A o Tatou Toe Feiloai Ai
Ou te tatalo ia faatumulia i tatou i le Agaga o le Alii a o tatou faalogologo atu i savali i le aso ma a taeao, ma aoaoina na mea ua finagalo le Alii tatou te iloa.
Se mea ina a lelei, uso e ma tuafafine, o le faafeiloai atu ia te outou i le Konafesi Aoao Lona 181 Faaleafatausaga a Le Ekalesia a Iesu Keriso o le Au Paia o Aso e Gata Ai.
O le konafesi lenei ua atoa i ai le 48 tausaga talu ona valaauina a’u i le Korama a Aposetolo e Toasefululua e Peresitene Tavita O. MaKei. Na faia ia Oketopa o le 1963. E foliga mai ua tele naua tausaga ua oo mai ma mou atu talu mai lena taimi.
A oo ina tatou pisi, e foliga mai e vavave lava le alu o le taimi, ma e le’i i ai se avanoa mo a’u i masina na mavae atu nei. O se tasi o faatumutumuga o lena vaitaimi, o le avanoa lea sa ou maua e toe faapaia ai le Malumalu o Atlanta Georgia i le aso 1 o Me. Sa matou malaga ai ma Elder ma Sister M. Russell Ballard, Elder ma Sister Walter F. González, ma Elder ma Sister William R. Walker.
I le taimi o faafiafiaga faaleaganuu sa faaigoaina o “Molī o Sasae,” na faia i le afiafi a o lumanai le toe faapaiaga, sa matou matamata ai i alii ma tamaitai talavou e 2,700 mai le itulagi atoa o le malumalu, sa faafiafia. O se tasi o polokalama sili ona tulaga ese ua ou vaai i ai, ma sa tele taimi na tutulai ai le aofia e patipatia.
O le aso na sosoo ai na toe faapaia ai le malumalu i ni sauniga se lua, lea sa matuai iloga le mafuta mai ai o le Agaga o le Alii ma i matou.
I le faaiuga o Aokuso, na faapaiaina ai e Peresitene Henry B. Eyring le Malumalu o San Salvador El Salvador. Na latou malaga ai ma Sister Eyring ma Elder ma Sister D. Todd Christofferson, Elder ma Sister William R. Walker, ma Sister Silvia Allred o le au peresitene aoao o le Aualofa. Sa lipotia mai e Peresitene Eyring, o se sauniga sa sili ona faaleagaga.
I le faaiuga o le tausaga nei, o le a malaga ai Peresitene Dieter F. Uchtdorf ma Sister Uchtdorf faatasi ma isi Pulega Aoao i Quetzaltenango, Guatemala, o le a ia faapaiaina ai lo tatou malumalu iina.
O loo faaauau pea le fauina o malumalu ma le le faalavelaveina, uso e ma tuafafine. O le asō ua ou maua ai se avanoa e faasilasila atu ai isi malumalu fou.
Muamua, ou te fia ta’u atu e leai se fale o le Ekalesia e fauina, e sili atu ona taua nai lo se malumalu. O malumalu o nofoaga e faamau faatasi ai sootaga ina ia tumau e oo i le faavavau. Tatou te faafetai mo le tele o malumalu i le lalolagi atoa ma mo faamanuiaga ua maua ai mo olaga o o tatou tagata.
O le tausaga ua mavae na matua faatama’iaina ai le Tapeneko o Provo i le Itumalo o Iuta i se afi matautia. Sa tuua lenei maota matagofie, sa pele i augatupulaga o le Au Paia o Aso e Gata Ai, ma na o ni puipui o fafo sa tutu ai. Ina ua maea se suesuega auiliili, sa tonu ia i matou e toe fauina ma ia toefuatai atoa ma faasao le itu i fafo, e avea ma malumalu lona lua o le Ekalesia i le aai o Provo. O le malumalu o loo i ai nei i Provo, o se tasi o malumalu aupito sili ona pisi o le Ekalesia, ma o se isi malumalu e lua a’i, o le a faafaigofie ai le aofaiga faateleina o tagata faamaoni o le Ekalesia o loo malaga atu i le malumalu mai Provo ma nuu taulalata atu.
Ou te fiafia foi e faasilasila atu ia malumalu fou i nofoaga nei: Barranquilla, Colombia; Durban, Aferika i Saute; Kinshasa i le Ripapelika Temokarasi o Congo; ma Star Valley, Wyoming. E le gata i lea, ua tatou agai atu i luma i a tatou fuafuaga mo se malumalu e fauina i Pale, Farani.
O le a tuuina atu auiliiliga o nei malumalu i le lumanai pe a maua nofoaga e faatutu ai, ma isi faamaoniga e tatau ai.
Sa ou ta’ua i konafesi ua mavae le tulaga alualu i luma ua tatou faia i le faatutuina o malumalu ia latalata atu i o tatou tagata. E ui ua faigofie malumalu mo le toatele o tagata o le Ekalesia, ae o loo i ai lava vaega o le lalolagi e matuai mamao ese lava ia malumalu mai o tatou tagata, ma o lea latou te le gafataulimaina ai feoa’iga e manaomia ina ia latou o ai i ai. Ona le mafai ai lea ona latou mauaina faamanuiaga paia ma le faavavau e maua mai i malumalu. Ina ia fesoasoani i lea tulaga, ua matou faaavanoaina le mea lea ua ta’ua o le Tupe Lautele e Fesoasoani ai i Tagata Ulu i le Malumalu. O lenei tupe e maua ai se malaga se tasi i le malumalu a i latou o le a le mafai ona o i le malumalu, ae ua matua naunau lava mo lena avanoa. Soo se tasi atonu e manao e saofagā i lenei tupe, e mafai ona tusia i faamatalaga o le pepa masani o foai lea e tuuina atu i le epikopo i masina taitasi.
O lenei, uso e ma tuafafine, ou te tatalo ia faatumulia i tatou i le Agaga o le Alii a o tatou faalogologo atu i savali i le aso ma a taeao, ma aoaoina na mea ua finagalo le Alii tatou te iloa. Ou te tatalo atu ai i le suafa o Iesu Keriso, amene.