O Afafine i Lo’u Malo: O Se Galuega Faasolopito mo Tamaitai o le AAG i le Taimi Nei
O Afafine i Lo’u malo: O Le Talafaasolopito ma le Galuega a le Aualofa, o se tusi fou na saunia i lalo o le taitaiga a le Au Peresitene Sili, o loo i ai se faamaumauga o le talatuu o le Aualofa ma tamaitai o le Ekalesia, o le saunoaga lea a Julie B. Beck, le peresitene aoao o le Aualofa, i le sauniga aoao a le Aualofa ia Setema 2011.
“O le a tuufaatasia ai ma soofaatasi se usoga a tamaitai i faamoemoega o le Aualofa ma mamanu ma avanoa paia o soo,” na ia saunoa ai. “O se molimau o le matafaioi taua a tamaitai i le fuafuaga o le fiafia a lo tatou Tama, ma o loo i ai se tagavai mausali o mea ua tatou talitonu i ai, o mea tatou te faia, ma mea o le a tatou puipuia” (itulau e 113 o le lomiga lenei).
Na ta’ua e Sister Beck e faapea o le tusi o loo maua ai se faavae mo faasinomaga o tamaitai, o ni afafine o le Atua. A suesue e tagata le tusi, na ia saunoa ai, o le a mafai ona latou vaai i le ala e tatau ai ona aoga le Aualofa i olaga o uso taitasi.
Pe na Faapefea ona Fatuina le Tusi
Na amata le galuega o se galuega na atofa mai i le Au Peresitene Sili. Na vaetofia ia Susan W. Tanner, le peresitene aoao talu ai o Tamaitai Talavou, na te tusia le tusi. Na tofia Sister Beck ma ona fesoasoani, o Silvia Allred, ma Barbara Thompson, e faafoeina le galuega ma galulue faatasi ma Sister Tanner, ma ē sa faasa’osa’oina, i latou sa mamanuina, ma isi e fuafua ai lona faagasologa e ala i le agaga o faaaliga. “Ou te lei galue lava i se galuega faatino e sili atu ona taialaina e le Agaga nai lo lenei,” o le saunoaga lea a Sister Beck.
O se vaega o lena faagasologa sa aofia ai le filifili po o le fea o le fia afe o itulau o talaaga faasolopito e tatau ona faaaofia ai i le tusi. Sa iloiloina e Sister Beck, o ona fesoasoani, ma Sister Tanner ia minute mai i uluai fonotaga a le Aualofa i Navu, ma isi talafaasolopito ma faamatalaga e uiga i le Aualofa ma tamaitai o le Ekalesia.
Na saunoa Sister Beck e faapea, o le taunuuga e le o se talafaasolopito masani e faasolo lelei i taimi, ae o se talafaasolopito faaleagaga o tamaitai o le Ekalesia ma le Aualofa.
“Tatou te suesueina lo tatou talafaasolopito aua e fesoasoani tatou te suia ai,” na saunoa ai Sister Beck i lana saunoaga i le sauniga aoao a le Aualofa ia Setema 2010. “O le faaiuga lava, o le taua o le talaaga e le faapea o ona aso, taimi, ma nofoaga. E taua aua e aoaoina ai i tatou i mataupu faavae, faamoemoega, ma mamanu e tatau ona tatou mulimuli ai, ma e fesoasoani tatou te iloa ai o tatou faasinomaga, ma le mea e tatau ona tatou faia e tuufaatasia ai i tatou i le faamalolosia o aiga o Siona ma fausia ai le malo o le Atua i le fogaeleele.” (“O Afafine i Lo’u Malo: O Le Talafaasolopito ma le Galuega a le Aualofa,” Liahona, Nov. 2010, 115).
E ui o loo mulimuli le tusi i se faasologa o taimi, ae o ona aoaoga o loo faailoa mai i mataupu ua i ai ni autu patino. O loo faaaogaina ai tala ma faataitaiga mai tusitusiga paia ma taimi i ona po nei, mai upu a perofeta, ma mai taitai o le Aualofa e aoao atu ai ona savali taua.
O Le Uunaiga a le Tusi
Na saunoa Sister Beck o le tusi o le a aoaoina ai e tamaitai le auala e faataunuu ai faamoemoega o le Aualofa i o latou lava olaga, ma le avea ai o se usoga a tamaitai o ni soo e tausi feagaiga.
“O le a latou aoaoina ai le uiga o le faateleina o le faatuatua ma le amiotonu faaletagata lava ia, faamalolosia aiga ma auaiga, ma saili atu e fesoasoani i isi o loo manaomia le fesoasoani,” na ta’ua ai e Sister Beck i se faatalanoaga ma mekasini a le Ekalesia. “A oo ina vaai ia tamaitai ia i latou lava i le galuega a le Aualofa, ona mafai lea ona latou malamalama i le faigofie ona uunaia e tamaitai o le atinaega o le Ekalesia, i aso anamua ma aso e gata ai, ma mafai ai ona latou iloa lo latou faamoemoega ma lo latou faasinomaga.”
E talitonu Sister Beck e faapea o i latou e faitauina le tusi o le a aoao ai e ala i faataitaiga ma mataupu, i le ala e faalogo ai i le Agaga Paia ma maua faaaliga patino faaletagata lava ia. E mafai ai foi ona faamalolosia i latou ma uunaia i o latou olaga i aso faisoo, ma i o latou tofotofoga ma faigata.
“E anoanoai faataitaiga o le malosiaga o loo i ai i le tusi—tele le malosiaga e mafai ona tatou faataitai i ai,” na saunoa ai Sister Beck. “O lea, a oo i aso faigata, ou te faamoemoe o le a tuu faalatalata ane e tagata a latou tusi ina ia faigofie ona piki i luga ma faitau se tala se tasi po o se faataitaiga o le a faamalolosia ai i latou.”
Na saunoa foi Sister Beck e faapea, o le a oo atu le tusi i fale o aiga o le Ekalesia e ala atu i lima o tamaitai, ae e talitonu foi o ia o le a avea le tusi ma punaoa taua mo alii ma tamaitai. O le a fesoasoani e malamalama ai tamaitai talavou i le ala e avea ai i latou ma se vaega o le usoga a tamaitai tele i le lalolagi atoa, ma e mafai ona tuufaatasia ai tane ma ava i la latou galuega paia, o le taialaina o o latou aiga ma auauna atu i le Ekalesia.
Ina ua maea ona suesue i le tusi, na saunoa Dale Cook, le peresitene o le Siteki a Syracuse Utah Bluff, o le a avea o se punaoa taua e fesoasoani ai e le gata i tamaitai o le Ekalesia ia malamalama ai i a latou matafaioi o ni soo o Keriso, ae faapena foi i alii. “Faitau i ai ma vaai pe faapefea e [le Aualofa] ona femilosa’i ma soofaatasi i le perisitua,” na saunoa ai Peresitene Cook. “Ua fesoasoani ai ia te au ou te iloa ai le mana o loo i ai i lo’u toalua ma le [ala] e [atili] ai ona alofa ia te ia ma fesoasoani ma lagolagoina o ia.”
E Uiga i le Tusi
O le tusi o se punaoa mo suesuega faaletagata lava ia ma mo aoaoga i totonu o le aiga, i le Aualofa, ma i faatulagaga faale-Ekalesia. Ua maea ona auina atu i epikopo ma peresitene o paranesi, o e o le a galulue ma peresitene o le Aualofa e fuafua ai pe faapefea ona avea le tufatufaga o tusi o se faamanuiaga i tamaitai i uarota ma paranesi.
Ua faamoemoe e maua ia tusi i le lata i le luasefulu ma ona tupu gagana i le faaiuga o Ianuari 2012. O le tele lava o na gagana ua maua i luga o le initoneti, lea e mafai ai e tagata o le au paia ona maua ia vitio e fesootai i ai, o upusii e faasoa ai, ma faitauina fautuaga i le ala e faaaoga ai ma faasoa atu savali o i ai i le tusi. Alu i le lds.org/relief-society/daughters-in-my-kingdom. Kiliki i le “Additional Languages (PDF)” i le ogatotonu o le itulau i lalo o le “Related Resources.” O le a oso mai ai se lisi o gagana ua maua ai, i le itu taumatau o le isi itulau. E iu lava ina faaliliuina le uepisaite i isi mau gagana.
Ua fuafuaina se lomiga faavaamalo o le tusi i le gagana Peretania, Potukale, ma le Sipaniolo i le faaiuga o le tausaga ma o le a maua atu i Faletusi Autu ma le store.lds.org.
ATA NA PUEINA E RICK WALLACE