Ko Hono ʻOmi ʻo e Palaimelí ki ʻApi
ʻOku ou Fili ki he Totonú ʻi Heʻeku Moʻuiʻaki ʻa e Ngaahi Tefitoʻi Moʻoni ʻo e Ongoongoleleí
ʻE lava ke ke fakaʻaongaʻi e lēsoni mo e ʻekitivitī ko ʻení ke lahi ange ai hoʻo ʻilo ki he kaveinga ʻa e Palaimelí ki he māhina ní.
ʻOkú ke lava ʻo fakakaukau atu ki haʻo ʻalu ʻo ngāue fakafaifekau kae ʻikai ke ke ʻiloʻi pe te ke foki mai ʻafē ki ho fāmilí? Ko e hā e ongo ʻokú ke maʻú? Ko e hā te ke fai ke ke mateuteu ai?
Naʻe ō ʻa e ngaahi foha ʻe toko fā ʻo e Tuʻi ko Mōsaiá—ʻa ʻĀmoni, ʻĒlone, ʻOminea, pea mo Himinai—pea mo honau kaungāmeʻa ko ʻAlamaá ʻo ngāue fakafaifekau ʻi ha taʻu ʻe 14. Naʻe mei hoko ha taha pē ʻi he ngaahi foha ʻo Mōsaiá ko ha tuʻi ʻo honau fonuá, ka naʻa nau muimui ʻi honau lotó. Ne nau ului mo ʻAlamā ki he ongoongolelei ʻo Sīsū Kalaisí, pea nau loto ke vahevahe ʻa e ongoongoleleí mo e kakai Leimaná, ʻa honau filí.
Naʻe ʻilo ʻe he kau talavoú ni he ʻikai ke nau lava ʻo fakahoko ʻenau ngāue fakafaifekaú taʻe kau ai e mālohi mei he ʻOtuá. ʻOku fakamalataʻi ʻe he ʻAlamā 17:2–3 ʻa e founga ne nau maʻu ai ʻa e mālohi ko ʻení: “Naʻa nau fakatotolo faivelenga ‘i he ngaahi folofolá, koeʻuhí ke nau ‘iloʻi ‘a e folofola ‘a e ‘Otuá. … Naʻa nau faʻa lotu mo ʻaukai lahi; ko ia naʻa nau maʻu ʻa e mālohi ʻo e kikité, pea mo e laumālie ʻo e fakahaá, pea ʻo ka naú ka akonaki ʻoku nau akonaki ʻi he mālohi mo e mafai mei he ʻOtuá.”
Naʻe tokoni ʻa e ʻaukaí mo e lotú ki he kau talavoú ni ʻo nau maʻu ʻa e ngaahi tāpuakí mei he ʻOtuá. Te ke lava ʻo ʻaukai mo lotu, hangē ko ʻAlamā mo e ngaahi foha ʻo Mōsaiá, ke teuteu ke maʻu e ngaahi tāpuaki kuo teu ʻe he Tamai Hēvaní maʻaú.
Toʻohemá: tā fakatātaaʻi ʻe Paul Mann; laló: tā fakatātaaʻi ʻe Richard Hull © IRI; toʻomataʻú: tā fakatātaaʻi ʻe Brian Bean