O Le Taua o se Igoa
Sei o tatou atiina ae se mausa … e faamanino atu ai o Le Ekalesia a Iesu Keriso o le Au Paia o Aso e Gata Ai, o le igoa lea na faatonuina ai i tatou e le Alii Lava Ia ina ia tatou lauiloa ai.
Elder Hales, e avea ai ma sui o i matou uma, matou te faailoa atu ai lo matou alolofa tele ma le agaga faafetai ua e faatasi mai i lenei taeao.
Talu mai le konafesi aoao mulimuli ia Aperila, o loo faaauau pea ona taulai atu lo’u mafaufau i le mataupu o le taua o se igoa. I nai masina ua mavae atu, ua tele fanau o fanau a le ma fanau ua fananau mai i lo matou aiga. E ui e foliga mai ua sili atu le vave o lo latou o mai nai lo la’u faitau, ae o tamaiti taitasi o se faaopoopoga fiafia lea i lo matou aiga. Ua tofu maua uma e i latou taitoatasi se igoa faapitoa na filifilia e o latou matua, o se igoa e lauiloa ai i o latou olaga atoa, e iloagofie ai o ia mai soo se tasi. E moni lea tulaga i soo se aiga, ma e moni foi i ekalesia i le lalolagi.
Na silafia e le Alii o Iesu Keriso le taua o le faaigoaina lelei o Lana Ekalesia i nei aso e gata ai. I le vaega e 115 o le Mataupu Faavae ma Feagaiga, na Ia faaigoa ai Lana Ekalesia: “Aua o le a faapea ona ta’ua o la’u ekalesia i aso e gata ai, “O Le Ekalesia a Iesu Keriso o le Au Paia o Aso e Gata Ai” (fuaiupu e 4).
Ma na aoaoina e le Tupu o Peniamina lona nuu i le vaitaimi o le Tusi a Mamona:
“Ou te manao ai ia outou ave i o outou luga le suafa o Keriso, outou uma ua ulu atu i le feagaiga a le Atua o le a outou usiusitai e oo i le iuga o o outou ola. …
“Ma ou te manao ia outou manatua foi, o le igoa lenei sa ou fai atu o le a ou avatu ia te outou e le tatau lava ona soloiesea, vagana ai i le solitulafono; o lea, ia outou faaeteete ai ia outou le solitulafono, ina ia le soloiesea le suafa mai o outou loto” (Mosaea 5:8, 11).
Tatou te ave i o tatou luga le suafa o Keriso i le vai o le papatisoga. Tatou te faafouina aafiaga o lena papatisoga i vaiaso taitasi pe a tatou aai ma feinu i le faamanatuga, ma faailoa atu ai lo tatou naunautai e ave i o tatou luga Lona suafa ma folafola atu tatou te manatua pea o Ia (tagai i le MF&F 20:77, 79).
Pe o tatou iloa ea le faamanuiaina o i tatou i le ave i o tatou luga o le suafa o le Alo Pele e Toatasi na Fanaua o le Atua? Pe o tatou malamalama ea i le taua o lena mea? Ua na o le suafa o le Faaola i lalo ifo o le lagi e mafai ona faaolaina ai le tagata (tagai i le 2 Nifae 31:21).
Pe afai o tou manatuaina, sa saunoa Peresitene Boyd K. Packer i le taua o le igoa o le Ekalesia i le konafesi aoao ia Aperila ua tea atu. Sa ia faamatalaina faapea “o le usiusitai i faaaliga, ua tatou faaigoaina ai la tatou lava ekalesia o Le Ekalesia a Iesu Keriso o le Au Paia o Aso e Gata Ai ae le o le Ekalesia Mamona” (“Taialaina e le Agaga Paia,” Liahona Me 2011, 30).
Ona e taua tele le igoa atoa o le Ekalesia, o lea ou te toe faaleo atu ai ia faaaliga mai tusitusiga paia, faatonuga a le Au Peresitene Sili i tusi i le 1982 ma le 2001, ma saunoaga a isi Aposetolo o e na uunaia ia tagata o le Ekalesia ina ia tausia ma aoao atu i le lalolagi ua faaigoa le Ekalesia i le suafa o le Alii o Iesu. O le igoa lea o le a valaau ai i tatou e le Alii i aso e gata ai. O le igoa lea ua iloga ai Lana Ekalesia mai isi [ekalesia] uma.
Sa ou mafaufau soo lava i ai pe aisea ua faaigoa ai e le Faaola Lana Ekalesia toefuataiina i se igoa e sefululima upu. Atonu e foliga e umi, ae ou te mafaufau i ai o se vaaiga lautele e faamatala ai le ituaiga Ekalesia, ma na vave lava ona avea ma se mea puupuu matagofie, faamaoni, ma faigofie. Pe faapefea ona tuusao atu ma le manino lenei faamatalaga ae ua faamatalaina i nai upu laiti?
E manino ma taua upu uma. O le upu O Le e faailoa mai ai le tulaga ese o le Ekalesia toefuataiina mai isi ekalesia i le lalolagi.
O upu Ekalesia a Iesu Keriso o loo tautino mai ai o Lana Ekalesia lenei. I le Tusi a Mamona na aoao mai ai Iesu: “Ma e faapefea ona avea ma a’u ekalesia vagana ai ua faaigoaina i lo’u igoa? Aua afai e faaigoaina se ekalesia i le igoa o Mose o lona uiga o le ekalesia lea a Mose; pe afai e faaigoaina i le igoa o se tagata [pei o Mamona] o lona uiga o le ekalesia lea a le tagata; ae afai e faaigoaina i lo’u igoa o lona uiga o la’u ekalesia lea, pe afai ua atiae i latou i luga o la’u talalelei” (3 Nifae 27:8).
O upu o Aso e Gata Ai o loo faamalamalama mai ai e tutusa lava lenei Ekalesia ma le Ekalesia lea na faatuina e Iesu Keriso i le taimi o Lana galuega talai faaletino ae ua toefuatai mai i nei aso e gata ai. Tatou te iloa ai sa i ai se pau ese, po o le liliuese, lea e manaomia ai le toefuatai mai o Lana Ekalesia moni ma le atoatoa i lo tatou vaitaimi.
O le Au Paia o lona uiga e mulimuli ia te Ia tagata o le ekalesia ma taumafai e faia Lona finagalo, tausi i Ana poloaiga, ma sauni e toe nonofo faatasi ma Ia ma lo tatou Tama Faalelagi i le lumanai. O le Au Paia o loo faasino lea ia i latou o e saili e faapaiaina o latou olaga e ala i le osi feagaiga e mulimuli ia Keriso.
O le igoa na faaigoa ai e le Faaola Lana Ekalesia o loo ta’u tonu mai ai lava ia i tatou ia ituaiga tagata tatou te i ai ma mea tatou te talitonu i ai. Tatou te talitonu o Iesu Keriso o le Faaola ma le Togiola o le lalolagi. Na Ia togiola tagata uma o e salamo mai a latou agasala, ma na Ia motusia ai noataga o le oti ma saunia le toetu mai le oti. Tatou te mulimuli ia Iesu Keriso. Ma e faapei ona ta’u atu e le Tupu o Peniamina i lona nuu, ma ou te toe faamautu atu ia te outou i le asō: “Ia outou manatua ia taofi [Lona] suafa ia tusia pea i o outou loto” (Mosaea 5:12).
Ua poloaiina i tatou e tutu atu e avea ma molimau ia te Ia “i taimi uma ma i mea uma, ma i nofoaga uma” (Mosaea 18:9). O lona uiga e ao ona tatou naunautai e faailoa atu i isi po o ai o loo tatou mulimuli i ai ma po o ai e ana le Ekalesia lea tatou te auai: o le Ekalesia a Iesu Keriso. E mautinoa lava tatou te fia faia lenei mea i le agaga o le alofa ma le molimau. Tatou te fia mulimuli i le Faaola e ala i le tautino atu i se ala faigofie ma le manino, ae ia faia ma le lotomaualalo, o i tatou o tagata o Lana Ekalesia. Tatou te mulimuli ia te Ia e ala i le avea ai ma Au Paia o Aso e Gata Ai—o soo [o Keriso] o aso e gata ai.
E masani lava ona tuuina atu e nisi ni igoa tauvalaau i tagata ma faalapotopotoga. Atonu o se igoa tauvalaau o se faapuupuuina lea o se igoa, pe e mafua mai se mea na tupu po o nisi uiga faaletino po o nisi foi amioga. E ui e le tutusa uma tulaga po o le taua o igoa tauvalaau e pei o igoa moni, ae e mafai ona faaaogaina ma le talafeagai.
Sa i ai igoa tauvalaau o le Ekalesia a le Alii i aso anamua faapea foi i nei vaitaimi. Sa valaauina le Au Paia i le vaitaimi o le Feagaiga Fou o ni Tagata Kerisiano aua sa latou talitonu ia Iesu Keriso. O lena igoa, sa le lelei le faaigoaina muamua ai e ni tagata faitio, ae ua avea nei ma se igoa taua; ma ua faamamaluina i tatou e ta’ua o se ekalesia Kerisiano.
O loo ta’ua o tatou tagata o ni Mamona aua tatou te talitonu i le Tusi a Mamona: O Se Tasi Molimau ia Iesu Keriso. Atonu na taumafai foi nisi e faaaoga le upu Mamona i se tulaga lautele e aofia ai ma i latou o e na o ese mai le Ekalesia ma faatuina ni a latou lava faapotopotoga. O ia faaaogaaga [o igoa tauvalaau] e na ona taitai atu ai i le le mautonu. Matou te faafetai atu i taumafaiga o ala o faasalalauga i le aloese mai le faaaogaina o le upu Mamona i se auala e ono mafua ai le le mautonu o tagata lautele, e uiga i le Ekalesia ma isi faalapotopotoga o loo tumau lava i aoaoga faavae anamua e pei o le tele o āvā. Sei ou faamatala faamanino atu, e leai se faalapotopotoga e tele āvā, e aofia ai ma i latou e ta’ua i latou o Fundamentalist Mormons po o nisi ua faata’ita’i i lo tatou igoa, e i ai se sootaga ma Le Ekalesia a Iesu Keriso o le Au Paia o Aso e Gata Ai.
E ui o le upu Mamona e le o se igoa sa’o atoa o le Ekalesia, ma e ui foi na tuuina mai anamua e tagata na faitio i le Ekalesia i le vaitaimi o sauaga, ae ua avea ma igoa tauvalaau ua taliaina pe a faatatau lea i tagata o le ekalesia ae le o le lotu. E leai se mea tatou te taofia ai fua le faaaogaina o le igoa Mamona pe afai e talafeagai ai, ae e tatau ona tatou tuuina atu le faamamafa i le igoa sa’o atoa o le Ekalesia lava ia. I nisi upu, e tatau ona tatou aloese mai ma faaitiitia le faaaogaina o le faaupuga “Ekalesia Mamona.”
I le aluga o tausaga sa ou faataunuuina ai ni tofiga i le salafa o le lalolagi, ma sa fesiligia au i le tele o taimi pe ou te auai i le Ekalesia Mamona. O la’u tali atu, “O au o se tagata o Le Ekalesia a Iesu Keriso. Talu ai matou te talitonu i le Tusi a Mamona, lea ua faaigoaina i se taitai-perofeta Amerika anamua ma o se tasi molimau ia Iesu Keriso, o lea ua ta’ua ai i matou i nisi taimi o ni Mamona.” O taimi uma e talia lelei ai lava lenei tali ma o le mea moni lava ua tatalaina ai le tele o avanoa mo a’u ou te faamatalaina ai le Toefuataiga o le atoaga o le talalelei i nei aso e gata ai.
Uso e ma tuafafine, tau lava o lou mafaufau i se aafiaga e mafai ona tatou oo i ai pe afai e tau lava ina tatou tali atu e ala i le faaaogaina o le igoa atoa o le Ekalesia e pei ona tautinoa mai e le Alii e tatau ona tatou faia. Ma afai e le mafai ona e faaaogaina vave le igoa atoa, ia tau lava o lou faapea atu, “Ou te auai i Le Ekalesia a Iesu Keriso” ma faamalamalama mulimuli atu “o le Au Paia o Aso e Gata Ai.”
Atonu e fesili nisi, ae faapefea ia saite o le Initoneti e pei o le Mormon.org faapea foi ma le tele o polokalama o ala o faasalalauga ua amatalia e le Ekalesia? E pei ona ou fai atu, o le faasinoina i tagata o le ekalesia o ni Mamona e talafeagai i nisi taimi. O se tulaga aoga, na o mai ai nisi e le auai i lo tatou faatuatuaga ma sailia i matou e sailiili i lena faaupuga. Ae o le taimi lava e tatala ai le Mormon.org, o loo faamatala mai ai le igoa talafeagai o le Ekalesia i le itulau autu, ma o loo i ai i itulau faaopoopo taitasi i luga o le saite. E le o se tulaga le talafeagai le faamoemoe i tagata e taina i totonu le igoa atoa o le Ekalesia pe a saili e su’e i tatou pe alu foi i totonu o la tatou uepisaite.
E ui e ono faaauau pea nei tulaga, ae e le tatau ai ona latou taofia tagata o le ekalesia mai le faaaogaina o le igoa atoa o le Ekalesia i soo se taimi lava e talafeagai ai. Sei o tatou atiina ae se mausa i totonu o o tatou aiga ma i gaoioiga fai a la tatou Ekalesia ma i a tatou fesootaiga o aso uma e faamanino atu ai o Le Ekalesia a Iesu Keriso o le Au Paia o Aso e Gata Ai, o le igoa lea na faatonuina ai i tatou e le Alii Lava Ia ina ia tatou lauiloa ai.
O se faamaumauga o manatu faaalia lata mai na faailoa mai ai ua matua toatele lava ia tagata e le o malamalama lelei o le igoa Mamona o loo faatatau lea i tagata o la tatou Ekalesia. Ma o le toatele o tagata e le o mautinoa lava pe o Mamona o ni tagata Kerisiano. E oo lava pe a latou faitau i a tatou galuega o Lima Fesoasoani i le lalolagi atoa pe a mavae ni afa, mafuie, lologa, ma oge, latou te le o faafesootaia lava a tatou taumafaiga agaalofa e avea ai i tatou o se faalapotopotoga Kerisiano. E moni o le a faafaigofie ona latou malamalama, o tatou e talitonu ma mulimuli i le Faaola pe afai tatou te faatatau ia i tatou lava o ni tagata o Le Ekalesia a Iesu Keriso o le Au Paia o Aso e Gata Ai. O lenei auala o le a faafesootaia ai e e faalogologo le igoa Mamona ma lo tatou igoa faaalia ma tagata o e mulimuli ia Iesu Keriso.
E pei ona talosagaina mai e le Au Peresitene Sili i la latou tusi o le aso 23 o Fepuari, 2001: “O le faaaogaina o le igoa ua faaalia, O Le Ekalesia a Iesu Keriso o le Au Paia o Aso e Gata Ai … , ua faateleina ai le avea ma o tatou tiutetauave le faalauiloa atu o le suafa o le Faaola i le lalolagi atoa. E faapena foi, matou te talosaga atu pe a tatou faatatau i le Ekalesia ia tatou faaaogaina lona igoa atoa i soo se taimi e mafai ai.
Sei o tatou toe tepa i le 1948 i le konafesi aoao ia Oketopa, lea sa saunoa ai Peresitene Siaosi Alapati Samita faapea, “Uso e ma tuafafine, pe a outou tuua iinei, o le a outou fegalegaleai ma le tele o isi faatuatuaga i le lalolagi, ae ia outou manatua e na o le tasi lava le Ekalesia i le lalolagi atoa, e ala i se poloaiga paia, o loo tauaveina le suafa o Iesu Keriso, lo tatou Alii” (i le Conference Report, Oke. 1948, 167).
O’u uso e ma tuafafine, ia tatou manatuaina foi lenei mea pe a tuua lenei konafesi i le aso. Ia faaleo atu a tatou molimau e uiga ia te Ia, ma ia i ai pea lo tatou alofa mo Ia i o tatou loto, ou te tatalo ai i le agaga lotomaualalo i Lona suafa, o le Alii o Iesu Keriso, amene.