Te ke Fai Hoʻo Fakamoʻoní?

Laleina Hingisoni, ʻInitiana, USA

Naʻá ku maʻu ki muí ha faingamālie ke maʻu houalotu sākalamēniti ʻi ha siteiti ʻe taha fakataha mo ha kāingalotu ʻo e Siasí naʻe ʻikai ke mau maheni. Naʻá ku ʻeke ange ki he tangata naʻe tangutu hoko mai kiate aú pe ʻoku palani ke fai ʻene fakamoʻoní ʻo ka hokosia e taimí, ko e feinga pē ke fakapōtalanoa ki ai. Talamai ʻe ia ʻio peá ne ʻeke mai, “Fēfē koe?”

Naʻá ku tali ange, “ʻIkai, mahalo pē ʻikai.” Peá u toe pehē ange, “Ka ʻoku moʻoni ʻa e Siasí, pea ʻoku moʻoni mo e ongoongoleleí.”

Naʻe ʻikai fuoloa kuo ngalo ʻema kiʻi pōtalanoá. Ko e taimi naʻe hoko ai e faingamālie ke kamata e ngaahi fakamoʻoní, naʻe poupou mai ke fakanounouʻi pē homau taimí kae maʻu ʻe ha tokolahi ha faingamālie ke fai ʻenau fakamoʻoní. Ko e taimi naʻe tuʻu ai e tangata naʻá ma talanoá ke fai ʻene fakamoʻoní, naʻá ne fakamahino ʻoku ʻikai feʻunga e taimí ke fakahā ai e meʻa kotoa naʻá ne fie vahevahe fekauʻaki mo e ongoongoleleí pea mo e fiefia ʻokú ne ʻomaí. Ka, naʻá ne fakamatalaʻi ʻene pōtalanoa mo aú, ko ha taha naʻe toki fetaulaki pē mo ia, mo hono fālute ʻe ha kiʻi kupuʻi lea mahino e meʻa kotoa peé: ʻoku moʻoni ʻa e Siasí, pea ʻoku moʻoni mo e ongoongoleleí. Ko e meʻa ia ʻoku mahuʻingá.

ʻOku mahino ʻi heʻeku fakakaukau ki he meʻa ko iá, te tau lava ke fai ʻetau fakamoʻoní ʻi ha ngaahi founga kehekehe, pea ʻe lava ke tau maʻu ha mālohi lelei ki he kakai kehé ʻi ha kiʻi taimi nounou. Tatau ai pē pe ko e hā hano nounou ʻo ʻetau fetuʻutaki mo ha taha, te tau kei lava pē ke tuku ha ongo ʻoku lelei ʻo e ongoongoleleí pea mo kitautolu.

Naʻe ʻikai ke u fai ʻeku fakamoʻoní ʻi he tuʻunga malangá he ʻaho ko iá, ka naʻe fakahoko ʻeku kiʻi fakamoʻoni nounoú mo fakatou ongoʻi hoku mālohí ʻe he tangata naʻá ma talanoá pea mo kinautolu ne nau fanongo ki heʻene fakamoʻoní.