Votai Vakaiyauyau mai na Koniferedi Raraba

Mai vei Michael Barber kei David Marsh

Tabacakacaka ni Lewenivuli

E dina ga ni da cavuta na “emeni” ni dau cava na iotioti ni soqoni ena koniferedi raraba, e sega ni gadrevi me sa cava e kea na kana magiti vakayalo. Sa rawa me tomani tikoga ena noda vulica ka bulataka tiko na ivakavuvuli mai na koniferedi o ya. Ena veiyabaki sa oti, era sa vakayaloqaqataki keda tiko mai na parofita meda cakava sara ga na ka oqo. Me vakataka, ena yabaki 1946, ni a veivakamasuti o Peresitedi Harold B. Lee (1899–1973) vei ira na lewenilotu mera vakatara na vosa ni koniferedi me “sa nodra idusidusi ni nodra ilakolako kei na ivosavosa ena loma ni ono na vula e tarava.” A vakamacalataka o koya. Sai koya oqo na veika bibi vua na Turaga e raica ni sa ka dodonu me vakatakilai yani vei ira na tamata ena siga nikua.”¹

Ena 1988, a voqataka kina na ivakasala oqori o Peresitedi Ezra Taft Benson (1899–1994) ena nona vakavulica, “Ena loma ni ono na vula e tarava, na ilavelave ni koniferedi ena Ensign me sa toka tikiva na nomuni ivolanikalou taucoko ka me na wiliki tiko ena veigauna.”²

Ena nona tinia na koniferedi raraba ni Okotova 2008, a vakadeitaka tale kina o Peresitedi Thomas S. Monson na bibi ni kena vulici na vosa ni koniferedi. A kaya: “Meda na dau nanuma tu vakabalavu na veika eda sa mai rogoca ena koniferedi raraba oqo. Na itukutuku sa mai soli ena laki tabaki sara ki na ilavelave ni vula mai oqo ni mekesini na Ensign kei na Liaona. Au sa vakamasuti kemuni mo ni vulica ka tugana na kena ivakavuvuli.”³

Ena gauna ko vulica ka tugana kina na itukutuku ni koniferedi, na cava e rawa mo cakava me vakaibalebale cake vakalevu kina ena nomu bula? Oqo eso na vakatutu me vukei iko mo vakavakarau, ciqoma, ka cakacaka ena vosa veivakauqeti vakayalo:

Vakavakarau mo ciqoma na veivakauqeti vakayalo. Se ko sarava, vakarorogo, se wilika na vosa ni koniferedi, e dodonu mo dolava na yalomu kei na nomu vakasama ki na veivakauqeti vakalou. E vakavulica o Elder David A. Bednar ena Kouramu ni iApositolo Le Tinikarua ni se cava ga na mana ni veika e vakavulica o koya e vosa tiko, “ena qai curu ga na lewe ni dua na itukutuku kei na ivakadinadina ni Yalo Tabu ki na yalo ni tamata kevaka walega e vakatara me curumi koya.” A vakamacalataka ni kena ciqomi na veivakauqeti vakayalo e “gadrevi kina na yalo, vakasama, kei na gagadre vakayago ka sega walega ni kena ciqomi tu ga vakawelewele.”⁴

Sa rawa me veivuke na veivakasama oqo ki na vakavakarau ni veivakavulici ni Yalotabu:

Digitaka e dua na gauna ka tauyavutaka e dua na vanua e galala mai na veika kecega mo na rawa ni ciqoma kina na veivakauqeti vakayalo.
Vakasaqara na veidusimaki vakalou ena masumasu.
Vola na nomu vakatataro se kauwai o vakasaqara tiko na kena iwali.

Mo kila vakavinaka na itukutuku. O ira na parofita kei na iapositolo bula era na veivakavulici, veituberi, veimasuti, veivunauci, ka ivakadinadina. Ni ko raica matua na nodra vosa ena vukei iko mo kila vakavinaka na nodra vosa. Oqo eso na iwalewale mana ni vuli:

Mo dau taro. Me kena ivakaraitaki: Na cava e vinakata vei au na Turaga meu vulica mai na itukutuku oqo? Ena rawa vakacava ki na vosa oqo me vakarabailevutaka kina na noqu kila vakavinaka na ivakavuvuli ni kosipeli se dua na tiki ni ivolanikalou? Na italanoa cava era vakayagataki me vakamatatataka kina na ivakavuvuli ni kosipeli, kei na veika cava au vulica rawa mai vei ira?
Vola e dua na ituvatuva. Vakarogoca matua na irogorogo ni nona ituvatuva o koya e vosa tiko. Wasea vakarua na vosa ka vola e dua na ivakaleka e vakamacalataka na vakasama bibi e tukuni tiko ena wase yadudua.
Mo raica rawa na gacagaca eso era tiko ena loma ni vosa. Vola na itukutuku me vakataka na vunau, ivolanikalou, italanoa, veivunauci, lisi, ivakadinadina, veisureti me vakayacori, kei na veivakalougatataki sa yalataki ni ko talairawarawa ki na ivakasala.
Vulica vakalevu na vosa. Sa gadrevi sara me vulici vakavuqa na dina ni kosipeli me rawa ni kilai na kedra ibalebale kei na inaki. Na veigauna yadua o vulica kina, mo vola tiko na veivakararamataki vou o na ciqoma tiko.

Mo vakayacora sara na veika o sa vulica. Kevaka o vulica ena masumasu na veivosa oqo, ko na raica rawa na kena bulataki na itukutuku ena nomu bula. Sa rawa mo kila na sala mo vakayacora kina eso na veisau e vakaibalebale cake ena nomu taroga na taro vakaoqo Na Cava e vinakata na Turaga meu cakava ena veika au sa vulica rawa? kei Na cava au sa vulica mena vukei au ena noqu matavuvale, cakacaka, se veikacivi ni Lotu? Vola na veivakasama eso mo kakua kina ni guilecavi ira. Ni ko vakayacora, ko na vakauqeti vakayalo mo bulataka na kena ivakavuvuli ka ciqoma vakakina na veivakalougatataki sa yalataki tu.

Na koniferedi raraba sa gauna e vakatakila mai kina na Turaga na Nona lewa mai vei ira na Nona italai kivei iko. E vakavulica kina o Peresitedi Spencer W. Kimball (1895–1985) ena vosa ni koniferedi, “E sega ni gadrevi ki na dua na itukutuku se ivola e taudaku ni ivolanikalou taucoko ni Lotu me vakatabakiduataki tiko ena ituvatuva ni veika o sa vulica rawa—sega ena kedra matau ni kena volai se na kedra veivakauqeti veirawai, ia na kedra inaki ga e veimuataki ki na bula tawamudu.”⁵