Tamaiti

Saunia e Elder Neil L. Andersen

O Le Korama a Aposetolo e Toasefululua

Ou te molimau atu e uiga i le faamanuiaga maoae o fanau ma le fiafia latou te aumaia ia i tatou i lenei olaga ma le faavavau.

Pe a tatou vaai atu i mata o se tamaitiiti, ua tatou vaai i se atalii po o se afafine o le Atua o le na tatou tutu faatasi i le muai olaga.

O se faamanuiaga maoae mo se tane ma se ava le fanauina o ni fanau ina ia maua ni tino faaletino o nei fanau agaga a le Atua. Tatou te talitonu i aiga ma e tatou te talitonu foi i le fanau.

Pe a fanau mai se tamaitiiti i se tane ma se ava, ua la faataunuuina se vaega o le fuafuaga a lo tatou Tama Faalelagi i le aumaia o fanau i le lalolagi. Sa fetalai mai le Alii, “O la’u galuega ma lo’u mamalu lenei—ia aumaia le tino ola pea ma le ola faavavau o le tagata.”¹ A o le’i oo mai le tino ola pea, e tatau ona i ai le tino faaletino.

O le aiga ua faauuina e le Atua. O aiga o le ogatotonu lea o le fuafuaga a lo tatou Tama Faalelagi i luga o lenei fogaeleele ma le faavavau atoa. Ina ua uma ona tuufaatasia ia Atamu ma Eva i le faaipoipoga, na faitauina faapea le mau, “Ua faamanuia foi e le Atua ia te i laua, ma ua fetalai atu le Atua ia te i laua, ia fanafanau ia, ma ia uluola, ma ia tumu ai le lalolagi.”² I o tatou aso ua tautino mai ai perofeta ma aposetolo e faapea, “O le uluai poloaiga na tuuina e le Atua ia Atamu ma Eva, e faatatau i lo la agavaa mo tulaga faamatua, o se tane ma se ava. Matou te tautino atu o le poloaiga a le Atua i Lana fanau ia fanafanau ma uluuluola ai le lalolagi, ua faamalosia ma faatumauina.”³

E le o faagaloina pe ua tuu esea lenei poloaiga e Le Ekalesia a Iesu Keriso o le Au Paia o Aso e Gata Ai.⁴ Matou te faailoa atu ma le agaga faafetai tele, le faaalia o le faatuatua maoae o tane ma ava (aemaise lava o tatou taitoalua) i lo latou naunautai e fanauina se fanau. O le taimi e fanau ai se tamaitiiti ma pe toa fia foi le aofai o le fanau o ni faaiuga faalilolilo lea e faia i le va o se tane ma le ava ma le Alii. O ni faaiuga paia ia—o ni faaiuga e ao ona faia ma se tatalo faamaoni ma galue i ai ma le faatuatua tele.

I tausaga ua mavae atu sa faasoa mai ai e Elder James O. Mason o le Fitugafulu lenei tala ia te au: “O le fanau mai o le ma pepe lona ono sa avea lea ma se aafiaga e le galo. A o ou sioa atu i lenei afafine matagofie ma aulelei i totonu o le potu o pepe i nai minute talu lona fanau mai, sa manino lava lo’u faalogoina o se leo o faapea mai, ‘O le a i ai se isi [pepe], ma o se tama.’ Ma lo’u faavalevalea tele, sa ou faanatinati atu i autafa o le moega o lo’u toalua lea sa matua le lavā lava ma ta’u atu ia te ia le tala manaia. Sa matua sese lava lo’u taimi.”⁵ Sa tulimatai atu le au Mason i lea tausaga ma lea tausaga mo le fanau mai o le la tamaitiiti lona fitu. Na mavae tausaga e tolu, fa, lima, ono, ma le fitu. Na iu lava, ina fanau mai le la pepe lona fitu ina ua mavae le valu tausaga—o se pepe tama.

Sa saunoa mai Peresitene Thomas S. Monson ia Aperila ua tea:

“I se tasi taimi na tele lava ona tutusa tulaga faatonuina o le Ekalesia ma tulaga faatonuina o malo, o lea ua i ai se va tele i lo tatou va, ma o loo faatupulaia pea lena va. …

Na faamatala e le Faaola o tagata, o Ia lava sa i ai i le lalolagi ae lē o se tasi o le lalolagi. E mafai foi ona tatou i ai i le lalolagi ae le o ni o le lalolagi pe a tatou teenaina manatu faavae sese ma aoaoga sese ma tumau ma le faamaoni i mea ua poloaiina ai i tatou e le Atua.⁶

O le tele o leo i le lalolagi i le taimi nei o loo tuuitiitia ai le taua o le fanauina o se fanau pe o fautua mai ina ia tolopo pe faaitiitia ia fanau i totonu o se aiga. Talu ai nei na faasino ai au e la’u fanau teine i se uepisaite na tusia e se tina Kerisiano (e le auai i le tatou faatuatuaga) e toalima le fanau. Sa ia faaalia ai ni ona manatu: “[O le tuputupu ae] i lenei aganuu, ua matua faigata ai ona maua se vaaiga faaletusipaia e uiga i le tulaga faatina. … O fanau e lei oo ina faatauaina kolisi. E lei taitai faitaulia i femalagaaiga i le lalolagi, ua mautinoa lea tulaga. E lei oo i le taimi e tatau ai ona o e tafafao i po. E lei oo foi i le taimi e faamanaia ai lou fuaitino i le faletaalo. E lei oo foi i soo se galuega e te mauaina pe faamoemoe e maua.” Ona ia toe faaopoopo mai lea: “O le tulaga faatina e le o se mea e te faia e fai ma mea e te fiafia i ai, ae o se valaauga. E te le faaputuputuina tamaiti ona e te manatu e aulelei nai lo le amiolelei. E le o se mea e te faia pe a fetaui ma mea ua e faatulagaina. O le i ai o se fanau, o le mea lea na tuu atu ai e le Atua ia te oe le taimi.”⁷

O le i ai o se fanau iti e le faigofie. E faigata i le tele o aso. Sa oso i luga o se pasi se tina talavou ma se fanau e toafitu. Sa fesili le ave pasi: “O lau fanau uma lea tamaitai? Po o se tafaoga?”

“O la’u fanau uma lava ia,” o le tali lea a le tina. “Ma e le o se tafaoga!”⁸

A o faateleina le tuu fesili mai o le lalolagi, “O lau fanau uma lea?” matou te faafetai atu mo le fausiaina i totonu o le Ekalesia o se nofoaga o le saogalemu mo aiga, lea tatou te faamamalu ai ma fesoasoani i tina o loo i ai fanau.

E le lava ni upu, a se tama amiotonu, e faailoa atu ai le agaga faafetai ma le alofa o loo ia lagonaina mo le meaalofa e le mafuatiaina a lona toalua o le fanauina ma le tausiaina o fanau.

Sa i ai se aafiaga o Elder Mason i le taimi faatoa atoa ni nai vaiaso talu ona faaipoipo, lea na fesoasoani i lona faatulagaina muamua o ona tiutetauave faaleaiga. Fai mai a ia:

“Sa ma fetuutuunai ma Marie, ina ia faaumaina la’u aoga faafomai o le a talafeagai le faigaluega pea o Marie. E ui e le o se mea na ma [mananao] e fai, ae o le a faamulimuli le fai o ni tamaiti. [Ae a o ou matamata i se mekasini a le Ekalesia i le fale o o’u matua] sa ou vaai ai i se tusiga a Elder Spencer W. Kimball, a o avea o ia i lena taimi ma se tasi o le Korama a le Toasefululua, [na faamamafaina ai] tiutetauave e fesootai ma le faaipoipoga. E tusa ai ma manatu o Elder Kimball, o se tasi o tiutetauave paia, o le faateleina ma faatumuina le lalolagi. Sa [latalata] le fale o o’u matua i le Ofisa o le Pulega a le Ekalesia. Sa ou savali faanatinati atu loa i le ofisa, ma e tolusefulu minute talu ona ou faitauina lana tusiga, ae ou saofai faafesagai ma Elder Spencer W. Kimball i luga o le kesi.” (E le faigofie lenei tulaga i le asō.)

“Sa ou faamatala atu i ai sa ou manao e avea ma se fomai. E leai se isi auala ae na o le tolopoina o le faia o se ma fanau. Sa faalogologo ma le onosai Elder Kimball ona tali mai lea o ia i se leo lemu, ‘Uso Mason, mata e finagalo le Alii e te solia se tasi o ana poloaiga taua ina ia avea ai oe ma se fomai? O le fesoasoani mai o le Alli, e mafai ai ona fanau mai se lua fanau ma avea foi [oe] ma se fomai. O fea lou faatuatua?’”

Sa faamatalaina pea e Elder Mason: “E le’i atoa le tausaga mulimuli ane ae fanau le ma pepe muamua. Sa ma galulue malosi ma Marie ma sa toina mai e le Alii pupuni o le lagi.” Sa faamanuiaina le au Mason i nisi tamaiti se toalua a o lei faauu o ia mai le aoga faafomai i le fa tausaga mulimuli ane.⁹

I le lalolagi atoa, e le o tulaga lelei le tamaoaiga ma e le o mautu ia tulaga tautupe i lenei vaitaimi. Na saunoa mai Peresitene Thomas S. Monson i le konafesi aoao ia Aperila: “Afai o loo e popole e uiga i le tausiga i mea tau tupe o se avā ma se aiga, ou te fia faamautinoa atu ia te oe e leai ma se maasiasi i se ulugalii o loo tau faasoasoa tatau ma teu se tupe. O le mea masani lava i le taimi o nei luitau o le a oulua tuputupu ae ai faatasi ma le vavalalata a o oulua aoao e ositaulaga ma faia ni faaiuga faigata.”¹⁰

O le fesili maatiati a Elder Kimball, “O fea lou faatuatua?” tatou te liliu atu ai i tusitusiga paia.

E le o le Faatoaga o Etena lea na fanau ai e Atamu ma Eva le la tama muamua. O le tuua o le faatoaga, “Sa amata ona galueaiina e Atamu [ma Eva] le laueleele. … Ma sa iloa e Atamu lana ava, ma sa [fanauina] … atalii ma afafine, ma sa amata ona latou fanafanau ma uluola i le lalolagi.”¹¹

E le o le la fale i Ierusalema, lea sa i ai auro, siliva, ma mea taua, lea sa faaalia ai e Liae ma Sarai le faatuatua, ma fanau ai le la fanau tama o Iakopo ma Iosefa. Ae o le togavao. Sa talanoa mai Liae e uiga i lona atalii o Iakopo o “lana ulumatua na fanauina i aso o lou puapuaga i le vao.”¹² Sa fai atu Liae e uiga ia Iosefa, “Sa fanauina oe i le vao o [ma] puapuaga; ioe, o aso o [lo ma] faanoanoa tele na fanauina ai oe e lou tina.”¹³

I le tusi o Esoto sa faaipoipo ai se tane ma se fafine, ma galulue i le faatuatua, ma fanau ai se pepe tama. E le’i i ai se faailo i le faitotoa o i luma e faafeiloai ai lona fanau mai. Sa la nanaina o ia aua na faatonuina e Farao ia pepe tama uma e fananau mai i tagata Isaraelu ina ia “lafo i le vaitafe.”¹⁴ Tou te iloa le tala atoa: sa faataoto ma le alofa lenei pepe i totonu o se tamai ato laau, ma tuu i totonu o le vaitafe, sa vaavaaia e lona tuafafine, ma maua ai e le afafine o Farao, ma tausi ai e lona lava tina moni. Sa toe faafoi atu le tamaitiiti i le afafine o Farao, lea na ia tausia e fai ma ana tama ma faaigoa ia te ia o Mose.

O se tala e sili ona pele e faatatau i se pepe na fanau mai, e leai se potu teuteuina po o se moega pepe—ae na o se faatanoa e fafaga ai manu na avea ma moega mo le Faaola o le lalolagi.

I “taimi sili [ma] … taimi faigata,”¹⁵ e le’i faagaloina e Au Paia faamaoni a le Atua, o loo galulue ma le faatuatua, pe lafoai, pe le’i popole i ai i “poloaiga a le Atua … ina ia faateleina ma faatumuina le lalolagi.”¹⁶ Tatou te agai i luma i le faatuatua—ma iloa ai o le faaiuga i le aofai o le fanau ma le taimi e fananau ai e faia lea i le va o le tane ma le ava ma le Alii. E le tatau ona tatou faamasino atu le tasi i le isi e uiga i lenei mataupu.

O le fanauina o se fanau o se mataupu maaleale ma e mafai ona matua faatiga lava mo tamaitai amiotonu o e le maua le avanoa e faaipoipo ai ma faia se aiga. Mo outou na tamaitai faamamaluina, e silafia e lo tatou Tama Faalelagi a outou tatalo ma faanaunauga. E ese lo matou faafetai mo a outou faatosinaga ofoofogia, e aofia ai le aapa atu ma lima alofa i tamaiti o e manaomia lo outou faatuatua ma malosiaga.

O le fanauina o se fanau e mafai foi ona avea ma se mataupu e nutimomoia ai le loto mo ulugalii amiotonu o e ua faaipoipo ae iloa ifo e le mafai ona maua sa laua lava fanau na la faamoemoeina ma le naunautai pe mo se tane foi ma le ava o e fuafua ia maua se aiga toatele ae e faamanuiaina i se aiga toalaiti.

Tatou te le o mafai ona faamatalaina i taimi uma ia faigata o lo tatou olaga faaletino. O nisi taimi ua foliga mai ua le talafeagai le olaga—aemaise lava pe afai o lo tatou naunautaiga sili o le faia o le mea tonu lava lea ua poloai mai ai le Alii. I le avea ai ma auauna a le Alii ou te faailoa atu ia te outou o lenei folafolaga e mautinoa: “O tagata faamaoni o le ekalesia o ē e le faatagaina e o latou tulaga i latou ina ia maua ia faamanuiaga o le faaipoipoga e faavavau ma le tulaga faamatua i lenei olaga, o le a mauaina faamanuiaga folafolaina uma i le faavavau, [pe afai] latou te tausia feagaiga sa latou osia ma le Atua.”¹⁷

Sa faamatala mai ia te au e Peresitene J. Scott Dorius o le Misiona i Sisifo o Peru Lima le tala lenei. Fai mai a ia:

“Ua 25 tausaga talu ona ma faaipoipo ma Becky ma e le’i fanau lava [pe vaetamaina] se la fanau. Sa ma siitia solo i le tele o taimi. Ma o le faailoa atu o i maua i nei tulaga fou taitasi sa avea ma se tulaga maasiasi ma e o nisi o taimi e tiga. Sa mafaufau tagata o le uarota pe aisea [na le maua] ai se ma fanau. E le na o i latou sa mafaufau i ai.

“Ina ua tofia au e avea ma se epikopo, sa [faaalia] le popole o tagata o le uarota i le leai o sou tomai e uiga i tamaiti ma le autalavou. Sa ou faafetai atu ia i latou mo le latou palota lagolago ma talosagaina i latou e faatagaina au e faataitai ni ou tomai i le tausia o se tamaitiiti i a latou fanau. Sa latou faatagaina au ma le alofa.

“Sa ma faatalitali, ma maua se vaaiga, ma aoao ai i le onosai. Ina ua mavae le 25 tausaga talu ona ma faaipoipo, na oo mai ai se pepe o le vavega i o maua olaga. Sa ma vaetamaina ia Nicole e lua tausaga ma Nikolai faatoa fanau. Ua faaamuia mai ni tagata ese ia i maua i le fanau matagofie a le ma fanau. Sa ma ataata ma faapea atu, ‘O le ma fanau i latou. Sa ma ola i se olaga e agai i tua.’”¹⁸

Uso e ma tuafafine, e le tatau ona tatou ola faamasinosino le tasi i le isi i lenei tiutetauave paia ma le patino.

“Ona tago lea o [Iesu] i le tama itiiti … i ona lima [ma] fetalai atu …

“Ai se talia se tama itiiti faapenei i lou nei igoa, ua talia e ia o au: ai se … talia au, e le o au ua ia talia … a o ia na auina mai au.”¹⁹

O se faamanuiaga matagofie le taliaina o ni atalii ma ni afafine o le Atua i totonu o o tatou aiga.

Sei o tatou saili ma le lotomaualalo ma le agaga tatalo ina ia malamalama ma talia ia poloaiga a le Atua, ma faalogologo atu ma le migao i le siufofoga o Lona Agaga Paia.

O aiga e ogatotonu i le fuafuaga e faavavau a le Atua. Ou te molimau atu e uiga i le faamanuiaga maoae o fanau ma le fiafia latou te aumaia ia i tatou i lenei olaga ma le faavavau, i le suafa o Iesu Keriso, amene.