Fetuʻutaki mo e Kakaí Ko Hono Fakafehokotaki ʻo e Siasí mo e Koló
ʻI he ngāue ʻa e kau taki lakanga fakataulaʻeikí mo e ngaahi fakataha alēlea fakasiteiki mo e fakavahefonua ʻo e fetuʻutaki mo e kakaí, te nau lava kotoa ʻo tokoni ʻi hono fakamālohia honau tukui koló—pea mo langa hake ʻa e puleʻanga ʻo e ʻOtuá he māmaní.
Ko e taimi naʻe ui ai ʻa Kalo Uiti Kulisiteniseni ke hoko ko e talēkita ʻo e fetuʻutaki mo e kakaí ʻi he Siteiki Toupika Kenisesí, naʻá ne ongoʻi “manavasiʻi mo taʻefeʻunga” ʻi he ʻai ke fetuʻutaki mo e kau faiongoongó mo e kau ʻētitá ʻo fakafofongaʻi ʻa e kau taki ʻo e siteikí.
ʻOkú ne pehē, “Ko e fakakaukau ko ia ʻo e fetuʻutaki hangatonu mo e kakai ʻo e ongoongó naʻe mei ongo fakailifia.” Pea neongo naʻe ako ki he lea faka-Pilitāniá ʻi he ʻunivēsití, ʻokú ne pehē naʻe “ʻikai haʻane ʻilo ha meʻa fekauʻaki mo hano faʻu ha ongoongo ke tukuatu.”
Naʻe pehē leva ʻe Sisitā Kulisiteniseni ke falala pē ki heʻene fakamoʻoní, ki heʻene maheni mo hono koló, pea mo e tui ko e haʻu hono uiuiʻí mei he kau taki lakanga fakataulaʻeiki ʻoku ueʻi fakalaumālié, neongo ʻene veiveiua ʻiate ia peé. ʻOkú ne pehē naʻe kamata ʻi he ngaahi ako mei he Potungāue Fetuʻutaki mo e Kakaí ʻa ʻene kamata ke “ako [hono] fatongiá, pea … ngāue ʻi he lakanga kuo fakanofo ia ki aí, ʻi he faivelenga kakato” (T&F 107:99).
Naʻe kamata ke ne lau e ngaahi konga fakalotu ʻo e nusipepa fakauike hono feituʻú ke fakafuofuaʻi pe ko e hā ʻoku feʻunga mo e ongoongó. Ne telefoni ki he taha faʻu ongoongo fakalotú ke ʻilo ʻa e ʻaho ʻoku ngata aí, ki muʻa pea toki fakahū atu ʻene fuofua ongoongo ke fakamafolá.
ʻOkú ne pehē, “Naʻá ku fakatokangaʻi ʻa e faʻahinga ʻo e fanga kiʻi ongoongo iiki naʻe pākí pea kamata ke u tokanga makehe ʻi he lotú ki he ngaahi meʻa ʻoku faí, kakai mahuʻingá, pea mo e ngaahi lavameʻa naʻe ngali taau ke fakahā ʻi heʻemau nusipepá.”
Naʻe fāifai pea ʻilo ʻe Sisitā Kulisiteniseni ko e fetuʻutaki fakamītiaá ʻoku ʻikai ko hono fakahū atu pē ha ngaahi fakakaukau fakaongoongo. ʻOku toe fekauʻaki ia mo e ʻilo ʻo e mītiá pea mo e tokoni ki he kau faiongoongó ʻi hono fakahoko ʻenau ngāué pea mo tokoniʻi kinautolu ʻi he taimi tatau pē ke mahino kiate kinautolu ʻa e Siasí.
Hili haʻane ola lelei hokohoko, kau ai ha fakamatala fekauʻaki mo e polokalama semineli hono siteikí ne hā ʻi he pepa fakafeituʻú, ʻokú ne pehē naʻá ne lotolahi mo “vela māfana ʻi ha holi ke ʻomi ʻa e Siasí ʻmei he kakapúʻ” (vakai, T&F 1:30). Hili ha ngaahi taʻu ʻeni mei ai, ʻoku kei hoko pē ʻa Sisitā Kulisiteniseni ko e talēkita fakasiteiki ʻo e fetuʻutaki mo e kakaí pea ʻokú ne pehē, “ko e afi ko iá ʻoku kei ulo kakaha pē.”
ʻOkú ne fakamatala ʻo pehē, “Ko e lahi taha ʻo e meʻa ʻoku mau feinga ke fakahoko ʻi he fetuʻutaki mo e kakaí, ʻokú ne fakahaaʻi ʻoku tau ʻofa, tui, pea mo hū kia Sīsū Kalaisi; fakakaumeʻa, ngāue fakataha, mo tokoniʻi hotau ngaahi tuongaʻane mo e tokoua ʻi he koló; pea mo fakaafeʻi mai ai ʻa e kakaí ki he ongoongolelei kuo fakafoki maí mo e Siasí.”
ʻOku fakahinohino mo poupouʻi ʻe he kau taki lakanga fakataulaʻeiki he funga ʻo e māmaní ʻa e kau mataotao mo e ngaahi fakataha alēlea ʻo e fetuʻutaki mo e kakaí ʻi heʻenau ngāue fakataha mo kinautolu ʻi honau feituʻú ke ʻaonga ki honau ngaahi koló, fakatonutonu ʻe ngaahi maʻu halá, pea mo fakahaaʻi ʻoku muimui ʻa e kāingalotu ʻo e Siasí kia Sīsū Kalaisi.
Neongo naʻe fakatefito e fuofua ngāue ʻa Sisitā Kulisitenisení ki he fetuʻutaki mo e ongoongó, ʻoku lahi ha ngaahi founga ʻoku muimui ai ʻa e ngaahi fakataha alēlea ʻa e Siasí ki he fetuʻutaki mo e kakaí, ki he fakahinohino fakalaumālie ʻa e lakanga fakataulaʻeikí mo nau tokoni foki ʻi hono langa hake honau tukui koló pea mo e puleʻanga ʻo e ʻOtuá.
Fetuʻutaki Fakakolo mo Fakapuleʻangá
ʻOku ngāue fakataha ʻa Palesiteni Pulusi F. Pilitei (Bruce F. Priday), ko e palesiteni fakasiteikí, mo Sisitā Kalo Tesilā (Carol Deshler), ko e talēkita fakasiteiki ʻo e fetuʻutaki mo e kakaí, ʻi ha maile pē ʻe 65 (kilomita ʻe 105) mei Topeka, ʻi he Siteiki Lenikesa Kenisesí, ke fokotuʻu ha vā lelei mo e kakai maʻolunga ʻi honau koló. ʻOku pehē ʻe Palesiteni Pilitei, ʻoku nau loto ke tokoniʻi kinautolu ke nau ʻilo ko e Kāingalotu ʻo e Siasí ko ha “kaungāʻapi lelei, ko ha ivi tokoni lelei ʻi honau koló, mo e kau muimui ʻo Sīsū Kalaisi.”
ʻOku feinga ʻa Sisitā Tesilā, ʻa iaʻoku ngāue mo e kau palesitenisī fakasiteikí mo ha kau mēmipa kehe ʻo e fakataha alēlea fakasiteiki ʻo e fetuʻutaki mo e kakaí, ke maʻu ha ngaahi faingamālie ke ngāue fakataha ai mo ha ngaahi kulupu tui fakalotu pea mo ha ngaahi kautaha fakakolo kehe ke tokoniʻi lelei ange ʻa e kau tangataʻi mo e fefineʻi fonua honau feituʻú.
ʻOku pehē ʻe Sisitā Tesilā, “ʻOku meimei ko e ngaahi ola lelei kotoa ʻi heʻemau ngāue mo e ngaahi kulupu fakakoló ko e tupu ia ʻi he feohi fakatāutaha.” Hangē ko ʻení, naʻe maʻu-meʻatokoni hoʻatā fakataha ha mēmipa ʻo ha siasi ʻe taha mo ha mēmipa hono siteikí ʻo na aleaʻi ha ngaahi founga ʻe lava ai e ongo kulupú ʻo fakataha ke fai ha faʻahinga meʻa lelei maʻá e koló. Naʻe iku ʻa e pōtalanoá ki ha kakai ʻe toko ono—taki tolu mei he ongo siasí—ʻo faʻu ha kōmiti “Lelei Ange Fakataha” ke nau aleaʻi e ngaahi fakakaukau ki he fetākinimá ni.
Ne iku ʻa e fetākinimá ni ki ha koniseti tokoni ʻi he 2010 ʻa ia ne kau ai ha ngaahi kuaea mei ha ngaahi siasi kehekehe. Ko e totongi huú ko ha kofukofu koloa, ʻa ia naʻe foaki ki ha feituʻu tauhiʻanga meʻakai maʻá e kau masivá. Naʻe ʻi ai ha kakai ʻe toko 700 nai ne nau omi ki ai, pea naʻe fakahoko ia ʻi ha senitā fakasiteiki foʻou naʻe toki ʻosi. Naʻe fokotuʻutuʻu mo ha kiʻi maʻu meʻatokoni talitali ke feohi ai ʻa e kau taki fakakoló mo e kau taki fakalotú ki muʻa ʻi he konisetí.
Hili e konisetí, ne kole ha siasi kehe ʻe fā, ongo mēmipa ʻe toko ua mei he kosilio fakakoló, pea mo ha pule polisi ke fakafofongaʻi kinautolu ʻi he kōmiti Lelei Ange Fakatahá, ʻa ia ʻoku nau fakataha fakamāhina he taimí ni. Naʻe toe fakahoko ʻa e konisetí ʻi he 2011, ʻo fakalelei ia ʻe ha siasi ʻe taha, ko ha siasi ʻe fitu fakakātoa naʻe kaú, pea ʻoku fakafuofua ki ha kau mēmipa ʻe toko 1,000 ʻo e koló naʻe ʻi aí.
ʻOku pehē ʻe Sisitā Tesilā, “Naʻe hoko mai ʻa e ongoʻi fietokoni mo e uouangataha ko e kau muimui ʻo Sīsū Kalaisí ʻi ha founga mahuʻinga ʻi he ngaahi siasí.” Naʻe hāsino ki mui ange ʻa e ngaahi ongo ko iá he taimi naʻe ʻi he malaʻe vakapuna ai ʻa Palesiteni Pilitei, ʻoku maile ʻe 1,000 tupu (1,600 km) mei hono ʻapí. Ne fakafeʻiloaki mai ha fefine naʻe teʻeki ke na fetaulaki ki muʻa ʻo ne fakahā ange ʻokú ne ʻiloʻi ia mei he ongo koniseti kumi tokoni ʻa e Lelei Ange Fakatahá, ʻa ia naʻe kau mo fakaʻofoʻofa ʻia ai.
Naʻá ne talaange, “Kuo teʻeki ai ke u maʻu ha faʻahinga ongo pehē ʻo e ʻofá ʻi hotau koló ʻo hangē ko ia ne u maʻu ʻi he ongo meʻa ne fakahokó. Fakamālō atu ʻi hoʻomou kaungā fakalele ʻa e ongo konisetí. ʻOku ou kau au ki ha kautaha lotu kehe, ka ʻoku mau maʻu ha fakaʻapaʻapa lahi mo tanganeʻia ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.”
Ne pehē ai ʻe Palesiteni Pilitei, “Ko e taumuʻa kānokato ia ʻo e fetuʻutaki mo e kakaí. ʻI heʻetau fakalahi hotau ʻātakaí mo fakalahi mo ʻetau vakaí, kuo tau fakatupulekina ai ha ngaahi kaumeʻa makehe ʻi he kakaí kotoa. ʻOku mau fefakaʻapaʻapaʻaki ʻi he ngaahi tui fakalotú mo maʻu ha feʻofaʻaki moʻoni.”
Ko hono maʻu ʻo e faʻahinga fengāueʻaki mo fakaʻapaʻapa peheé mei he kau taki fakakoló kuo fakamoʻoniʻi ʻoku toe ola lelei pē ʻi ʻIulope Hahake. ʻOku ngāue ʻa Katia Seuiki (Katia Serdyuk), ko e talēkita ʻo e fetuʻutaki mo e faiongoongó ʻi he fakataha alēlea ʻo e fetuʻutaki mo e kakaí ʻi ʻIukuleiní, mo e kau faifekau fetuʻutaki mo e kakaí pea mo e kau taki lakanga fakataulaʻeikí ke fakaleleiʻi ʻa e fengāueʻaki ʻa e Siasí mo e kakaí. ʻOku pehē ʻe Sisitā Setuiki, “ʻOku tokolahi ha kakai ʻoku nau maʻu ha fakakaukau hala mo ha fakamatala hala fekauʻaki mo e Siasí. ʻI heʻemau hoko ko e kau mataotao ʻo e fetuʻutaki mo e kakaí ʻo ngāue mo e kau taki lakanga fakataulaʻeikí, ʻoku mau feinga ke liliu e ngaahi fakakaukau ko iá ʻaki haʻamau ngāue mo e kau taki ʻoku nau māʻu ha mālohi ki he kakaí, mītiá, pea mo e kakaí fakalūkufua. ʻOku hanga ʻe he ngaahi ngāue ola lelei ʻo e fetuʻutaki mo e kakaí ʻo fakatupu ha ongo ʻe lava ai ʻa e kakai māʻolungá ʻo tokoniʻi ʻa e Siasí ke aʻusia hono ngaahi taumuʻá, lolotonga iá ʻoku tau tokoniʻi kinautolu ke nau aʻusia ʻenau ngaahi taumuʻá foki.”
Naʻe kau ʻa e kāingalotu ʻo e Siasí ʻi Saitomae (Zhytomyr) ʻi ʻIukuleiní ʻi ha maʻu meʻatokoni naʻe fakahoko ʻe he pule ʻo e koló, ʻa ʻOlekisanitā Mikoleiovisi Posikovisikī (Olexander Mikolayovich Bochkovskiy), ke fakaʻilongaʻi ʻaki e ngāue tokoni ʻofa fakaetangata ʻa e Siasí naʻá ne foaki ha ngaahi meʻangāue naʻe fuʻu fie maʻu ki ha ngaahi akoʻanga ʻe fitu ʻi he koló. Naʻe toe fakaʻilongaʻi foki ai mo e ongo ngāue tokoni fakakolo ʻa e kāingalotu ʻo e Siasí ʻi he Paʻake Kakaliní (Gagarin Park), ʻa ia naʻe fakahoko ʻi ʻEpeleli pea mo ʻOkatopa ʻo e 2011. Naʻe fakafofongaʻi ʻe he palesiteni ʻo e Kolo Saitomaé, ʻe ʻAlekisānita Teivitovu (Alexander Davydov) ʻa e Siasí mo fakamālōʻia hono fakahoungaʻi ʻe he koló.
Ko Hono Palani ʻo e Ngaahi Meʻá
ʻOku pehē ʻe Taniela mo Lepeka Mei (Daniel and Rebecca Mehr), ʻa ia ne na toki ʻosí ni mei haʻana ngāue fakafaifekau ʻi he fetuʻutaki mo e kakaí ʻi he ʻElia Kalipiané, ʻoku ʻi ai ha toe faingamālie kehe ʻi he fetuʻutaki mo e kakaí ʻoku maʻu ʻi hono palani mo fakalele e ngaahi meʻa ʻoku faí, ʻo makehe ia mei he mītiá mo e fetuʻutaki fakakoló.
ʻOku pehē ʻe Sisitā Mei, “Ko hono uki ʻo e kāingalotú ke nau akoʻi honau ngaahi kaungāmeʻá ʻi he ngaahi ʻekitivitī ʻoku tau tatau aí, ʻo hangē ko ha meʻa fakafonua, maʻu–meʻatokoni efiafi, ngāue ʻofa, pe ha toe ʻekitivitī pē, ʻe lava ke mātuʻaki ʻaonga ki hono fokotuʻu ʻo e vā feohí.”
Neongo ia, ʻoku fakatokanga mai ʻa Misa Mei ko e taha ʻo e ngaahi fehālaaki lahi taha ʻe lava ke fakahoko ʻe ha mataotao ʻi he fetuʻutaki mo e kakaí ko hano “kamata palani e ngaahi ʻekitivitií taʻetomuʻa fakakaukauʻi e ngaahi fie maʻu ʻa e kakaí mo taʻefeongoongoi mo e kau taki lakanga fakataulaʻeikí.”
ʻOku tui ʻa ʻEletā mo Sisitā Mei ko e founga ʻe taha ʻe tokoni ki hono tataki ʻo e meʻa ʻoku palaní mei he kamataʻangá ko ha palani fakataʻu ʻoku hāsinio ai e fakahinohino ʻa e kau taki lakanga fakataulaʻeiki fakasiteikí mo e fakauōtí. Ke faʻu ha palani pehē, ʻoku fokotuʻu ʻe Sisitā Mei ke fakafekauʻaki ʻa e ngaahi meʻa ʻe hokó ʻo ngāueʻaki ha palani konga fā ʻoku nofo taha ki he ola ʻo e founga fakahokó pea fepikitaki mo e ngaahi fie maʻu ʻa e kakaí mo e taumuʻa ngāue fakataulaʻeiki ʻo e feituʻú:
-
Ko e hā e ngaahi fie maʻu vivili taha ʻi hotau kakaí?
-
Ko e hā e ngaahi meʻa ʻi hotau feituʻú ʻokú ne uesia e fakalakalaka ʻa e Siasí, lelei pe kovi?
-
Ko hai e kau taki ʻi he kakaí te tau lava ʻo fengāueʻaki ke aleaʻi e ngaahi fie maʻú mo fakaleleiʻi e ngaahi palopalemá?
-
ʻE founga fēfē haʻatau kamata pe hoko atu e fetuʻutaki mo e kau taki ko ʻení?
Ka tali e ngaahi fehuʻi ko ʻení, ʻe lava leva ʻa e kau taki lakanga fakataulaʻeikí mo e ngaahi fakataha alēlea ʻo e fetuʻutaki mo e kakaí ʻo taʻofi hano fai ha “ngaahi ʻekitivitī noaʻia peé.” Ka ʻe lava ʻe he ngaahi fakataha alēleá ʻo palani mo fakahoko ha ngaahi meʻa te ne lava ke fokotuʻu ha fefalalaʻaki ʻi he kakaí mo e kau taki lakanga fakataulaʻeikí. ʻOku toe ʻomi foki ʻe he ngaahi meʻa ko ʻení ha faingamālie ki he kāingalotu ʻo e Siasí mo e kakai ʻo e koló ke nau feohi ai mo fokotuʻu ha vā fakakaumeʻa.
Hangē ko ʻení, naʻe ngāue fakataha ʻi he Lepupelika Tominikení ʻi he 2010 ʻa e kau taki lakanga fakataulaʻeikí, ngaahi fakataha alēlea ʻo e fetuʻutaki mo e kakaí, pea mo e kau mēmipa ʻo e koló ʻi ha meʻa ne fakahoʻata atu ai e ngaahi ngāue ʻo e Nima Fietokoni ʻo e Māmongá. Ne fakaafeʻi ʻe Misa mo Mīsisi Mei ha kau māʻolunga ʻe niʻihi ʻo e fonuá ʻa ia ne na fengāueʻaki mo kinautolú.
ʻOku pehē ʻe Misa Mei, “Naʻe tokolahi ha kakai mahuʻinga ʻoku nau fakafofongaʻi ha ngaahi faʻunga kautaha ne nau ō mai,” peá ne toe pehē ne lava mai foki mo e Kau Palesitenisī Fakaʻēlia ʻo e Siasí.
ʻOkú ne fakamatala ʻo pehē, “Naʻe mātuʻaki ola lelei ʻa e meʻá ni. ʻOku fakautuutu ʻemau maʻu ha ngaahi kole mei ha kau pule kolo mo ha ngaahi kautaha fakakolo ke mau tokoni ʻi ha faʻahinga fakamaʻa ʻo e koló. ʻIkai ngata ai, naʻe lelei ange hono ʻiloa ʻo e Siasí ʻi ha ngaahi kautaha lahi.”
Neongo ʻoku mahuʻinga hono fakakau e fakahinohino ʻa e lakanga fakataulaʻeikí ki ha meʻa ʻoku palani lelei ke fai, ka ʻoku ʻikai ko ia pē ʻe fakakaukauʻí. ʻOku kau ʻa Kefi Moala ʻi he fakataha alēlea fakavahaʻa siteiki ʻo e fetuʻutaki mo e kakaí ʻi Senitieko ʻi Kālefōnia ʻi ʻAmelika. Naʻe pehē ʻe ha taha ʻo hono ngaahi kaumeʻá mei ha tui fakalotu kehe ʻoku poto ʻa e Kāingalotou ʻo e Ngaahi ʻAho Kimui Ní ʻi hono fakaafeʻi ʻo e kakaí ki he ngaahi ʻekitivitī ʻoku fakalele ʻe he Siasí ka ʻoku ʻikai ke nau faʻa lava ʻo fengāueʻaki fakataha mo e kakai kehé ʻi he ngaahi meʻa ʻa e ngaahi siasi ko iá.
ʻOku manatuʻi ʻe Sisitā Moala ha pehē ʻe hono kaungāmeʻá, “ʻOkú ke kole ʻa e kakaí ke nau ō mai. ʻE lelei ange kapau te ke ʻeke mai pe ʻoku mau fie maʻu tokoni. Ko e talí ʻoku mahino ko e ʻio.”
ʻOku pehē ʻe Sisitā Moala, ko hono ʻai ke ʻilo e ngaahi fie maʻu ʻa e kakaí, ʻe lava leva ʻe he ngaahi fakataha alēlea ʻo e fetuʻutaki mo e kakaí ke tokoniʻi ha kolo he taimi ʻe niʻihi, ʻo laka ange ʻi haʻanau fakalele pē ʻe kinautolu e ngaahi meʻa ʻoku faí.
Ko e Fetuʻutaki mo Tokangaʻi e Ngaahi Fakatamakí
Neongo ʻoku fakahoko e ngāue lahi taha ʻa e fetuʻutaki mo e kakaí ʻi he ngaahi tūkunga fakaʻaho ʻo e moʻui fakakoló, ka te ne toe lava pē foki ke teuteuʻi ha siteiki, fonua, pe ʻēlia ʻo e Siasí ke ne feau e ngaahi meʻa fakatuʻupakeé, hangē ko ia ne hoko he taʻu kuo ʻosí ʻi Siapaní.
ʻI he taimi naʻe kei Palesiteni ai e Pisope Pulé ko Keuli E. Sitīvenisoni ʻi he ʻĒlia Noate ʻĒsiá, naʻá ne mātā tonu ai ʻa hono liliu vave ʻe he mofuike ʻo e 2011 ʻa e fakakaukau ʻa e maʻuʻanga ongoongó. ʻOkú ne pehē, “Naʻe puke ʻe he mofuiké mo e peau-kulá ʻa e tokanga ʻa e māmaní pea mo Siapani kātoa ʻi he meʻa fakalilifu he matāfanga fakatokelau hahaké.”
ʻOku pehē ʻe Pīsope Sitīvenisoni naʻe fakatupu ʻe he meʻa fakamamahí ni ha “tuʻunga māʻolunga ʻo e tokangá” ʻi he tokoni ʻofa fakaetangatá mo e ngaahi ngāue taʻetotongi ne fai ki Siapaní, kau mo ia ne fakahoko ʻe he Siasí.
Naʻe kamata ʻa e Siasí ʻi ha ngaahi ʻaho siʻi pē mei he hoko ʻa e peau-kulá ke ʻoatu e ngaahi fie maʻú ki he kāingalotu ne tofanga he fakatamakí pea mo e kakai taʻesiasí fakatouʻosi. ʻOku pehē ʻe Pīsope Sitīvenisoni, “Naʻe kamata ʻa e ngaahi maʻuʻanga ongongo fakalotofonuá mo fakavahaʻa puleʻangá ke muimuiʻi ʻa e ongoongo kotoa pē.”
ʻOku pehē ʻe Pīsope Sitīvenisoni, naʻe lāngaʻia e tokanga e kau taki ʻo e puleʻanga fakalotofonuá ʻi hono foaki atu ko ia ʻe he Siasí ʻa e toni koloa tokoni ʻofa fakaetangata ʻe 250 mo uki ha kau ngāue tokoni ʻofa ʻe 24,000 ʻa ia ne nau ngāue tokoni ʻi ha houa ʻe 180,000 tupú. Ko ha fonua ia ʻoku siʻi ange ʻi he peseti ʻe uá ʻi he tokolahi fakakātoa ʻo e kakaí ʻoku pehē ʻoku nau tui faka-Kalisitiane, ka ne fie maʻu ʻe ha niʻihi ʻo honau kau takí ke nau ʻilo lahi ange ki he kaunga ʻa e Siasí ʻi he ngaahi ngāue ko ʻení. ʻOkú ne pehē, ne ʻomi ʻe he fieʻiló ni ha faingamālie ki he kau mataotao ʻo e fetuʻutaki mo e kakaí ke ʻoua naʻa ngata pē ʻi heʻenau tokoniʻi kinautolu ne fie maʻu vivilí ka mo toe fokotuʻu foki ha femahinoʻaki he taimi tatau pē. Hangē ko ʻení, ʻosi ha uike ʻe taha mei he hake ʻa e peau-kulá ʻi Siapaní, ne tohi ʻe ha faiongoongo ʻe taha: “Ko e meʻa pē taha ʻoku feʻauhi mo e malava ʻe he Siasi Māmongá ʻo fakamafola e folofolá ko hono ivi ke feau e ngaahi meʻa fakatuʻupakeé. … ʻOku ʻikai tokanga ʻataʻatā pē Siasí ia ki hono kakaí.”1
Naʻe malava ʻa e fakamatala leleí ni tuʻunga ʻi he taʻu lahi hono tanumaki ʻo e vā fetuʻutakí. ʻOku pehē ʻe Kōneni mo Sinitī Kalami, ʻa ia ne na kamata hoko ko e ongo fakafofonga fetuʻutaki mo e kakaí he ʻElia Noate ʻo ʻEsiá ʻi ʻAokosi 2010, “naʻe pau ke ngāue lahi ʻa e fakataha alēlea fetuʻutaki mo e kakaí ʻi Siapaní ʻi ha ngaahi taʻu lahi mo e kau taki māʻolunga he fonuá. Naʻe fakaava ʻe he maheni ko ʻení ʻa e ngaahi matapā ki he ngaahi kautaha fakalotofonuá, ʻo nau loto fiemālie ai ke tali ʻetau tokoní.” ʻOku fakamahino mai ʻe ʻEletā Iāsuo Niʻiama, ʻoku hoko mo hono uaifí ko e talēkita ʻo e fakataha alēlea ʻo e fetuʻutaki mo e kakai ʻo Siapaní he Siasí, “naʻa mo e kau taki fakafonua he puleʻanga ʻi Siapaní naʻe aʻu ʻo mahino kiate kinautolu e maau ʻa e Siasí pea mo e vave ʻo ʻetau lava ʻo ngaʻunu ke fai ha tokoní.”
Ko ha fakatātā ʻo e fakahoungaʻi ʻe he kau taki ʻo Siapaní e tokoni taimi tonu ʻa e Siasí, ko e taimi ko ia ne kumi ai ʻe he kau taki lakanga fakataulaʻeiki fakalotofonuá ha feituʻu kumi hūfanga ʻanga tokolahi ʻa ia naʻe ʻai ʻi ha ʻapiako ʻi ha feituʻu mamaʻo. Ne nau hanga leva mo e fakataha alēlea ʻo e fetuʻutaki mo e kakaí pea mo e pule uelofea fakalotofonua ʻo e Siasí, pea mo e kau taki lakanga fakataulaʻeikí ʻo fokotuʻutuʻu ha ngaahi koloa tokoni kehe ke ʻoatu ki he hūfangaʻangá ni, ʻa ia ne nofo ai ha kakai ʻe meimei toko 270 ne mole honau ʻapí he peau-kulá.
Pea neongo naʻe muʻaki ʻohovale e kakai he fale hūfangaʻangá ni ʻi hono maʻu e tokoní mei ha siasi faka-Kalisitiané, ko e taimi hoko ne toe ō mai ai ʻa e kau ngāue tokoni ʻo e Nima Fietokoni ʻo e Māmongá ʻoku tui honau ngaahi uasikote engeengá, ne kaila ha kiʻi tamasiʻi ia, “Ko ʻeni kuo nau ō mai! ʻOku ou fifili pe ko e hā te nau ō mai mo ia he taimi ní!”
Naʻe talaange ʻe he kouʻōtineita ʻo e fale hūfangaʻangá kia ʻEletā mo Sisitā Kalami, ʻi he hili hono maʻu ʻo e ngaahi tokoní, “Ko homou Siasí naʻa nau ʻomai e fuofua kakanoʻi manu mo e fuofua vesitapolo kei foʻou ne mau maʻu ʻi he hili ʻo e mofuiké.”
ʻOku pehē ʻe Sisitā Kalami, “Naʻe ongo fakafiefia ke ʻikai ngata pē heʻete hoko ko ha nima tokoni ki he fale hūfangaʻangá ka ki he kau taki lakanga fakataulaʻeiki foki ne nau feinga ke aʻu kiate kinautolu ne siʻi tukuhāusiá.”
ʻOku fakamatalaʻi ʻe ʻEletā Niʻiama ha ola lelei ʻe taha ʻo e ngaahi ngāue ʻa e fakataha alēleá ʻo pehē: “Ne mau fakatokangaʻi naʻe mātuʻaki mahuʻinga hono vahevahe e fakamatala fekauʻaki mo e ngāue tokoni ʻa e Siasí mo e kāingalotú pea pehē ki he kau taki māʻolunga taʻesiasí, ki he ngaahi taumuʻa ngāue ʻo ʻetau fetuʻutaki mo e kakaí. ʻOku ou tui kuo maʻu ʻe he kakai teʻeki Siasí he taimí ni ha ʻata lelei ange ʻo e Siasí pea ʻoku falala lahi ange ʻa e kāingalotú ki he ivi ʻo e Siasí ʻi Siapaní.”
Hoko ʻa e Fetuʻutaki mo e Kakaí ko ha Meʻangāue ki he Taki Lakanga Fakataulaʻeiki Fakalotofonuá
ʻI heʻene hoko ko ha konga mahuʻinga ʻo ha faʻunga fakaemāmani lahí, ʻe lava leva ʻa e kau taki lakanga fakataulaʻeikí ke maʻu tokoni mei ha ngaahi fakataha alēlea ʻo e fetuʻutaki mo e kakaí ʻoku nau ʻiloʻi e puleʻanga fakalotofonuá mo malava ke tokoni ʻi hono feau e ngaahi fie maʻu ʻa e kakaí. ʻOku pehē ʻe Sisitā Setuiki ʻo ʻIukulení, “ʻOku fakafiefia ke mamata ki hono tali lelei ʻe he kau taki lakanga fakataulaʻeikí e fetuʻutaki mo e kakaí ʻo hoko ko ha meʻangāue ki hono aʻusia ʻo ʻenau ngaahi taumuʻa ngāué. Ko hano sīpinga ʻe taha, ʻa hono fakahoko ʻo e tokoni fakakoló ʻo fou ʻi he ngaahi ngāue ʻa e Nima Fietokoni ʻo e Māmongá, he kuó ne fakatupulaki ha uouangataha ʻi he kāingalotu ʻo e fanga kiʻi koló mo e ngaahi uōtí pea kuo tokoni ʻi hono tanumaki ha feohi vāofi ange ʻi he vā ʻo e Siasí mo e kakai ʻo e fonuá.”
Tā fakatātaaʻi ʻo e ʻatá ʻe David Stoker
Ne fetākinima ʻi ha taʻu ʻe ua ʻa e Siteiki Lenikesa Kenisesí ʻi he ʻIunaiteti Siteití mo ha ngaahi siasi kehe ʻi he ʻēliá ʻi hono fakahoko ha koniseti tokoni. Ko e totongi huú—ko ha kofukofu koloa—ʻa ia naʻe foaki ki ha feituʻu tauhiʻanga ʻo e meʻakai maʻá e kau masivá ʻi honau feituʻú. ʻI he 2011, ʻoku fakafuofua ki ha kakai ʻe 1,000 ʻo e koló ni ne nau omi ki ai, kau ai ha kau ʻōfisa ʻo ha ngaahi siasi kehekehe pea mo e puleʻangá.
Ngaahi taá naʻe fai ʻe Carol Deshler
Hili ʻe mofuike ʻo e 2011 ʻi Siapaní, ne ngāue leva ʻa e kau taki lakanga fakataulaʻeikí mo e kau mataotao ʻo e fetuʻutaki mo e kakaí ke fokotuʻutuʻu ha ngaahi ngāue tokoni ʻo fakafou he polokalama Nima Fietokoni ʻo e Māmongá. Ne pehē ʻe ha taha faiongoongo fekauʻaki mo e ngaahi ngāue tokoni ʻofa fakaetangatá ni: “Ko e meʻa pē taha ʻoku feʻauhi mo e malava ʻe he Siasi Māmongá ʻo fakamafola e folofolá ko hono ivi ke feau e ngaahi meʻa fakatuʻupakeé.”
Ngaahi taá naʻe fai ʻe Conan Grames