Taʻe Hano Mele mei Māmani

Fai ʻe Julie Thompson

Naʻá ku fifili pe ko e hā naʻá ku ʻi he temipalé ai ke fakamaʻá ka ʻoku ʻikai ha meʻa ia ai ʻe ʻulí. Ka naʻe vave ʻeku fakatokangaʻi ʻoku ʻikai ko e fakamaʻá ʻa e tefitoʻi ʻuhingá.

Naʻá ku aʻu atu ki he Temipale Paunitifulu ʻIutaá he ngaahi taʻu siʻi kuo hilí ke fakahoko hano fakamaʻa tuʻuapō ne vahe mai. Ko kinautolu naʻe ō angé naʻe tokolahi ʻaupito, peá u fifili ai ʻi ha kiʻi taimi siʻi pe ʻe ʻi ai ha niʻihi ʻe fekau ke nau foki ki ʻapi. Naʻá ku fuʻu mateuteu au ke u kole ke u foki vave. Peá u fakakaukau fakaoli pē ʻiate au, “He ʻikai ke nau tuku ke mau foki vave. Te nau kumi ha fanga kiʻi ngāue iiki maʻa kimautolu kātoa, ʻo pehē ko hanau fatongia ke puke kimautolu heni ʻi he houa ʻe uá kakato.” Naʻá ku manatuʻi ha ngāue ki muʻa naʻá ku tafi ai ʻa e efú ʻo laka hake ʻi ha houa ʻe taha, pea toki fakafoki ʻa e konga tupenu naʻe ʻomi kiate aú ʻoku kei maʻa pē ia ʻo tatau mo e taimi naʻe ʻomai aí. Naʻá ku teuteu ke u fakamoleki ha houa ʻe ua ki hano fakamaʻa ha ngaahi meʻa naʻe ʻikai ʻasi ʻoku nau fie maʻu ke fakamaʻa. Ko hono moʻoní, naʻá ku haʻu ki he temipalé he pō ko iá ko e fai fakafatongia pē ʻo laka ange ia ʻi ha holi ke tokoni.

Naʻe taki atu ʻemau kulupú ki he kiʻi falelotú ki ha fakataha lotu. Ne leaʻaki ai ʻe he taha tauhi fale naʻá ne tataki ʻemau fakataha lotú ha meʻa te ne liliu ʻo taʻengata ʻa e anga ʻo ʻeku vakai ki he ngāue fakamaʻa ʻo e temipalé. Hili ʻene talitali lelei kimautolú, ne hoko atu leva ʻo ne fakamatalaʻi ʻoku ʻikai ko ʻemau ʻi aí ke fakamaʻa ʻa e ngaahi meʻa naʻe ʻikai fie maʻu ke fakamaʻá ka ke taʻofi ʻa e fale ʻo e ʻEikí mei haʻane ʻuli. ʻI heʻemau hoko ko e kau tauhi ʻo e taha ʻo e ngaahi feituʻu toputapu taha he māmaní, ʻoku ʻi ai hamau fatongia ke tauhi ia ke taʻe-hano-mele.

Naʻe mahuhuhuhu ʻene pōpoakí ki hoku lotó, peá u ʻalu leva ki he feituʻu naʻe vahe au ki aí mo ha loto vekeveke ke maluʻi ʻa e fale ʻo e ʻEikí. Naʻá ku fakamoleki ha taimi mo ha kiʻi polosi molū, ʻo tafi e efu ʻi he fanga kiʻi vahaʻa tongi he ʻesia ʻo e matapaá, papa he veʻe falikí, pea mo e vaʻe ʻo e ngaahi tēpilé mo e ngaahi seá. Kapau naʻe tuku mai kiate au ʻa e ngāué ni ʻi ha ngāue ki muʻa, mahalo naʻá ku mei fakakaukau au ʻoku ngalivale mo tafi noaʻia pē ʻa e ngaahi ʻēliá ke u ngali femoʻuekina. Ka ko e taimi ko ʻení, naʻá ku fakapapauʻi ʻoku aʻu ʻa e mataʻi polosí ki he kiʻi vahaʻa tongi siʻisiʻi tahá.

Naʻe tāpuakiʻi ʻaki au ha taimi ke u fakakaukau ai ʻi he lolotonga ʻo ʻeku ngāué, he naʻe ʻikai fakaongosia fakaetuʻasino pe fakaʻatamai ʻa e ngāué ni. Naʻá ku ʻuluaki fakatokangaʻi naʻe ʻikai ke u teitei tokanga au ki he fanga kiʻi meʻa iiki peheé ʻi hoku ʻapí kae fakamaʻa pē ʻa e ngaahi feituʻu ʻoku lava ʻo ʻuluaki mamata ki ai ʻa e kakaí, kae fakaliʻeliʻaki pē ngaahi feituʻu ko e kau mēmipa pē hoku fāmilí mo au ʻoku nau ʻiló.

Naʻá ku fakatokangaʻi hono hoko naʻe ʻi ai ha ngaahi taimi naʻá ku moʻui ʻaki ai ʻa e ongoongoleleí ʻi he founga tatau—ʻo moʻui ʻaki pē ngaahi tefitoʻi moʻoní mo fakahoko ʻa e ngaahi ngāue ko ē naʻe mataʻāʻā kiate kinautolu ʻiate aú kae tuku pē ngaahi meʻa ia naʻe ngali toki ʻilo pē ʻe hoku fāmilí mo aú. Naʻá ku maʻu lotu, fua ha ngaahi fatongia, fakahoko ha ngaahi ngāue, ʻalu ʻo faiako ʻaʻahi—ʻoku nau mataʻāʻā kotoa ki he kāingalotu homau uōtí—kae fakaliʻeliʻaki pē toutou ʻalu ia ki he temipalé, fai ʻo e ako fakafoʻituitui mo fakafāmili ʻa e folofolá mo e lotú, mo e fai ʻo e efiafi fakafāmili ʻi ʻapí. Naʻá ku akoʻi ha ngaahi lēsoni mo lea ʻi he lotú kae ʻi he taimi ʻe niʻihi naʻe ʻikai ke u maʻu ʻa e ʻofa moʻoní ʻi hoku lotó ʻi he taimi ke mau feohi ai mo e niʻihi kehé.

Naʻá ku siofi ʻa e kiʻi polosi vali ʻi hoku nimá ʻi he pō ko iá he temipalé mou fehuʻi kiate au, “Ko e hā ʻa e fanga kiʻi avaava ʻi heʻeku moʻuí ʻoku fie maʻu ha tokanga lahi ange ki ai?” Naʻá ku tukupā ai te u feinga mālohi ange ke ʻoua naʻa tuku ke nau ʻuli, kae ʻikai ke toutou palani maʻu pē ke fakamaʻa ʻa e ngaahi feituʻu heʻeku moʻuí naʻe fie maʻu ke tokangaʻí.

ʻOku ou manatuʻi e lēsoni heʻeku fakamaʻa ʻa e temipalé ʻi he taimi kotoa pē ʻoku fakamanatu mai ai ke tauhi kitautolu ke “taʻe hano mele mei māmaní” (Sēmisi 1:27).