Sa Rawa me Tou Masu
Scott Edgar, Utah, e Amerika
Ena vula itubutubu ni 1975 a vakaitikotiko na neitou matavuvale ena dua na qele ni iteitei drokadroka vinaka ena vanua o Rheinland-Pfalz mai na Ra kei Jamani. Ni keitou draiva lesu tiko ki vale mai na lotu ena dua na Siga Tabu ucauca, keitou kele sara me raici e dua na motoka ka davo vakababa tu e gaunisala tovaki wai ena yasa ni veikau. Sa vakaturubuto tu mada ga na veikau ena vuku ni rugurugua ni veivunikau ka sa roro tiko mai na bogi.
Ni keitou raica oti na motoka sa voca tu oqo, keitou lesu ki na neitou motoka ka raica ni sa lobo tu ena soso. Sa sega ni rawa meu vasukasuka, ia sa rawa ga meu draiva yani i liu—ki na veikau. Keitou sa lakova oti ena motoka na veikau oqo ka kila tu ni ra veisemati na gaunisala ni veikau oqo ka na laki mua lesu tale mai, kau sa mani toso ga yani ki liu ki na butobuto.
E totolo sara na noqu kila ni sa cala na noqu lewa. Na gaunisala lailai, tovaki wai oqo e levu na kena dabibi ka sa mua tikoga yani ki na loma sara ni veikau loa. Au sa saga meu vakatotolo tikoga, niu rerevaka tiko ke keitou na kele, keitou sa na tao. Au raica sara e dua na delana mai liu ka rairai kaukauwa toka ka rawa ni taura rawa na bi ni motoka. Sa noqu inaki meu muataka laivi na motoka mai na dabibi meu na vakasama mada. Sa mani tubu vakalailai na motoka ka lako tani mai na dabibi.
Au kelea na motoka ka curu i tuba. Ni boko na cina ni motoka, au sega ni raica rawa e dua na ka. Au sa mani waqara tale na cina, taura mai na cina livaliva, raica wavoki na motoka, ka sa noqu inaki vinaka duadua e tarava meu vakasukasuka ki na veikau ka vukataki keitou yani ki na sala keitou a curu mai kina.
Au a vakasukasuka sara e muri ki na veikau, vakatakata na idini, mua yani ki na gaunisala, ka tao vakatitobu sara ena dabibi. Oqo keitou sa qai leqa dina. E tautuba ni motoka sa buto sara ka vakanomodi. Ena loma ni motoka au sa toka rerere kei watiqu kei na tolu na luvei keirau.
Au sa kere vakasala vei watiqu. Ni oti vakalailai a kaya mai, “Sa rawa me tou masu.” E ratou yalo vakacegu sara kina vakatotolo na luvei keirau. Au a cabora e dua na masu malumalumu ia ena lomaleqa me keitou vukei. Niu sa masu tiko, sa lako makare mai vei au e dua na vakasama: “Cobara na sinucodo ni taya.”
Sa qai tucake tu o watiqu vinaka ena nona vinivo ni Siga Tabu ena dabibi e 10 na idi, ka taura tu na cina livaliva niu vakasavasavataka tiko na taya e ligaqu ka cobara na sinucodo. Ena vakabauta kei na yalonuidei, keitou a masu ka yavalata na motoka. Vakamalua na neitou sa draiva yani ena dabibi ka yaco lesu rawa ki na gaunisala kaukauwa.
Ena neitou mamarau ni keitou sa galala mai na dabibi kei na butobuto, au sa voleka kina ni guilecava o cei a vukei keitou tani mai na veikau. A vakavotuya vei au na luvequ yalewa yabaki lima ni a kaya, “Ta, e dau sauma dina sara ga na Tamada Vakalomalagi na noda masu, se vakaevei?”