Elder Tad R. Callister
O Le Au Peresitene o Fitugafulu
Sa faamalamalama mai e Elder Tad Richards Callister, lea faatoa lagolagoina i le Au Peresitene o Fitugafulu ma o se uso o le Korama Lua o Fitugafulu e faapea, o se tasi o sini a le Usoga o le aumaia lea o le “tuputupu ae moni” i le Ekalesia. “E manaomia ai le tele ma le tele o tagata e le tau na ona o mai i le sauniga faamanatuga ae ia taumamafa foi i le faamanatuga, mauaina ia sauniga ua ofoina mai e le Ekalesia, ma le tausiaina o a latou feagaiga,” sa ia fai mai ai.
I lona naunautai ai e fesoasoani i taitai o le Ekalesia i iunite i lena taumafaiga, ua faafetai ai Elder Callister i le tele o avanoa ua tuuina atu e le Alii ia te ia e auauna ai i le tele o valaauga. “I le maua ai o ia aafiaga lava e tasi ma ia lava tagata ua matou galulue faatasi—peresitene o siteki ma epikopo ma peresitene o korama a toeaina—e faamoemoe ou te mataalia atili ai ma ou nofouta ai i o latou manaoga,” o lana faamalamalama mai lea.
Sa avea ia Elder Callister o se faifeautalai faamisiona i le Misiona a Eastern Atlantic States, peresitene o le korama a toeaina, peresitene o le misiona a le siteki, fesoasoani i le peresitene o le siteki, epikopo, peresitene o le siteki, sui risone, Fitugafulu Eria, peresitene o le Misiona a Kanata Toronto East (2005–08), ma sa avea ma Peresitene o le Eria o le Pasefika i le taimi na valaauina ai i le Au Peresitene o Fitugafulu.
Sa soifua mai o ia ia Reed ma Norinne Callister ia Tesema 1945, i Glendale, Kalefonia, ISA, sa maua e Elder Callister se faailoga i le tausitusi mai le Iunivesite o Polika Iaga i le 1968. Sa faauu mai o ia mai le aoga faaloia i le Iunivesite o Kalefonia Los Angeles i le 1971. I le 1972 sa ia maua ai se LLM se faailoga (matuaofaiva) i le tulafono o lafoga mai le Iunivesite o Niu Ioka. Mai le 1972 i le 2005 sa ia galue ai o se loia, ma na ia tusia ni tusi e uiga i le Togiola ma le Liliuese ma le Toefuataiga.
Sa faaipoipo atu ia Kathryn Louise Saporiti ia Tesema 1968 i le Malumalu o Los Angeles Kalefonia. E toaono le la fanau.
Ua faailoa e Elder Callister le aao o le Alii i lona soifuaga. “Ua matuai faagaeetia lava au i le alofa o le Faaola lea ou te manatu ai o loo Ia faatalitali pea ma lo tatou Tama i le Lagi ma le naunautai e faamanuia i tatou i ni nai mea itiiti tatou te faia, aua o lo La natura lena.”