iTukutuku ni Valetabu

Vakayacori na Vakatatabu me baleta na Valetabu na Quetzaltenango Guatemala

A vakatabui na Valetabu na Quetzaltenango Guatemala ena Sigatabu, na ika 11 ni Tiseba, 2011, ena tolu na soqoni mai vei Peresitedi Dieter F. Uchtdorf, na iKarua ni Daunivakasala ena Mataveiliutaki Taumada. A kaburaki na veisoqoni ni vakatatabu vei ira na veivavakoso ni Lotu ena loma ni tikina vakavaletabu.

“Sa dua na valetabu totoka oqo,” e kaya o Peresitedi Uchtdorf ena soqo ni marau ni vakaraitaki ivalavala vakavanua, ka ra meke, lagasere ka vakaraitaka kina e dua na drama ni itukutuku kei na itovo vakavanua na itabagone mai na veivavakoso ena iwasewase. “E koto kina e dua na rarama serau me vaka e dua na vatutalei, ia e dua dina na vatutalei ena iwase ni vanua oqo ena matanitu oqo.”

Na valetabu na Quetzaltenango Guatemala sa ika 136 ni valetabu e vuravura taucoko ka ikalima ena Lomai Amerika. Na valetabu oqo ena veiqaravi ena vukudra e rauta ni 60,000 na Yalododonu Edaidai.

Kelivaka na Lotu na Yavu ni iKavitu ni Valetabu mai Brazil

Ena ika 15 ni Noveba, 2011, a vakatulewataka kina o Elder David A. Bednar ena Kuoramu ni iApositolo Le Tinikarua na soqo ni kelivaki yavu ni Valetabu na Fortaleza Brazil, na ikavitu ni valetabu ni Lotu mai Brazil.

“Ena yaco na valetabu oqo me ivurevure ni vakanuinui, rarama, kei na vakabauta na Kalou vei ira kece era na lako mai ka yabeta voli na vanua oqo kei na tikiniqele oqo,” e kaya o Elder Bednar. “Ena uasivi cake ka duatani na siti oqo baleta na kena mai tara kina na valetabu.”

Ena tara na valetabu mai Avenida Santos Dumont e Fortaleza mai Ceará, Brazil. A kacivaka o Peresitedi Thomas S. Monson na tara ni Valetabu na Fortaleza Brazil ena koniferedi raraba ni Okotova 2009.

Na Valetabu na Quetzaltenango Guatemala, ka vakatabui ena ika 11 ni Tiseba, 2011, mai vei Peresitedi Dieter F. Uchtdorf, sai ka 136 ni valetabu ni Lotu.

VAKAVINAVINAKA: