Ko ha Fanafana ʻo e ʻOfa
“ʻOfa ki homou ngaahi filí, fai lelei kiate kinautolu ‘oku fehiʻa kiate kimoutolú” (Luke 6:27).
Pehē mai e fineʻeiki ʻa Sēmisí, mo tuhu ki ha kiʻi tamasiʻi ʻi he holó he veʻe loki Palaimelí, “ʻOku ʻi heni ʻa Kāsoni he ʻahó ni.”
Naʻe ngū pē ʻa Sēmisi. Naʻe talausese tangakalī pē ʻa Kāsoni mo sote motuʻa. Naʻe ʻilo ʻe Sēmisi he ʻikai teitei tuku heʻene faʻeé mo ʻene tamaí ke ne tui ha faʻahinga meʻa pehē ki he lotú, ka ʻoku ʻikai foki ke na teitei tuku ke hao hake ʻa Kāsoni ʻi he ngaahi meʻa lahi kehe naʻá ne faí.
Naʻe tuli ʻa Kāsoni ki tuʻa mei he kalasí ʻi he uike kuo ʻosí ko haʻane taungtu ki he faiakó. Naʻá ne fakakata ʻaki maʻu pē ʻa e founga teuteu ʻa Sēmisí mo lumaʻi ia ʻi heʻene hoko ko e tamasiʻi nounou taha ʻi he akó.
Naʻe pehē ʻe Sēmisi, “Fēfē kapau ʻe kaila kia Sisitā Uini pe kamataʻi ha kē?”
Talaange ʻe he fineʻeikí, “ʻOku ou tui ʻe sai pē meʻa kotoa. Kuo teʻeki pē ʻalu ʻa Kāsoni ia ki he lotú, pea mahalo ʻoku manavasiʻi.”
Ko e taimi ne kamata ai ʻa e kalasí, ne ʻeke ʻe Sisitā Uini pe ko hai naʻe haʻu mo ʻene folofolá. Hikinima fakataha ʻa Sēmisi mo e toenga ʻo e kalasí, ka naʻe kalokalo e ʻulu ia ʻo Kāsoní. Naʻe hangē naʻe maá, ʻo ʻohovale ai ʻa Sēmisi. Naʻe faʻa fai maʻu pē ʻe Kāsoni ha kiʻi tūkuhua ʻi he taimi naʻe ʻikai ke ne fai ai ʻene ngāue mei ʻapí. Ka ko e lahi ange fakakaukau ʻa Sēmisi ki aí, ko e lahi ange ia ʻo ʻene fifili pe ʻe fēfē kapau ko haʻane fuofua ʻalu ʻeni ki ha siasi foʻou.
Ne mono ange ʻe Sisitā Uini ʻene folofolá kia Kāsoni ke ne fakaʻaongaʻi. Ko e taimi ne aʻu mai ai kia Kāsoni ke ne lau e folofolá, ne kamata ke hohaʻa ʻa Sēmisi. Ko e hā ʻe hoko kapau ʻe lī ʻe Kāsoni ia e folofolá ki he falikí pe fakafisi ke lau?
Ka naʻe ʻikai ke fakahoko ʻe Kāsoni ha taha ʻo e ngaahi meʻa ko iá. Naʻe sio-fakamamaʻu pē ki he foʻi leá mo fakafulofula. Hili ha taimi siʻi, kuo fakatokangaʻi ʻe Sēmisi ʻoku ʻikai ke lava ʻa Kāsoni ʻo laukonga lelei. Naʻe teʻeki ke fakatokangaʻi ʻeni ʻe Sēmisi ki muʻa ʻi he akó.
Ne punou atu ʻa Sēmisi kia Kāsoni ʻo fanafana ange, “Ko e moʻoni.”
Ne mata ʻohovale ʻa Kāsoni, ka naʻá ne puʻaki ʻa e foʻi leá mo hoko atu ʻi hono lau ʻo e vēsí. Ko e taimi pē naʻe faingataʻaʻia ai ʻi ha foʻi lea, ne tokoni ki ai ʻa Sēmisi. Ko e taimi ne ʻosi aí, ne tafoki hake ʻa Kāsoni kia Sēmisi ʻo kiʻi kamo atu ki ai.
Naʻe ʻikai ke fakapapauʻi ʻe Sēmisi pe ʻe toe kehe ʻa e ngaahi meʻá ʻi he akó hili e meʻa ko ʻení. Ko e meʻa fakaolí he naʻe ʻikai ke tokanga ia ki ai. Naʻá ne ongoʻi lelei ʻi heʻene ʻilo naʻe tokoni ki ha kiʻi tamasiʻi naʻe angakovi maʻu ange pē ki ai, pea he ʻikai ke lava ʻe ha taha ia ʻo toʻo ʻa e ongo ko iá.
Ko ia Foki
Te ke lava ʻo kau heʻemau timí.
Tā fakatātaaʻi ʻe Val Chadwick Bagley
Ngaahi tā fakatātā ʻa Craig Stapley