Na Cava e Tarava ni Oti na Semineri?
E sega ni sa icavacava ni vuli vakalotu na semineri. E dua na ka talei e se vo tiko vei iko.
Eda dau vulica na ivolanikalou ka rairai dau sota wasoma talega kei ira na noda itaba ena semineri. O vakila ni o taleitaki, ka rawa ni o vakila na Yalotabu. Ni sa oti na semineri, sa oti beka kina na veika oqo? Sega dina.
E tarava mai na parokaramu ni inisitute, o na taleitaka. Se o lako tiko ki na vuli torocake se sega, e rawa ni o tomana tikoga na nomu vulica na kosipeli, vakavakarau ki na kaulotu kei na vakamau ena valetabu, ka wasea na veika o sa sotava kei ira na nomu itaba.
Oqo eso na isau ni taro dau rogo wasoma me baleta na inisitute. E rawa ni o raica e levu tale ena institute.lds.org.
Na cava na inisitute?
Na inisitute e tu kina na kalasi ni vuli ena kosipeli, oka kina na kalasi ni ivolanikalou, nodra ivakavuvuli na parofita, kei na vakavakarau ki na kaulotu se vakamau ena valetabu. Ena so na inisitute e rawa ni o digidigi mai na vuqa na kalasi.
O cei e rawa ni lako kina?
Era sa vakauqeti vakaukauwa sara na itabagone qase cake me ra dau lako ki na inisitute. E rawa ni tiko kina na tamata kecega—vakawati se sega—nodra yabaki ni bula mai na 18 ki na 30.
Au na raica evei na inisitute?
Ena so na vanua e tu na vale ni inisitute voleka ki na koronivuli torocake kei na univesiti. Ena so na vanua dau vakayacori na kalasi ena veivale e taukena na Lotu kei na so tale na vanua. Veitaratara vei nomu bisopi se peresitedi ni tabana mo kila na veika e baleta na parokaramu ni inisitute ena nomu vanua, se lako ki na institute.lds.org mo kunea e dua na inisitute e voleka vei iko.
Na cava meu taura kina na kalasi ni inisitute?
E kaya vaqo o Peresitedi Thomas S. Monson: “Vakaliuca na nomu vakaitavi ena inisitute. … Vakasamataka mada. Eda na vakaitokani, eda na vakila na Yalotabu, ka vaqaqacotaki na vakabauta. Au yalataka vei kemuni ni o ni vakaitavi ena inisitute ka vulica vagumatua na ivolanikalou, ena vakalevutaki cake na nomu kaukauwa mo levea kina na veitemaki ka ciqoma na veidusimaki ni Yalo Tabu ena veika kece o cakava” (institute.lds.org, 21 ni Epe., 2009).
Kena itaba mai na Media Services