Au sa na Mate!
Ramona Ross, e Tennessee, mai Amerika
Au nasi tiko ena dua na tiki ni valenibula osooso ni vakacegui ira na sele, ka dua na siga au a ciqoma sara e dua na qiri ni me baleta e dua na tamata tauvimate na yacana o Bill ka se qai sele oti ga. A dodonu me laki davo ena tikina ni tauvimate bibi, ia a mani vagolei mai vei au baleta ni sa sinai na tikina o ya.
Sa yaco sara mai o tamata tauvimate vata kei na nona matavuvale. Au yalo vakacegu niu raica ni bulabula toka, ka vakilai koya toka, ka sega ni laurai vua na taqaya.
Niu sa taura oti na veika bibi baleti koya ka vakarautaki koya kei na nona matavuvale ena nona rumu, au gole yani ki na olo meu laki vola na nona jati. Niu se qai tekivu volavola ga, au sa rogoca e dua na domo, “Lesu tale ki na nomu rumu.” Au sa sega ni volavola ka rai ki muri. E sega ni dua e tu e kea. Au nanuma niu vakasamataka ga na domo o ya, ia a rogo tale mai—ka sa voqa levu sara mai.
Au a cici lesu ki na rumu nei Bill ka raica ni sa vuce vakalevu sara na domona, ka sa dredre tiko ni cegu. Ena noqu nanuma ni sa kalamu na wa ni dra e domona, au a tabaka na domona ena ligaqu imatau meu qirita ena ligaqu imawi na vuniwai a seleti koya. A kaya mai o vuniwai ni na tala mai e dua na timi vei Bill ena kena gauna totolo. “Ia kakua ni biuta na ligamu!” E kaya kina.
Niu tabaka tikoga na domona, au raica sara ena yasani idavodavo nei Bill e dua na ivola ni Lotu au kila. “O iko beka o lewe ni Lotu?” Au taroga.
A saga o koya me deguvacu ka kaya ni dua na ivakalesilesi ni cakacaka tabu vakalotu e na Valetabu e Atlanta Georgia. A sauriva ka turu na waini matana ka kaya mai, “Au sa na mate!”
Au a kaya vua ena doudou, ni na sega ni mate, “Au na vakamau tiko ena Valetabu e Atlanta ena vula mai oqo, ko na tiko kina.” Ratou sa yaco sara mai na timi ni veisele ka kauti Bill yani.
Niu marautaka tiko na vakarau ki na noqu vakamau ena vula mai oqo, au a voleka sara ni guilecavi Bill, ni a lako vaka-ca vua na wainimate. Ia ni sa mai kauti au o metereni ki na rumu ni veivauci ena siga ni noqu vakamau, au raica kina e dua na tamata au kila: o Georgia, na wati Bill. Niu sa tukuna vua niu sa vakarau vakamau, a lako sara me kauti Bill mai. Ni voleka toka ni yaco na vakamau, sa dola mai na katuba ka curu mai o koya. Ni oti e vica na macawa ni mosi ni ulu, veilecayaki ni yago, kei na wawale, sa vakila o Bill na nona bula vinaka ka rawa ni gole mai ki na valetabu, ka sega tiko ni kila ni a siga ni noqu vakamau.
Ni oti e rua na yabaki keirau a kacivi vakaveiwatini me keirau vakailesilesi ni cakacaka tabu vakalotu ena Valetabu e Nashville Tennessee. Ni keirau yaco yani e valetabu me keirau tabaki, a dolava mai na katuba vei au e dua na turaga ka kaya, “Ni bula vinaka mai ki na Valetabu e Nashville!” O Baraca Bill.
Keirau a veiqaravi vata me tolu na yabaki. A kaya o Bill vei ira na tamata niu a vakabulai koya, ia au kila ni a vakabulai koya na Turaga. Ena veika sa yaco oqo, a vakavulica vei au o koya na bibi ni noda vakarorogo ki na veivakauqeti ni Yalotabu.