Kakua ni Voca
Levea na veileqa lelevu mai muri ena nomu walia ena gauna oqo na leqa lalai.
E dau taleitaka o Andrei na waqavuka mai na gauna se lailai kina. Ia ni levu era dau tadra tu me ra vuka, e sega ni nanuma tiko o Andrei na o ni lomalagi; na nona gagadre e tiko ena sukuru kei na nati. E vuli tiko na gone yabaki 16 oqo mai Romania me mekeniki ni waqavuka.
Mai Romania o ira na yabaki tinivakacaca e rawa ni ra digitaka me ra lako ki na vuli torocake se me ra lako ki na vuli tara. Me vaka ni dau taleitaka o Andrei na waqavuka, a rawarawa ga na nona vakatulewa me lako ki na koronivuli ni vuli vuka.
O ira na mekeniki ni waqavuka era sega ni dau vakavinakataka ga na waqavuka. E dua na ka bibi duadua era dau cakava sai koya ni ra dau vakadikeva ka taqomaka na waqavuka me ra kakua ni ca. Era dau vakadikeva ena veigauna na veika kece sara ena dua na waqavuka, mai na ivocevoce ki na qia ni vakaroro kei na veitikina e loma.
“E rawa ni dredre na kena kunei na leqa lailai ka rawa ni vakavuna na kena takasa e dua na waqavuka,” e kaya o Andrei.“Ia e rawarawa cake na kena tovolei me kunei mai na kena qai laki biu vata na waqavuka ni sa kasere.”
Sa bibi sara me dau toka e dua na ivakarau ni veitaqomaki ka me kakua ni dau calati,—me baleta na waqavuka ka vakakina vei keda na lewe ni Lotu—me rawa kina ni kunei ka vakadodonutaki na leqa ni se bera ni ra vakatubu leqa ki na idini se ki na bula vakayalo.
Veitaqomaki Vakayalo
E vakaitikotiko o Andrei e Bucharest, e dua na siti ka voleka ni rua na milioni na lewena. Ia, se gone sara na Lotu mai Romania, ka rauta walega ni rua na tabana na levu ni lewenilotu mai Bucharest. Eratou vakaitikotiko vakayawa sara mai vei ira na vo ni lewenilotu o Andrei kei na nona matavuvale. E dau vakila o Andrei na idre kei vuravura e tu vakavolivoliti koya e koronivuli ka vakakina vei ira na nona itokani. E kila tu o koya na kena rawarawa me takasa—ena rai vakayalo—kevaka e sega ni yadrava tiko na nona itataqomaki vakayalo.
E rawa ni osooso sara na bula. E dau kunea o Andrei na gauna me masu, lolo, vulica na ivolanikalou, ka qarava vinaka na nona itavi vakabete, ena loma ni gauna ni vuli, veicaqe, kei na komipiuta. E dau raica talega me “laki” semineri, ena initaneti baleta ni sa rui yawa.
Na veika oqori e tiki ni ivakarau ni itataqomaki vakayalo ka dau vukea na kena kilai ka vakadodonutaki na malumalumu eso ni bera ni ra vakavuna na takasa vakayalo.
“E tu eso na ka e dodonu ga me da dau cakava e veigauna—me da vakaitovotaki keda kina,” e kaya o koya. “E sega ni rawa ni o laiva na bula me rawai iko.”
Takasa Vakayalo
Sa kila o Andrei ni kevaka eda sega ni qarava tiko ena veigauna eso na noda itataqomaki vakayalo, ena rawa ni vakamalumalumutaka na noda kaukauwa me da vorata kina na veitemaki, na veika me vaka na osooso ni vakasama kei nodra ile na itaba vata. Ni yaco oqori, ena sega ni dede sa na seva na noda ilakolako, noda vakatulewa, ka qai kena itinitini noda kaukauwa vakayalo.
Me vaka ga na waqavuka ni sega na kena kaukauwa sa na sega ni vuka tubu, ni da ivalavala ca, sa na yali na kaukauwa vakayalo kei na igu, eda sa na yawa kina mai lomalagi ka sega ni dede eda na takasa vakayalo.
E dina ni na rawa ena Veisorovaki ni iVakabula me vakadodonutaki keda tale ni oti na noda takasa, e vinaka cake sara me da vakararavi ena Nona kaukauwa me vukei keda ena noda vakavinakataka na leqa ni se lailai—ni bera ni vakavuna e dua na leqa vakaitamera.
Na Rerevaki ni Levei
Se bera vakadua ni votu ena vakasama nei Andrei me levei na veitaqomaki vakaidini. E sega ni dua na digidigi na leve. “E tu na lawa me baleta qori,” e kaya o koya. Ia kevaka e levea vakadua mada ga—na ivakarau ni itataqomaki—e vakadinata o koya ni “na sega beka ni dua na ka e yaco.”
E rairai ni leqa levu duadua me baleta na leve oya ni na sega ni takasa ena gauna vata ga na waqavuka, ia ni na sega. “Kevaka e sega ni dua na ka e yaco niu levea nikua, au na temaki vakarawarawa sara meu levea tale ni mataka,” e kaya o koya.
Ni levei wasoma na ivakarau ni tataqomaki, na kaukauwa kei na oca e yaco ena waqavuka—se vei keda—ena vakavuna me leqa e dua na ka. “Ena yaco me da takasa,” e kaya o koya.
Oqori na vuna e solia kina vei keda na Kalou na lawa eso ni ivakarau tudei ni itataqomaki vakayalo. “Sota [ena lotu] vakawasoma” (3 Nifai 18:22; vakaikuritaki). Masu tikoga (raica na 3 Nifai 18:19). Vakasaqara na ivolanikalou vagumatua (raica na 3 Nifai 23:1–5). “Mo qarauna me savasava tikoga nomu vakanananu veigauna kece” (V&V 121:45; vakaikuritaki). “Sikova e veigauna na valetabu.1
Na rokovi ni veilawa oqori ka caka tiko na ivakarau ni itataqomaki eda na vuka tiko kina vakadodonu.
“E ta e dua na waqavuka me rawa ni biuta na vuravura,” e kaya o Andrei. “Oqori na ka e vinakata vei keda na Tamada Vakalomalagi. Ni dau vakayacori tiko na ivakarau ni itataqomaki, eda na yaco vakavinaka ki na vanua eda via lako kina—me da lesu tale ki lomalagi.”
iTaba ni waqavuka mai vei iStockphoto © Christopher Pattberg; imatau: itaba mai vei Adam C. Olson
iTaba ni tabana mai vei Adam C. Olson; itaba ni vava mai vei John Luke