Ko Hono Mahuʻinga ʻo e Ngaahi Tāpuaki Fakataulaʻeikí
Mei ha lea ʻi he konifelenisi lahi ʻo ʻEpeleli 1987.
Ko e tāpuaki fakataulaʻeikí ko hano foaki ia ʻo e mālohí ʻi ha ngaahi meʻa fakalaumālie.
ʻOku fakaʻaongaʻi ʻe ha tamaioʻeiki ʻa e ʻEikí ʻa e lakanga fakataulaʻeikí ʻi ha tāpuaki fakataulaʻeiki, ʻo fakatatau mo hono ueʻi ʻe he Laumālie Māʻoniʻoní, ke kolea e ngaahi mālohi ʻo e langí ke ʻaonga ki he taha ʻoku tāpuakiʻí. Ko e faʻahinga tāpuaki peheé ʻoku foaki ia ʻe kinautolu ʻoku nau maʻu ʻa e Lakanga Taulaʻeiki Faka-Melekisētekí, ʻa ia ʻokú ne maʻu ʻa e ngaahi kī ʻo e ngaahi tāpuaki fakalaumālie kotoa pē ʻo e Siasí (vakai, T&F 107:18, 67).
Ngaahi Sīpinga ʻo e Tāpuaki Fakataulaʻeikí
ʻOku lahi e ngaahi faʻahinga ʻo e tāpuaki fakataulaʻeikí. Pea ʻi heʻeku ʻoatu ha ngaahi sīpingá, kātaki ka mou manatuʻi ʻoku ʻatā ʻa e ngaahi tāpuaki fakataulaʻeikí kiate kinautolu kotoa pē te nau fie maʻu iá, ka ʻoku toki foaki pē ʻi hano kole.
ʻOku muʻaki fakahoko e ngaahi tāpuaki ki he fakamoʻui ʻo e mahakí ʻi hano tākai ʻaki e loló, hangē ko hono fakahinohino ʻe he folofolá (vakai, Sēmisi 5:14–15; Maʻake 6:13; T&F 24:13–14; 42:43–48; 66:9). ʻOku foaki ʻa e ngaahi tāpuaki fakapēteliaké ʻe ha pēteliake kuo ʻosi fakanofo.
ʻE lava ke maʻu ha tāpuaki fakataulaʻeiki ʻe ha niʻihi ʻoku nau fie maʻu ha fakahinohino ʻi ha fili mahuʻinga. ʻE lava ʻe ha niʻihi ʻoku nau fie maʻu ha mālohi fakalaumālie makehe ke ikunaʻi ha faingataʻaʻia fakafoʻituitui ha tāpuaki. ʻOku faʻa kolea e ngaahi tāpuaki fakataulaʻeikí mei he ngaahi tamaí ki muʻa pea toki mavahe ʻa e fānaú mei ʻapi ki ha ngaahi taumuʻa kehekehe, hangē ko e akó, kau he ngāue fakakautaú, pe ko ha fononga mamaʻo.
Ko e ngaahi tāpuaki ʻoku foaki ʻi ha ngaahi tūkunga hangē ko ia ne toki fakamatalaʻí ʻoku ui ia ko e ngaahi tāpuaki ʻo e fakafiemālie pe faleʻi. ʻOku faʻa fakahoko kinautolu ʻe he ngaahi tamaí pe husepānití pe ʻe ha kau kaumātuʻa kehe ʻi he fāmilí. ʻE lava pē ke hiki kinautolu ʻo tauhi ʻi he ngaahi lekooti fakafāmilí ko ha fakahinohino fakalaumālie fakafoʻituitui ki he kakai naʻe tāpuakiʻí.
ʻOku toe fakahoko foki ʻa e ngaahi tāpuaki fakataulaʻeikí ʻi he fakanofo ki he lakanga fakataulaʻeikí pe ʻi ha vaheʻi ʻo ha tangata pe fefine ki ha uiuiʻi ʻi he Siasí. Mahalo ko e ngaahi meʻa ʻeni ʻoku hoko lahi taha ai ʻa e ngaahi tāpuaki fakataulaʻeikí.
Ne ʻosi kole ʻe hatau tokolahi ha tāpuaki fakataulaʻeiki ʻi ha taimi ne tau ʻamanaki fuesia ai ha fatongia foʻou ʻi heʻetau ngāué. Naʻá ku maʻu ha tāpuaki pehē he ngaahi taʻu lahi kuo hilí peá u ongoʻi he taimi pē ko iá hono fakanongá pea mo ʻene fakahinohino tuʻuloá.
Mahuʻinga ʻo e Ngaahi Tāpuaki Fakataulaʻeikí
Ko e hā hano mahuʻinga ʻo ha tāpuaki fakataulaʻeiki? Fakakaukau ki ha talavou ʻoku teuteu ke mavahe mei ʻapi ke kumi faingamālie ʻi he māmaní. Kapau ʻe ʻoange ki ai heʻene tamaí ha kāpasa, mahalo te ne fakaʻaongaʻi e meʻangāue fakamāmani ko ʻení ke tokoni ʻi hono kumi hono halá. Kapau naʻe foaki ange heʻene tamaí ha paʻanga, te ne lava ke fakaʻaongaʻi ia ke ne maʻu ai ha mālohi ki ha ngaahi meʻa fakamāmani. Ko ha tāpuaki fakataulaʻeiki ko hano foaki ia ʻo e mālohi ki he ngaahi meʻa fakalaumālié. Neongo he ʻikai lava ʻo pā ki ai pe fuatautau, ka ʻoku mahuʻinga fau ʻi hono tokoniʻi kitautolu ke tau ikunaʻi ʻa e ngaahi meʻa ʻokú ne fakafeʻātungiaʻi ʻa e hala ki he moʻui taʻengatá.
Ko ha fatongia mātuʻaki toputapu ki ha taha maʻu Lakanga Taulaʻeiki Faka-Melekisēteki ke ne lea ʻo fakafofongaʻi ʻa e ʻEikí ʻi hano fai ha tāpuaki fakataulaʻeiki. Pea hangē ko ia kuo ʻosi fakahā mai ʻe he ʻEikí ʻi he fakahā ʻo onopōní, “Ko ʻeku ngaahi leá … ʻe fakamoʻoniʻi hono kotoa, neongo pe ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē” (T&F 1:38). Kapau ʻe lea ha tamaioʻeiki ʻa e ʻEikí ʻo fakatatau mo hono ueʻi ia ʻe he Laumālie Māʻoniʻoní, ko ʻene ngaahi leá ko e “finangalo ia ʻo e ʻEikí, … ko e folofola ʻa e ʻEikí, … [mo e] leʻo ʻo e ʻEikí” (T&F 68:4).
Ka, kapau ʻe fakafofongaʻi ʻe he fakalea ʻo e tāpuakí ʻa e ngaahi holi mo e fakakaukau pē ʻa e taha maʻu lakanga fakataulaʻeikí, ʻo ʻikai ueʻi ʻe he Laumālie Māʻoniʻoní, pea ʻe makatuʻunga leva ʻa e tāpuakí ʻi he tuʻunga pe ʻokú ne fakafofongaʻi nai ʻa e finangalo ʻo e ʻEikí.
ʻE lava ʻe he kau maʻu Lakanga Taulaʻeiki Faka-Melekisēteki moʻui tāú ʻo foaki ha ngaahi tāpuaki ki honau hakó. ʻOku lekooti ʻe he folofolá ha ngaahi tāpuaki lahi pehē, kau ai e ngaahi tāpuaki ʻa ʻĀtama (vakai, T&F 107:53–57), ʻa ʻAisake (vakai, Sēnesi 27:28–29, 39–40; 28:3–4; Hepelū 11:20), ʻa Sēkope (vakai, Sēnesi 48:9–22; 49; Hepelū 11:21), pea mo Līhai (vakai, 2 Nīfai 1:28–32; 4).
ʻOku fekauʻi ʻa e kau mēmipa ʻo e Siasí he fakahā ʻo onopōní ke nau ʻomi ʻenau fānaú ki he “ʻao ʻo e Siasí,” ʻa ia ʻe hanga ai ʻe he kaumātuʻá “ʻo hilifaki honau nimá kiate kinautolu ʻi he huafa ʻo Sīsū Kalaisí, ʻo tāpuakiʻi ʻa kinautolu ʻi hono huafá” (T&F 20:70). Ko e ʻuhinga ʻeni ʻoku ʻomai ai ʻe he ngaahi mātuʻá ʻenau pēpeé ki he houalotu sākalamēnití, pea hanga ai ʻe ha kaumātuʻa—meimei ko e tamaí—ʻo foaki ange ha hingoa mo ha tāpuaki.
ʻOku ʻikai fakangatangata pē ʻa e tāpuaki fakataulaʻeikí ki he ngaahi tāpuaki ʻoku fai ʻi he hilifaki ʻo e nimá ki he ʻulu ʻo ha tahá. ʻOku faʻa foaki he taimi ʻe niʻihi ha ngaahi tāpuaki ki ha falukunga kakai. Naʻe tāpuakiʻi ʻe he palōfita ko Mōsesé ʻa e fānau kotoa ʻo ʻIsilelí kimuʻa heʻene pekiá (vakai, Teutalōnome 33:1). Naʻe hanga ʻe he Palōfita ko Siosefa Sāmitá ʻo “fai ha tāpuaki ki he kau fafine” naʻe ngāue ʻi he Temipale Ketilaní. Naʻá ne toe tāpuakiʻi foki mo e “haʻofangá.”1
ʻOku toe fai foki mo ha ngaahi tāpuaki fakataulaʻeiki ki ha ngaahi feituʻu. ʻOku tāpuakiʻi ʻa e ngaahi puleʻangá mo fakatapui ki hono malangaʻi ʻo e ongoongoleleí. ʻOku fakatapui ʻa e ngaahi temipalé mo e ngaahi fale lotú ki he ʻEikí ʻaki ha tāpuaki fakataulaʻeiki. ʻE lava ke fakatapui mo ha ngaahi fale kehe ʻi he taimi ʻoku fakaʻaongaʻi ai kinautolu ki he ngāue ʻa e ʻEikí. “ʻE lava ke fakatapui ʻe he kāingalotu ʻo e Siasí honau ngaahi ʻapí ko ha fale toputapu ʻe lava ke nofoʻia ʻe he Laumālie Māʻoniʻoní.”2 ʻE lava ke tuku ʻe he kau faifekaú mo e kau maʻu lakanga fakataulaʻeikí ha tāpuaki fakataulaʻeiki ʻi ha ʻapi naʻe tali ai kinautolu (vakai, ʻAlamā 10:7–11; T&F 75:19). Kau talavou, ʻe taimi nounou mei heni kuo kole atu ke mou fakahoko ha tāpuaki pehē. ʻOku ou fakatauange ʻoku mou teuteu fakalaumālie ki ai.
Ngaahi Aʻusia ʻi he Tāpuaki Fakataulaʻeikí
Te u fakamatala atu ha ngaahi sīpinga kehe ʻo e ngaahi tāpuaki fakataulaʻeikí.
ʻI he taʻu ʻapē ʻe teau kuo hilí, ne lava ai ʻa Sela ʻIongi Vānisi ʻo hoko ko ha māʻuli. Ne tāpuakiʻi ia ʻe ha taki lakanga fakataulaʻeiki “te ne fakahoko maʻu pē ʻa ia ʻoku totonú mo ia ʻoku lelei taha ki he lelei ʻo e kakai te ne tauhí” ki muʻa pea toki kamata ʻene ngāue ki he houʻeiki fefine ʻo ʻAlesoná. Ne laka hake ʻi ha taʻu ʻe 45, ʻa e faifāʻele ʻa Sela ʻi ha pēpē ʻe meimei toko 1,500 ʻo ʻikai mate ha faʻē pe pēpē ʻe taha. Naʻá ne pehē, “Ko e taimi pē naʻá ku fetaulaki ai mo ha palopalema faingataʻa, naʻe hangē naʻe ʻi ai maʻu pē ha meʻa naʻá ne ueʻi au pea naʻe hangē naʻe ʻi ai maʻu pē ha founga ne u ʻilo ai ʻa e meʻa totonu ke faí.”3
ʻI he 1864, naʻe ui ai ʻa Siosefa A. ʻIongi ʻi ha misiona makehe ke ne tokangaʻi e pisinisi ʻa e Siasí ʻi he Hahaké. Naʻe tāpuakiʻi ia heʻene tamaí, Palesiteni Pilikihami ʻIongi, ke ʻalu pea foki hao mai. ʻI heʻene foki maí, ne kau ai ʻi ha fepaki fakatuʻutāmaki he lēlué. Naʻá ne lipooti ʻo pehē, “Naʻe haveki ʻa e lēlué kotoa, kau ai ʻa e konga naʻá ku ʻi aí ʻo aʻu ki ha toe pē sea ʻe taha mei hoku tangutuʻangá, [ka] naʻá ku hao taʻe ʻi ai ha makohi.”4
ʻI heʻeku lea ko ia ki he ngaahi tāpuaki fakataulaʻeikí, ʻoku lahi fau e meʻa ʻoku ou manatu ki aí: ʻOku ou manatu ki he kole mai hoku ngaahi fohá mo hoku ngaahi ʻofefiné ha tāpuaki ke tokoniʻi kinautolu ʻi he ngaahi meʻa fakangangauʻulu taha ʻi heʻenau moʻuí. ʻOku ou fiefia ʻi heʻeku manatu ki he ngaahi palōmesi fakalaumālie pea mo e tui ne fakamālohia ʻa ia naʻe maʻu ʻi honau fakahokó. ʻOku ou ongoʻi laukau ʻi he tui ʻa ha toʻu tangata foʻou, ʻi he taimi ʻoku ou fakakaukau ai ki ha foha, ʻoku taʻemanonga fekauʻaki mo ha sivi fakapalofesinale ka ʻoku ʻikai ke lava ʻo aʻu ki heʻene tamai ʻoku mamaʻó, ʻi heʻene kumia ha tāpuaki fakataulaʻeiki mei he taha maʻu lakanga fakataulaʻeiki ofi taha ʻi hono fāmilí, ko e husepāniti hono tuofefiné. ʻOku ou manatuʻi ha tokotaha papi ului puputuʻu kei talavou ki he Siasí, ne fekumi ki ha tāpuaki ke tokoni ange ʻi hono liliu ʻene tōʻonga moʻui fakatuʻutāmaki kiate iá. Naʻá ne maʻu ha tāpuaki mātuʻaki faikehe ne u fakatumutumu he taimi naʻá ku fanongo ai ki he ngaahi lea naʻá ku lea ʻakí.
ʻOua te ke momou ke kole ha tāpuaki fakataulaʻeiki ʻi he taimi ʻokú ke fie maʻu ai ha mālohi fakalaumālié.
Ngaahi tā fakatātā ʻa Keith Larson