Na Veisorovaki kei na iLakolako ni Bula Oqo
Mai na dua na vosa ni lotu ena Brigham Young Univesiti ena ika 23 ni Okotova, 2001. Me baleta na kena Vakavalagi, sikova na speeches.byu.edu.
Na kaukauwa veivukei ni Veisorovaki ena vaqaqacotaki keda meda vinaka ka caka vinaka meda veiqaravi yani ena noda gagadre ga kei na rawa-ka vakai keda.
Na inaki cecere ni kosipeli ni iVakabula a vakamacalataka vakalekaleka sara o Peresitedi David O. McKay (1873–1970): “Na inaki ni kosipeli oya me … ra vinaka kina na tamata ca ka vinaka vakaoti sara na tamata vinaka, ka veisautaka na ituvaki ni kawatamata.”1 O koya gona, na ilakolako ni bula oqo mena torocake mai na ca ki na vinaka ka sotavi na veisau levu ni yalo—me veisautaki kina na keda ituvaki lutu (raica na Mosaia 5:2).
Na iVola i Momani sa noda ivoladusidusi ni ivakasala ni da lakova tiko yani na salatu mai na ca ki na vinaka ki na vinaka vakaoti ka sasagataka me veisautaki na yaloda. A vakavulica o Tui Penijamini na ilakolako ni bula oqo kei na ilesilesi ni Veisorovaki ena kena muataki keda tiko vagumatua ena ilakolako o ya: “A sa veimecaki na itovo vakayago kei na Kalou me tekivu sara mai na lutu i Atama, ka na vaka tu kina me tawamudu kevaka eda sa sega ni vakarorogo ki na domo ni Yalo Tabu, meda biuta tani na itovo vakayago ka yaco me tamata yalosavasava ena vuku ni isoro i Karisito na Turaga” Mosaia 3:19; vakamatatataki).
Au vagolea na nomuni vakasama ki na rua na malanivosa matata. iMatai—“biuta tani na itovo vakayago.” Na ilakolako mai na ca ki na vinaka sai koya na cakacaka ni kena biu tani na itovo vakayago se itovo vakayago vakayalewa vei keda yadua. Ena bula oqo eda sa temaki kece sara ena yagoda. Na gacagaca sara ga a buli mai kina na yagoda sa mai lutu ka sa tikina tudei ni veidreti ki na ivalavala ca, butobuto, kei na mate. Ia sa rawa meda vakatorocaketaka na noda rawa-ka meda vorata rawa kina na gagadre ni yago kei na veitemaki “mai na veisorovaki i Karisito.” Ni da sa caka cala, ni da sa itovo vakatani ka ivalavala ca, sa rawa meda veivutuni ka yaco meda savasava ena kaukauwa veivueti ni Veisorovaki i Jisu Karisito.
iKarua—“ka yaco me tamata yalosavasava.” Na malanivosa oqo e vakamacalataka na kena tomani tiko na ikarua ni wase ni ilakolako ni bula oqo o ya me “vinaka vakaoti na tamata vinaka” se dua tale, o ya me vaka sara na tamata yalosavasava. Na ikarua ni wase ni ilakolako oqo, na cakacaka ni gole mai na vinaka ki na vinaka vakaoti, sa dua na ulutaga eda dau sega sara ni vulica se vakavulica vakalevu sara se sega sara ni kila vakavinaka.
Au vakabauta ni vuqa na lewe ni Lotu era kila vakavinaka cake tu na inaki ni veivueti kei na kaukauwa veivakasavasavataki ni Veisorovaki mai na kena veivakaqaqacotaki kei na kena kaukauwa veivukei. Sa dua na ka meda kila tiko ni a tadu mai ko Jisu Karisito ki na vuravura me mai mate ena vukuda—ni sa ikoya oqo na iusutu ka yavu tiko ni vunau i Karisito. Ia sa dodonu vakakina vei keda meda taleitaka na gagadre ni noda Turaga, mai na Nona Veisorovaki kei na kaukauwa ni Yalo Tabu, me mai bula e lomada—sega walega me mai dusimaki keda ia me vakaukauwataki keda talega.
E vuqa vei keda e kila tu ni gauna eda caka cala kina, eda na gadreva na veivuke meda uabaleta kina na revurevu ni valavala ca ena noda bula. Sa mai sauma na kena isau na iVakabula ka sa rawa kina vei keda meda sa tamata savasava ena kaukauwa ni Nona veivueti. E vuqa vei keda sa matata sara tu ga vei ira ni Veisorovaki sa baleti ira na tamata ivalavala ca. Au sega mada ni vakadeitaka o ya, ia, eda sa kila ka vakadeitaka ni Veisorovaki sa baleti ira talega na yalododonu—o ira na tagane kei na yalewa vinaka era sa talairawarawa, bula kilikili, ka vakasama dodonu tiko era sasagataka tiko mera vinaka vakaoti ka veiqaravi yani vagumatua ena yalodina. E rawa beka ni cala na noda vakabauta o ya meda taura yani na ilakolako mai na vinaka ki na vinaka vakaoti ka yaco meda tamata yalosavasava ena noda sasaga ga vakai keda, ena noda kaukauwa taucoko, lewa e loma, kei na bula vakaivakarau, kei na noda rawa-ka vakaiyalayala ga sa kilai tu.
Na kosipeli ni iVakabula e sega ni walega ni noda lako tani mai na veika ca ni noda bula; sa ka bibi talega meda caka vinaka ka vinaka sara. Na Veisorovaki sa vakarautaka vei keda na veivuke meda vorata rawa na veika ca ka lako tani mai kina ka meda caka vinaka ka yaco meda vinaka. Na veivuke ni iVakabula sa vakarautaki tu ena ilakolako taucoko ni bula oqo—mai na ca ki na vinaka ki na vinaka vakaoti ka veisautaka na keda ituvaki.
Au sega ni tukuna tiko ni veivueti kei na kaukauwa veivakasavasavataki ni Veisorovaki e rau wase ka duidui. Ia, oi rau na gacagaca e rua oqo ni Veisorovaki e rau sema vata tiko ka duabau; e gadrevi me rau cakacaka vata tiko ena ituvatuva taucoko ni ilakolako ni bula oqo. Ka sa ka bibi tawamudu kina vei keda kece meda kila ni o irau na gacagaca bibi ni ilakolako ni bula oqo—o ya na noda biuta tani na itovo vakayago ka yaco me da tamata yalosavasava, na noda vorata rawa na veika ca ka yaco meda vinaka—sa rawa ga ena kaukauwa ni Veisorovaki. Na noda dui lewa e loma, noda sasaga kei na veimuataki, ka tuvatuva mana eso kei na lalawa sa ka yaga ia se sega sara ni veirauti vei keda meda yacova qaqa yani na ilakolako ni bula oqo. Sa dina sara, meda sa qai vakararavi ga ki na “yalovinaka, kei na nona loloma, kei na nona lomasoli na Mesaia Yalosavasava” (2 Nifai 2:8).
Na Loloma Vakalou kei na Kaukauwa Veivukei ni Veisorovaki
Eda vulica ena Bible Dictionary ni vosa loloma vakalou e dau vakayagataki vakawasoma ena ivolanikalou me tukuna tiko na kaukauwa ni rawa-ka:
“[Loloma Vakalou e] dua na vosa e tukuni tiko vakawasoma ena Veiyalayalati Vou, vakabibi ena ivola ni Paula. Na inaki levu ni vosa oqo sai koya na sala vakalou ni veivukei se na veivaqaqacotaki, soli mai na loloma veivueti cecere ni loloma i Jisu Karisito.
“Mai na loloma vakalou duadua ga ni Turaga o Jisu, e vakayacori rawa mai na nona solibula veisorovaki, sa rawa kina vua na kawatamata me tucake tale mai na mate, ka lesu ki na tamata yadua na yagona mai na ibulubulu ki na ituvaki ni bula tawamudu. Sa vakakina mai na loloma vakalou ni Turaga ki na tamata yadua, ena nona vakabauta na veisorovaki i Jisu Karisito ni ra veivutunitaka na nodra ivalavala ca, era ciqoma na veivakaukauwataki kei na veivuke mera caka vinaka kina ka a sega ni rawa mera tudei tiko kina kevaka mera sasagataka ga vakai ira. Na loloma vakalou oqo sa dua na kaukauwa veivukei ena rawa kina vei ira na tagane kei na yalewa mera qumia rawa kina na bula tawamudu kei na bula vakalou ni oti na nodra vagumatuataka yani na nodra vinaka taucoko.”2
Na loloma vakalou sai koya na veivuke vakalou se vakalomalagi eda sa gadreva dina sara na tamata yadua meda na rawata kina na matanitu vakasilesitieli. O koya gona, na kaukauwa veivukei ni Veisorovaki e vaqaqacotaki keda meda caka vinaka ka vinaka ka veiqaravi yani mai na noda gagadre yadua kei na noda rawa-ka vakatamata.
Niu dau vulica na ivolanikalou, au dauvakacuruma na vosa “kaukauwa ni rawa-ka” ena veigauna yadua au sotava kina na vosa loloma vakalou. Vakasamataka mada, me vakataka, na tikina oqo eda sa kila taucoko tu: “Ia eda sa kila ni da sa vakabulai ena loloma walega, ka segai ena vuku ni cakacaka” (2 Nifai 25:23). Au vakabauta ni sa rawa ni da vulica na gacagaca bibi oqo ni Veisorovaki kevaka meda na vakacuruma na “kaukauwa ni rawa-ka kei na veivaqaqacotaki” ena veigauna yadua eda raica kina na vosa loloma vakalou ena ivolanikalou.
iVakaraitaki kei na iNaki
Na ilakolako ni bula oqo o ya meda gole mai na ca ki na vinaka ki na vinaka vakaoti me veisautaki kina na noda ivakarau ni bula. Sa sinai tu ena iVola i Momani na nodra ivakaraitaki na tisaipeli kei na parofita era vulica, kila vakavinaka, ka vakavoutaki mai na kaukauwa ni rawa-ka ni Veisorovaki ena ilakolako o ya. Ni da sa mai kila vakavinaka cake kina na kaukauwa vakalou oqo, ena vakararamataki ka vakabulabulataki vakalevu na noda rai baleta na kosipeli. Na rai vakaoqo ena dau veisautaki keda ena sala veivakurabuitaki eso.
E dua na kena ivakaraitaki o Nifai ni a vulica, kila vakavinaka, ka vakararavi ga ki na kaukauwa veivukei ni iVakabula. Eda nanuma kina na nodratou lesu ki Jerusalemi na luvei Liai me ratou laki kauti Isimeli mai kei iratou na lewe ni nona matavuvale ena nodratou ilakolako o ya. Ena ilesulesu mai Jerusalemi era a veisaqasaqa o Leimani kei na so tale ena ilawalawa vata kei Nifai ki na lekutu, ka vakamasuti iratou na tacina o Nifai me ratou vakabauta tiko na Turaga. Oqo sara ga na vanua ena nodratou ilakolako oqo e rau a vesuki Nifai kina na tacina ena dali ka navuca me vakamatei. Ni raica mada na masu oqo nei Nifai: “Oi kemuni na Turaga, mo ni vakabulai au mai na ligadrau na tuakaqu me vaka na noqu vakabauti kemuni; ni vakaukauwataki au meu drutia rawa na kequ ivesu” (1 Nephi 7:17; vakamatatataki).
Ko ni kila beka na ka au gadreva meu masulaka kevaka au veisuki mai vei rau na taciqu? “Yalovinaka ni kauti au tani mai na leqa oqo ENA GAUNA SARA GA OQO!” E ka taleitaki tiko vei au ni a sega ni masulaka o Nifai me veisautaki na kena ituvaki o ya Ia, a masulaka me vakaukauwataki me veisautaka na kena ituvaki o ya. Kau vakabauta ni vuna e masu kina vakaoya sa baleta ga ni sa vulica, ka kila vakavinaka tu, ka sa sotava mai na kaukauwa veivukei ni Veisorovaki.
Au sega ni vakabauta ni dali a vesu kina o Nifai a tasere ga mai vakai koya mai ligana kei na lokiloki. Ia, au vakabauta ni a vakalougatataki o koya ena sasaga kei na kaukauwa e sega ni rawata rawa o koya, ka yaco kina “ena kaukauwa ni Turaga” (Mosaia 9:17) me yavala ka veimoiyaki ka drutia laivi na dali, ka yaco sara me tasere laivi na ivesu o ya.
Na inaki ni italanoa oqo kivei keda yadua sa matata vinaka sara tu ga. Ni da mai kila vakavinaka kina ka vakayagataka na kaukauwa veivukei ni Veisorovaki ki na noda bula, eda sa qai masuta kina na veivakaukauwataki me veisau na keda ituvaki ka sega ni masu me veisau ga vakataki koya na keda ituvaki. Eda sa qai yaco meda mata sa cakacaka yani ka sega ni ka me cakacakataki mai (raica na 2 Nifai 2:14).
Meda raica mada na ivakaraitaki ena iVola i Momani ena gauna a vakacacani kina o Alama kei ira na nona tamata mai vei Emuloni. Sa yaco mai na domo ni Turaga kivei ira na tamata vinaka oqo ena gauna ni nodra rarawa ka kaya:
“Ia au na vakamamadataka na icolacola dou sa vakacolati kina, mo dou kakua ni vakila ni dou sa colata. …
“A sa vakamamadataki na icolacola kece sa vakataqari vei Alama kei ira na wekana; a sa vakaukauwataki ira na Turaga mera colata rawa na nodra icolacola, ka ra soli ira ena yalomarau kei na yalo vosota ki na nona lewa na Turaga” (Mosaia 24:14–15; vakamatatataki).
Na cava a veisautaki ena italanoa oqo? A sega ni veisau na icolacola; a sega ni kautani vakatotolo mai vei ira na tamata na ibolebole kei na dredre ni veivakacacani. Ia a vakaukauwataki o Alama kei iratou na nona ilawalawa, ka yaco me vakalevutaki na nodratou rawa-ka kei na kaukauwa ka vakamamadataki kina na nodratou icolacola. O ira na tamata vinaka oqo era sa qai vakaukauwataki mai na Veisorovaki mera sa qai cakacaka ka mata mera gumatua ena kedra ituvaki. Ia ena “kaukauwa ni Turaga” era a qai muataki o Alama kei ira na nona tamata mera laki taqomaki ena vanua o Saraemala.
Ko ni na rairai vakasamataka tiko beka, “E yaco vakacava na italanoa kei Alama kei ira na nona tamata me ivakaraitaki ni kaukauwa veivukei ni Veisorovaki? Na kena isau e tiko ena kena vakatautauvatataki na Mosaia 3:19 kei na Mosaia 24:15
“Meda biuta tani na itovo vakayago ka yaco me tamata yalosavasava ena vuku ni isoro i Karisito na Turaga, ia meda vaka na gone lailai, meda talairawarawa, yalomalua, yalomalumalumu, dauvosota, dauloloma, ka talairawarawa ki na veika kece sa lewa vua na Turaga me vaka na gone sa talairawarawa vua na tamana” (Mosaia 3:19; vakamatatataki).
Ni da torocake tiko yani ki na noda ilakolako ni bula oqo mai na ca ki na vinaka ki na vinaka vakaoti, ni da sa biuta tani na itovo vakayago kei na itovo vakayago vakayalewa mai vei keda yadua, ka da sasaga meda tamata yalosavasava ka veisau na keda ituvaki, ka yaco na ivakarau ni bula sa tukuni tiko ena tikina oqo me sa keda ituvaki ni tamata vou eda sa yaco tiko kina. Eda sa yaco kina me vaka na gonelailai, talairawarawa vakalevu cake, dauvosota, ka yalorawarawa.
Meda na vakatauvatataka mada na ivakarau eso oqo ena Mosaia 3:19 vata kei na kena e vakamacalataki kina o Alama kei ira na nona tamata: “Ka ra soli ira ena yalomarau kei na vosota ki na nona lewa na Turaga” (Mosaia 24:15; vakamatatataki).
Au raica na veivakatauvatani vei rau na ivakarau e vakamacalataki ena veitikina oqo sa vakamatatataka tiko ni o ira na tamata vinaka i Alama era sa vuki mera vinaka vakaoti ena vuku ni kaukauwa veivukei ni Veisorovaki ni Turaga o Jisu Karisito.
Eda nanuma kina na italanoa kei Alama kei Amuleki ena Alama 14. Ena italanoa oqo era a vakamatei kina e vuqa sara vei ira na Yalododonu yalodina ena nodra vakamai, ka rau a vesu ka mokulaki kina oi rau na italai oqo ni Turaga. Meda raica mada na kerekere oqo nei Alama ni masu tiko ena loma ni valeniveivesu: “Ni vakaukauwataki keirau na Turaga me vaka na neirau vakabauti Karisito, ka sereki keirau” (Alama 14:26; vakamatatataki).
Eda raica tale eke na kila vakavinaka kei na yalonuidei nei Alama ki na kaukauwa veivukei ni Veisorovaki a vakayaco-ka ena nona kerekere. Meda raica sara mada na isau ni masu oqo:
“A rau sa drutia na kedrau ivesu [o Alama kei Amuleki]; ia ni ra sa raica ko ira na tamata, era sa dui dro ni ra sa rere, de ra na rusa. …
“E rau sa curu mai ki tuba ko Alama kei Amuleki; a sa sega na leqa e yaco vei rau; a sa vakaukauwataki rau na Turaga, me vaka na nodrau vakabauti Karisito” (Alama 14:26, 28; vakamatatataki).
Sa yaco tale na kaukauwa veivukei vei ira na tamata vinaka ni ra vorata tiko na veika butobuto ka sasagataka tiko mera vinaka vakaoti ka veiqaravi yani ena kena vinaka duadua “ena kaukauwa ni Turaga.”
Sa veivakasalataki talega e dua na ivakaraitaki oqo mai na iVola i Momani. Ena Alama 31, a liutaka tiko kina o Alama e dua na kaulotu me kauti ira lesumai na Soramu era sa vuki tani, ni oti toka na nodra tara na nodra Rameumitomi, ka ra cabora kina e dua na masu veivakaroti ka dokadoka.
Meda raica mada na masu nei Alama ni kerea tiko me vakaukauwataki: “Oi kemuni na Turaga, mo ni vakaukauwataki au, meu vosota rawa na veika rarawa ena yaco vei au, ena vuku ni nodra ivalavala ca na tamata oqo” (Alama 31:31; vakamatatataki).
A masulaka talega o Alama me ratou vakalougatataki vakakina na nona itokani: “Ia mo ni vakaukauwataki iratou talega, me ratou vosota rawa na veika rarawa ena yaco vei iratou ena vuku ni nodra ivalavala ca na tamata oqo” (Alama 31:33; vakamatatataki).
A sega ni masu o Alama me vagalalataki na nona rarawa. Sa kila tu o koya ni sa matataka tiko na Turaga, ka sa masuta kina na kaukauwa me vakayaco-ka ena ka e sotava.
Na iusutu ni ivakaraitaki oqo e tiko ena iotioti ni tikina ena Alama 31: “A sa vakaukauwataki iratou talega [na Turaga], me ratou vosota rawa na veika rarawa, ia me ratou marau ga ena vuku i Karisito. A sa yaco na veika kece sa masuta ko Alama, ni sa masu ena vakabauta” (tikina 38; vakamatatataki).
A sega ni vagalalataki na rarawa. Ia e ratou a vaqaqacotaki ka vakalougatataki o Alama kei iratou na nona itokani mai na kaukauwa veivukei ni Veisorovaki me ratou “vosota rawa na veika rarawa, ia me ratou marau ga ena vuku i Karisito.” Sa qai dua dina na veivakalougatataki totoka. Meda sa qai vuli yadudua mai na lesoni oqo.
E sega walega ni kune ena ivolanikalou na ivakaraitaki ni kaukauwa veivukei oqo. A sucu o Daniel W. Jones ena 1830 mai Missiouri, ka lewena na Lotu mai California ena 1851. Ena 1856 a vakaitavi o koya ena nodra laki vueti mai na kabani ni qiqidreti ka a laki tao tu ena cagi kaukauwa ni ucacevata mai Wyoming. Ni sa oti na nodra laki vueti mai na Yalododonu vakaleqai mai vei ira na ilawalawa veivueti, ka ra vakayacora eso na veitaqomaki totolo sara, ka vakarautaka mera vakau yani na tauvimate kei na malumalumu ki Salt Lake City, e a bole o Daniel kei na so tale na cauravou mera vakatawa tiko mai ka taqomaka na nodra iyaya na kabani. E lailai sara na kakana kei na iyaya a biu tu mai vei Daniel kei iratou na nona ilawalawa ka sa vakayagataki tu. Na itukutuku oqo mai na ivolaniveisiga nei Daniel Jones e vakamacalataka na veika a yaco.
Era sa sega na manumanu me vakasasataki ka keitou sega ni vakamatea rawa e dua. Keimami a kana lewe ni manumanu makawa, ka na via kana tale o koya ena kania. Sa mani oti kece sara, ka sa vo tu ga na kulini manumanu. Keitou sa mani saga me keitou kania. Sa mani saqa sara tu vakalevu ka laukana vakaveitalia ka tauvimate kina na kabani taucoko. …
“Sa butobuto na veika kece, ni sa sega tale ni vo e dua na ka ia na kulini manumamnu droka mai na bulumakau walokai. Keitou a kerea na Turaga me dusimaki keitou ki na veika me vakayacori. Eratou a sega ni vosa kudrukudru na veitacini, ia e ratou a vakararavi ga vua na Kalou. … Sa oti o ya sa lomaqu sara meu vakavinakataka na ka kece ka vakasalataki ira na kabani, ka vakamacalataka na iwalewale ni kena vakasaqari; o ya mera tavuna ka karia laivi na vutina; oqo me na vakamatea ka vakasavasavataka na kena ikanakana ca ni a vakasaqari. Ni sa kari oti, me qai saqa vakalevu ena wai me dua na auwa, sova laivi na kena wai ka a kabikabi tu, me qai vakasavasavataki vakavinaka sara ka kari laivi na kulina, vakasavasavataki ena wai batabata, oti me qai saqa me waliwalia ka me qai vakabatabatataki, me qai vakamiriki kina na suka ka laukana. Sa qai dua na cakacaka levu, ia sa sega tale na ka me keitou cakava ni vinaka cake oqo mai na walokai.
“Keitou a kerea vua na Kalou me vakalougatataka na ketei keitou me na ciqoma rawa na kakana oqo. … Sa lako vinaka na kana ni sa marautaki. Keitou a sega tu ni kana ena tolu na siga me yacova ni sa qai vakatovolei tale oqo. Keitou a taleitaka tiko na kana magiti oqo me ono na macawa.”3
Ena ituvaki vakaoya au na rairai masulaka meu kania e dua tale na ka: “Tamaqu Vakalomalagi, yalovinaka ni vakauta mai vei au e dua na toa ni veikau se dua na bafalo.” Ena rairai sega beka ni votu vei au meu masulaka me kaukauwa na ketequ ka ciqoma rawa na kakana sa vakarautaki tu. Na cava so e kila tu o Daniel W. Jones? E kila tu o koya na kaukauwa veivukei ni Veisorovaki i Jisu Karisito. A sega ni masulaka me veisautaki na kena ituvaki o ya. A masulaka me na vakaukauwataki me taqeya rawa kina na kena ituvaki o ya. Me vaka ga na nona a vakaukauwataki o Alama kei ira na nona tamata, o Amuleki, kei Nifai, a yaco vei Daniel W. Jones e dua na rai vakayalo me kila na veika me masulaka.
Ena vaqaqacotaki keda na kaukauwa veivukei ni Veisorovaki i Karisito meda cakava na veika eda sega ni cakava rawa vakai keda. Au dau vakasamataka tu eda na vulica beka ena noda gauna oqo ni sa rawarawa tu na ka—ena noda vuravura oqo ni ovani livaliva kei na talevoni veikauyaki kei na motoka e vakacagi batabata kei na itikotiko veivakacegui—me vakanamata na noda vakararavi ena veisiga ki na kaukauwa veivukei ni Veisorovaki.
E dua dina na marama yalodina ka vuku o Sisita Bednar, kau vulica mai vua na lesoni bibi ni veika e baleta na kaukauwa veivaqaqacotaki mai na nona ivakaraitaki yalomalua. Au raica na nona gudei tiko ena gauna voravora ni dau malumalumu ena veimataka lailai—me tauvimate tu ena siga taucoko me walu na vula—ena tolu na gauna a bukete voli kina. Keirau a masulaka vata me na vakalougatataki, ia a sega ni vagalalataki na bolebole o ya. Ia, sa mani yaco ga vua me vakayacora rawa na veika e sega ni rawa me cakava ga ena nona kaukauwa. Ena veiyabaki au sa raica talega na nona sa vaqaqacotaki me taqeya rawa na veivakacacani kei na veivakalialiai e yaco mai vua e dua na isoqosoqo vakavuravura ena gauna e vakamuria kina e dua na marama Yalododonu Edaidai na ivakasala ni parofita ka me vakaliuca tiko na nona matavuvale kei na nodra susugi na gone. Au vakavinavinaka ka vakacaucautaki Susan ena nona vukei au meu vulica na lesoni cecere vaka oya.
E Kila ka Kila Vakavinaka na iVakabula
Eda vulica ena Alama Wase 7 na sala kei na vuna sa mai vakarautaka kina na iVakabula na kaukauwa veivukei:
“Ia ena mai vunau voli ko koya ena vosota na ka rarawa, na veivakararawataki kei na veivakatovolei kecega, a sa yaco na veika oqo me vakayacori kina na vosa sa tukuni, ni na colata ko Koya na nodra rarawa kei na nodra i valavala ca na nona tamata.
“Ena soli Koya me mate me sereka kina na i vesu ni mate sa vesuki ira tu na nona tamata; ia sa mai bula vakatamata ko Koya me kila kina na nodra malumalumu na nona tamata, ka vakabulai ira ena nona yalololoma.” (Alama 7:11–12; vakamatatataki).
Sa mai vakararawataki na iVakabula sega walega ni baleta na noda ivalavala ca ia sa vakakina ena noda veivakaduiduitaki, na veiqati, na mosi, na rarawa, kei na lomaocaoca ni vakasama e dau yaco vakavuqa vei keda. E sega ni dua na rarawa vakayago, sega na lolosi ni yalo, sega na rarawa ni yalo, sega na ivalavala ca se malumalumu e daru sotava o iko kei au ena ilakolako ni bula oqo me a sega ni bau sotava mada e liu na iVakabula. O iko vata kei au daru na tagicaka beka ena gauna ni nodaru malumalumu, “E sega ni dua ena vakasamataka rawa. E sega ni dua e kila.” E sega mada ni dua na tamata, me na kila. Ia sa kila vakavinaka tu na Luve ni Kalou ka rawa ni vakasamataka rawa, baleta ni a vakila taumada o Koya ka colata na noda icolacola ni bera ni da mai cakava. Ena vuku ga ni sa mai sauma na isau cecere duadua ka colata na icolacola bibi o ya, sa kila vinaka kina o Koya na yaloda ka ra me dodoka mai na Ligana dauloloma cecere ena vuqa na veituvaki eso ni noda bula. Sa rawa Vua me dodoliga mai, tarai keda, veivuke—ka vaqaqacotaki keda meda yaco meda cecere sara ena kena eda rawata ka vukei keda meda cakava rawa o ya ka da sega ni rawata rawa ena noda vakararavi tiko ki na noda kaukauwa ga vakai keda.
“Dou lako mai vei au, koi kemudou vakaaduaga sa oca ka colata na icolacola bibi, ia kau na vakacegui kemudou.
“Vakataqara vei kemudou na noqu ivua, ka vuli vei au; niu sa yalomalua ka yalomalumalumu: dou na kunea kina na vakacegu ni yalomudou.
“Ni sa rawarawa na noqu ivua, ka mamada na noqu icolacola” (Maciu 11:28–30).
Au vakaraitaka eke na noqu vakadinadina kei na vakavinavinaka me baleta na solibula tawayalani ka tawamudu ni Turaga o Jisu Karisito. Au kila ni bula tiko na iVakabula. Au sa sotava ruarua na Nona kaukauwa veivueti kei na Nona kaukauwa veivukei, kau sa vakadinadinataka ni sa dina sara na kaukauwa e rua oqo ka sa vakarautaki tu vei keda yadudua. Sa dina sara, ni sa rawa meda cakava ka vorata rawa na veika kecega “ena kaukauwa ni Turaga” ni da toso tikoga ki liu ena noda ilakolako ni bula oqo.
O My Father, mai vei Simon Dewey
iVakaraitaki mai vei Jeff Ward
iVakaraitaki mai vei Jeff Ward
Droini mai vei Behold My Hands, mai vei Jeff Ward