Hotau Ngaahi ʻApí, Hotau Ngaahi Fāmilí
ʻOua Naʻá Ke Teitei Foʻi
Ko hano fakamatalaʻi ʻe ha husepāniti mo ha uaifi ʻena ului ki he ongoongolelei ʻo Sīsū Kalaisí—mavahevahe ʻaki ha taʻu ʻe 35.
Ko e Fakamatala ʻa ʻIvá
Ko e taʻu ʻe 35 ʻo ʻeku fakaʻamu mo tatali ke hoko hoku husepānití ko ha mēmipa ʻo e Siasí. Ne fakafonu ʻaki e ngaahi taʻu lōloa ko iá ha ngaahi lotu fakamātoato, ka ʻoku ʻi ai ha lotu ʻe tolu ne hoko ko ha liliuʻanga fakangalongataʻa kiate au.
Ne u mali mo ʻAlo ʻi he 1959. Hili ha taʻu ʻe hongofulu mei ai kuo ʻi ai haʻama fānau ʻe toko tolu pea mau nofo ʻi ha kiʻi kolo ʻi Kānata. Naʻe fakalele ʻe ʻAlo ha kiʻi pisinisi langa, ka ne u hoko pē ko ha faʻē nofo pē ʻi ʻapi ʻo faʻa tokoni he taimi ʻe niʻihi ʻi he pisinisí. ʻI he ngaahi fakaʻosinga ʻo e uiké, ne u faʻa fakafiefia ai mo ʻAlo mo homa ngaahi kaumeʻá, ʻo fakahoko maʻu ʻaki pē ʻa e kava mālohí. Naʻe ʻolokahōlika ʻeku tangataʻeikí, pea naʻe ʻikai ke u saiʻia ʻi he hoko ʻa e inú ko ha konga lahi ʻo ʻema moʻuí, ka ne hoko ia ko ʻema founga feohi.
Naʻá ku fakatokangaʻi he taʻu ko iá, 1969, ʻoku ʻikai ha tupulaki ʻi heʻeku moʻuí pea naʻe ʻi ai ha totonu ʻo ʻema fānaú ki ha meʻa lelei ange ʻi he meʻa ne ma ʻoangé. Pea ʻi ha pō ʻe taha, hili ʻemau fakafiefia konaá, naʻá ku tūʻulutui ʻo lotu, “ʻE ʻOtua, kapau ʻokú Ke ʻi ai, tokoni mai muʻa ke u liliu ʻeku moʻuí.” Naʻá ku palōmesi ange he ʻikai ke u toe inu kava mālohi, ʻa ia ko ha tukupā ne u tauhi talu mei ai.
Ko e fuofua lotu fakangalongataʻá ia, pea naʻe tali vave mai. Naʻe fakaafeʻi e kiʻi taʻahine hoku tokoua ʻi he fonó, ʻa ia ʻoku ou ʻilamutu ʻaki, fakataha mo hano kaumeʻa Siasi ki he Palaimelí. Pea ʻi he ʻilo lahi ange hoku tokoua ʻi he fonó ki he Siasí, naʻá ne ongoʻi hono ueʻi ke ne ʻomai haʻaku makasini ʻo e Siasí, ʻa ia ne aʻu mai ʻi ha māhina ʻe taha, hili hono fakahoko ʻeku ʻuluaki lotú. Naʻe ʻikai ke u ʻilo ʻe au pe ko e hā ʻa e Māmonga, ka naʻá ku saiʻia ʻi he ngaahi pōpoaki naʻe ʻi he makasiní mou toutou lau mei he kamataʻangá ki he ʻosi. Naʻá ku pehē leva ke u vakaiʻi ʻa e Siasí pea naʻá ku maʻu ai ʻeku talí. Naʻá ku liliu moʻoni ai ʻeku moʻuí, pea naʻe papitaiso au he ʻaho 19 ʻo Sune 1970.
Naʻe ʻikai ke tui tatau ʻa ʻAlo mo ʻeku fakaʻānauá. Naʻe saiʻia pē ia heʻema tōʻonga moʻui ki muʻá pea hokohoko atu pē ia ai. Naʻe kei hoko pē ko ha husepāniti, tamai, mo ha tauhi lelei, ka ʻi he taʻu ʻe 35 hono hokó, naʻá ku toko taha pē, ʻi he ngaahi meʻa fekauʻaki mo e ongoongoleleí.
Naʻá ku ohi hake ʻema kiʻi fānaú ʻi he Siasí, ka ʻi ha ngaahi taʻu siʻi pē, kuo fakakaukau ʻema fānaú ʻoku nau fie fakamoleki ʻe kinautolu e ngaahi ʻaho Sāpaté ke ʻeva vaka mo ʻenau tamaí kae ʻikai ō mo au ki he lotú. Naʻá ku loto mamahi. Naʻá ku talanoa ʻi ha ʻaho ʻe taha he 1975 mo ʻeku palesiteni fakasiteikí peá u fakahā ange kuó u fakakaukau ʻoku fie maʻu ke u mavahe mei he Siasí he ʻokú ne veuki homau fāmilí. Naʻe fanongo fakalongolongo pē pea pehē mai, “Fai e meʻa kuo pau ke ke fakahokó, ka ke fakapapauʻi ʻoku tali ia ʻe hoʻo Tamai ʻi he Langí.” Ko ia, ne u foki heni ki ʻapi ʻo lotu mo ʻaukai. Ko e lotu fakangalongataʻa ia hono uá. Ko e tali naʻe hoko maí ko ha ongo ko e fehokotakiʻanga au ʻi he ongoongoleleí maʻa hoku fāmilí; kapau pe motu, ʻe mole ʻa e taha kotoa. Naʻá ku ʻilo ko e haʻu ʻa e talí mei he ʻOtuá, pea naʻá ku tukupā ai he ʻikai teu teitei mavahe mei he Siasí. Pea naʻe ʻikai ke u teitei fai ia.
Naʻe ʻikai faingofua ʻe te tuʻu maʻú, ka naʻe tokoni ha ngaahi meʻa ke u pukepuke ʻeku tuí mo faʻa kātaki ʻi he ʻamanaki ki ha ʻaho ʻe toe fakakaukauʻi ai ʻe ʻAlo ʻa e ongoongoleleí:
-
Naʻá ku ʻofa maʻu pē ʻia ʻAlo mo fai hoku lelei tahá ke tokangaʻi ia pea mo hoko ko ha uaifi ʻoku poupou mo faivelenga.
-
Naʻá ku lotu maʻu pē. Ne hoko ʻa e Tamai Hēvaní mo Sīsū Kalaisi ko haku ongo takaua ʻi he ongoongoleleí. Ko e taimi ne faingataʻa ai ke te nofo mo ʻAlo ʻi he ʻikai ke ne moʻui ʻaki ʻa e ngaahi tuʻunga ʻo e ongoongoleleí, naʻá ku fakataufolofola ki he Tamai Hēvaní pea aʻu ʻou ʻilo hoku Fakamoʻuí.
-
Naʻá ku faʻa lau maʻu pē ʻeku folofolá mo e ngaahi tohi kotoa pē ʻa e Siasi naʻá ku lava ʻo maʻu, kau ai e Ensign. Naʻe mahuʻinga mo ongo moʻoni kiate au ha veesi ʻe ua he folofolá, 3 Nīfai 13:33 mo e Tokāteline mo e Ngaahi Fuakava 75:11. Naʻá na ʻomi ha ivi mo ha kātaki fuoloa ke u kei pīkitai pē he lolotonga ʻeku tatali ki ha liliu he loto hoku husepānití mo e fānaú.
-
Naʻá ku ʻalu tokotaha maʻu pē ki he lotú ʻo aʻu ki he foki kotoa ange ʻema fānaú. Kuo nau mālohi kotoa he ʻahó ni. Ko e taimi ne nau lalahi ai ʻo mavahe mei ʻapí, naʻá ku kei hoko atu pē maʻu lotu tokotahá.
-
Naʻa mau fakahoko e efiafi fakafāmili ʻi ʻapí taʻe ʻiloʻi ʻe ʻAlo ʻa e meʻa naʻa mau faí. Naʻá ku ʻohake ha kaveinga ʻi heʻemau tēpile maʻu-meʻa-tokoní, pea mau aleaʻi fakafāmili ia.
-
Naʻá ku feinga maʻu pē ke talangofua mo fai e meʻa totonú.
-
Naʻá ku maʻu ha toe mālohi ʻaki haʻaku kole ha ngaahi tāpuaki fakataulaʻeiki.
-
Naʻá ku kole ha faleʻi mei he kau taki lakanga fakataulaʻeikí.
-
Naʻá ku lau hoku ngaahi kaumeʻa he Siasí ko e fāmili.
-
Naʻá ku ʻalu ki he temipalé ʻo maʻu hoku ʻenitaumení. Naʻe taʻu lahi peá u toki fai e fili ko ʻení; naʻá ku manavasiʻi naʻá ne ʻai hoku vā mo ʻAló ke faingataʻa ange. Ko hono ikuʻangá, naʻá ku ʻilo ne hoko ia ko e fili lelei taha kiate aú. Naʻe poupouʻi ʻe ʻAlo, pea ne u fiefia ai, pea ʻi he hili ʻeku maʻu iá, naʻe ʻikai ke u toe tukuakiʻi ʻa ʻAlo ʻo pehē ko e ʻuhinga ia naʻe ʻikai ke u ʻalu ai ki he temipalé. Ko e taimi ne u kau ai he lotu ʻi he temipalé, naʻá ku faʻa hiki e hingoa ʻo ʻAló he lisi ʻo e lotú.
Ko hono moʻoní, naʻá ku hokohoko atu ke moʻui ko ha mēmipa faivelenga ʻo e Siasí. Naʻá ku kumi ha fanga kiʻi founga ke vahevahe ai e ongoongoeleleí mo ia, neongo naʻe ʻikai faʻa fiefanongo ki ai. Ka naʻá ku ʻilo ʻe tataki au ʻe he Laumālie Māʻoniʻoní ʻi he ngaahi meʻa totonu ke u leaʻakí ʻi he founga totonú pea mo e taimi totonu ke fakamatalaʻi aí. Naʻá ku toki ʻilo ki mui ne tuʻunga heʻeku faivelenga mo mateakiʻi iá, ʻa e ongo kia ʻAlo e ueʻi ʻa e Laumālié.
Naʻe aʻu ʻo loto ke fanongo ki he ngaahi lēsoni fakafaifekaú ʻi ha taimi ʻe niʻihi. Ka ne u loto mamahi he meimei taimi kotoa pē, he naʻe foki maʻu pē ia ki heʻene tōʻonga moʻui fuoloá. Ka neongo e ngaahi momeniti fakalotofoʻí ni, naʻe tauhi au ʻe he Tamai Hēvaní mo fakalato ʻeku ngaahi fie maʻú ʻaki ha ngaahi tāpuaki, ʻi he ngaahi meʻa naʻe ʻikai ke u maʻú. Ka ne u ʻilo ʻi he taimi kotoa ko ʻení ʻoku ʻi ai ha meʻa ʻia ʻAlo ʻe mahuʻinga ke u tatali ki ai.
Naʻe kamata māmālie ʻa ʻAlo ke fai ha ngaahi liliu. Ne tuku ʻene kapekapé. Tuku mo ʻene konaá. Naʻe anga lelei ange kiate au ʻo laka ʻi ha toe taimi ki muʻa. Pea kamata haʻu ki he lotú.
Peá u kei lotu pē.
Naʻe maʻu e tali taʻeʻamanekina ʻo ʻeku lotu fakangalongataʻa hono tolú ʻi ʻEpeleli 2005. Naʻá ku fifili pe ʻe faifai koā pea tali ʻe ʻAlo ʻa e ongoongolelei ʻo Sīsū Kalaisí—Naʻá ku kiʻi ongoʻi loto foʻi. Naʻá ku tangi ai ki he Tamai Hēvaní ke tokoni. ʻOku pau pē kuo fāifai pea aʻu ki hono taimi totonú he naʻe papitaiso ʻa ʻAlo ʻi he ʻaho 9 ʻo Siulaí.
Neongo naʻe ʻikai faingofua e aʻu mai ki he tuʻunga ko ʻení, ka ʻoku ou fakafetaʻi ʻi heʻeku siotonu ʻi he mālohi ʻo e ʻOtuá ʻi hono liliu ha loto taʻetui ke hoko ko ha taha tui. ʻOku ou ʻilo naʻá Ne ongoʻi mo tali ʻeku ngaahi lotu lahi naʻe fai he taʻu ko ʻeni ʻe 35. ʻOku ou nofo ai he taimí ni mo ha tangata kuo liliu, ko ha taha ʻoku ʻofa heʻetau Tamai Hēvaní ʻo tatau pē mo au, tuʻunga Heʻene ngaahi talí. ʻOkú ma toe feʻofaʻaki lahi ange ʻo laka ange ʻi ha toe taimi ki muʻa.
ʻOku ou ʻilo ʻoku ʻi ai mo ha niʻihi kehe ʻi he Siasí ʻoku tatali, ʻamanaki, pea mo lotua ha ʻofaʻanga ke foki mai ki he Siasí. ʻOku ou fie poupou atu ki he ngaahi toungaʻane mo e ngaahi tokoua ko ʻení ke nau tali e fakaafe ʻa e Fakamoʻuí kiate kinautolú ke “haʻu kiate aú” (ʻAlamā 5:34) he ʻoku ʻikai maʻa honau ngaahi ʻofaʻangá pē. ʻOku ou ʻilo mei he meʻa kuó u fouá, ʻe hanga heʻetau fai ʻení ʻo foaki mai ha mālohi he ʻoku ʻikai ha meʻa ia te ne toe lava. ʻOku ʻomi ʻe he nofo ofi ki he Tamai Hēvaní, talangofua ki Heʻene ngaahi fekaú, mo hono maʻu ʻo e ngaahi tāpuaki lolotongá, ʻa e fiefiá pea malava ke Ne ngāue ʻo fakafou ʻiate kitautolu.
ʻOku ou fakamoʻoni ʻoku ongoʻi ʻe he ʻOtuá ʻetau ngaahi lotú. ʻOku ʻikai ke faʻa faingofua ʻa e tatali ki he ʻEikí mo tali ʻEne taimi-tēpilé ʻi he tuí, ka ʻoku ou ʻilo ʻoku tonu maʻu pē ʻEne taimí.
Ko e Fakamatala ʻa ʻAló
Ne taʻu ʻe 35 haʻaku talanoa mo ha kakai tokolahi ʻo kau ki he ongoongoleleí. Naʻe ʻikai teitei tukunoaʻi ʻe hoku uaifí ha faingamālie ke fakamatalaʻi ai, peá ne faʻa fakapotoʻi hono tuku e Tohi ʻa Molomoná mo e makasini Ensign ke u lava ʻo fakatokangaʻí. Moʻoni pē, naʻe ʻikai ke u teitei toʻo ia. Naʻá ne fakaafeʻi ʻa e kau faifekaú ke nau haʻu ʻi he ngaahi taimi lahi; mahalo ko e hoa ʻe ua pe tolu naʻa nau akoʻi au ʻi he ngaahi lēsoni fakafaifekaú.
Ko e hā leva e meʻa naʻá ne taʻofi au mei heʻeku hifo ki he vai ʻo e papitaisó?
Naʻe ʻi ai maʻu pē ʻeku ʻuhinga. Naʻá ku ngāue ʻi ha ngaahi houa lōloa. Naʻe ʻikai ke u tui ʻe faifai angé pea ʻi ai haku taimi ki he ongoongoleleí. Naʻá ku fuʻu femoʻuekina au he ngāue paʻangá. Ne u talaange ai kia ʻIva “ʻE ʻi ai ha taimi ʻe hōloa ai e ngāué pea ʻatā leva hoku taimí pea te u lau e Tohi ʻa Molomoná.”
Hala pē ke u teitei fai ia ʻe au. ʻIkai ngata ai, naʻe ʻikai ko ha taha lautohi au, pea ko e taimi naʻá ku feinga ai ke lau e Tohi Tapú, naʻe ʻikai ʻuhinga ia kiate au. Ko ʻene ʻosí ai pē ia ʻaʻana.
Naʻe ʻi ai ha meʻa naʻá ne taʻofi au mei heʻeku kau ki he Siasí, ko ha meʻa mamafa ange: ko e moʻui angahalaʻia naʻá ku ʻi aí. ʻOku akoʻi mai ʻe he Tuʻi ko Penisimaní ko e “tangata fakakakanó ko e fili ia ki he ʻOtuá … kae ʻoua kuó ne talangofua ki he ngaahi fakahinohino ʻa e Laumālie Māʻoniʻoní” (Mōsaia 3:19). Naʻe ʻikai ke u talangofua—naʻá ku tuʻu pē ʻi loto. Naʻe folofola ʻa e Fakamoʻuí, “Ko ia ʻoku ʻikai kau mo aú, ʻoku angatuʻu ia kiate au” (Mātiu 12:30). Kuó u toki fakatokangaʻi he taimí ni ko ʻeku founga tōʻonga moʻuí, naʻá ku angatuʻu ai kiate Ia. Naʻe fie maʻu ke u liliu.
Naʻá ku moʻui takai pē ʻi he ongoongoleleí ka naʻe ʻikai ke u moʻui ʻaki ia, ka ʻi he fakalau atu ʻo e taimí, ne u kamata ke ongoʻi ʻa e Laumālié. Naʻe tuku leva ʻeku fakafiefiá mo ʻeku konaá. Pea ʻi heʻeku fakahoko e liliu ko iá, naʻe kamata leva ke toutou hāsino mai e Laumālié. Naʻe teʻeki pē ke u aʻu ki he tuʻunga naʻe fie maʻu ke u ʻi aí—naʻe ʻikai ke fuʻu lelei ʻeku tōʻonga leá pea naʻe ʻi ai mo haku ngaahi ʻulungaanga kovi kehe ke fakaleleiʻi—ka naʻá ku liliu.
Ka ne u maʻu ha fakamoimoi ʻi ha ʻaho ʻe taha. Ko e ʻomi ia mei ha taha ʻo hoku ngaahi ʻofefiné, ko Linitā. Naʻe ʻi ai ha Tohi ʻa Molomona mo ha Tohi Tapu ne lahi ai ha ngaahi potufolofola ne ʻosi fakaʻilongaʻi. Naʻá ne toe fai mai foki ha tohi ʻo ne fakahā mai ai e lahi ʻo ʻene ʻofa ʻiate aú mo ʻene fie maʻu ke u ʻilo e meʻa kuó ne ʻiló.
Naʻá ne tohi ʻo pehē, “Ko e founga pē taha ke ʻilo ai pe ʻoku moʻoni e ongoongolelei ʻo Sīsū Kalaisí ke fehuʻi ʻi he loto fakamātoato mo e loto moʻoni.”
Pea toki fakamatala mai leva ʻe Linitā ha ngaahi potu folofola ne nau taki au ʻi ha fononga ʻo e lotu mo e ako folofola.
Naʻá ne tohi mai ʻo pehē, “Ko e founga pē taha ke u ʻilo ai hoku Fakamoʻuí mo e Tamai Hēvaní ko e lotu mo lautohi fekauʻaki mo Kinaua ʻi he folofolá.”
Hili ia peá ne toki fakamatalaʻi mai hono mahuʻinga ʻo e loto fakatōkilaló pea ka ne taʻeʻoua ʻa e ʻOtuá ʻi heʻene moʻuí, ne mei ʻikai ke ne lava ʻo maʻu ha nonga. Fāifai, pea tohi mai, “ʻOua te ke toe fakatoloi. Kuo lahi ha ngaahi meʻa kuo foaki atu kiate koe. Ko e taimi ʻeni ke ke fakafoki ai ki he Tamai Hēvaní. Ko e founga pē ʻeni ki he fiefia moʻoní.”
Naʻe ʻikai ke toe ʻi ai haʻaku ʻuhinga. Hōloa e ngāué, pea maʻu haku taimi lahi. Ne u kamata leva ke lau mo ako e ngaahi potufolofola naʻá ne fokotuʻu mai kiate aú, ʻo nau ʻomi kiate au ʻa e holi ke lau kakato e Tohi ʻa Molomoná. Ka naʻe kei toe lahi pē ngaahi meʻa naʻe teʻeki mahino kiate au.
Aʻu ki he taimi ko ʻení kuó u ʻosi maʻu houalotu sākalamēniti au he naʻe talamai ʻe hoku uaifí ʻe lelei kapau te u ʻalu ange ʻo tangutu hono tafaʻakí. Naʻá ne toe fokotuʻu mai foki ke u lau ʻa e Tokāteline mo e Ngaahi Fuakavá. Naʻá ku fai ia, pea mahino lelei ange ai kiate au. Pea, fakataha mo e tokoni hoku uaifí, naʻá ku lau ai e Tohi ʻa Molomoná ʻo ʻiloʻi e moʻoni ʻo e ngaahi potu folofolá. Naʻe kamata ke ueʻi mālohi au ʻe he Laumālié tuʻunga ʻi ha ngaahi lotu lahi.
Ko e hā naʻá ne fakahoko e liliú? Ko e Laumālie Māʻoniʻoní mo e ʻilo ʻo e folofolá. Naʻá na fakatou foaki mai kiate au ha loto toʻa ke liliu ʻeku moʻuí mo kole ki he ʻOtuá ha fakamolemole ki heʻeku ngaahi angahalá, he ko e ongo meʻa ia naʻá na taʻofi moʻoni au mei heʻeku kau ki he Siasí ʻi he ngaahi taʻu kotoa ko iá.
Naʻe mātuʻaki faingataʻa hono vete ʻo ʻeku ngaahi angahalá. Naʻá ne ʻomi kiate au ha mamahi lahi ʻou tokoto ai ʻi hoku mohengá ʻi ha ʻaho ʻe tolu. Ka ʻi he Fakalelei ʻa Sīsū Kalaisí, naʻe fakamolemoleʻi au. Pea toki foaki mai leva ʻe he Tamai Hēvaní ha ivi ke u tuʻu ʻo hoko atu ʻeku moʻuí.
Naʻe papitaiso au ʻe hoku foha ko Kēviní he ʻaho 9 ʻo Siuilai 2005. Naʻe ʻi ai ha taha ʻo e kau faifekau ne nau akoʻi hoku uaifí ʻi he taʻu ʻe hongofulu tupu ki muʻá. Hili mei ai ha taʻu ʻe ua kuó u ʻave hoku fāmilí ki he Temipale Sani Tiako Kalefōniá ke mau sila ki he moʻuí ni mo ʻitāniti.
Ko e ngaahi taʻu fakafiefia taha ʻo ʻeku moʻuí ʻa e taʻu ʻe fitu ne toki ʻosí. Kuo fāifai peá u lava ʻo tuʻu ʻi hoku tuʻunga ko e pēteliake mo e taki fakalaumālie ʻo homau fāmilí ʻo ʻinasi fakataha he ongoongoleleí mo hoku uaifí, ʻema fānaú, pea mo homa makapuná ʻe hiva. Kuo hanga ʻe he uouangataha fakafāmili ko ʻení ʻo fakaivia fakalaumālie ʻa e taha kotoa. Kuo kau ha foha ʻi he fono ki he Siasí, pea ko ha toko fā ʻo homa ngaahi makapuná kuo nau ʻosi pe lolotonga ngāue fakafaifekau. Kuo hoko ʻeku moʻui foʻou ʻi he Siasí ko ha mana. Naʻe hala haʻaku misi ki he fiefia lahi mo e tupulaki te ne ʻomi kiate aú.
ʻOku ou fakamālō lahi ʻi he faingamālie hono ua ko ʻení. ʻOku ou fakamālō ʻi heʻeku lava ʻo fetongi ʻa e ngaahi taʻu mole ko iá ʻaki ʻeku fai e ngāue ʻa e ʻOtuá.
ʻI heʻeku lau e tohi hoku ʻofefiné, naʻá ku fakatokangaʻi ʻoku ʻikai haʻaku toe kumi ʻuhinga.
Kuo hoko mai e fiefia lahi ki heʻemau moʻuí koeʻuhí he kuo mau taha ʻi he ongoongoleleí.
Ngaahi taá naʻe fai ʻe Craig Dimond