Vakasama ni Lotu Vakamatavuvale

Na mekesini oqo e tu kina na italanoa kei na veitavi qaravi eso ka rawa ni vakayagataki me baleta na lotu vakamatavuvale. Oqo e rua na kena ivakaraitaki.

“Na Veivakalougatataki ni Semineri,” tabana e 20: Railesuva rawa na italanoa ka vakatulewa ena sala mo vakayagataka kina vakavinaka duadua na itukutuku ena nomu matavuvale. Kevaka era tiko na gone yabaki tinivakacaca ni semineri, tekivu ena nomu taroga na vuna e bibi kina vei ira na semineri. Qai wilika na iwasewase ka vakatokai na “Ciqoma na Kena Yalayala.” Vakayaloqaqataki ira na gone sobu me ra vakarautaki ira me ra lakova na semineri ni ra sa yacova na kena yabaki. Kevaka e sega na itabagone ena yabaki ni semineri, o na vinakata mo wilika na italanoa ka qai veivosakitaka na bibi ni semineri vei ira na itabagone nikua.

“Tamata Kece e Kilai Bleck,” tabana e 42: Vakasamataka mo lagata na “Dina tu Ga” (Sere ni Lotu, naba 143) me sere idola. Wilika se vakalekalekataka na italanoa kei Bleck. Kerei ira na lewe ni matavuvale me ra wasea e dua na ka era sa sotava ena nodra vakatauca e dua na lewa dredre me baleta e rua na sala duidui kei na veika e yaco mai na lewa era vakatauca. Tinia ena nomu wilika na vosacavuti mai vei Peresitedi Thomas S. Monson.

Rawarawa, Maravu, ka Tawaguilecavi

Oqo e dua na lotu vakamatavuvale tawaguilecavi vata kei rau na neirau goneyalewa lalai, o Angélique, yabaki 6, kei Béthanie, yabaki 4. Keirau dui dalasai ruarua kei na watiqu ena neirau idabedabe, ena oca ka keirau sega ni kila na vanua me keirau tekivu kina. Erau dui soli vakasama na neirau goneyalewa ka rau wirica na qiqi ni ilesilesi ena lotu vakamatavuvale, ka dui soli vei keirau e yadua na itavi. Nona itavi na watiqu me veiliutaki, nei Béthanie na sere, noqu na itaviqaravi, ka solia na vakasama vakayalo o Angélique.

Digitaka o Béthanie na “I Love to See the Temple” (Children’s Songbook, 95), keitou mani lagata vata. Dolava ena masu o Tata. Qai taura o Angélique na iotioti ni Liaona e qai taba ka digia e dua na italanoa mai na nodra iwasewase na gonelalai. Se qai vuli wilivola tiko o koya mai koronivuli, qai wilika vei keitou na italanoa. E maravu na yalo e neitou vale. E vakadinadinataka na Yalotabu ni dina na veika e wilika tiko.

Keitou qitotaka vata eso na qito, au cabora na masu ni suka. Niu masu tiko, au sega ni cegu ena vakavinavinaka vei Tamada Vakalomalagi ena Yalona kei na loloma kei na nona vakalougatataka na neitou vale mai vei rau na yalo lalai oqo. Keirau kila kei na watiqu ni neirau itavi me keirau qaravi rau ka vakavulica vei rau na kosipeli. Na vakayacori ni lotu vakamatavuvale e dua na itavi tabu oqori.

Sylvie Poussin, Réunion