Ngaahi Ongoongo Nounou Mei Māmani
Kole ‘a e Polokalama Fakaakeake mei he Maʻunimaá Ha Ngaahi Talanoa ‘o ha Fakaakeake mo e Moʻuí
‘I he teuteu ko ia ki ha uepisaiti ‘o e Polokalama Fakaakeake mei he Maʻunimaá (ARP) ke kamata he konga kimui ‘o e taʻu ní, ‘oku kole ai ‘e he Siasí ha ngaahi talanoa fakafoʻituitui ‘o ha fakaakeake mei he maʻunimaá.
‘Oku totonu ke ‘omai ‘e kinautolu te nau loto ke vahevahe ‘enau ngaahi talanoá ‘i ha ‘ī-meili ki he arp@ldschurch.org ‘a e ngaahi fakamatala ko ‘ení, ‘a ia he ‘ikai fakahāhā holo:
-
Hingoa kakató, taʻu motuʻá, tangata pe fefine
-
Laʻi tā ʻo ʻou (‘oku fie maʻu ka ‘oku ‘ikai ko ha me’a pau)
-
Ko hoʻo fekauʻaki mo e Siasí/tuʻunga mēmipá
-
Kiʻi fakamatala nounou ki hono maʻunimā koé pe maʻunimā ‘o ha taha ‘okú ke ‘ofa aí
-
Ko ha fakaʻilonga hoʻo loto fiemālie ke vahevahe hoʻo fakamatalá ‘i ha vitiō, leʻo, tohi fakamatalaʻi, pe kātoa kinautolu ‘i ‘olungá
-
Ko hoʻo fakamatalá. Fakakau ai e ngaahi nunuʻa hono maʻunimā koé (fakamolemole kae ‘oua ‘e fakamatalaʻi mai ha ngaahi fakaikiiki ‘oku ‘ikai tāú, ka ke fakamatala ki he uesia koe ‘e he ngaahi tōʻonga ‘o e maʻunimaá pea mo kinautolu ‘oku mou feohí); kiʻi fakamatala nounou ki hoʻo moʻuí ‘i he taimi naʻá ke ‘ilo ai ‘okú ke fie maʻu tokoní; fakamatala ki he founga hoʻo aʻusia e fakamoʻui ‘ia Kalaisí pea mo hoʻo ongó ‘i he taimi naʻe toe fakafoki atu ai hoʻo ‘amanaki leleí; pea mo ha kiʻi fakamatala ki hoʻo moʻuí he ‘ahó ni pea mo e ngaahi meʻa mahuʻinga mo e ngaahi tāpuaki kuó ke aʻusiá tuʻunga ‘i he fakamolemolé, fakatomalá, pea mo e tokoní.
Foaki ‘e he Kāingalotu ‘o e Siasí ‘i Fisí ha Tokoni ‘Ofa Fakaetangata ki he Kau Faingataʻaʻia he Tāfeá
Naʻe fakahoko ‘i Fēpueli ‘e he ngaahi siteiki ‘e tolu ‘i Suva, Fisí ha tānaki meʻakai, ngaahi nāunau fakaʻapi mo fakaako maʻá e kau faingataʻaʻia he tāfeá he fakatokelau pea mo e fakahihifo ‘o Fisí.
Naʻe tofanga ‘a Fisi ‘i ha ‘uha lōvai taʻetuku he konga kimuʻa ‘o e taʻú, ‘o tupu ai ha tāfea lahi pea holo ‘a e kelekelé ‘i he feituʻu fakahihifó mo e fakatokelaú. Naʻe iku ‘a e tāfeá ‘o mālōlō ai siʻa niʻihi pea pau ai ke hiki ha lauiafe mei honau ngaahi ‘apí.
‘I he taimi ne fuʻu mālohi ai ‘a e tāfeá ‘i he feituʻu fakahihifo mo e fakatokelau ‘o Fisí, ne fakaava leva ‘e he kau taki fakalotofonua ‘o e Siasí ‘a e ngaahi falelotú ke hoko ko ha ngaahi senitā hūfangaʻanga ki ai ‘a e kakai ne tuʻu honau ngaahi ‘apí ‘i he halanga ‘o e tāfeá.
Naʻe kamataʻi ‘e ‘Eletā Taniela Uakolo, ko e Fitungofulu Fakaʻēlia mo e Pule ‘o e Senitā Tokoni ‘o e Siasí ‘i Fisí, ‘a e tānaki tokoni ko ‘ení he ‘aho 6 ‘o Fēpuelí, hili pē ha taimi nounou mei hono fakahā ki he kau taki fakalotofonua ‘o e Siasí ‘a e tāfeá. Naʻe tānaki mo fakafaʻahinga ‘e he kāingalotú ‘a e meʻakaí, valá, nāunau mohengá, nāunau ki peitó, mo e ngaahi nāunau akó; pea toki tufa leva ‘a e ngaahi koloá ki he kakai naʻe tukuhāusiá.
Ke lau ʻo toe lahi ange ki he meʻá ni pea mo ha toe ngaahi fakamatala, kātaki ‘o ‘alu ki he news.lds.org.
‘I he teuteu ki ha uepisaiti foʻou, ‘oku kole ai heni ‘e kinautolu ‘oku nau tataki ‘a e Polokalama Fakaakeake mei he Maʻunimaá (‘oku hā heni ‘a e fakatahá) ha ngaahi talanoa fakafoʻituitui ‘o ha fakaakeake mei he maʻunimaá.
Faitaaʻi ‘e Rick Wallace