Fautuaga i le Autalavou
E ui lava i mea faafeagai, tofotofoga, ma faaosoosoga, e le tatau lava ona e toilalo ai pe fefe.
Ou te lauga patino atu i le autalavou nai lo mea ou te masani ai, i le faatusatusaina o lo’u talavou ma outou.
E matuā le mafuatiaina lava lo outou taūa. Ua ou vaaia outou i le tele o atunuu ma konetineta uma. Ua sili atu lava outou nai lo le mea na matou i ai a o talavou. Ua tele atu lo outou iloa o le talalelei.Ua tele atu lo outou faatagatamatua ma sili atu le faamaoni.
Ua 87 nei o’u tausaga. Atonu tou te manatunatu i lo’u matua pe o le a se mea ou te mafai ona saofagā ai i o outou olaga. Sa ou i ai i le mea o loo outou i ai ma iloa le mea o loo outou ō i ai. Ae tou te le’i oo lava i le mea lea ua ou i ai. Ou te sii maia ni nai laina o se solo e le mafaagaloina:
Ua amata ona telegese le matuu toeaina.
E le o le matuu laitiiti.
O mea e le iloa e le matuu laitiiti
E iloa uma e le matuu toeaina.
O le iloa e le matuu toeaina o mea
E avea ai pea o ia ma matai o le matuu laitiiti.
O a mea e le iloa e le matuu telegese toeaina?
—Pe faapefea ona lele saoasaoa.
E lele i luga le matuu laitiiti, ma lalo foi,
Ma faapepepepe i luga o le matuu toeaina.
O le a se mea e leiloa e le matuu laitiiti saosaoa?
—Pe o fea e alu i ai?1
E le o se solo e faatusalia ia Wordsworth, ae o se solo e le mafaagaloina!
Faatasi ai ma mea uma o loo tutupu i le lalolagi, i le faaitiitia o tulaga faatonuina o amioga mama, o outou le autalavou ua ola ae i teritori o le fili.
Ua tatou iloa mai tusitusiga paia sa i ai se taua i le lagi ma sa fouvale Lusifelo ma, “ua lafo ifo i le lalolagi.”2 Ua ia naunau e faasalaveia le fuafuaga a lo tatou Tama Faalelagi ma saili atu e pulea mafaufau ma amioga a tagata uma. O lenei uunaiga e faaleagaga, ma ua i ai o ia “i le salafa o le laueleele.”3
Ae e ui lava i mea faafeagai, tofotofoga, ma faaosoosoga, e le tatau lava ona e toilalo ai pe fefe.
Ina ua 17 o’u tausaga, ua sauni e faauu mai le aoga maualuga o se tamaitiiti lelei lava sa i ai ni vaivaiga, e pei ona ou manatu i ai, sa faafuasei lava ona suia mea uma na siomia ai matou i se tasi o taeao o se Aso Sa. O le aso na sosoo ai na valaauina ai i matou e o atu i le fale faafiafia o le aoga. I luga o le tulaga sa i ai se nofoa ma se tamai leitio. Sa ki e le puleaoga le leitio. Ona matou faalogoina lea o le siufofoga o Peresitene Franklin Delano Roosevelt a o ia faasilasila mai le tu’ipomuina o Pearl Harbor. Ua i ai le Iunaite Setete i se taua ma Iapani.
Na toe tupu foi lena vaaiga mulimuli ane. Ua toe faalogoina foi le siufofoga o Peresitene Roosevelt, o le taimi la lenei ua faasilasila mai ai ua tau lo tatou atunuu ma Siamani. Sa salalau solo le Taua Lona Lua o le Lalolagi i le salafa o le lalolagi.
O le taimi lea ua le mautonu ai lo matou lumanai. Sa matou le iloaina le mea o i luma atu. Pe mata o le a matou ola se’i faaipoipo ma faia ni aiga?
I aso nei ua i ai “taua ma tala o taua, ma [ua] vāvāō le lalolagi atoa.”4 O outou, la matou autalavou, atonu ua lagonaina le le mautonu ma le le mautinoa i o outou olaga. Ou te fia fautua atu ma aoao outou, ma tuu atu se lapataiga e uiga i nisi o mea e fai ma nisi o mea e le faia.
O le fuafuaga o le talalelei o “le fuafuaga sili o le fiafia.”5 O le aiga o le totonugalemu o lena fuafuaga. E faalagolago le aiga i le faaaogaina ma le agavaa o na mana e foafoa ai le ola o loo i totonu o o outou tino.
I le “O Le Aiga: O Se Folafolaga i le Lalolagi,” o se faamatalaga musuia na tuuina mai e le Au Peresitene Sili ma le Korama a Aposetolo e Toasefululua, ua tatou aoao ai i le muai olaga “o tagata uma—tane ma le fafine—[sa] foafoaina i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi, ma, o lea, ua tofu ai ma se natura paia ma se taunuuga.O le tulaga tane po o le fafine [o le tagata] o se vaega taua [ma sa faavaeina i lena muai olaga]. …
“… Matou te toe tautino atu foi ua poloai mai le Atua, o mana paia o le foafoaina o fanau, ua na o le va lava o le alii ma le tamaitai ua faaipoipoina faaletulafono, o se tane ma le ava, e tatau ona faaaogaina ai.”6
O le faasalaga sili na tuu e Lusifelo ma e na mulimuli ia te ia i o latou lava luga o le le mafai lea ona maua o ni o latou tino faitino.
O le tele o faaosoosoga tou te fetaiai, e mautinoa lava o mea e sili ona ogaoga e fesootai ma o outou tino. Ua le gata ina outou maua le mana e foafoa ai ni tino mo se tupulaga fou, ae ua ia te outou foi le faitalia.
Sa aoao mai le Perofeta o Iosefa Samita, “O tagata uma e fai tino e i ai le mana ia i latou o e leai ni tino.”7 O lea o agaga soifua uma ua i ai se tino faaletino e mulimuli ane lava e maua le mana e pulea ai le fili. Tou te mafatia i faaosoosoga ona o le natura faaletino, ae ua ia te outou foi le mana e pulea ai o ia ma ana agelu.
E oo ifo i le taimi na matou faauu ai mai le aoga maualuga, ua toatele au uo ua malaga i le taua, o nisi o i latou e le’i toe foi mai lava. O le isi toatele o i matou o le a vave ona ulufale atu i le militeli. Sa matou le iloaina lo matou lumanai. Pe o le a matou sao mai ea i le taua? Mata o le a lava se mea e totoe o lo matou lalolagi pe a matou toe foi mai?
Ona sa ou mautinoa o le a ou oo atu i le vaegaau, o lea sa ou auai ai i le fuavaalele. Sa vave ona ou i ai i Santa Ana, Kalefonia, mo mua’i aoaoga ave vaalele.
O le taimi lena e le’i i ai sa’u molimau maumaututu e moni le talalelei, ae sa ou iloa na iloa e o’u faiaoga seminare, o Abel S. Rich ma John P. Lillywhite, e moni. Sa ou faalogo o la molimau ai, ma na ou talitonu ia i la’ua.Sa ou faapea ifo ia te a’u, “O le a ou faalagolago i a la molimau seia oo ina ou maua e au lava ia sa’u molimau.” Ma sa faapena ona fai.
Sa ou faalogo e uiga i faamanuiaga faapeteriaka ae sa ou le’i mauaina. I siteki taitasi o loo i ai se peteriaka faauuina ua i ai le agaga o valoaga ma le agaga o faaaliga. Ua faatagaina o ia e tuuina atu ni faamanuiaga patino ma faalilolilo ia i latou ua fautuaina atu e o latou epikopo. Sa ou tusi atu i lo’u epikopo mo se pepa faataga.
O J. Roland Sandstrom o se peteriaka faauuina sa nofo i le Siteki o Santa Ana. Sa ia le iloaina lava se mea e uiga ia te a’u ma e le’i vaai muamua foi ia te a’u, ae na ia tuuina mai ia te a’u lo’u faamanuiaga. Na ou maua ai i totonu ni tali ma ni faatonuga.
E ui o faamanuiaga faapeteriaka e faalilolilo tele, ae o le a ou faasoaina atu se upusii puupuu mai lo’u faamanuiaga: “O le a taialaina oe e ala i musumusuga a le Agaga Paia ma o le a lapataia oe i mea matautia. Afai e te faalogo i na lapataiga, o le a faamanuiaina oe e lo tatou Tama Faalelagi ina ia mafai ona toe faatasia oe ma e pele ia te oe.”8
O le upu afai, e ui ina laitiiti, ae e telē e pei o se itulau. O le a faamanuiaina au e toe foi mai le taua pe afai ou te tausia poloaiga ma pe afai ou te faalogo i uunaiga a le Agaga Paia. E ui foi na faaee mai ia te au lena meaalofa i le papatisoga, ae ou te le’i iloaina lava po o ai le Agaga Paia ae pe faapefea foi ona aogā ia uunaiga.
O mea na manaomia ona ou iloaina e uiga i uunaiga sa ou maua i le Tusi a Mamona. Sa ou faitau ai e faapea “e tautatala agelu i le mana o le Agaga Paia; o le mea lea, latou te fetalai mai afioga a Keriso. O le mea lea, … ia taumamafa fiafia i afioga a Keriso; aua faauta, o afioga a Keriso, o le a ta’u mai ai ia te outou mea uma e tatau ona outou faia.”9
Atonu o le mea e tasi silisili na ou aoaoina mai lenei faitauga o le Tusi a Mamona o le siufofoga o le Agaga e oo mai o se lagona nai lo o se leo. O le a e iloaina, e pei ona ou iloaina, ia “faalogo” atu i lena siufofoga lea e lagonaina nai lo le faalogoina.
Na otegia e Nifae ona uso matutua ma faapea atu, “Ua oulua vaai i se agelu, ma sa fetalai mai o ia ia te oulua; ioe, sa oulua faalogo i lona siufofoga mai lea taimi i lea taimi; ma sa fetalai mai foi o ia ia te oulua i se leo filemu itiiti, peitai ua oulua te’a atu ma le toe lagonaina, na oulua le mafafai ai ona lagona ana fetalaiga.”10
O nisi faitioga ua faapea mai o nei fuaiupu o loo sese ona e te faalogo i upu, e te le lagonaina Ae afai e te iloa soo se mea lava e uiga i fesootaiga faaleagaga, e te iloaina o le upu e sili ona faamatalaina ai se mea o tupu, o le upu lagona.
O le meaalofa o le Agaga Paia, afai e te faatagaina, o le a taialaina ma puipuia, ma e oo lava i le faasa’oina o au amioga. Sa saunoa le perofeta o Enosa, “Sa toe tulei mai le siufofoga o le Alii i lo’u mafaufau.”11 Ma na ta’u atu e le Alii ia Oliva Kaotui, “Faauta, o le a Ou ta’u atu ia te oe i lou mafaufau ma lou loto, e ala i le Agaga Paia, lea o le a oo atu i ou luga.”12
E le o faamoemoeina e te ola i lenei olaga e aunoa ma le faia o ni mea sese, ae o le a e le faia lava se mea sese matuia e aunoa ma le lapataia muamua o oe e uunaiga a le Agaga Paia. O lenei folafolaga e faatatau i tagata uma o le Ekalesia.
O nisi o le a faia ni mea sese e matuā matuia lava, o le soliina o tulafono o le talalelei. O i, o le taimi lea e faamanatu atu ai ia te oe le Togiola, salamo, ma le faamagaloga atoa i le tulaga e mafai ai ona e toe mama. Na fetalai mai le Alii, “Faauta, o ia o le ua salamo i ana agasala, o ia lava lea ua faamagaloina, ma o A’u, o le Alii, e le toe manatuaina lava i latou”13
Afai e oo ina ave faapagota outou e le fili ona o a outou agasala, ou te faamanatu atu ia te outou o loo outou umiaina le ki o le a tatala ai le faitotoa o le falepuipui mai totonu. E mafai ona faamamaina outou e ala i le taulaga togiola a le Faaola o Iesu Keriso.
Atonu tou te manatu i ni taimi o o outou puapuaga ua le aoga ona laveai outou ona ua outou faia ni mea sese, ogaoga pe faatauvaa, ma ua outou manatu ua outou leiloloa nei. E le moni lava lena mea! Ua na o le salamo lava e mafai ona faamaloloina ai mea ua tiga. Ae e mafai e le salamo ona faamaloloina mea ua tiga, e tusa lava pe o le a.
Afai ua e se’e atu i mea e le tatau ona e oo i ai, pe afai foi ua e fegalegaleai ma tagata ua tosoina ese atu oe i le itu sese, o le taimi tonu lena e faatino ai lou tutoatasi, lau faitalia. Faalogo i le siufofoga o le Agaga, ma o le a le taitaiina sese lava oe.
Ou te toe fai atu e faapea o le autalavou o aso nei ua ola ae i teritori a le fili faatasi ma se faaitiitia o tulaga faatonuina o le ola mama. Ae i le avea ai ma auauna a le Alii, ou te folafola atu o le a puipuia outou ma leoleoina mai osofaiga a le fili pe afai o le a outou faalogo atu i uunaiga ia e sau mai le Agaga Paia.
Oofu i laei talafeagai; tautala ma le faaaloalo; faalogologo i musika musuia. Aloese mai le ola le mama ma faatinoga leaga patino uma. Ia e puleaina lou olaga ma poloaiina oe lava ia ina ia faamaoni. Talu ai matou te faalagolago tele atu ia te outou, o le a matua faamanuiaina lava outou. E le o tuuaunoaina lava outou e le silafaga a lo outou Tama Faalelagi agaalofa.
O le malosi o la’u molimau ua suia lava talu mai le taimi sa ou faalagolago ai i molimau a o’u faiaoga seminare. O le asō o loo ou faalagolago ai i isi pe a ou savali ona o le matua ma le faama’i pipili a o ou tamaitiiti ae e le mai masalosaloga e tusa ai ma mataupu faaleagaga. Ua oo ina ou talitonu, malamalama, ma iloa upumoni taua o le talalelei ma le Faaola o Iesu Keriso.
I le avea ai ma se tasi o Ana molimau faapitoa, ou te molimau atu o le taunuuga o lenei taua lea na amata mai i le muai olaga e le fesiligiaina lava. O le a faia’ina ia Lusifelo.
Sa tatou talanoa muamua i matuu. O outou o tama’i matuu e le manaomia ona outou felelei atu ma toe foi mai e aunoa ma se uiga, ua le mautinoa le ala o i luma. O loo i ai i latou ua silafia le ala “E le faia lava se mea e le Alii o Ieova, a e faaalia lona finagalo i ana auauna o perofeta.”14 Sa faatulagaina e le Alii Lana Ekalesia i luga o le mataupu faavae o ki ma aufono.
I le faauluuluga o le Ekalesia o loo i ai ni tamalii se 15 ua lagolagoina o ni perofeta, tagatavaai, ma talifaaaliga. O tamalii taitasi o le Au Peresitene Sili ma le Korama a Aposetolo e Toasefululua ua umiaina ki uma o le perisitua e manaomia mo le taitaiga o le Ekalesia. O le Aposetolo sinia o le Perofeta lea—Peresitene Thomas S. Monson, ma ua na o ia lava ua faatagaina e faaaogaina uma na ki.
E manaomia e tusitusiga paia le galulue o le Au Peresitene Sili ma le Korama a le Toasefululua i aufono ma o faaiuga a na aufono e ao ona autasia. Ma o le mea lena o loo tupu. Ua matou faatuatuaina le Alii e taialaina le ala, matou te saili atu e faia na o Lona finagalo. Matou te iloa o loo Ia matuai faatuatuaina lava i matou, taitoatasi ma se vaega atoa.
E ao ona e aoao ia “faatuatua ia Ieova ma lou loto atoa; a e aua le faalagolago i lou lava atamai.”15 E tatau ona faatuatuaina oe ma siosiomiaina oe lava ia i uo e mananao ia pei foi o oe.
O nisi taimi atonu e faaosoosoina oe e pei ona ou oo i ai mai lea taimi i lea taimi i lo’u talavou: Ona o le auala o loo tutupu ai mea, o le a uma le lalolagi. O le a oo mai le iuga o le lalolagi ae ou te le’i ausia mea e tatau ona ausia.” E le sa’o lea mea! E mafai ona e vaai atu i luma i le faia o le mea sa’o—faaipoipo, fai se aiga, ia e vaai i lau fanau ma fanau a lau fanau, atonu foi ma fanau a fanau a fanau.
Afai o le a outou mulimuli i nei mataupu faavae, o le a leoleoina outou ma puipuia ma o le a outou iloaina lava mo outou e ala i uunaiga a le Agaga Paia pe o le fea ala e alu ai, aua “o le mana o le Agaga Paia e mafai ai ona outou iloa le moni o mea uma lava.”16 Ou te folafola atu o le a faataunuuina lava ma talosagaina se faamanauiaga i o outou luga, o matou talavou faapelepele, i le suafa o Iesu Keriso, amene.