Sa Cakacaka Tiko na Matabose ni Tabanalevu
Era sa vakayagataka tiko na Yalododonu Edaidai na matabose ni tabanalevu mera vakalougatataka kina na nodra bula era vakaleqai tu.
Ena bogi ni Me 22, 2011, ena loma ni voqa ni saireni, a cakuvu e dua na tonado ena loma kei Joplin, mai Missouri, e Amerika, ka vakarusa vakadua na veiitikotiko kei na bula ni tamata. A boloraki vakaca sara na Tabanalevu e Joplin First mai na tonado oqo, ia a vakatotolo sara na nona soqoni ira vata mai na nona lewe ni tabanalevu o bisopi kei na matabose ni tabanalevu.
“Keitou sa vakarautaka tu e dua na ituvatuva baleta ni keitou sa veivosakitaka oti tu na vakavakarau oqo ena matabose ni tabanalevu ni bera ni yaco na veika oqo.” A kaya. “Keimami a vakararavi talega ki na Yalotabu me kilai kina na veika me vakayacori. Era sa bale na duru ni livaliva. Era sa sega ni cakacaka na talevoni veikauyaki. Keimami sa qai masu ka vakarorogo ki na kena isau, ia era a yaco mai—ni ra sa dau yaco ga mai. E marau na yaloqu ka vakavinavinaka ena noqu itutu vaka-bisopi niu rogoci ira na lewenilotu ni ra kaya, ‘Au sa cakava oti oqo,’ ka sega ni, ‘Na cava o vinakata meu cakava?’”
Na caka vinaka oqo e Jopilin e vakaraitaka tiko na kaukauwa ni dua na matabose ni tabanalevu e duavata. “Na matabose ni tabanalevu sa dua vei ira na soqoni bibi duadua ena Lotu.” A vola vakaoqo o Elder M. Russell Ballard ena Kuoramu ni iApositolo Le Tinikarua. “baleta ni ra na veivosaki ka tuva-ka kina na kuoramu ni matabete kei na iliuliu ni mataisoqosoqo vata kei na matabisopi. … Mai vei ira taucoko na matabose kei na komiti ena loma ni Lotu, au vakabauta ni matabose ni tabanalevu sa rawa me vakayaco-ka vakalevu sara ena nodra vukei na luvedra na Tamada Vakalomalagi.”1
Duavata ena Loloma kei na Vakabauta
Mai Puerto Francisco de Orellana, e dua na koro tiko vakayawa sara ena loma ni veikau e Ecuador, era tiko kina na lewenilotu era vauci kaukauwa sara ena loloma kei na vakabauta. E laurai ena matabose vakavula ni tabana na nodra veikauwaitaki. Era vakaliuca vakatabakidua na tamata yadudua kei na matavuvale, kei na kena rawa ni veivuke na parokaramu. E tarava mai na veivakauqeti vakayalo.
E vuqa na lewenilotu era gadreva tu na veivuke mera kune cakacaka. Sa qai kunea na matabose ni tabana ni nodra ibolebole oqo na lewenilotu e rawa ni wali ga ena nodra itikotiko. Ni ra sa veivosakitaka na matabose na nona gagadre e dua na marama tina duadua kei na luvena yalewa lailai e dau tautauvimate, sa raica kina o peressitedi ni iSoqosoqo ni Veivukei e dua na cakacaka e rawa ni laki cakacaka kina o tinani gone oqo ka rawa ni tiko volekata talega na luvena yalewa.
Ena rawa talega ki na matabose ni tabana me vakayagataka na ivurevure ni Lotu, me vakataka na iyaya ni veituberi ni vaqara cakacaka ena Veiqaravi ni Veivakacakacakataki ni YDE.2 Era tauyavutaka e dua na kalasi e veivakavulici kina e dua na lewenilotu ena tabana, ka na vukea e dua tale na lewenilotu ena tabana me kune cakacaka.
E kaya kina vakaoqo o Ramiro Reyes, na imatai ni daunivakasala ena mataveiliutaki ni tabana, me baleta na matabose ni tabana: “Keimami sa iyaya ni cakacaka ena liga ni Turaga. Ena vakayacora rawa o Koya na Nona inaki mai na noda cakacaka.”
Na Nomu Sala ki na Valetabu
Mai Liverpool, Niu Yoka, mai Amerika, a tiko rawa o Melissa Fisk ena nona itutu vaka-peresitedi ni Lalai ena matabose ni tabanalevu, ka yaco me vakararamataki ki na kena kaukauwa. Ena gauna sa tara kina mai na nona beqi e dua na ivolalailai, a raica sara e dua na kedra itaba e 28 na gone ena Lalai era tucake tu ena kabakaba ni Valetabu e Palmyra New York. Ka sa tauvi duka ni manumanu. E vaka, me dreta vakalailai na nona vakasama mai na bose, ka vakananuma sara na siga a gole kina na Lalai ni tabanalevu ki Palmyra mera laki marautaka na yalo vakalou e tiko ena rara ni valetabu. E ka ni rarawa, ni gauna era tevuka kina na gone na nodra itutuvi, era a ceburaka laivi e dua na bure ni pi.
Ni sa oti na nodra qaravi, era sa sureti ira na gone na iliuliu mera laki tara na valetabu. Era sa bese na gone ni ra rerevaka de ra tu kina eso tale na pi oya. Era sa qai tuva na itubutubu kei na iliuliu me dua kina na sala ki valetabu. Era sa qai vakayaloqaqataki kina na gone mera toso yani ki liu.
Ena gauna sa vakarorogo lesu tale mai kina o Melissa ki na bose ni matabose ni tabanalevu, a vakananuma, “Kevaka mada ga mera wavoliti yadua mai vei ira na itokani kei na iliuliu dauloloma ni ra toso yani ki na valetabu.”
A takosovi na nona vakanananu ni sa kaya mai o peresitedi ni iSoqosoqo ni Veivukei me baleta e dua na sisita me na vukei: “A sega ni mai lotu o koya ena Siga Tabu sa oti. Au na raica me rau laki tukuna vua na nona dausiko vuvale me baleta na ilakolako ki valetabu e tarava.”
“E ratou sotava tiko eso na ka dredre ena gauna oqo,” a tomana mai o peresitedi ni kuoramu ni italatala qase. “Au na talemuri rau mada na nodratou dauveituberi ni vuvale kevaka e tiko na ka me tou vakayacora.”
“Sa rawa vei ira na goneyalewa mera laki veivuke ena meimei,” a kaya mai o peresitedi ni Goneyalewa.
Ni raica yani o Melissa na matadra na lewe ni matabose ni tabanalevu, e raica ni ra veikauwaitaki ka malele dina kina. E matadredredre sara kina. “Na Turaga sa vakarautaka na sala eso mera taqomaki ka lomani kina na Luvena,” a vakasamataka. “Na matabose ni tabanalevu!”
Me vaka ga a yaco e Joplin, Puerto Francisco de Orellana, kei Liverpool, era sa raica tikoga na iliuliu ni Lotu e vuravura taucoko na veivakalougatataki ni matabose ni tabanalevu kei na tabana. Ni ra cakava oqo, era na rawata kina na kaukauwa cecere ni veimatabose oqo me vukei na Turaga me vakalougatataki kina na Luvena ka vakayacora rawa na Nona cakacaka.
iMawi: iTaba vakadroini mai vei Craig Dimond
iMawi: itaba vakadroini mai vei Joshua J. Perkey