Ia Pipii i Feagaiga
Afai tatou te faatuatua ia Keriso ma pipii i a tatou feagaiga, o le a tatou mauaina le olioli lea o loo tautala i ai tusitusiga paia ma ua folafola mai e o tatou perofeta o aso e gata ai.
“Ia sii a’e i luga lou loto ma olioli, ma pipii i feagaiga ua e faia.”1 E le mafai ona ou faitauina lenei mau e aunoa ma le lagonaina o le olioli. E olioli lo’u loto pe a ou mafaufau i folafolaga ma faamanuiaga e tele ia ua avea o se vaega o lo’u olaga a o ou saili e pipii i feagaiga sa ou faia ma le Tama Faalelagi.
Talu ai ua maliliu uma o’u matua, ua tatau ai i lenei tausaga ona faamama lo la’ua fale ma sauniuni ai mo le faatauina atu. I nai masina na mavae atu nei, a o matou faamamaina ma nai o’u tei ma faavasega mea o le fale o o’u matua, sa matou mauaina ai ni talaaga faaleaiga ma le tele o pepa ma tusiga taua. O se mea matagofie le faitau i talaaga patino ma faamanuiaga faapeteriaka o o’u matua ma matua matutua. Sa faamanatu mai ai ia te au ia feagaiga sa ou faia ma tausia.
O le tina o lo’u tina o Ellen Hanks Rymer o se tina talavou i le 1912 i le taimi na maua ai lona faamanuiaga faapeteriaka. Ina ua ou faitauina lona faamanuiaga, o laina nei na uunaia ai a’u ma sa pipiimau i lo’u mafaufau: “Na filifilia oe a o lei faavaeina le lalolagi, ma o se agaga filifilia e fanau mai i lenei taimi. … O le a faalauteleina lau molimau ma o le a mafai ona e molimau atu. … Ua saili le faaoosala e faaumatia oe, ae afai o le a e pipiimau i le Atua, o le a le ia te ia [le faaoosala] se mana e faatamaia ai oe. O le a i ai ia te oe e ala i lou faamaoni le mana sili ma o le a sola ese le faaoosala mai ou luma ona o lou amiotonu. … A oo atu ia te oe le itula o le fefe ma tofotofoga, afai o le a e mapu ane i lou afeafe faalilolilo i le tatalo, o le a faamafanafanaina lou loto ma aveeseina mea faasoesa.”2
Na folafola atu i lo’u tinamatua afai o le a ia tausia ana feagaiga ma tumau i le Atua, o le a le mafai e Satani ona i ai sona mana e pulea ai o ia. O le a ia maua le mafanafana ma le fesoasoani i ona tofotofoga. Sa faataunuuina nei folafolaga i lona olaga.
O le aso ou te fia talanoa atu e uiga i le (1) taua o le pipii i feagaiga ma (2) le olioli ma le puipuiga e maua mai i le tausiga o feagaiga.
O le a ou faaaogaina ni nai faataitaiga mai le O Afafine i Lo’u Malo: O Le Talafaasolopito o le Galuega a le Aualofa. Ua faatumulia lea tusi i faataitaiga o tamaitai na mauaina le olioli sili i le tausiga o feagaiga.
O Le Taua o le Pipii i Feagaiga
“O loo ta’u mai i le Lomifefiloi o le Tusi Paia e faapea, o le feagaiga o se konekarate e faia i le va o le Atua ma le tagata. “O le Atua lava i lona finagalo ma e tusa ai ma lona agalelei, na faatuina tuutuuga, lea na talia e le tagata. … Ua faatulagaina le talalelei ina ia maua ai mataupu faavae ma sauniga e ala i feagaiga ma tuu ai lē na te taliaina i se matafaioi malosi ma se tiutetauave e faamamaluina ai le tautinoga.”3 I le fuaitau “pipii i feagaiga,” o le upu pipii o lona uiga “ia taofimau ma le mausali” i se mea.4
Ua tatou iloa mai tusitusiga paia ia alii ma tamaitai sa osifeagaiga ma le Atua. Na tuuina atu e le Atua ia faatonuga i mea e faia ina ia faamamalu ai na feagaiga, ma ina ua tausia na feagaiga, sa mulimuli mai ai ma faamanuiaga na folafolaina.
Mo se faataitaiga, e ala i le sauniga o le papatisoga, tatou te faia ai se feagaiga ma lo tatou Tama Faalelagi. Tatou te saunia i tatou lava mo le papatisoga e ala i le faatuatua i le Alii o Iesu Keriso, salamo i a tatou agasala, ma naunau e tauave i o tatou luga le suafa o Keriso. Tatou te faia se tautinoga e tausia poloaiga a le Atua ma manatua pea lava pea le Faaola. Tatou te osifeagaiga e “tauave avega a le tasi, ina ia mama.” Tatou te faailoa atu ua tatou naunau e faanoanoa faatasi ma faamafanafana atu ia i latou o e manaomia le faamafanafanaga.5
I totonu o malumalu paia, e maua ai isi sauniga ma faia ai isi feagaiga. I uluai aso o le Toefuataiga, sa naunau ia le Perofeta o Iosefa Samita mo le Au Paia ina ia mauaina faamanuiaga folafolaina o le malumalu. Na fetalai le Alii, “Ia tuu atu ia fausia lenei fale mo lo’u igoa, ina ia mafai ona Ou faaali atu ai i totonu a’u sauniga i lo’u nuu.”6
“O se tasi o faamoemoega o le Alii i le faatulagaina o le Aualofa o le saunia lea o Ona afafine mo faamanuiaga e sili atu o le perisitua, o loo maua i sauniga ma feagaiga o le malumalu. Sa faatalitali ma le naunautai tele ia … tuafafine i Navu ia mae’a le malumalu aua sa latou iloa, e pei ona sa folafola atu e le Perofeta o Iosefa Samita ia Mercy Fielding Thompson, o le faaeega paia o le a aumaia ai i latou ‘mai le pogisa i le malamalama ofoofogia.’”7
“E silia ma le 5,000 le Au Paia na lolofi atu i le Malumalu o Navu ina ua mae’a lona faapaiaga, ina ia mafai ai ona maua o latou faaeega paia ma sauniga o faamauga a o lei tuua mo la latou malaga” i le Vanu o Sate Leki.8 Na faaalu e Polika Iaga ma le toatele o taitai o le Ekalesia ma le aufaigaluega o le malumalu lo latou taimi, i le ao ma le po, e galulue ai i le malumalu ina ia mafai ai ona faatino lenei galuega taua mo le Au Paia.
O a tatou feagaiga e lagolagoina ai i tatou i taimi lelei po o taimi faigata. Na faamanatu mai e Peresitene Boyd K. Packer ia i tatou e faapea “o i tatou o ni tagata o le feagaiga. Ua tatou osifeagaiga e tuu atu a tatou punaoa o taimi ma tupe ma taleni—o mea uma ua tatou maua—i le mea e manao ai le malo o le Atua i le lalolagi. I se faaupuga faigofie, ua tatou osifeagaiga e faia mea lelei. O i tatou o tagata o le feagaiga, ma o le malumalu o le totonugalemu lea o a tatou feagaiga. O le puna o le feagaiga.”9
Ua faamanatu mai e le mau, “Ma o le a avea lenei ma a tatou feagaiga—o le a tatou savavali i sauniga uma a le Alii.”10
E maoae faamanuiaga tatou te maua pe a tatou pipii i a tatou feagaiga.
E Maua le Olioli ma le Puipuiga mai le Tausiga o a Tatou Feagaiga
I le Tusi a Mamona tatou te faitau ai i le lauga a le Tupu o Peniamina. Na ia aoao atu ona tagata e uiga ia Iesu Keriso, o le a afio mai o Ia i le lalolagi ma o le a feagai o ia ma ituaiga o mafatiaga uma. Na ia aoao atu i tagata o le a togiolaina e Keriso tagata uma mai a latou agasala, ma o Lona suafa o le a na o le pau lea o le suafa e mafai ona maua ai e le tagata le faaolataga.11
Ina ua uma ona faalogologo i nei aoaoga matagofie, sa lotomaulalo tagata ma mananao ma o latou loto atoatoa ia saoloto mai agasala ma ia faamamaina. Sa latou salamo ma tautino atu lo latou faatuatua ia Iesu Keriso. Sa latou osifeagaiga ma le Atua o le a latou tausia Ana poloaiga.12
“Sa afio ifo i o latou luga le Agaga o le Alii, ma faatumuina i latou i le olioli, ina ua latou mauaina se faamagaloga o a latou agasala, ma ina ua latou maua le filemu o le mafaufau, ona o le faatuatua tele ia Iesu Keriso.”13
O se tasi faataitaiga o le olioli e maua mai i le faamaoni i le tausiga o poloaiga a le Atua ma le faasoa atu o Lana talalelei i isi, o loo faaalia lea e Amona. Sa avea Amona ma ona uso ma meafaigaluega e fesoasoani ai i le fiaafe o tagata ia o mai ia Keriso. O nisi nei o upu na faaaoga e Amona e faamatala ai ona lagona ina ua anoanoai tagata e papatiso ma faia feagaiga ma le Atua:
“Ua tele se pogai tatou te olioli ai.”14
“Ua atoatoa lo’u olioli, ioe, ua tumu lo’u loto i le olioli, ma o le a ou olioli i lo’u Atua.”15
“E le mafai ona ou fai atu se vaega itiiti o le mea ua ou lagona.”16
“E lei i ai lava ni tagata na i ai se pogai tele naua latou te olioli ai e pei o i tatou.”17
O le faia ma tausia o feagaiga paia e mafai ai e i tatou ona maua le Agaga e mafuta ma i tatou. O le Agaga lena “o le a faatumulia ai lou agaga i le olioli.”18
O le Taua Lona Lua a le Lalolagi na matua’ia ai le tele o mafatiaga mo le toatele o tagata i le lalolagi atoa. Sa onosaia e le Au Paia i Siamani le tele o faigata. O se peresitene faatuatua o le Aualofa i Stuttgart, Siamani, o Sister Maria Speidel. I lona ta’ua ai o ona faigata, na ia saunoa ai: “O lo matou faatuatua i le Alii ma a matou molimau i lana Ekalesia, sa avea ma poutu o le malosi. … Matou te usuina ma le olioli pese o Siona ma tuu atu lo matou faatuatuaga i le Alii. Na te faaleleia mea uma.”19
Ou te toe fai atu, a o tausia e tagata o le ekalesia a latou feagaiga, sa latou lagonaina le olioli tusa lava pe fetaiai ma luitau ogaoga.
O Sarah Rich o se tamaitai amiotonu sa nofo i Navu, ma sa tofia e galue i le malumalu a o lei tutuliesea le Au Paia mai le aai. O ana upu nei e uiga i faamanuiaga o feagaiga o le malumalu: “O le tele o faamanuiaga sa matou mauaina i le maota o le Alii, ia sa matou fiafia ai ma mafanafana i le lotolotoi o o matou faanoanoaga uma ma sa mafai ai ona matou maua le faatuatua i le Atua, i le iloa ai o le a Ia taialaina i matou ma tausia i matou i le malaga e le mailoa o loo lupe.”20
Na faamae’a e le Au Paia anamua le Malumalu o Katelani, ma e toatele sa auai ai i le faapaiaga. Ina ua mae’a le faapaiaga, sa taliaina e le Alii le malumalu. Na ta’u atu e le Alii ia i latou o le a “matua olioli tele i faamanuiaga o le a sasaa atu … i luga o ulu o [Lona] nuu.”21
Ma o loo tele pea isi malumalu ua fausia i le salafa o le lalolagi, ma ua ou vaaia faamanuiaga ua oo mai i olaga o tagata o le ekalesia. I le 2008, sa ou molimauina ai le olioli i foliga o se ulugalii mai Iukureini a o la faamatala mai e uiga i le o atu i Freiberg, Siamani, ina ia maua o la’ua sauniga o le malumalu. O le malaga i le malumalu e 27-itula e o ai i le pasi ma e faapena foi le toe foi ane mo nei au paia faamaoni, ma sa le mafai ona la malaga soo. Sa matua faagaeetia i la’ua aua e le o toe mamao ona mae’a lea o le Malumalu o Kyiv, ona mafai lea ona la o soo i ai. O lea ua tatala nei lena malumalu, ma ua faitau afe i latou ua olioli ai i faamanuiaga iina.
I le faitauina o le talaaga patino o le tina o lo’u tina, sa ou aoaoina ai lona olioli tele i ana feagaiga. Sa fiafia o ia e alu i le malumalu ma faatino sauniga mo le fiaafe o i latou ua maliliu. O lana misiona lea i le olaga. Sa avea o ia o se tagata faigaluega i le malumalu mo le silia ma le 20 tausaga i le Malumalu o Manti Iuta. Sa ia tusia sa ia vaaia le tele o faamalologa faavavega ina ia mafai ai e ia ona tausia lana fanau ma auauna atu i isi e ala i le faia o o latou galuega i le malumalu. I le avea ai ma fanau a lana fanau, afai e i ai se mea sa matou iloa e uiga ia Tinamatua Rymer, o ia o se tamaitai amiotonu sa tausia ana feagaiga ma sa manao ia i matou ina ia faia foi faapena. Pe a faavasega e tagata a tatou meatotino pe a tatou oti, faamata o le a latou mauaina ni faamaoniga sa tatou tausia a tatou feagaiga?
Sa ta’u mai e lo tatou perofeta pele, o Peresitene Thomas S. Monson, ia i tatou i le konafesi aoao talu ai: “A tatou o i maota paia o le Atua, a tatou manatua feagaiga tatou te osia i totonu, o le a sili atu ona tatou mafaia ona onosaia tofotofoga uma ma faatoilaloina faaosoosoga taitasi. O totonu o lenei maota paia, o le a tatou maua ai le filemu; o le a faafouina ai ma faamalolosia i tatou.”22
Ou te toe fai atu, “Ia sii a’e i luga lou loto ma olioli, ma pipii i feagaiga ua e faia.”23 O le tausia o feagaiga o le olioli moni lea ma le fiafia. O le faamafanafanaga lea ma le filemu. O le puipuiga lea mai mealeaga o le lalolagi. O le tausia o a tatou feagaiga o le a fesoasoani ia i tatou i taimi o faigata.
Ou te molimau atu afai tatou te faatuatua ia Keriso ma pipii i a tatou feagaiga, o le a tatou mauaina le olioli lea o loo tautala i ai tusitusiga paia ma ua folafola mai e o tatou perofeta o aso e gata ai.
Uso pele, ou te alofa ia te outou ma e faamoemoe o le a outou mauaina le olioli tele i o outou lava soifuaga. I le suafa o Iesu Keriso, amene.