Konafesi Aoao Lona 181 Faaleafatausaga

E silia ma le 100,000 tagata sa auai i sauniga e lima o le Konafesi Aoao Lona 181 Faaleafatausaga a Le Ekalesia a Iesu Keriso o le Au Paia o Aso e Gata Ai i le Maota Autu mo Konafesi i le Aai o Sate Leki, Iuta, ISA, i le aso 1 ma le 2 o Oketopa. E faitau miliona isi na maimoa mai ma faalogologo faasalalauga i le TV, leitio, satelite, ma le Initoneti.

I le sauniga muamua i le aso Toonai, 1 Oketopa, sa fofogaina mai ai e Peresitene Thomas S. Monson ia nofoaga o malumalu fou e ono: Barranquilla, Colombia; Durban, Aferika i Saute; Kinshasa, Ripapelika Temokarasi o Congo; Pale, Farani; Provo, Iuta, ISA; ma Star Valley, Wyoming, ISA.

Ina ua maea lenei faasilasilaga, sa valaaulia e Peresitene Monson ia tagata o le ekalesia e saofagā i le Tupe Lautele e Fesoasoani ai i Tagata Ulu i le Malumalu. “O lenei tupe e maua ai se malaga se tasi i le malumalu a i latou o le a le mafai ona o i le malumalu, ae ua matua naunau lava mo lena avanoa,” na ia saunoa ai.

I le afiafi o le Aso Toonai, sa faasilasila mai ai e Elder David A. Bednar o le Korama a Aposetolo e Toasefululua se vaega fou o le youth.lds.org—FamilySearch Youth and Family History (lds.org/familyhistoryyouth). O lea vaega fou ua faamoemoe e fesoasoani ai i talavou latou te sailia talafaasolopito o aiga ma tautuaina o latou augatama e ala i le sailia o o latou faamaumauga. (Tagai i le tusiga o i le itulau e 128.)

O le sauniga foi lea, na faamalolo mai ai Elder Claudio R. M. Costa mai le Au Peresitene o Fitugafulu. Sa lagolagoina ai i le Au Peresitene o Fitugafulu ia Elder Tad R. Callister (tagai i le itulau e 128 mo se otootoga o lona soifua). E toasefululua Fitugafulu ma Fitugafulu Eria na faamalolo mai ai pe tuuina atu foi i ai le tulaga o le faamalolo faamamaluina (tagai itulau 23 mo le lagolagoina o taitai ma e na faamalolo mai ai).

I lana saunoaga i le taeao o le Aso Sa, sa faamanatu mai ai e Peresitene Henry B. Eyring, Fesoasoani Muamua i le Au Peresitene Sili, i tagata taitoatasi le valaau—na tuuina mai i le konafesi aoao ia Aperila i le amataga o lenei tausaga—mo tagata uma o le au paia ina ia auai i le faatinoina o se auaunaga i se aso o le 2011 (tagai Henry B. Eyring, “O Avanoa e Fai ai Mea Lelei,” Liahona, Me 2011, 22).

Sa faalogologo tagata o le ekalesia i le lalolagi atoa i le konafesi i gagana e 93. Mo faamatalaga e uiga i le taimi e maua ai tusiga, lipine e faalogologo ma matamata ai o le konafesi i gagana eseese, asiasi ane i le lds.org/general-conference/when-conference-materials-will-be-available.

O se faatufugaga a se tusiata o loo faaalia ai le Tapeneko i Provo, lea sa faaumatia e le afi, ua toefuatai nei ma ua avea ma malumalu lona lua i Provo, Iuta, ISA.