Eda Tukuni Karisito

Loloma Vakalou Veivakurabuitaki

Mai vei Kristen Nicole Cardon

Au sa vakararavi ga ki na loloma vakalou i Jisu Karisito ena veisiga.

“Ena neimami soqoni ni Lotu, keimami sega ni dau veivosakitaka vakalevu na veika e baleta na loloma vakalou,” e kaya o noqu qasenivuli ni lotu ena Brigham Young University, “ia, oi keimami na lewe ni Lotu i Jisu Karisito ni Yalododonu Edaidai, keimami sa vakabauta na loloma vakalou.”

E dina sara, au sega ni vakasamataka rawa e dua na lesoni ni Goneyalewa se Wilivola ni Siga Tabu me baleta na loloma vakalou, ia e lesu na noqu vakasama ena neimami a lagata na matasere ni koronivuli torocake na “Amazing Grace.”

Loloma vakalou veivakurabuitaki (kamica na kena rorogo!)

E vakabulai au mai na noqu rarawa!

Au a yali, ia au sa qai kunei;

Au a mataboko, ia au sa qai rai oqo.¹

“Na loloma vakalou sai koya na kaukauwa ni Kalou mai na Veisorovaki i Jisu Karisito,” a vakamacalataka o noqu qasenivuli. “Au wasea na loloma vakalou ki na va na kaukauwa: tucaketale, veivueti, veivakabulai, kei na veivaqaqacotaki.” A tomana tale me vakamacalataka na kaukauwa yadua oqo, ia au a lesu tale ki na noqu vakanananu makawa.

Na matasere ni koronivuli torocake vata ga o ya a gole yani ki California, e Amerika, me laki veisisivi ena dua na soqo ni ivakatagi. Au a tauvimate ni keimami sa vakarau gole tiko, ka sa vakaraitaka tiko na domoqu droga niu sa na sega ni lagasere rawa kei na matasere ena soqo o ya—se kevaka meu na lagasere, ena ca, ka na lako vata na mosi. Au a kerea vei tamaqu me solia vei au na veimasulaki ni matabete kau a masumasu tikoga ena siga e tarava.

E rairai au sega beka ni kila vakavinaka sara ena gauna o ya, niu sa lagata na “Amazing Grace” ena domoqu sa vakavinakataki ena soqo o ya, kau sa lagata sara tikoga na kaukauwa a vakabulai au ena siga sa oti. A vakalougatataki au ena siga o ya na Veisorovaki ni iVakabula; na Nona loloma vakalou e a ivurevure ni noqu vakabulai.

“Ia ena mai vunau voli ko [Jisu], ena vosota na ka rarawa, na veivakararawataki kei na veivakatovolei kecega, a sa yaco na veika oqo me vakayacori kina na vosa sa tukuni, ni na colata ko Koya na nodra rarawa kei na nodra i valavala ca na nona tamata” (Alama 7:11).

Ni oti mai na vuli torocake, me vakataki ira ga na se qai curuvou, a uabaleti au na lewenivuli ni koliji kei na ibolebole ena gauna vata ni tiko vakayawa mai na noqu itikotiko ia vata kei na lima na noqu lewe ni rumu.

Oqo na gauna au a vulica rawa kina meu kila vakavinaka na veivaqaqacotaki kei na kaukauwa gugumatua ni loloma vakalou nei Karisito. Au cakacaka ka vuli ena veisiga, ia au sa vakararavi ga ki na noqu masumasu ena veisiga meu kerea kina vua na Tamada Vakalomalagi meu rawa ni vakacavara kina na noqu cakacaka. Ni sa toso tiko na yabaki ni vuli, au reki niu raica na veivaqaqacotaki kei na kaukauwa gugumatua ni Veisorovaki nei Karisito, au sega walega ni cakacaka vakavinaka ia e sega talega kina na dredre.

“Au sa rawata na ka kecega ena vuku i Karisito o koya sa vakaukauwataki au” (Filipai 4:13).

E dina ga niu se bera tiko ni sotava na rua tale na gacagaca ni Nona loloma vakalou—na tucaketale kei na taucoko ni veivueti—au se vakararavi tikoga ki na Veisorovaki i Jisu Karisito ena veisiga yadua. Na loloma vakalou, na kaukauwa ni Kalou mai na Veisorovaki i Jisu Karisito, sa mai vakabulai au ka vaqaqacotaki au. Ena gauna au sasagataka kina meu talairawarawa ki na vunau ni Kalou ka vakarorogo ki na Nona lewa, au ciqoma kina na veivuke vakalomalagi niu sa mai gugumatua sara ena noqu rawa-ka vakai au.

“Ia eda sa kila ni da sa vakabulai e na loloma wale ga, ka segai ena vuku ni cakacaka” (2 Nifai 25:23).

iDusidusi

1. John Newton, “Amazing Grace,” Olney Hymns (1779), no. 41.

Ena Kaukauwa ni Turaga

“Ni da sa vakabauta na Turaga o Jisu Karisito ka talairawarawa ki na nona kosipeli, ni da cavuikalawa ka torocake tiko yani, kerea tiko meda vaqaqacotaki, vakatorocaketaka tiko na noda ivakarau kei na inakinaki, eda na raica ni da sa laki wili rawa ena qelenisipi nei koya na iVakatawa Vinaka. Oqori ena gadrevi kina na bula vakaivakarau kei na vuli kei na gagadre vakayago kei na kaukauwa. Ia a kaya kina o Paula na iApositolo, ‘Au sa rawata na ka kecega ena vuku i Karisito o koya sa vakaukauwataki au.’ (Filipai 4:13).”

Peresitedi Howard W. Hunter (1907–95), “Developing Spirituality,” Ensign, Me 1979, 26

Ena Cakacaka Vakacava ki na Noda Bula na Loloma Vakalou ni iVakabula?

E veivuke o Elder David A. Bednar ena Kuoramu ni iApositolo Le Tinikarua ki na saumi na taro oqo e “Na Veisorovaki kei na iLakolako ni Bula Oqo” e tiko ena ilavelave oqo ena tabana 12:

• “Sa gadreva kina na iVakabula, mai na Nona Veisorovaki kei na kaukauwa ni Yalo Tabu, me mai bula e lomada—ka sega walega me dusimaki keda ia me solia vei keda na kaukauwa.”

• “Na lewa-e-loma ni dua na tamata, gugumatua kei na veimuataki yadudua, na tuvatuva mana kei na navuci ni inakinaki sa ka yaga sara ia se sega ni rauti keda meda qaqa vakaoti ki na kena vakacavari taucoko na ilakolako ni bula oqo. Sa dina sara, meda sa qai vakararavi ga ki na ‘nona yalovinaka kei na nona loloma kei na lomasoli na Mesaia Yalosavasava’ (2 Nifai 2:8).”

• Na kaukauwa gugumatua ni Veisorovaki sa vaqaqacotaki keda meda caka vinaka ka loma vinaka tiko ka veiqaravi uabaleta yani na noda gagadre yadudua kei na rawa-ka vakatamata.”

Sa rawa mo vola ena nomu ivolaniveisiga ka wasea ki na nomu matavuvale na veigauna eso o a vakila kina na loloma vakalou ni Turaga ena nona veivakabulai, veivuke, se vaqaqacotaki iko.

iTaba mai vei Ash Ram