O Le Alofa Atoatoa e Faateaeseina ai le Fefe
Afai o le a outou tali atu i valaaulia e faasoa atu o outou talitonuga ma lagona e uiga i le talalelei toefuataiina a Iesu Keriso, o le a avea se agaga o le alofa ma se agaga o le lototele ma au soa tumau.
Peresitene Monson, ua matua faagaeetia i matou uma i le talafou matagofie o ni malumalu fou. Aemaise o se talafiafia mo le anoanoai o o tatou aiga i le setete o Wyoming.
E faia e le Ekalesia se mea i le lalolagi atoa pe a fausia se malumalu fou lea o se tu masani taatele i le Iunaite Setete ma Kanata—e tatalaina mo maimoaga. I le gasologa o vaiaso a o lumanai le faapaiaga o le malumalu fou, tatou te talaia ai faitotoa ma valaaulia ia taitai faalemalo ma faalelotu i le lotoifale, o tagata o le Ekalesia i le lotoifale, ma tagata o isi faatuatuaga ina ia maimoaina le malumalu fou faatoa fauina.
O mea matagofie nei o loo tutupu e fesoasoani ai i tagata e le o masani i la tatou Ekalesia e aoao ai sina mea itiiti e uiga i ai. E toetoe lava o tagata uma e asiasi atu i se malumalu fou e maofa i lona matagofie i fafo ma totonu. E faafiafiaina i latou i mamanu ma gauai atu i auiliiliga o foliga uma o le malumalu. Ma le isi, o le toatele o tagata asiasi e lagonaina se mea uiga ese ma faapitoa a o taialaina i latou i totonu o le malumalu e le’i faapaiaina. O tali masani uma nei a tagata asiasi e maimoaina, ae e le o tali masani taatele ia. O le mea e faagaeetia ai le tele o tagata asiasi nai lo se isi lava mea, o tagata o le Ekalesia latou te feiloai i ai i le taimi o maimoaga. Latou te tuua ma le faagaeetia pea ona o i latou na talimalo, o le Au Paia o Aso e Gata Ai.
O loo gauai atu pea tagata i le Ekalesia i le lalolagi atoa nai lo se isi lava taimi muamua. O loo tusitusi pea sui o ala o faasalalauga pe talanoa e uiga i le Ekalesia i aso uma, ma lipotia le tele o ana gaoioiga. O loo talanoaina pea e le tele o fale nusipepa e sili ona lauiloa i le Iunaite Setete le Ekalesia ma ona tagata. O loo tupu foi nei talanoaga i le lalolagi atoa.
Ua tosina atu foi tagata i le Ekalesia i luga o le Initoneti, e pei ona outou silafia, ua suia tele ai le ala e fefaasoaai ai e tagata ia faamatalaga. I taimi uma lava o le aso i le lalolagi atoa, o loo talanoaina lava le Ekalesia ma ana aoaoga i luga o le Initoneti, o lautusi patino ma upega o fesootaiga e tagata e le’i tusitusi lava mo se nusipepa po o se mekasini. O loo latou faia ni vitio ma faasoa atu i le initoneti. O tagata le taualoa nei—o tagata uma o lo tatou faatuatuaga ma isi foi faatuatuaga—o ē o loo talanoa e uiga i Le Ekalesia a Iesu Keriso o le Au Paia o Aso e Gata Ai.
O suiga i auala tatou te fesootai ai ua faamalamalama ai se vaega i le mafuaaga ua iloa atili ai tatou o “Mamona” nai lo se isi lava taimi. Ae o loo tuputupu ae foi le Ekalesia ma agai i luma. O le tele o tagata o loo i ai ni o latou tuaoi ma uo o ni tagata o le Ekalesia, ma o loo i ai ni tagata iloga o le Ekalesia i faigamalo, i pisinisi, i faafiafiaga, i aoaoga, ma soo se mea lava—e pei ona i ai. E oo lava ia i latou e le o ni tagata o le Ekalesia ua latou iloaina lenei mea, ma latou tomanatu pe o le a se mea o tupu. E maofa i le toatele ua nofouta nei i le Ekalesia ma le Au Paia o Aso e Gata Ai.
A o faasolo pea ina iloa atili le Ekalesia, o loo toatele pea tagata e le o malamalama lava i ai. O nisi ua aoaoina ina ia masalosalo i le Ekalesia ma talitonu i talitonuga taatele lē lelei e uiga i le Ekalesia e aunoa ma le fesiligia o a latou punaoa ma le faamaoniga o a latou faamatalaga. O loo i ai foi le mau faamatalaga le sa’o ma le le mautonu e uiga i le Ekalesia ma le mea o ia talitonu i ai. E moni lava lenei mea talu mai le taimi o le Perofeta o Iosefa Samita.
Na tusia e Iosefa Samita lona talafaasolopito i vaega “e faasa’o ai mafaufau o tagata lautele, ma tuu atu ai i tagata sailiili uma le mea moni ia maua tala sa’o” (Iosefa Samita —Talafaasolopito 1:1). E moni lava o le a i ai pea i latou e suia ia upumoni ma avesese ma le loto i ai ia aoaoga a le Ekalesia. Ae o le toatele o i latou e i ai fesili e uiga i le Ekalesia ua na ona fia mananao ia malamalama. O tagata mafaufau tonu nei o loo fia iloa moni lava i tatou.
O le faatupulaia o le iloaina ma le tauleleia o le Ekalesia ua tuu mai ai se avanoa maoae ia i tatou o ona tagata. E mafai ona tatou fesoasoani “e faasa’o ai mafaufau o tagata lautele,” ma faasa’o ai faamatalaga sese pe a faamatalaina i tatou i se mea sese. Ae o le mea e sili ona taua, o le mafai lea ona tatou faasoa atu o o tatou faasinomaga.
E tele ni mea e mafai ona tatou faia—e mafai ona outou faia—e faateleina ai le malamalama e uiga i le Ekalesia. Afai tatou te faia i le agaga lava lea e tasi ma pulea i tatou lava i le ala lava lea e tasi tatou te talimalo ai i maimoaga i malumalu, o le a malamalama atili a tatou uo ma tuaoi ia i tatou. O le a tafiesea lo latou masalosalo, o le a mou ese talitonuga taatele lē lelei, ma o le a amata ona latou malamalama i le Ekalesia ma lona moni.
Se’i ou fautuaina atu ni manatu i mea e mafai ona tatou faia.
Muamua, e tatau ona tatou lotototoa i a tatou tautinoga e uiga ia Iesu Keriso. Tatou te mananao i isi ia iloa tatou te talitonu o Ia o le tamalii e sili ona taua i le talafaasolopito o tagata uma. O lona soifuaga ma aoaoga o le fatu lea o le Tusi Paia ma isi tusi ua tatou talitonu ua avea ma tusitusiga paia. Na saunia e le Feagaiga Tuai le ala mo le galuega i la le tino a Keriso. Ua faamatalaina e le Feagaiga Fou Lana galuega i la le tino. Ua tuu mai e le Tusi a Mamona ia i tatou le molimau lona lua o Lana galuega i la le tino. Na afio mai o Ia i le lalolagi e folafola Lana talalelei e avea ma faavae mo tagata uma ina ia mafai e fanau uma a le Atua ona aoao i Ana aoaoga ma mulimuli ai. Ona Ia foai mai lea o Lona soifua e fai ma o tatou Faaola ma Togiola. Ua na o Iesu Keriso lava e auala mai ai lo tatou faaolataga. O le mafuaaga lea tatou te talitonu ai o ia o le tamalii e sili ona taua i le talafaasolopito o tagata uma. O se mea mamalu le talitonu ia te Ia ma talia o Ia o lo tatou Faaola, lo tatou Alii, ma lo tatou Matai.
Tatou te talitonu foi ua na o Keriso lava le auala e mafai ai ona maua le olioli sili, faamoemoe, ma le fiafia—i lenei olaga faapea ma le faavavau. O la tatou aoaoga faavae, e pei ona aoaoina i le Tusi a Mamona, o loo faamamafa mai ai: “O le mea lea, e tatau ai ona outou fetaomi atu i luma ma le tumau ia Kersio, ma se susulu atoatoa o le faamoemoe, ma le alofa i le Atua ma tagata uma. O le mea lea, afai tou te fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai le Tamā: O le a outou maua le ola e faavavau” (2 Nifae 31:20).
Tatou te tautino atu lo tatou talitonuga ia Iesu Keriso ma talia o Ia o lo tatou Faaola. O le a Ia faamanuiaina i tatou ma taitai i tatou i a tatou taumafaiga uma. A o tatou galulue ai iinei i lenei olaga, o le a Ia faamalosia i tatou ma aumai ia i tatou le filemu i taimi o tofotofoga. O tagata o Le Ekalesia a Iesu Keriso o le Au Paia o Aso e Gata Ai e savavali i le faatuatua ia te Ia o Lē ana le Ekalesia.
Lua, ia avea ma se faataitaiga amiotonu i isi. A uma la tatou tautinoga o o tatou talitonuga, e tatau ona tatou mulimuli i le fautuaga ua tatou maua i le 1 Timoteo 4:12: “A ia fai oe ma faaaoao i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoia.”
Na aoao mai le Faaola e uiga i le taua o le avea ma se faataitaiga o lo tatou faatuatua ina ua fetalai mai, “Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi” (Mataio 5:16).
E tatau ona avea o tatou olaga ma faataitaiga o le lelei ma uiga mama, a o tatou taumafai e mulimuli i Ana faataitaiga i le lalolagi. O galuega lelei a i tatou taitoatasi e mafai ona tauleleia uma ai le Faaola ma Lana Ekalesia. A o e aofia ai i le faia o mea lelei, i le avea ai ma alii ma tamaitai faamamaluina ma amiotonu, o le a atagia mai le malamalama o Keriso i o outou olaga.
O le isi, talanoa e uiga i le Ekalesia. I le gasologa o o tatou olaga i aso uma, ua faamanuiaina lava i tatou i le tele o avanoa e faasoa atu ai i isi mea ua tatou talitonu i ai. Pe a fesiligia e a tatou uo patino ma uo faalegaluega o tatou talitonuga faalelotu, o loo latou valaauliaina i tatou e faasoa atu pe o ai i tatou ma mea ua tatou talitonu i ai. Atonu latou te fiafia pe le fiafia foi i le Ekalesia, ae latou te fiafia e fia iloa atili i tatou.
O la’u fuatuaga ia te outou ia talia a latou valaaulia. E le o valaauliaina oe e au uo ia e aoao atu, tala’i atu, faamalamalama, ma apoapoai atu. Faaauai i latou i se talanoaga itu lua—faasoa atu se mea e uiga i ou talitonuga faalelotu ae ia fesili atu foi i ai i o latou talitonuga. Ia iloilo o latou tulaga o le fia iloa e ala i fesili latou te fesiligia. Afai latou te fesiligia ni fesili se tele, taulai atu le talanoaga i le taliina o a latou fesili. Ia manatua pea lava pea, e sili atu mo i latou le fesili mai nai lo lou ta’uina atu.
O nisi tagata e foliga mai e mananao e faalilolilo lo latou auai i le Ekalesia. E i ai a latou mafuaaga. Mo se faataitaiga, atonu latou te talitonu e le o so latou tiute le faasoa atu o o latou talitonuga. Atonu latou te fefefe ne’i o latou faia se mea sese pe fesiligia foi i se fesili e le mafai ona latou taliina. Afai e i ai ni manatu faapea ia te oe, e i ai sa’u fautuaga mo oe. Tau lava ia manatua upu a Ioane: “E leai se fefe i le alofa, a o le alofa atoatoa e faateaeseina ai le fefe” (1 Ioane 4:18). Afai tatou te alolofa i le Atua ma alolofa i o tatou tuaoi, ua folafola mai ia i tatou o le a faatoilaloina lo tatou fefe.
Afai na e asiasi talu ai nei i le Mormon.org, o le uepisaite lea a le Ekalesia mo i latou e fiafia e aoao e uiga i le Ekalesia, ua e vaai ai i tagata o le ekalesia ua tuuina i luga ni faamatalaga e uiga ia i latou. Ua latou fatuina ni talaaga i luga o le initoneti e faamalamalama ai i latou ma le mafuaaga e taua ai o latou talitonuga faalelotu ia i latou. O loo latou talanoa mai e uiga i lo latou faatuatuaga.
E tatau ona tatou talisapia ma faia na talanoaga i le alofa faa-Keriso. O lo tatou leo, pe tautala pe tusitusi, e tatau lava ona faaaloalo ma migao, e tusa lava pe o a tali mai i isi. E tatau ona tatou faamaoni ma lotomatala ma taumafai ia manino mea tatou te ta’u atu. Tatou te mananao e aloese mai le fiafinau pe fiafaatautee i soo se itu.
Na faamalamalama mai e le Aposetolo o Peteru, “A e pei ona paia o ia na valaauina outou, ia faapea foi outou ona paia i a outou amio uma” (1 Peteru 1:15).
O “amio uma” o aso nei ua foliga mai o loo aofia ai pea lava pea le Initoneti. Matou te uunaia tagata, talavou ma matutua, ia faaaoga le Initoneti ma ala o agafesootai e aapa atu ai ma faasoa atu o latou talitonuga faalelotu.
A e faaaogaina le Initoneti atonu e te tau ai i ni talanoaga faifai pea e uiga i le Ekalesia. Pe a taitaiina ai e le Agaga, aua le faatuai ona faaopoopo i ai sou leo i nei talanoaga.
O le savali o le talalelei a Iesu Keriso e le pei o soo se mea o le a e faasoaina atu i isi. I le tele o faamatalaga maua solo mai i lenei vaitaimi, o le faamatalaga sili lenei ona taua i faamatalaga uma i le lalolagi. E le fesiligiaina lava lona taua. O se penina tau tele lava (tagai Mataio 13:46).
Pe a talanoaina le Ekalesia, tatou te le taumafai ia tauleleia atu nai lo le mea o i ai. Tatou te manaomia ona fesootai tuusao atu ma le faamaoni le savali. Afai o le a tatou tatalaina ia ala o fesootaiga, o le a tuuina e le savali o le talalelei toefuataiina a Iesu Keriso ia lava ia i latou ua saunia e taliaina.
O loo i ai i nisi taimi se eseesega tele—se āva tele i le malamalama—i le va o le ala tatou te iloa ai le Ekalesia mai totonu ma le ala e iloa ai e isi le Ekalesia mai fafo. O le mafuaaga autu lea tatou te faia ai ni maimoaga i le malumalu a o le’i faapaiaina. O tagata galulue fua i maimoaga i le malumalu o loo taumafai e fesoasoani i isi ia iloaina le Ekalesia e pei ona latou iloaina mai totonu. Latou te iloaina o le Ekalesia o se galuega ofoofogia, o se mea e ofo ai, ma latou te mananao ia iloa foi e isi.
Ou te folafola atu ia te outou afai o le a outou tali atu i valaaulia e faasoa atu o outou talitonuga ma lagona e uiga i le talalelei toefuataiina a Iesu Keriso, o le a avea se agaga o le alofa ma se agaga o le lototele ma au soa tumau, aua o le “alofa atoatoa e faateaeseina ai le fefe” (1 Ioane 4:18).
O se taimi lenei o avanoa ua faateleina e faasoa atu ai le talalelei a Iesu Keriso i isi. Ia tatou saunia i tatou lava e faaaoga ia avanoa ua tuu mai ia i tatou taitoatasi e faasoa atu ai o tatou talitonuga, ou te tatalo ai ma le lotomaualalo i le suafa o Iesu Keriso, amene.