Kole ʻa e Siasí ki he Kāingalotú ke Mahino Muʻa Kiate Kinautolu ʻa e Ngaahi Tuʻutuʻuni ʻo e Hisitōlia Fakafāmilí
ʻOku kole ʻa e kau taki ʻo e Siasí ki he Kāingalotu ʻo e Ngaahi ʻAho Kimui Ní ke nau ako mo ʻai ke mahino lelei ʻa e ngaahi tuʻutuʻuni ki he hisitōlia fakafāmili ʻa e Siasí fekauʻaki mo hono fakahū ʻo e ngaahi hingoá ki he ngaahi ouau fakatemipalé.
Naʻe pehē ʻe Tenisi C. Pilimiholo (Dennis C. Brimhall), ko e talēkita pule ʻo e Potungāue Hisitōlia Fakafāmili ʻa e Siasí, ko e ngaahi tuʻunga ki hono fakaʻaongaʻi ʻo e uepisaiti ko e New.FamilySearch.org naʻe fokotuʻu ia “ʻi he ngaahi ʻuhinga ʻo e fakakaukau lelei, ngaahi ʻuhinga fakatokāteline, pea mo e ngaahi ʻuhinga ʻo e fakaʻapaʻapa.”
Ko e ngaahi tuʻungá ʻoku faingofua mo hangatonu. ʻOku pehē ʻe he tuʻutuʻuní kuo pau ke tali ʻe kinautolu kotoa ʻoku nau fakaʻaongaʻí, ʻi he taimi kotoa pē te nau fetuʻutaki ai ki he uepisaití, “ʻOku ʻikai totonu ke fakahū ʻe kinautolu ʻoku nau fakaʻaongaʻí ha ngaahi hingoa ʻo ha kakai ʻoku ʻikai ke nau kāinga ki he ngaahi ouau fakafofonga ʻo e temipalé, kau ai e ngaahi hingoa ʻo ha kakai ʻiloa pe manakoa, pe ko ē ʻoku tānaki mei ha ngaahi ngāue toʻo-hingoa ʻoku teʻeki fakangofuá.”
Ko hono toe fakamamafaʻi ʻo e ngaahi fakahinohinó, ʻa ia ʻoku toe fakamatalaʻi pē ʻi he Tohi Tuʻutuʻuni Fika 2, ʻo e Siasí ʻoku makatuʻunga ia ʻi hono maumauʻi kimuí ni mai ʻo e tuʻutuʻuni ki he papitaiso fakafofonga ʻo e Siasí.
Naʻe pehē ʻe Misa Pilimiholo, “Ko e taha e ngaahi meʻa ʻoku fie maʻu ke tau manatuʻí ko e fakatotolo ko ia hotau fāmilí mo e teuteu ʻo e ngaahi hingoá ki he ngāue ʻe fakahoko ʻi he temipalé, ʻio, ko ha fatongia, ka ko ha toe faingamālie foki. ʻOku foaki ʻa e faingamālie ko iá ki he kāingalotú ʻe kinautolu ʻoku nau maʻu ʻa e kī ki he ngāué. Ko e kī ki he ngāué ni ʻoku ʻi he Kau Palesitenisī ʻUluaki ia ʻo e Siasí.”
Kuo kole ai ʻa e kau taki ʻo e Siasí ki he kāingalotu ʻoku nau fakahū ha ngaahi hingoa ki he papitaiso fakafofonga ʻo e kau pekiá ke:
-
Ngāue pē ki honau fāmili totonú.
-
ʻOua ʻe fakahū mai e ngaahi hingoa ʻo e kakai ongoongoa pe ʻiloá.
-
ʻOua ʻe fakahū mai ha ngaahi hingoa ʻo ha ngaahi kulupu ʻoku ʻikai fakamafaiʻi, hangē ko e kakai Siu naʻe tōtau he ngaahi loki kasa ʻi Siamané.
Naʻe ʻoatu ʻe he kau taki ʻo e Siasí ha fanongonongo he ʻaho 21 ʻo Fēpueli 2012, ko e tali ki ha ngaahi fehuʻi fekauʻaki mo hono maumauʻi e tuʻutuʻuni faka-Siasi naʻe fokotuʻu ʻi he 1995, hili hano aleaʻi mo e kau taki ʻo e tui lotu faka-Siú.
Naʻe toe fakaongo atu ʻe he fanongonongó ʻa e tukupā mamafa ʻa e Siasí ke ʻoua naʻa tali e ngaahi hingoa ʻo ha ngaahi kulupu kuo teʻeki fakamafaiʻí ki he papitaiso fakafofongá pea mo fakamahino ko e founga pē ke hao ai mei he ngaahi meʻa-maluʻi kuo ʻosi fokotuʻú, ko ha fakaʻaongaʻi ʻe he taha ʻokú ne fakahuú “ha founga taʻe-faitotonu mo kākā.”
He ʻikai ngata pē ha fakaiku e faʻahinga tōʻonga ko iá ki hano taʻofi fakataimi hono ngāue ʻaki ʻe he mēmipá ʻa e uepisaiti New.FamilySearch.org, ka ʻe lava foki ʻe he kau taki fakalotofonuá ke fakahoko ha tuʻutuʻuni fakatonutonu ʻi ha ngaahi meʻa ʻe niʻihi.
Naʻe pehē ʻe he fakamatalá, “ʻOku fakatupu loto mamahi ʻa e taimi ʻoku loto moʻoni ai ha taha ke ne maumauʻi ʻa e tuʻutuʻuni ʻo e Siasí mo ha faʻahinga meʻa ʻoku totonu ke mahino ko ha foaki ʻo makatuʻunga ʻi he ʻofa pea mo e fakaʻapaʻapa ʻo hoko ia ko ha tupuʻanga ʻo ha fetaʻemahinoʻaki.”
Naʻe pehē ʻe Misa Pilimiholo, “Te tau mātāʻia ha taimi ʻo e akó. Te tau toe fakamanatuʻi pē kiate kitautolu ʻa e ngaahi totonu, fatongia, kī mo e faingamālie pea mo Ia ʻoku ʻaʻana ʻa e ngāue ko ʻení pea mo e founga ke fakahoko aí mo ia ʻokú ne tatakí. Kapau te tau manatuʻi pē ia, ʻoku ou tui te tau lelei. … Te tau lava ʻo ʻai e polokalamá ke lelei ange ki he taha kotoa.”
Kuo kole ai ʻa e kau taki ʻo e Siasí ki he kāingalotu ʻoku nau fakahū mai e ngaahi hingoá ki he papitaiso maʻá e pekiá ke nau ngāue pē ki he laine ʻo honau fāmili tonú, ʻo ʻoua ʻe fakahū mai e hingoa ʻo e kakai ʻiloá, pea ʻoua ʻe fakahū mai e hingoa ʻo ha ngaahi kulupu kuo teʻeki fakamafaiʻi, ʻo hangē ko e kakai Siu ne Tōtau he ngaahi loki kasa ʻi Siamané.