Aua Ne’i Galo A’u
O la’u tatalo ma faamanuiaga ia aua nei galo o outou o ni afafine moni faapelepele i le malo o le Atua.
O’u tuafafine pele, o se fiafiaga le faatasi ai ma outou i lenei aso. Ou te tulimataia lava lenei fonotaga aoao faaletausaga a le Aualofa ma savali e tuuina atu ai. Faafetai atu, tuafafine. O se faamamaluga taua mo au le tofiaina e Peresitene S. Monson e lauga atu ia te outou i le aso, ma faaopoopo atu ni nai manatu e lauga atu ai i tuafafine o le Ekalesia.
O se taimi e le’i mamao atu sa matou savalivali ai ma lo’u toalua ma lo ma afafine i se togalaau matagofie. Sa ou maofa i le mataina ma le matagofie o foafoaga a le Atua. Ona ou vaaia ai lea, i fuga mataina uma, o si tamai fugalaau. Sa ou iloaina le igoa o lenei fugalaau aua talu mai lo’u laitiiti, sa i ai so’u sootaga faapitoa i lea fugalaau. O le fugalaau e ta’u o le aua-nei-galo-au.
Ua ou le mautinoa lelei pe aisea ua tele naua ai le taua o lenei fugalaau itiiti ia te au i le aluga o tausaga. E le vave tosina atu i ai se vaai; e faigofie lava ona le iloa atu ona e punitia e fugalaau tetele ma sili atu ona lautetele; ae peitai, e tutusa lava le matagofie, ma lona lanu lea e atagia ai lagi e sili ona lanumoana—atonu o se tasi lea mafuaaga ou te fiafia tele i ai.
Ma o loo i ai le aioi faagalo gata i lona igoa. E i ai se tala faafagogo a Siamani e faapea, ina ua uma ona faaigoa e le Atua o laau iti uma, e tasi lava le laau sa le’i faaigoaina. Sa tautala atu se leo itiiti, “Aua ne’i galo a’u, le Alii e!” Ona tali atu lea o le Atua o lona igoa la lea.
O le afiafi nei, ou te fia faaaogaina ai lenei fugalaau laitiiti e fai ma faatusa. O petala e lima o le fugalaau itiiti o le aua-nei-galo-au, ua uunaia ai au e mafaufau i mea e lima tatou te nofouta i ai ia aua lava nei faagaloina.
Muamua, aua nei galo ona e onosai ia te oe lava.
Ou te fia faamatala atu se mea, ou te faamoemoe o le a outou faauigaina i lona aano moni: Ua silafia lelei lava e le Atua o oe ma a’u e le atoatoa.
Se’i o’u faaopoopo atu: Ua silafia lelei lava foi e le Atua, o tagata e te manatu ua atoatoa, e le atoatoa foi.
Ae peitai, tatou te faaaluina le tele o le taimi ma le malosi e faatusatusa ai i tatou lava i isi—e masani lava ona faatusatusa o tatou vaivaiga i o latou malosiaga. O lenei mea e mafua ai ona tatou fatuina ni faamoemoega mo i tatou lava ia e faigata ona ausia. O se taunuuga la, tatou te le patipatia lava a tatou taumafaiga lelei, aua e foliga mai e laiti atu nai lo mea e fai e se isi tagata.
E tofu tagata uma ma malosiaga ma vaivaiga.
E manaia tele le i ai o ou malosiaga.
Ma o se vaega o ou aafiaga i le olaga nei le i ai o ou vaivaiga.
E finagalo le Atua e fesoasoani mai ia i tatou ia liliu o tatou vaivaiga uma e avea ma malosiaga,1 peitai ua Ia silafia o lenei mea o se sini mo se taimi umi. E finagalo o Ia ia tatou atoatoa,2 ma afai tatou te tumau i le ala e avea ai ma soo, o le a i ai le aso o le a tatou atoatoa ai. E le o i ai se afaina i lou le’i oo atu i ai iina. Ia e galue pea i ai, ae tuu ia lou faasalaina o oe lava.
O’u tuafafine pele, o le toatele o outou e le uma lo outou tigaalofa ma le onosai i vaivaiga o isi. Faamolemole ia manatua foi, ia e tigaalofa ma onosai mo oe lava.
Ae o le taimi nei, ia e faafetai mo manuia laiti i totonu o lou aiga, o au fegalegaleaiga faaleaiga, au aoaoga ma galuega, lou auai i le Ekalesia ma le alualu i luma faaletagata lava ia. E faapei o fugalaau o le aua-nei-galo-au, atonu e foliga laitī nei manuia ia te oe ma atonu foi e le matauina e isi, ae e silafia i latou e le Atua ma e le o ni mea iti ia te Ia. Afai e te mafaufau e faapea, o le faamanuiaina e na o se rosa atoatoa po o se oketi matagofie, atonu ua e misia nisi o aafiaga sili ona matagofie o le olaga.
Mo se faataitaiga, o le manao ia e maua se afiafi faaleaiga “atoatoa e pei o se atapu’e” i vaiaso taitasi—e ui o le faia faapea e te faanoanoa ai ma faanoanoa ai tagata uma e siomia oe—atonu e le o le filifiliga sili lea ona lelei. Nai lo lena, ia fesili ifo ia te oe lava, “O le a se mea e mafai ona tatou faia o se aiga o le a avea ma se mea fiafia ma faaleagaga ma atili ai ona tatou nonofo vavalalata faatasi?” O lena ituaiga afiafi faaleaiga—e tusa lava pe faatauvaa ona faamoemoega ma le faataunuuga—e i ai taunuuga umi e sili atu ona lelei.
O la tatou malaga agai atu i le atoatoa e umi, ae e mafai ona tatou maofa ma fiafia i laasaga aupito iti o lena malaga.
Lona lua, aua nei galo le eseesega o se ositaulaga lelei ma se ositaulaga faavalevalea.
O se ositaulaga e taliaina o lo tatou tuueseina lea o se mea lelei mo se mea e sili atu ona aoga.
O le ositaulagaina o se moe laitiiti ina ia fesoasoani i se tamaitiiti ua malu’ia, o se ositaulaga lelei lea. O le ala i le po atoa, ma lamatia ai lo tatou lava ola maloloina, ina ia fai ni teuga mo se ofu o lau tama mo le Aso Sa, atonu o se ositaulaga faalēlelei lea.
O le tuuto atu o nisi o o tatou taimi i le suesueina o tusitusiga paia po o le tapena e aoao atu se lesona, o se ositaulaga lelei lea. O le faaaluina o ni itula se tele i le su’iina o le autu o le lesona i luga o ie sii ulo mo tagata taitoatasi o lau vasega, atonu e le o se ositaulaga lelei lea.
E eseese uma lava tagata ma tulaga, ma o se ositaulaga lelei i se tulaga se tasi atonu o se ositaulaga faavalevalea lea i se isi tulaga.
E faapefea ona tatou iloa le eseesega mo o tatou lava tulaga? E mafai ona tatou fesili ifo ia i tatou lava, “Pe o tuuto atu ea lo’u taimi ma le malosi i mea e sili ona aoga?” E tele lava mea lelei e fai, ae e le mafai ona tatou faia na mea uma. E sili ona fiafia lo tatou Tama Faalelagi pe a tatou ositaulagaina se mea lelei mo se mea e sili atu, i se vaaiga i le faavavau. O nisi taimi, o le uiga o lena mea o le tausia o se fugalaau manaia itiiti o le aua-nei-galo-au nai lo o se togalaau o loo fuga taufuifui.
Lona tolu, aua nei galo ona e fiafia i le taimi nei.
I le tala manaia a tamaiti o, Siale ma le Falegaosi Sukalati, sa nana ai e le alii faisukalati faalilolilo o Willy Wonka se pepa auro i ni sukalati se lima ma faasilasila atu o ai lava le tagata e mauaina se tasi o na pepa, o le a manumalo i se maimoaga taamilo i lona falegaosi sukalati ma se sapalai o sukalati i le olaga atoa.
Sa tusia i luga o ia pepa auro taitasi le savali lenei: “Faafeiloai atu ia te oe, le tagata laki ua mauaina le Pepa Auro lenei … ! E tele mea mananaia o loo teuina mo oe! E tele mea matagofie e te ofo ai o loo faatalitali atu mo oe! … Mealilo ma mea ofoofogia e te te’i ai … o le a … faafiafia ai … ma maofa ai ma faafenumia’i ai oe.”3
I lenei tala faamama’i a tamaiti, sa tau fai faamemelo ai tagata uma o le lalolagi ia maua le pepa auro. Sa manatu nisi o lo latou fiafia atoa i le lumanai e faalagolago lea i lo latou mauaina pe leai foi o se pepa auro. I lo latou popolevale, sa amata ai ona galo i tagata le fiafia faatauvaa sa masani ona latou maua i se fasisukalati. Sa avea le fasisukalati lava ia ma se mea faaosoita tele pe a le maua i ai se pepa auro.
E toatele naua tagata i aso nei o loo faatalitali mo a latou lava pepa auro—o le pepa lea ua latou talitonu o loo i ai le autu o le fiafia sa latou moemiti i ai. Mo nisi, atonu o le pepa auro o se faaipoipoga atoatoa; mo isi, o se fale e pei o fale o loo faaalia i faavaa o mekasini pe atonu foi o le saoloto mai le atuatuvale po o le popole.
E leai se mea e leaga ai faanaunauga amiotonu—tatou te faamoemoe ma saili i mea na e “mama, matagofie, pe logoleleia pe tauleleia.”4 E oo mai le faafitauli pe a tatou faapafala lo tatou fiafia ae tatou faatalitali mo se mea e tupu i le lumanai—la tatou pepa auro—ia oso mai.
Na pau lava le mea sa manao ai se tasi o tamaitai o le faaipoipo lea i le malumalu i se alii amiotonu e umia le perisitua ma ia avea ma se tina ma se avā. Sa moemiti o ia i lenei mea i lona olaga atoa, ma oka, se tina ina a lelei ma se ava agalelei o le a avea ai o ia. O le a tumu lona aiga i le alofa ma le agalelei. O le a le tautalagia ai se upu faatiga. O le a le mu lava se meaai. O lana fanau foi, nai lo le tafafao ma a latou uo, o le a mananao e faaalu o latou afiafi ma faaiuga o vaiaso faatasi ma Tina ma Tama.
O lana pepa auro lea. O le mea lea e tasi sa manatu o ia ua faalagolago i ai lona ola atoa. O le mea lea e tasi i le lalolagi atoa sa matuai faananau i ai o ia.
Peitai sa le’i tupu lava. Ma a o alu pea tausaga, sa amata ona le toe fia fegalegaleai [ma isi tagata], ua inoino, ma iu ai ina ita. Sa le malamalama o ia pe aisea ua le foaiina mai ai e le Atua lona manaoga amiotonu lenei.
Sa faigaluega o ia o se faiaoga i le aoga tulagalua, ma o le i ai faatasi ma tamaiti i le aso atoa, na atili faamanatu atu ai ia te ia sa le’i maua lava lana pepa auro. A o mavae tausaga, sa atili ai lona le fiafia ma le le fia fegalegaleai ma isi tagata. Sa le fiafia tagata e pipii i ai ma ua aloaloese mai ia te ia i taimi uma latou te mafai ai. Sa iu foi ina faapa atu lona ita i tamaiti i le aoga. Sa oo ina itaitagofie, ma sa fai ma oso lona le fiafia ma le atuatuvale i le tuua toatasi.
O le leaga o lenei tala, o lenei tamaitai pele, ona o lona le fiafia i le pepa auro, sa le mafai ai ona ia matauina ia faamanuiaga sa i ai lava ia te ia. Sa le’i i ai sana fanau i lona aiga, ae sa siomia e i latou o ia i lona potuaoga. Sa le’i faamanuiaina o ia i se aiga, ae sa tuuina atu e le Alii ia te ia se avanoa lea e toalaiti ni tagata e mauaina—o le avanoa e uunaia ai mo le lelei ia olaga o le faitau selau o tamaiti ma aiga i le avea ai o se faiaoga.
O le lesona i i o le, afai tatou te faaaluina o tatou aso i le faatalitali mo ni rosa mananaia, o le a tatou misia le matagofie ma le mananaia o fugalaau laiti o le aua-nei-galo-au o loo siomia ai i tatou.
E le faapea ua ou fai atu e tatau ona tatou lafoaia le faamoemoe pe ta’umāmāina ai a tatou sini. Aua lava nei tuua le taumafai mo le mea sili o loo i totonu ia te outou. Aua nei tuua le faamoemoe mo manaoga amiotonu uma lava o lou loto. Ae aua foi nei moeiini ou mata ma lou loto i le matagofie o nai taimi masani i aso taitasi lea e maua ai se olaga tamaoaiga ma sologa lelei.
O tagata aupito sili ona fiafia ua ou iloa, e le o i latou o e ua maua a latou pepa auro; ae o i latou ia o e, a o tulitulimatagauina ni sini aoga, latou te maua ma teufatuina le matagofie ma le manaia o taimi o aso taitasi. O i latou ia o e, o loo lalagaina, i lea filo ma lea filo, se ielalaga o le agaga faafetai ma le mata’ina i o latou olaga. O i latou ia o loo fiafia moni.
Lona fa, aua nei galo le “aisea” o le talalelei.
O nisi taimi, i mea masani o o tatou olaga, tatou te le mafaufauina ai le sopoloa o la tatou vaai i se vaega taua o le talalelei a Iesu Keriso, e pei uma lava o le sopoloa o le vaai a se tasi i se fugalaau matagofie ma le maaleale o le aua-nei-galo-au. I a tatou taumafaiga maelega e faataunuu ia matafaioi uma ma tiute tatou te tauaveina o ni tagata o le Ekalesia, o nisi taimi tatou te vaai atu ai i le talalelei o se lisi umi o galuega e ao ona tatou faaopoopo atu i la tatou lisi ua matuai umi lava “o mea e fai”, o se poloka o le taimi lea e ao ona tatou faaofiina i a tatou fuafuaga pisi. Tatou te taulai atu i le o le a le mea e finagalo le Alii tatou te faia ma le pe faapefea ona tatou faia, ae o nisi taimi e galo ai ia i tatou le aisea.
O’u tuafafine pele, o le talalelei a Iesu Keriso e le o se matafaioi; o se auala, ua faataatia e lo tatou Tama agalelei, e tau atu i le fiafia ma le filemu i lenei olaga ma le mamalu ma le fiafia e le mafaamatalaina i le olaga a sau. O le talalelei o se sulu lea e ati mai i le olaga nei ma faamalamalamaina ai le ala i o tatou luma.
E ui o le malamalama i le “o le a” ma le “pe faapefea” o le talalelei e alagatatau, ae o le afi faavavau ma le mamalu o le talalelei e fotuae mai i le “aisea.” A tatou malamalama i le aisea ua tuuina mai ai e lo tatou Tama Faalelagi lenei mamanu mo le ola ai, pe a tatou manatua le aisea ua tatou tautino ai i le faia ia avea o se vaega faavae o o tatou olaga, e le toe avea le talalelei o se avega ma, nai lo lena, e avea o se fiafiaga ma se olioliga. E iu ina pele ma matagofie.
Aua nei o tatou savavali i le ala o le avea ma soo ma tatou punonou i lalo, ae na o le mafaufau i galuega ma tiute o i o tatou luma atu. Ia aua nei o tatou savavali ma le le nofouta i le matagofie o laufanua mamalu faalelalolagi ma faaleagaga ua siomia ai i tatou.
Tuafafine pele, ia outou sailia le mamalu, ma le matagofie, ma le olioli tele o le “aisea” o le talalelei a Iesu Keriso.
O le “o le a” ma le “pe faapefea” o le usiusitai e faailoga ai le ala ma tatou tumau ai i le ala sa’o. O le “aisea” o le usiusitai e faapaiaina ai a tatou faatinoga, ma liua ai le mea masani i le mamalu. E faalauteleina ai a tatou faatinoga laiti o le usiusitai i ni faatinoga o le faapaiaina.
Lona lima, aua nei galo e alofa le Alii ia te oe.
A o ou laitiiti, a ou tilotilo i fugalaau laiti o le aua-nei-galo-au, o isi taimi ou te lagona ai e tai pei lava a’u o lena fugalaau—e laitiiti ma faalētaua. Sa ou le iloa pe o le a faagaloina au e lo’u aiga po o lo’u Tama Faalelagi.
O ni tausaga mulimuli ane, e mafai ona ou toe tepa i tua i lena taulealea laitiiti ma le agalelei ma le alofa. Ma ua ou iloa nei—e lei faagaloina lava a’u.
Ma ua ou iloa foi se isi mea: i le avea ai ma se Aposetolo a lo tatou Matai o Iesu Keriso, ou te folafola atu ma lo’u mautinoa atoa ma le talitonuga maumaututu o lo’u loto—e le o faagaloina foi oe!
E le o faagaloina oe.
Tuafafine, pe o fea lava o e i ai, pe o a foi ou tulaga o i ai, e le faagaloina lava oe. E tusa lava pe o le a le foliga faaletonu o ou aso, e tusa lava pe o le a lou lagonaina o lou faalētaua, e tusa lava pe o le a le lofituina ua e manatu ua e i ai, e le o faagaloina lava oe e lou Tama Faalelagi. O le mea moni, e alofa o Ia ia te oe, i se alofa e le mavae.
Mafaufau foi la i ai: O loo silafia ma manatua oe e le Tagata e aupito sili ona tamalii, mamana, ma mamalu i le lalolagi atoa! O loo alofaina oe e le Tupu o le vateatea e le gata ma faavavau!
O Lē na foafoaina ma silafia fetu, e silafia foi oe ma lou igoa—o outou o afafine o Lona malo. Sa tusia e le Fai Salamo:
“A ou vaai atu i lou lagi, o le galuega a ou tamatamai lima, o le masina atoa ma fetu na e faia;
“Se a ea le tagata e te manatu mai ai ia te ia? …
“Aua ua e faamaulalo ane teisi o ia i agelu, ua e faapaleina foi o ia i le mamalu ma le matagofie.”5
E alofa le Atua ia te oe aua o oe o Lona afafine. E alofa o Ia ia te oe e ui e i ai taimi atonu e te lagonaina ai le tuulafoaiina pe faia foi ni mea sese.
O le alofa o le Atua ma le mana o le talalelei toefuataiina e laveai ma faaolaina ai. A faapea e te faatagaina Lona alofa paia i lou olaga, e mafai ona fusifusia ai soo se manu’a, faamalolo i soo se tiga, ma faamafanafana ai soo se faanoanoaga.
O’u tuafafine pele o le Aualofa, o loo e latalata atu i le lagi nai lo le mea e tatau ona i ai. Ua faauuina oe mo mea e sili atu nai lo mea e mafai ona e iloa. Ia faaauau ona e alualu i luma i le faatuatua ma le amiotonu patino. Talia le talalelei toefuataiina a Iesu Keriso e avea ma au auala e te ola ai. Opomau i le meaalofa o le malosi i totonu o lenei Ekalesia maoae ma le moni. Faapelepele i le meaalofa o le auauna atu i le faalapotopotoga faamanuiaina o le Aualofa. Ia faaauau ona faamalolosia aiga ma auaiga. Faaauau ona saili ma fesoasoani atu i isi o loo manaomia lau fesoasoani ma le fesoasoani a le Alii.
Tuafafine e, o loo i ai se mea musuia ma le faagaeetia i le fugalaau itiiti o le aua-nei-galo-au. Ou te faamoemoe o le a avea ma se faailoga o mea iti e avea ai o outou olaga o ni olaga fiafia ma suamalie. Aua nei galo e tatau ona outou onosai ma alolofa ia te outou lava, o isi osigataulaga e sili atu nai lo isi, tou te le tau faatalitali mo se pepa auro ina ia outou maua ai le fiafia. Faamolemole aua nei galo o le “aisea” o le talalelei a Iesu Keriso o le a musuia ma siitia ai oe. Ma aua lava nei galo e silafia, e alofa, ma faapelepele lou Tama Faalelagi ia te oe.
Faafetai mo le tagata ua avea ai oe. Faafetai mo le anoanoai o faatinoga o le alofa ma le auauna atu o loo e ofoina atu i tagata e toatele. Faafetai mo mea uma o le a e faia e aumai ai le olioli o le talalelei i aiga, i le Ekalesia, i lou nuu, ma i malo o le lalolagi.
Tuafafine, matou te alolofa ia te outou. O la’u tatalo ma faamanuiaga ia aua nei galo o outou o ni afafine moni faapelepele i le malo o le Atua, i le suafa paia o lo tatou Faaola pele, o Iesu Keriso, amene.