iTukutuku ni Mataveiliutaki Taumada
Sa Tucaketale ko Koya
Na iVakadinadina ni Dua na Parofita
A vakaraitaka o Peresitedi Thomas S. Monson, ni “Oqo na kaci ni veivakayavalati kivei keda na Lotu Vakarisito” ni sa tucaketale mai na mate o Jisu na kai Nasareci. “Na dina ni Tucaketale e vakarautaka vei keda kece sara na vakacegu ka sega ni vakasamataki rawa” (raica na Filipai 4:7).1
Ena itukutuku e tarava, e vakaraitaka kina o Peresitedi Monson na nona ivakadinadina kei na nona vakavinavinakataka na Tucaketale ni iVakabula ka vakaraitaka ni vuku ga ni sa mai qaqa na Luvena ki na mate, o ira kece na luvena na Tamana era gole mai ki na vuravura oqo era na bula tale.
Na bula ni Oti na Bula Oqo
“Au vakabauta ni sega ni dua vei keda e rawa ni kila taucoko sara na veika a vakayacora na Karisito ena vukuda mai Kecisemani, ia au vakavinavinaka tu ga ena veisiga kece sara ni noqu bula me baleta na Nona solibula ni veisorovaki ena vukuda.
“A rawa Vua me vakasuka ena iotioti ni gauna. Ia a sega. A sotava kina na veika kecega me vakabula na veika kecega. Ni vakayacora vakakina, a solia kina vei keda na bula ni sa oti na bula oqo. Sa vueti keda mai na Lutu i Atama.
“Au vakavinavinaka Vua, mai na boto ni yaloqu. E vakavulica vei keda na ivakarau ni bula. E vakavulica vei keda na ivakarau ni mate. A rawata na noda vakabulai.”2
Vakawabokotaki na Butobuto ni Mate
“Ena so na gauna, me vaka na icolacola bibi ni mosi kei na tauvimate, sa lako mai o mate me agilosi ni veivakacegui. Ia ena vuqa na yasana, eda nanuma ni sai koya na meca ni marau vakatamata.
“Na butobuto ni mate e rawa ni vakarusai mai na rarama ka vakaraitaka na dina. ‘Oi au na vu ni tucake-tale, kei na vu-ni-bula,’ e kaya na iVakavuvuli. ‘Ko koya sa vakabauti au, kevaka sa mate, ena bula ga: Ia o koya yadua sa bula ka vakabauti au, ena sega sara ni mate.’
“Na veivakayaloqaqataki oqo—io, na veivakadeitaki vakayalo—na bula ka sa sivia yani na ibulubulu e rawa ni solia na vakacegu ka a yalataka na iVakabula e na Nona vakayaloqaqataki ira na Nona tisaipeli: ‘Au sa solia vei kemudou na vakacegu, au sa solia vei kemudou na noqu vakacegu e sega ni solia o vuravura, au sa solia vei kemudou. Me kakua ni taqaya na lomamudou, ka me kakua talega ni rere.’”3
Sa Sega Eke Ko Koya
“Sa bula tale na noda iVakabula. Na ka e lagilagi, veivakacegui ka veivakadeitaki duadua ena veika kece sa yaco ena itukutuku ni kawatamata—sa vakadrukai o mate. Sa taqusi tani na mosi kei na yaluma e Kecisemani kei Kalivari. Sa vakadeitaki na vakabulai ni kawatamata. Sa vakasukai na Lutu nei Atama.
“Na ibulubulu lala ena imatai ni mataka ni Siganimate ko ya sa isau ni taro nei Jope, ‘Kevaka sa ciba na tamata, ena bula tale ko koya?’ Vei kemuni kece o ni rogoca tiko na domoqu, au sa kaya, Kevaka sa ciba na tamata, ena bula tale ko koya. Eda kila, baleta ni tu vei keda na rarama ni dina vakalesuimai. …
“Kemuni na taciqu kei na ganequ lomani, ena noda gauna ni rarawa titobu, e rawa ni da rawata na vakacegu cecere mai na vosa ni agilosi ena imatai ni mataka ni Siganimate o ya: ‘Sa sega eke ko Koya: sa tucake tale.’”4
Eda na Bula Kece Tale
“Eda dredre, eda tagi, eda cakacaka, eda qito, eda loloma, eda bula. Oti eda qai mate. …
“Ia eda na mate tu ga kevaka a sega e dua na Tamata kei na Nona cakacaka, io ko Jisu mai Nasareci. …
“Mai na vu ni yaloqu kei na gagadre ni lomaqu, au laveta kina na domoqu ena vakadinadina me vaka e dua na vakadinadina bula digitaki, ka kaya ni bula dina tiko na Kalou. E Luvena ko Jisu, na Le Duabau Ga nei Tamana ena lewe. O Koya na noda Dauveisereki; O Koya na noda Dautataro vei Tamana. Sai Koya a mate ena kauveilatai me sorovaka na noda ivalavala ca. Sa yaco ko Koya me kena imatai ni Tucaketale. Ena nona Mate, eda na bula kece.”5
Na Noqu iVakadinadina
“Au vakaraitaka na noqu ivakadinadina ni sa vakadrukai oti na mate, sa rawati na qaqa mai na ibulubulu. Me kila na tamata taucoko sara na dina ni vosa ka sa mai vakatabuya o Koya ka a rawata. Ni nanuma matua. Ni karona. Ni rokova. Sa Tucake Ko Koya.”6
Veivakavulici mai na iTukutuku Oqo
Ni oti na veiwasei ena veimalanivosa mai na itukutuku nei Peresitedi Monson, meda raica sara na nona vakadinadinataka na ibalebale dina ni Siganimate. Sa rawa mo tarogi ira na lewe ni matavuvale na taro eso oqo: “Na cava na kena ibalebale vei iko ni sa mai vakadinadinataka e dua na parofita bula nikua na veika dina oqo? O na bulataka rawa vakacava ena nomu bula?” Sa rawa talega mo vakuria na nomu ivakadinadina.
Ko Tomasi na Dauvakatitiqa, mai vei Carl Heinrich Bloch