Vakayacori na Semineri ena Veikauloa kei Ecuador
Ena dua na loma ni veikau vakayawa, sa basika tiko na veisau levu ena vuku ni semineri vei ira na itabagone.
Ena tokalau kei Quito e Ecuador, ni sivia na volukeno kei na Veiulunivanua na Andes, e sirovi sobu na veidelana ki na veikauloa ni Amazon. E kea o na raica kina na veikauloa, na veiuciwai, na maqe, toukana, kei na babale piqi.
O na raica talega kina e dua na siti ka vakatokai na Puerto Francisco de Orellana. E yawa sara mai, io, na veika kece tale e Ecuador. Ena tinikalima na yabaki sa oti a vica wale sara na tamata ena vanua oya. Ia na kena kunei na waiwai sa basika kina na cakacaka, era lako yani na tamata vaqara cakacaka, kei ira na lewe ni Lotu.
Semineri ena Dua na Tabana Lailai
E vica na itabagone, me vakataki Oscar R., era sa lewenilotu rawa tu ena gauna e tauyavu kina na tabana, ia e vuqa era qai saumaki wale ga mai. Ka caudre tiko e yalodra e dua na buka. “Keimami tudei tu,” e kaya o Oscar.
Ena Sepiteba ni 2010, ni se qai oti ga e dua na yabaki mai na kena tauyavu, sa tekivu ena tabana e dua na parokaramu ni semineri. “Ni keimami tekivu vakasoqoni vata ena vica na yabaki sa oti,” e kaya o Oscar, “keimami se lewe vica wale ga. O au duadua ga na itabagone. Ia keimami a tubu tikoga. Sega ni dede sa 6, oti sa 10, ena gauna oqo sa levu sara na itabagone.”
Ia baleta ni so na itabagone era vuli ena mataka ka so tale ena yakavi, sa tauyavu kina e rua na gauna ni kalasi ni semineri—dua ena mataka mai na 8:00 ki na 9:00, ka dua ena yakavi mai na 4:30 ki na 5:30.
E sega beka ni lewe levu sara na itabagone ena parokaramu, ia vei ira na itabagone era dau tiko kina, sa veisautaka nodra bula na semineri.
Na Cava mo Lako Kina?
“E dua na veivakalougatataki levu vei au na semineri,” e kaya o Luis V., e dua e qai saumaki ga mai. “E veivuke ena noqu vakarautaki meu daukaulotu vinaka. Au sotava e vuqa na ka derdre kei na veivakatovolei mai na gauna au lewena kina na Lotu, ia au a vakadeitaki au tikoga baleta niu kila niu cakava tiko na ka dodonu.”
Ia e sega ni o Luis duadua ga e vaqori na nona nanuma. “Au se qai lewena wale ga na Lotu,” e kaya o Ariana J., “ia au sa dau lakova tu na semineri mai na gauna au se qai papitaiso kina. Au marautaka na noqu lakova tiko baleta niu vulica kina e vuqa na ka dina me baleta na kosipeli i Jisu Karisito ka vakasinaita na yaloqu ena inuinui kei na noqu vakasama ena kila ka.”
Nona dau lakova na semineri sa vukea na nona vakadeitaki o Ariana ena kosipeli. “Sa ka ni veivakalougatataki vei au noqu lewena tiko na kalasi oqo,” e kaya o Ariana. “E vaqaqacotaka na yaloqu ka vukea na noqu vakarautaki me dua na siga meu na dua na radi ni vale vinaka, tina, iliuliu ena Lotu, ka dua tale beka ga na daukaulotu vinaka.”
E vakakina na nanuma nei Gerardo, na ganei Ariana. “Au vakavinavinaka ni yaco me dua na tiki bibi ni noqu bula na semineri,” e kaya o koya. Sa vakarautaki au tiko meu na laki kaulotu ena dua na siga. Au vulica mai kina na ituvatuva ni veivakabulai sa vakarautaka na Kalou me baleti au. Na kalasi yadua au lako kina sa solia vei au na inuinui ni rawa niu laki rawata na matanitu selesitieli ka vakadeitaka vei au niu sa ciqoma na kosipeli i Jisu Karisito.”
Ena so na gauna ni kalasi sa dau oca vakalevu o Gerardo. Me dau kauta mada na tacina lailai ki vuli qai lesu tale ki vale me rau lako vata kei ganena ki semineri. Ia e sega ni kauwaitaka o koya.
“E vou vei au na ka kece oqo, ia e dau vakasinaiti au ena marau,” e kaya o Gerardo. “Au kila niu sa tu ena sala dodonu ka na rawa kina vei au meu sota tale kei Tamaqu Vakalomalagi. E vakadeitaka vei au oqo na Yalo Tabu. Meu na segata tikoga ka vosota ki na ivakataotioti.”
Me Kakua na Rere
Vei Walter A., taumada a rere vakalailai ena semineri. “Au a rere vakalailai ena imatai ni gauna au lako mai kina,” e kaya o koya. “Ia niu curu yani ki na kalasi, au vakila noqu taleitaki baleta niu vakila na loloma eda dau vakila ni da vulica na ivolanikalou. Ia niu biuta mai, au vakila niu vaqaqacotaki ena marau e yaloqu ena vuku ni veika au sa vulica. E dua vei ira na veivakalougatataki cecere sa vakarautaka tu na Tamada Vakalomalagi me baleti ira na itabagone na semineri.”
“Sa veisautaka na noqu bula na Lotu i Jisu Karisito ni Yalododonu Edaidai,” e kaya o Abel A., ka sa vakavakarau tale tikoga ki na kaulotu. “Au sa vulica tiko na nodra ivakavuvuli na parofita. Au lomani Josefa Simici. A cakacaka vagumatua me rawa kina ni Vakalesui Mai na Lotu dina e dina ni levu na leqa a kauta mai vua. Au vinakata meu dau gugumatua me vakataki koya.”
E levu na itabagone era dau solibula me ra lako rawa ki na semineri. E sega ni dau rawarawa e veigauna, ia vei ira na itabagaone mai Puerto Francisco de Orellana e Ecuador, sa dau mate vinaka na sasaga.
“Niu vakasamataka na toso tikoga ki liu, me vaka e kaya na ivolanikalou,” e vakamacalataka o Abel, “Au vakabauta ni kena ibalebale me da vakotora na veika e dodonu me liu ena noda bula. E dua vei ira na semineri. Me vaka na kena sa veisautaka na noqu bula, e rawa ni vakakina vei ira tale eso na itabagone.”
Ena loma ni veikau loa kei Ecuador, sa vakacagau ka veisautaka tiko na bula na Lotu i Jisu Karisito kei na kena parokaramu ni semineri vei ira era vakatara me vakakina.
Na semineri e vaqaqacotaki ira na itabagone vaqo mai Ecuador, e vuqa vei ira era se qai saumaki ga mai.
Veitaba o Joshua J. Perkey