ʻOku ou Fie Huki ʻia Sīsū
ʻIkai fakahā ʻa e hingoá
Naʻe kei taʻu fā pē homa mokopuna tangatá ʻi hono fakaheka ia ʻe ha polisi he veʻe hala lahí. Talaange ʻe ia ko ʻene ʻalu ki he fale ʻo Kulenimaá, ʻoku maile ʻe nima (kilomita ʻe 8) hono mamaʻó.
Ko e tuʻo ua ʻaki ia ʻene hola mei he mamahi ʻi ʻapí, ko e feinga ke aʻu mai kiate au. Naʻe aʻu ʻo u fakatokangaʻi ʻi he ngaahi māhina siʻi ne hokó, ko e fatongia ki hono ohi hake hoku mokopuna tangatá mo hono ongo tuofāfine īkí ʻe ngali hilifaki mai ia ki hoku umá—ko ha fakakaukau naʻe ʻikai ke u tali lelei.
Naʻá ku fakahoko mo hoku husepānití ʻema lelei tahá ke ohi hake ʻema fānaú ʻaki e ngaahi tefitoʻi moʻoni ʻo e ongoongoleleí, ka naʻe iku pē ʻo nau siʻaki e ngaahi tefitoʻi moʻoni ko iá. Naʻá ku taʻu 50 tupu mou ongoʻi kuo fāifai peá u maʻu e totonu ke tulifua ki he ngaahi meʻa ʻoku ou manako aí. Naʻá ku mahuʻingaʻia he taumuʻa ne ma fokotuʻu mo hoku husepānití ke ma ngāue fakafaifekau fakataha ʻi haʻane maʻu vāhenga mālōlō. Ka ko e fakakaukau ʻo e ō ʻo fakatau mo e longaʻi fānau teʻeki akó, fokotuʻutuʻu ʻo e taimi kaí, fō ha falukunga fō ʻe lauiafé, pea toe hoko ha ʻaho ko ha faʻē ki ha kau taʻu hongofulu tupú, naʻá ne fakatupu ʻe ia ke u tangi.
Ka neongo ia, ne liliu hoku lotó ʻe ha meʻa ʻi ha hoʻatā efiafi ʻe taha. Naʻe fakalotomamahiʻi hoku kiʻi mokopuna tangatá ʻe ha kiʻi meʻa, pea naʻá ku hiki hake leva ia ʻo huki mo holoholoʻi hono loʻimatá. Ne ma talanoa ʻi heʻeku pukepuke iá, ʻo fekauʻaki mo e lahi ʻo e ʻofa ʻa Sīsū ki aí. Naʻá ku maʻu ha tohi māhina ʻo ha ngaahi tāvalivali ʻo e Fakamoʻuí ne ofi mai, ko ia ne ma vakai taha taha ki he ngaahi ʻīmisi fakaʻofoʻofá.
Naʻe tautautefito e tokanga hoku kiʻi mokopuna tangatá ki ha fakatātā ʻo e Fakamoʻuí ʻoku tangutu ʻi ha matapā hūʻanga maka mo ha kiʻi taʻahine louʻulu lanu kelo fakapōpōʻuli ʻi Hono fungá. Naʻe mahino ʻi he fakatātaá naʻe fakatou fakahoʻata atu ʻe he Fakamoʻuí mo e kiʻi taʻahiné ʻa e nongá. Naʻe sio fakamātoato pē hoku kiʻi mokopuna tangatá, tuhu ki he kiʻi taʻahiné, mo ui ia ʻaki e ʻuluaki hingoa hono tuofefiné.
ʻEke mai ʻe ia, “Kulenimā, ʻoku anga fēfē huki ʻa Keiti ʻia Sīsuú? ʻOku ou fie huki mo au ʻia Sīsū!”
Naʻá ku talaange, “ʻOfaʻanga, he ʻikai ke ke lava koe ʻo huki ʻia Sīsū he taimí ni, ka te ke lava ʻo huki ʻiate au. ʻOku foaki ʻe Sīsū ki he fānau valevalé haʻanau kui fefine ke ʻofaʻi mo pukepuke pea mo tokangaʻi kinautolu ʻi heʻenau fie maʻu iá.”
Fakafokifā pē kuo maʻu ʻe hoku lotó ha kahaʻu ʻo e ʻofa—ʻo hangē ko e ʻofa naʻe mei fai ʻe he Fakamoʻuí—ko ha kiʻi fānau ʻofeina ʻe toko tolu ʻoku nau fie maʻu au. Naʻe ʻikai ke nau kei hoko ko ha kavenga ka ko ha tāpuaki fakaʻofoʻofa mo ha faingamālie ke tokoni ki hotau ʻEikí.
Te u fakafetai taʻetūkua ʻi he ʻaloʻofa ongongofua ʻa e ʻEikí kuó ne foaki kiate au he hoʻatā efiafi ko iá. Naʻá ne liliu ʻeku moʻuí pea ʻokú ne kei fakamālohia mo tāpuakiʻi hoku ʻapí.