma amio e faapei o ni soo o Keriso.

Ou te molimau atu o i tatou o fanau a lo tatou Tama oi le Lagi, e alofa o Ia ia i tatou, ma na Ia auina mai Lona Alo e Toatasi, o Iesu Keriso, ina ia mafai ona tatou toe foi atu i Lona afioaga. Ou te fai atu ai i nei mea i le suafa o Iesu Keriso, amene.