Na cava me caka kina na Semineri?

Na cava e rawa ni o tukuna ni ka bibi duadua e rawa ni rawata e dua na gonevuli mai na semineri kei na inisitute?

Na cava e rawa ni o tukuna ni ka bibi duadua e rawa ni rawata e dua na gonevuli mai na semineri kei na inisitute? Ni ra taroga e dua na ilawalawa gonevuli ni semineri na Komisina ni iVakarau ni Vuli ena Lotu, o Elder Paul V. Johnson ena Vitusagavulu, na taro vata oqo, a sauma ni ka bibi duadua e rawa ni o rawata sai koya na “ivakadinadina dina sara kei Jisu Karisito. Na kena kilai ni kila ka dina sara sai koya na kila ka vakayalo. Sai koya na ka e lako mai vua na Yalo Tabu ki yaloda yadua. Oqori na dina kaukauwa duadua, na ka kaukauwa duadua e rawa ni basika mai ena semineri kei na inisitute. E sega ni veisautaka walega na veika o kila; e veisautaki iko sara ga, ka veisautaka na ivakarau ni nomu raici vuravura. Kei na ivakarau ni vuli cecere vaqori ena vukea na kena taucoko na mataqali vuli tale eso” (“A Higher Education,” New Era, Epe. 2009, 15).

O Elder Johnson e dua vei ira na vuqa na Vakaitutu Raraba sa vosa oti me baleta na veivakalougatataki vakasakiti ka dau yaco mai ena noda lakova na semineri kei na inisitute. Kevaka o vakataroga tiko se cava na vuna mo lakova kina na semineri, oqo eso tale na vuna vivinaka mai vei ira na parofita kei na iapositolo.

Vakaitavi ena Semineri

“Ena vukei kemuni na semineri mo ni vakararavi kina ivakavuvuli kei na Veisorovaki i Jisu Karisito. Ko na vakila na Yalo ni Turaga ni ko vulica mo lomana na ivolanikalou. Ko na vakarautaki iko kina valetabu vakakina na veiqaravi ni kaulotu.

“Kemuni na itabagone, au kerei kemuni mo ni vakaitavi ena semineri. Ni wilika ena veisiga na nomuni ivolanikalou. Ni rogoci ira vinaka na nomuni qasenivuli. Ni bulataka ena masumasu na veika o ni vulica.”

President Thomas S. Monson, “Participate in Seminary,” seminary.lds.org.

Raica e Tolu na Ka e Rawa ni Cakava na Semineri

“E tolu na ka qaqa e rawa ni vakayacora na semineri. Taumada, e kauti ira vata mai na itabagone e tautauvata na veika era vakabauta. Era dau taleitaka na itabagone me ra wasea na nodra vakabauta. Karua, e biuti ira na itabagone kei na dua na qasenivuli ka tiko na nona ivakadinadina, ka ra na vakila na kena waqawaqa ena gauna sa wasei kina. Katolu, na semineri e biuti ira na itabagaone ena loma ni ivolanikalou.”

Peresitedi Henry B. Eyring, Matai ni Daunivakasala ena Mataveiliutaki Taumada, “A Discussion on Scripture Study,” Liaona, Julai 2005, 11.

Me Liu

“Kemuni na gonevuli, kevaka e donu tu na ka o ni dau vakabibitaka, o ni na sega ni lomalomarua mo biuta tani eso na kalasi digitaki ka rawa ni ukutaka na nomu bula mo taura na lesoni ka na vaqaqacotaka na kena yavu sara ga. Ia, ni sa volai na yacamu, lakova, vulica ka kila. Vakauqeti ira na nomu itokani me ra vakayacora vakakina. O ni na sega vakadua ni veivutunitaka; au yalataka oqo vei kemuni.”

Peresitedi Boyd K. Packer, Peresitedi ni Kuoramu ni iApositolo Le Tinikarua, “Agency and Control,” Ensign, Me 1983, 67.

Vakadavora e dua na Yavu ni Marau kei na Qaqa

“Ena vukei iko na parokaramu ni semineri ni o cauravou se goneyalewa mo vakadavora e dua na yavu ni bula marau kei na qaqa.”

Elder Richard G. Scott ena Kuoramu ni iApositolo Le Tinikarua, “Oqo na Gauna ni Laki Kaulotu!” Liaona, Me 2006, 88.

Sureta ki na Nomu Bula na Veivakalougatataki

“Au vakavinavinakataka na ivakarau ni semineri ena Lotu kei na parokaramu ni inisitute ni Lotu. Au via vakauqeti ira kece na gonevuli ena vuli torocake o ni tiko eke mo ni vakayagataka na parokaramu ni semineri. Ena vakalougatataki vakalevu cake na nomuni bula ke ko ni vakayacora vakakina.”

Peresitedi Gordon B. Hinckley (1910–2008), “Excerpts from Recent Addresses of President Gordon B. Hinckley,” Ensign,, Tise. 1995, 67.

Mo Tauri iVola ena Semineri

“Dau lakova e veigauna na semineri ka tauri ivola mai na semineri. Na kalasi ni semineri e dua na gauna vakayalo bibi duadua e rawa ni sotava e dua na cauravou kei [na goneyalewa].”

Peresitedi Ezra Taft Benson (1899–1994), “To the ‘Youth of the Noble Birthright,’” Ensign, Me 1986, 44; “To the Young Women of the Church,” Ensign, Nove. 1986, 82.

Vulica na Dina ni Kosipeli

“Au diva ga me rawa vei ira kece na gonetagane kei na goneyalewa me ra lakova na semineri, baleta ni oqori na vanua era na vulica mai kina e vuqa na dina ni kosipeli. Na semineri sai koya na vanua e laki vakadeitaki kina na nodra nanuma e vuqa vei ira me baleta na ka me ra cakava, ka ra qai lako yani ki kaulotu.”

Peresitedi Spencer W. Kimball (1895–1985), “President Kimball Speaks Out on Being a Missionary,” New Era, Me 1981, 49.

iTaba kei Spencer W. Kimball isolisoli mai na LDS Church Archives