Mei he Malaʻe Ngāue Fakafaifekaú
Ko ha Palōmesi mo ha Lotu
ʻOku maʻu ʻe he Tohi ʻa Molomoná ʻa e mālohi ke tokoniʻi ha taha ʻokú ne fie ʻilo pe ʻoku moʻoni.
Ko e meʻa ʻoku ou fakatumutumu ai ʻi he Tohi ʻa Molomoná ko e liliu maʻongoʻonga mo taʻengata te ne lava ʻo fakatupu ʻi he kakaí ʻo aʻu ai pē ki he taimi ki muʻa pea nau toki hoko ko ha kāingalotu ʻo e Siasí. ʻI heʻeku hoko ko ha faifekau he Misiona Mekisikou Kuanavatá, naʻá ku sio tonu ai ʻi he liliu maʻongoʻongá ni.
Ko hoku māhina ʻaki pē ia hono ono ʻi he ngāue fakafaifekaú, kuo fakaongoongoleleiʻi mai ʻe ha mēmipa ʻo e koló ha fefine taʻu 20 mo hono fāmilí, ke u akoʻi mo hoku hoá. Naʻe ʻikai ke mahino ki he fefine kei talavoú ni pe ko e hā ʻoku tui ki ai ʻa e Kau Māʻoniʻoni ʻi he Ngaahi ʻAho Kimui Ní peá ne fai mai ha ngaahi fehuʻi lahi. Ne ma ʻoange ki ai ʻa e Tohi ʻa Molomoná, ʻi heʻema ʻilo ʻoku tali ʻe he tohí ʻa e ngaahi fehuʻi kotoa ʻo e lotó, mo fakamatalaʻi ange ʻa e talaʻofa ʻoku ʻi ai fekauʻaki mo e lotu fakamātoato ke ʻilo pe ʻoku moʻoní.
Naʻe maʻulotu ʻi ha uike ʻe tolu, peá ma kei ʻaʻahi pē ki ai. Naʻe ʻikai ke ma ʻilo kuó ne ʻosi fakahoko ha sitepu mahuʻinga: kuo ʻosi lotu ia fekauʻaki mo e Tohi ʻa Molomoná. Lolotonga ha lēsoni ʻe taha, naʻá ne fakamatalaʻi mai ai e meʻa ne hoko ki aí. Naʻe fakakaukau lahi fekauʻaki mo e ngaahi lēsoni ne ma fakamatalaʻí, pea loto ia ke lotu pē ʻiate ia. Naʻe tūʻulutui ai ʻo kole ki he ʻOtuá pe ʻoku moʻoni ʻa e Tohi ʻa Molomoná. Naʻe hanga ʻe he nonga naʻá ne maʻu ʻi he ʻosi ʻene lotú ʻo fakalotolahiʻi ia ke ne lau ke lahi ange ʻa e tohí. Lolotonga ʻene laú, naʻá ne ongoʻi hono nofoʻia ia ʻe he Laumālié.
Naʻá ne talamai ʻi heʻene fakamatalaʻi e meʻa naʻá ne fouá, “Naʻá ku ongoʻi makehe ange ʻi ha toe taimi ki muʻa. Naʻe ʻi ai ha faʻahinga meʻa naʻá ne kamata ke fakafonu ʻa e ngaahi potu ʻatā kotoa heʻeku moʻuí ʻo ʻikai ha toe feituʻu ʻe ʻatā. Naʻá ku ongoʻi mātuʻaki fiefia ʻou kamata ke tangi. Naʻe ʻikai ke u lava ʻo tui ki he meʻa ne u ongoʻí, ka naʻá ku ʻilo kuo tali mai heʻeku Tamai Hēvaní ʻeku lotú, ʻokú Ne ʻafioʻi au, pea ʻoku feʻunga ʻEne ʻofa kiate aú ke fanongo mai ai mo tali ʻeku lotú.”
Naʻá ku ongoʻi ha fiefia lahi ʻi hoku lotó ʻi he taimi naʻá ne fakamatalaʻi mai ai ʻa ʻene aʻusiá. Naʻá ku ʻilo kuó u ʻi ha potu toputapu he meʻá ni. Naʻe fakamahinoʻi mai ʻe he Laumālie Māʻoniʻoní kiate au naʻe moʻoni ʻene fakamatalá. Naʻe fakamanatuʻi mai ʻe heʻene fakamoʻoní kiate au ʻa e ʻofa maʻongoʻonga ʻoku maʻu heʻetau Tamai Hēvaní kiate kitautolú; ʻoku lahi fau ʻEne ʻofa ʻiate kitautolú ʻo Ne foaki mai ai ʻa e Tohi ʻa Molomoná ko ha meʻangāue ke ʻilo ai Ia mo ʻEne moʻoní. Ko e taimi ʻoku tau talangofua ai ki he ngaahi tefitoʻi moʻoni ʻoku ʻi he Tohi ʻa Molomoná, ʻe liliu leva ʻetau moʻuí.
ʻOku ou kei manatuʻi pē ʻa e fakaʻosinga ʻo e lēsoni ko iá. Naʻe ʻeke mai ʻe he fefiné, “Ko e hā leva ʻe hoko he taimi ní, ʻi heʻeku ʻilo ʻoku moʻoni e Tohi ʻa Molomoná?”
Ne ma tali ange, “Papitaiso.”
Ko ʻene talí naʻe nounou ka naʻá ne fakasino mai ʻa e mālohi mo e mahino ʻo ʻene fakamoʻoní: “Ta te u papitaiso leva.”
ʻOku maʻu ʻe he Tohi ʻa Molomoná ʻa e mālohi ke tokoniʻi kitautolu ke tau maʻu ʻa e fiefiá mo e nongá. Ko e taimi ʻoku tau lau ai iá, te tau fakatupulaki ha loto moʻoni ke moʻui ʻaki ʻa e ongoongolelei ʻo Sīsū Kalaisí, ʻo hangē ko e loto moʻoni ʻo e fefiné ni ke muimui ki he sīpinga ʻa e Fakamoʻuí ki he vai ʻo e papitaisó.
Tā fakatātaaʻi ʻe Kathleen Peterson